ពលរដ្ឋនៅខេត្តឧត្តរមានជ័យចោទក្រុមហ៊ុនចិនថាធ្វើអោយខូចផ្លូវ
2016.06.28
ក្រុមហ៊ុនចិន មួយដែលកំពុងធ្វើផ្លូវក្រវាត់នៅតាមបន្ទាត់ព្រំដែនខ្មែរ-ថៃ បានធ្វើឱ្យខូចខាតផ្លូវលំឆ្លងកាត់ភូមិរបស់ប្រជាពលរដ្ឋខ្លះនៅខេត្តឧត្តរមានជ័យ ក្នុងរដូវវស្សាដែលមានភ្លៀងធ្លាក់នេះ។
ក្រុមហ៊ុនចិន ដែលអ្នកភូមិមិនស្គាល់ឈ្មោះកំពុងតែអនុវត្តគម្រោងសាងសង់ផ្លូវថ្នល់របស់រដ្ឋាភិបាលដែលត្រូវការធ្វើនៅតាមបន្ទាត់ព្រំដែនខ្មែរ-ថៃ ចម្ងាយច្រើនរយគីឡូម៉ែត្រ ចាប់ពីខេត្តព្រះវិហារ រហូតទៅដល់ខេត្តបន្ទាយមានជ័យ។
ប្រជាពលរដ្ឋមួយចំនួននៅសង្កាត់បន្សាយរក្ស ក្រុងសំរោង សំដែងការមិនសប្បាយចិត្តចំពោះក្រុមហ៊ុនចិន មួយថា កំពុងប្រើរថយន្តធំៗដឹកជញ្ជូនថ្មឆ្លងកាត់តំបន់ដែលពួកគេរស់នៅហើយបំផ្លាញផ្លូវលំឱ្យខូចខាតយ៉ាងធ្ងន់ធ្ងរ។ ក្រុមអ្នកភូមិទាំងនោះអំពាវនាវសុំឱ្យអាជ្ញាធររដ្ឋាភិបាលជួយចាត់វិធានការទប់ស្កាត់រថយន្តធំៗរបស់ក្រុមហ៊ុនចិន ទាំងនោះ កុំឱ្យបើកបរបំផ្លាញផ្លូវលំឆ្លងកាត់ភូមិរបស់គេតទៅទៀត។
បុរសអ្នកភូមិអូរបាត់ដាវ ម្នាក់ ក្នុងចំណោមពលរដ្ឋជាច្រើនទៀតដែលសុំមិនបញ្ចេញឈ្មោះមានប្រសាសន៍នៅរសៀលថ្ងៃអង្គារ ទី២៨ ខែមិថុនា ថា បច្ចុប្បន្នក្រុមហ៊ុនចិន ដែលគាត់មិនស្គាល់ឈ្មោះបានប្រើរថយន្តធំៗជាច្រើនគ្រឿងដឹកជញ្ជូនថ្មភ្នំ ឆ្លងកាត់តាមផ្លូវលំនៃភូមិរបស់គាត់ធ្វើឱ្យផ្លូវស្រុត និងផុលជាច្រើនកន្លែង។ បុរសដដែលបញ្ជាក់ថា រយៈពេល ៣-៤ថ្ងៃមកនេះ នៅពេលដែលមានភ្លៀងធ្លាក់គឺប្រជាពលរដ្ឋពិបាកធ្វើដំណើរ ដូចជាបើកម៉ូតូរអិល ឯឡានតូចៗត្រូវស្លុះជាប់ផុងជាដើម៖ «សូមអំពាវនាវឱ្យរដ្ឋាភិបាលជួយទប់ស្កាត់យ៉ាងណាកុំឱ្យឡានចិន បើកបរពេលដែលកំពុងធ្លាក់ភ្លៀង។ អាពេលភ្លៀងប៉ុន្មានថ្ងៃ ឡានក្រុមហ៊ុនចិន សម្រុកដឹកថ្មមក ឥឡូវខ្ទេចខ្ទីអស់ផ្លូវ»។
ប្រភពពីប្រជាពលរដ្ឋឱ្យដឹងថា ពេលបច្ចុប្បន្ន គឺប្រជាពលរដ្ឋច្រើនរយគ្រួសារក្នុងភូមិចំនួន៤ នៃសង្កាត់បន្សាយរក្ស កំពុងទទួលរងការប៉ះពាល់ដោយសារផ្លូវខូចខាត ពិបាកធ្វើដំណើរ។
ភូមិទាំង៤នោះ មានភូមិអូរបាត់ដាវ ភូមិបន្សាយរក្ស ភូមិតាវ៉ាន និងភូមិត្រពាំងត្រាវ ជាដើម។
ចៅសង្កាត់បន្សាយរក្ស លោក ហែម សេដា ទទួលស្គាល់ថា ក្រុមហ៊ុនចិន ដែលធ្វើផ្លូវក្រវាត់តាមព្រំដែនខ្មែរ-ថៃ ពិតជាកំពុងធ្វើឱ្យខូចខាតផ្លូវលំក្រាលក្រួសក្រហម នៅក្នុងសង្កាត់របស់លោកនោះមែន។ លោកចៅសង្កាត់បញ្ជាក់ថា ក្រុមហ៊ុននោះបានធ្វើផ្លូវក្រវាត់តាមបណ្ដោយព្រំដែន ក៏ប៉ុន្តែបានប្រើរថយន្តធំៗដឹកថ្ម មិនដឹងយកមកពីណាឆ្លងកាត់ផ្លូវលំបណ្ដាលឱ្យខូចខាត និងមានគ្រលុកធំៗ ហើយលោកគ្មានមធ្យោបាយណាការពារផ្លូវនោះបានទេ៖ «ប្រសិនបើគាត់ដឹកជញ្ជូនក៏ដឹកទៅចុះ ប៉ុន្តែឱ្យជួយដឹកដីចាក់ផ្លូវខូចខាតអីខ្លះមក ក៏ប៉ុន្តែពិបាកនិយាយគ្នាណាស់ ពីព្រោះក្រុមហ៊ុននោះមិនមានអ្នកបកប្រែភាសាឱ្យស្ដាប់គ្នាបានសោះ»។
ទោះជាយ៉ាងណាវិទ្យុអាស៊ីសេរី មិនអាចទាក់ទងអភិបាលក្រុងសំរោង លោក អ៊ុន សុភក្ត្រ ដើម្បីសុំការអធិប្បាយជុំវិញរឿងនេះបានថាយ៉ាងណានៅឡើយ នៅថ្ងៃទី២៨ ខែមិថុនា ដោយសារតែលោកមិនទទួលទូរស័ព្ទ។
អ្នកសម្របសម្រួលសមាគមការពារសិទ្ធិមនុស្សអាដហុក (ADHOC) ខេត្តឧត្តរមានជ័យ លោក ស្រី ណារ៉េន មានប្រសាសន៍ថា អ្នកភូមិខ្លះបានទូរស័ព្ទមកប្ដឹងរូបលោកជុំវិញរឿងដែលក្រុមហ៊ុនចិន បើករថយន្តធំៗដឹកជញ្ជូនថ្មបណ្ដាលឱ្យខូចផ្លូវលំនោះ។
លោក ស្រី ណារ៉េន បញ្ជាក់ថា ក្រុមហ៊ុនចិននោះ មិនត្រឹមតែបើកឡានធំៗបណ្ដាលឱ្យខូចផ្លូវប៉ុណ្ណោះទេ គឺកន្លែងខ្លះបានទាំងប្រើគ្រឿងចក្រជីកដីកម្មសិទ្ធិរបស់ប្រជាពលរដ្ឋដើម្បីយកអាចម៍ដីទៅប្រើប្រាស់ដោយមិនបានសុំម្ចាស់ដី ព្រមទាំងមិនដោះស្រាយការប៉ះពាល់ទៀតផង៕