កម្មករចំនួន ៤រោងចក្រ ធ្វើកូដកម្មទាមទារប្រាក់បំណាច់ឆ្នាំ
2019.01.01
មេដឹកនាំសហជីព ឲ្យដឹងថា យ៉ាងហោចណាស់ មានកម្មករចំនួន ៤រោងចក្រ កំពុងនាំគ្នាធ្វើកូដកម្មទាមទារប្រាក់បំណាច់ឆ្នាំ។
កម្មករប្រាប់ថា ពួកគេទាមទារប្រាក់បំណាច់ឆ្នាំ ដោយសារចាប់ពីឆ្នាំ២០១៩ ទៅរោងចក្រនឹងធ្វើកិច្ចសន្យាថ្មី ហើយនឹងចាប់ផ្ដើមអនុវត្តប្រាក់អតីតភាពការងារ ៦ខែម្ដង ដែលអាចធ្វើឲ្យបាត់បង់អតីតភាពការងារ នៅមុនឆ្នាំ២០១៩។
កម្មកររោងចក្រ សេឌូណូ អ៊ីនវេសស្មេន (Seduno Investment (Cambo) fashion Co. Ltd. ) ស្ថិតនៅភូមិខ្វារ ខណ្ឌដង្កោ រាជធានីភ្នំពេញម្នាក់ គឺអ្នកស្រី ខិ សុហៀង ប្រាប់ថា ក្រុមកម្មករបាននាំគ្នាធ្វើកូដកម្មតាំងពីថ្ងៃទី២៦ ធ្នូមក មិនទាន់មានដំណោះស្រាយទេ។
អ្នកស្រីបញ្ជាក់ថា កម្មករទាមទារឲ្យថៅកែរោងចក្រទូទាត់ប្រាក់អតីតភាពការងារឲ្យពួកគេ ដោយសារតែថៅកែគ្រោងនឹងប្ដូរកិច្ចសន្យាថ្មី សម្រាប់ពួកគេ ដែលធ្វើឲ្យបាត់បង់ប្រយោជន៍អតីតភាពរបស់កម្មករ។
កម្មកររូបនេះ ឲ្យដឹងទៀតថា រោងចក្រ សេឌូណូ អ៊ីនវេសស្មេន មានកម្មករសរុបជាង ១ពាន់ ២រយនាក់ បានកូដកម្មបិទផ្លូវជាតិលេខ២ ម្ដង កាលពីថ្ងៃទី២៩ ធ្នូ ប៉ុន្តែរងការបង្ក្រាបពីកងកម្លាំងកងរាជអាវុធហត្ថ និងនគរបាលខណ្ឌដង្កោ ហើយនៅរសៀលថ្ងៃទី៣១ ធ្នូ អាជ្ញាធរបានកោះហៅកម្មករទាំងអស់ ចូលក្នុងរោងចក្រ ដើម្បីស្ដាប់ការសម្របសម្រួល៖ «ខណ្ឌដង្កោគាត់ឲ្យកម្មកររោងចក្រចូលមកទាំងអស់ក្នុងបរិវេនរោងចក្រនេះពួកគាត់និយាយថាឲ្យកម្មករចូលមកដើម្បីស្ដាប់ដីការរាយច្បាប់ការងារ អីនឹងបង។ វាដូចថា ២ ទៅ ៣ដងហើយឃើញថា វាដដែលៗ ភាគីរោងចក្រមិនព្រមចេញមុខដោះស្រាយឲ្យកម្មករសោះ ទំនាស់នឹងកើតឡើងដោយសារភាគីរោងចក្រនឹងមិនព្រមដោះស្រាយឲ្យ»។
នៅខេត្តតាកែវឯណោះវិញ កម្មករជាង ២.០០០នាក់ នៃរោងចក្រកាត់ដេរ សេឌូណូ ខេមបូ នីតធីង (Seduno Cambo Knitting Co. Ltd.) ក្នុងស្រុកបាទី ខេត្តតាកែវ បានបង្ហោះវីដេអូ បង្ហាញថា កាលពីថ្ងៃទី២៩ ធ្នូ កងកម្លាំងប្រដាប់ ដោយដំបង និងខែល ជាច្រើននាក់ ត្រូវបានដាក់ពង្រាយ តាមផ្លូវជាតិលេខ២ ដើម្បីបង្ក្រាប ប្រសិនបើកម្មករហ៊ានតវ៉ា បិទផ្លូវ។ កម្មករ បានស្រែកទ្រហោយំ ស្នើសុំឲ្យកងកម្លាំងកុំឲ្យវាយបង្ក្រាប និងរុញច្រានពួកគេ ព្រោះខ្លាចចូលឡានដែលកំពុងបើកបរ លើផ្លូវជាតិលេខ២។
ចំណែកកម្មករជិត ២ពាន់នាក់ នៃរោងចក្រ ដាប់ប៊ែលយូ អែន ឌី (W&D) នៅភូមិឫស្សី ខណ្ឌមានជ័យ រាជធានីភ្នំពេញ ដែលតវ៉ាទាមទារប្រាក់អតីតភាពការងារជាង ១សប្តាហ៍មកហើយ នៅថ្ងៃទី៣១ ធ្នូ បាននាំគ្នា យកញត្តិទៅដាក់នៅខុទ្ទកាល័យ លោក ហ៊ុន សែន មេដឹកនាំរបបក្រុងភ្នំពេញ នៅក្បែរដើមពោធិ៍មុខវត្តបទុមវតី។
មន្ត្រីចាំទទួលញត្តិនៅខុទ្ទកាល័យ លោក ហ៊ុន សែន គឺលោក គង់ ចំរើន ទទួលញត្តិពីក្រុមកម្មករ និងសន្យា ដូចមុនៗ ដែរថា នឹងបញ្ជូនញត្តិនោះ ឲ្យថ្នាក់លើពិនិត្យដើម្បីដោះស្រាយ។
ប្រធានសហភាពការងារកម្ពុជា លោក អាត់ ធន់ ប្រាប់អាស៊ីសេរីថា យ៉ាងហោចណាស់ មានកម្មករចំនួន ៤រោងចក្រ គឺនៅភ្នំពេញ ៣ និងនៅខេត្តតាកែវ ចំនួន ១ កំពុងធ្វើកូដកម្មទាមទារប្រាក់បំណាច់ ប្រចាំឆ្នាំនេះ។ លោក អាត់ ធន់ ថា មូលហេតុដែលកម្មករធ្វើកូដកម្មនេះ ដោយសារកន្លងមក និយោជក បានប្រើប្រាស់កិច្ចសន្យាមិនត្រឹមត្រូវ មានករណីខ្លះ និយោជកចង់បញ្ឈប់កម្មករ និងមានការប្ដូរកិច្ចសន្យាមុនឆ្នាំ២០១៩ ជាដើម។
លោក អាត់ ធន់ ថា តាមច្បាប់ស្ដីពីការងារ កម្មករត្រូវទទួលបានការទូទាត់ប្រាក់បំណាច់ នៅពេលក្រុមហ៊ុនបញ្ឈប់ ប៉ុន្តែតាមវិសោធនកម្មថ្មី បើទោះជាមិនទាន់បានបញ្ឈប់ក៏កម្មករត្រូវទទួលបានប្រាក់អតីតភាពការងារ រាល់ ៦ខែម្ដង ចាប់ពីឆ្នាំ២០១៩ តទៅ៖ «យើងស្នើរដែរយើងស្នើរឲ្យក្រសួងបញ្ចប់កិច្ចសន្យាការងារអាចាស់ទៅក៏ប៉ុន្តែក្រសួងអត់អាចអនុញ្ញាតបានដោយសារនិយោជកគេថា ទៅអត់រួចទេ ព្រោះលុយច្រើនពេក ក៏ប៉ុន្តែក្នុងករណីដែរកម្មករឧទាហរណ៍គាត់ទើបធ្វើការបាន ១ឆ្នាំទៅ ២ឆ្នាំអី គាត់ខ្ជិលរញ៉េរញ៉ៃគាត់ឲ្យអត់មានបញ្ហាទេ ព្រោះយើងខ្លាចតែគេមិនឲ្យទេ ទើបអាចមានបញ្ហាបាទ។
អាស៊ីសេរីមិនអាចសុំការអធិប្បាយពីអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ លោក ហេង សួរ បានទេ នៅថ្ងៃទី៣១ ធ្នូ។ ប៉ុន្តែ លោក ហេង សួរ ប្រាប់សារព័ត៌មានក្នុងស្រុកថា បាតុកម្មរបស់កម្មករទាមទារប្រាក់បំណាច់ប្រចាំឆ្នាំ អាចមានការញុះញង់នៅពីក្រោយ ដោយសារកម្មករមិនទាន់យល់ច្បាស់ ពីគោលការណ៍នៃការបើកប្រាក់អតីតភាពការងារ ដែលនឹងចាប់អនុវត្តពីឆ្នាំ២០១៩ តទៅ។ លោក ហេង សួរ អះអាងថា បើទោះច្បាប់ថ្មី ចូលជាធរមានក៏ដោយ ថៅកែរោងចក្រនៅតែមានតួនាទីទូទាត់ប្រាក់អតីតភាពការងារជូនកម្មករដដែល ហើយអ្នកនាំពាក្យរូបនេះ អះអាងទៀត ថា របបក្រុងភ្នំពេញ ធានាមិនឲ្យកម្មករណាម្នាក់បាត់បង់អត្ថប្រយោជន៍ ដោយសារតែក្រុមហ៊ុនក្ស័យធនឡើយ។
កាលពីថ្ងៃទី២៨ ធ្នូ ក្រសួងការងារ និងបណ្ដុះបណ្ដាលវិជ្ជាជីវៈ ចេញសេចក្ដីប្រកាសថា កម្មករនិយោជិក ដែលកំពុងប្រើប្រាស់កិច្ចសន្យាការងារមានថេរវេលាមិនកំណត់ (កិច្ចសន្យាប្រភេទយូរ) នឹងទទួលបានការទូទាត់ប្រាក់អតីតភាព ការងារ ១ឆ្នាំ ២ដង គឺនៅខែមិថុនា និងខែធ្នូ។ ក្រសួងការងារ នឹងធានាផលប្រយោជន៍ស្របច្បាប់ ចំពោះកម្មករ និយោជិក ធ្វើការងារនៅសហគ្រាស ដែលក្ស័យធន ឬបិទទ្វារមិនបានទូទាត់ប្រាក់អតីតភាពការងារ។
អ្នកសម្របសម្រួលនៃមជ្ឈមណ្ឌលច្បាប់ និងការងារ ហៅកាត់ថា អង្គការសង់ត្រាល់ លោក ឃុន ថារ៉ូ ថា ការផ្ទុះការតវ៉ារបស់កម្មករទាមទារប្រាក់បំណាច់ប្រចាំឆ្នាំ កើតឡើងក្រោយពេល ច្បាប់ស្ដីពីការងារ ត្រូវបានធ្វើវិសោធនកម្ម។ សង្គមស៊ីវិលរូបនេះ យល់ថា វិសោធនកម្មច្បាប់ការងារ ជាចំណុចវិជ្ជមានមួយ ដែលកម្មករអាចមានការធានាថា ប្រាក់អតីតភាពការងារ ត្រូវបានបង់រំលោះដោយនិយោជក ហើយកម្មករដែលមានប្រភេទកិច្ចសន្យាមានថិរវេលាមិនកំណត់ ក៏អាចទទួលបានប្រាក់អតីតភាពការងារប្រហាក់ប្រហែលគ្នាទៅនឹងកម្មករប្រភេទកិច្ចសន្យាខ្លីៗ ដែរ។ ប៉ុន្តែ អ្វីដែលសំខាន់ គឺការផ្សព្វផ្សាយឲ្យបានទូលាយអំពីច្បាប់ និងប្រកាសក្រសួង ជាពិសេសរូបមន្តនៃការទូទាត់ ត្រូវចៀសវាងការកិបកេងប្រាក់អតីតភាពរបស់កម្មករ៕