ពលរដ្ឋនៅកំពង់ឆ្នាំងចង់ឲ្យមានការប្រណាំងទូកក្នុងពិធីបុណ្យភ្ជុំ
2014.09.23
ចាស់ព្រឹទ្ធាចារ្យនិងប្រជាពលរដ្ឋក្នុងខេត្តកំពង់ឆ្នាំង ចង់ឲ្យមានការប្រណាំងទូកអុំនៅអំឡុងពេលនៃពិធីបុណ្យភ្ជុំបិណ្ឌឡើងវិញ បន្ទាប់ពីហាក់ខានជាង ១០ឆ្នាំមក។ ចំណែកអាជ្ញាធរខេត្តឆ្លើយតបថា ការប្រណាំងទូកអុំនឹងមានឡើងវិញនៅឆ្នាំក្រោយ ប៉ុន្តែនៅឆ្នាំនេះអាជ្ញាធរកំពុងប្រមូលឡើងវិញនូវទូកអុំពីតាមវត្ត និងឃុំមួយចំនួន ដើម្បីមកអុំសម និងអាចបញ្ជូនទៅអុំប្រណាំងថ្នាក់ជាតិនៅរាជធានីភ្នំពេញ ក្នុងឱកាសបុណ្យអុំទូក អកអំបុក និងសំពះព្រះខែខាងមុខ។
ពលរដ្ឋដែលខ្លះជាអតីតអ្នករៀបចំកម្មវិធីប្រណាំងទូកផងនោះឲ្យដឹងនៅថ្ងៃទី២៣ ខែកញ្ញា ថា កាលពីជាង ១០ឆ្នាំមុន ទូកអុំជិត ៤០គ្រឿង នៅស្រុកកំពង់លែង ស្រុកបរិបូរណ៍ ស្រុកកំពង់ត្រឡាច និងក្រុងកំពង់ឆ្នាំង នៃខេត្តកំពង់ឆ្នាំង តែងតែប្រណាំងគ្នានៅតាមមូលដ្ឋានរៀងៗខ្លួនយ៉ាងសប្បាយនៅអំឡុងពេលនៃពិធីបុណ្យភ្ជុំបិណ្ឌ ប៉ុន្តែបច្ចុប្បន្នបាត់បង់អស់គឺនៅតែប្រណាំងទូកម៉ាស៊ីនតិចតួច។
អតីតចៅសង្កាត់ផ្សារឆ្នាំង និងជាអ្នករៀបចំកម្មវិធីប្រណាំងទូកអុំកាលពីជាង ១០ឆ្នាំមុន លោក សុខ ឈឿង មានប្រសាសន៍ថា សម្រាប់ក្រុងកំពង់ឆ្នាំង គេតែងតែប្រណាំងទូកនៅទន្លេផ្សារក្រោម ហើយការប្រណាំងកាលណោះមិនដែលបានជ្រើសរើសរកអ្នកឈ្នះលេខ១ ដល់លេខ៣ ដើម្បីទៅប្រណាំងបន្តនៅរាជធានីភ្នំពេញឡើយ គឺគ្រាន់តែបានរង្វាន់ជានំអន្សម ឬរបស់របរខ្លះៗប៉ុណ្ណោះ។
លោកបន្តថា ការប្រណាំងទូកនៅក្នុងខេត្តបានបាត់បង់ជាបន្តបន្ទាប់ រហូតមកដល់បច្ចុប្បន្ននៅតែការប្រណាំងទូកម៉ាស៊ីនតូចៗ និងឆ្នាំខ្លះគ្មានប្រណាំងតែម្ដង៖ «គណៈកម្មការវត្តយាយទេពហ្នឹងមានចែកជាអន្សមតាមទូកចែកអន្សម អត់មានលុយអត់មានកាក់អីទេ មានតែចែកជាអន្សមចែកជាអី ហើយជួនកាលនឹងអំពៅទៅតាមអីចឹងទេ។ គេមានមេក្រូដាក់ស្រែកអីយ៉ាងម៉េចទេ? បាទ! មានមេក្រូស្រែកអ៊ីចឹងដែរ។ ទូកហ្នឹងមានតាមវែងតាមខ្លីទូកអុំហ្នឹងចំណុះ៤០នាក់អីបាទ»។
ចំណែកអ្នករត់ម៉ូតឌុប និងពលរដ្ឋរស់នៅម្ដុំផ្សារក្រោមថ្លែងបញ្ជាក់ថា ការបាត់បង់នូវការប្រណាំងទូកនេះ គឺដោយសារតែពុំមានការយកចិត្តទុកដាក់ពីអាជ្ញាធរ និងខ្វះការឧបត្ថម្ភពីសប្បុរសជន។ ពួកគេយល់ថា ដើម្បីឲ្យការប្រណាំងទូកអុំកើតមានឡើងវិញ និងរក្សាបានរហូតដល់ក្មេងជំនាន់ក្រោយនោះ គឺអាជ្ញាធរត្រូវតែលើកទឹកចិត្ត និងឧបត្ថម្ភដល់អ្នកអុំទូក ព្រមទាំងគិតគូរពីទីធ្លាប្រណាំងផងដែរ៖ «ច្រើនណាស់មនុស្សច្រើនណាស់! ខ្ញុំដើរតាំងពីមុខមកមនុស្សឡើងណែនត្រង់ហ្នឹងនែក កាលណឹងតាំងពីចៅហ្វាយខេត្តដូចជាស៊ូ ភារិន្ទ កាលណឹង ទេចង់៦ ទៅ៧ឆ្នាំហើយបាត់ណា។ ចំពោះចិត្តខ្ញុំវិញចង់ឲ្យមានការប្រណាំងទូកពីព្រោះវាជាប្រណីរបស់ខ្មែរយើងកាលណាបើយើងមិនធ្វើនៅពេលបុណ្យភ្ជុំអីចឹងមិនអុំទូកជាតំណាងអីចឹង យូរៗអាចបាត់បង់កូនខ្មែរមួយៗចេះតែចង់បានមើលតៗគ្នាអីចឹងបងណា»។
ឆ្លើយតបនឹងការលើកឡើងនេះ អភិបាលរងទទួលបន្ទុករៀបចំបុណ្យជាតិ និងអន្តរជាតិខេត្តកំពង់ឆ្នាំង លោក សៀត គឹមលៀង មានប្រសាសន៍ថា នៅអំឡុងពេលនៃពិធីបុណ្យភ្ជុំបិណ្ឌឆ្នាំនេះ ពុំមានការប្រណាំងទូកនៅក្នុងខេត្តនោះទេ ប៉ុន្តែអាជ្ញាធរកំពុងផ្សព្វផ្សាយព័ត៌មានទាក់ទងនឹងការប្រណាំងអុំទូកថ្នាក់ជាតិ ហើយបច្ចុប្បន្នប្រមូលទូកបានចំនួន ២០គ្រឿងហើយ ដើម្បីយកទៅអុំសមនៅវត្ដកំពង់ត្រឡាចក្រោម ស្ថិតនៅស្រុកកំពង់ត្រឡាច មុននឹងជ្រើសរើសយកទៅប្រណាំងនៅរាជធានីភ្នំពេញ។ លោកបន្តថា នៅឆ្នាំក្រោយៗអាជ្ញាធរនឹងរៀបចំឲ្យមានពិធីប្រណាំងទូកឡើងវិញ៖ «ឆ្នាំនេះយើងមិនអាចដំណើរការបានរបៀបថា ជាពិធីអីឲ្យត្រឹមត្រូវទេយើងបានត្រឹមកម្រិតថា គាត់សប្បាយរីករាយការឲ្យគាត់មានការប្រយ័ត្នអីហ្នឹងណា។ ភាគច្រើនពួកគាត់លេងគប់កំប្លោកគ្នា គាត់ប្រណាំងគ្នាខ្លាំងពេក ហើយទូកវាច្រើនជួនកាលវាប៉ះគ្នាណាអីចឹងយើងឲ្យគាត់ប្រុងប្រយ័ត្នធ្វើម៉េចមានអាវសុវត្ថិភាពធ្វើម៉េចឲ្យគាត់មានអ្នកចេះហែលទឹកពិតប្រាកដកុំឲ្យយកក្មេងក្មាងទៅជាមួយអីចឹងយើងបានណែនាំគាត់ហើយ»។
បច្ចុប្បន្ននៅមុខវត្តយាយទេព និងផ្នែកខ្លះនៃផ្ទៃទឹកទន្លេផ្សារក្រោមមានទីធ្លាចង្អៀតដោយមានផ្ទះពលរដ្ឋវៀតណាម កន្លែងលក់ដូរ និងមានដេប៉ូឈើជាច្រើននៅទីតាំងនោះ។ ប្រសិនបើអាជ្ញាធរចាប់ផ្ដើមបង្កើតឲ្យមានពិធីប្រណាំងទូកអុំឡើងវិញ គឺអាចប្រឈមនឹងបញ្ហាទីធ្លាប្រណាំង និងអ្នកទស្សនា៕