សហជីពថា ការដោះស្រាយវិវាទការងារក្រុមហ៊ុនណាហ្គាវើលដ៍នៅក្រសួងការងារមិនមានលទ្ធផលសាច់ការទេ
2021.12.24
សហជីពលើកឡើងថា ការដោះស្រាយវិវាទការងារក្រុមហ៊ុនណាហ្គា វើលដ៍ (Naga World) នៅក្រសួងការងារ កាលពីពេលថ្មីៗ នេះ គឺមិនទទួលបានលទ្ធផលផ្លែផ្កាណាមួយឡើយ ព្រោះភាគីក្រុមហ៊ុនមិនបានចូលរួមដោះស្រាយទេ។ សង្គមស៊ីវិលយល់ថា ក្រសួងការងារមានសមត្ថកិច្ចគ្រប់គ្រាន់ ដើម្បីបង្ខំឲ្យភាគីក្រុមហ៊ុនដោះស្រាយបញ្ចប់វិវាទការងារនេះ ស្របតាមច្បាប់ស្ដីការងាររបស់កម្ពុជា។
ជម្លោះការងាររវាងកម្មករនិយោជិតជាង ៣រយនាក់ និងក្រុមហ៊ុនណាហ្គា វើលដ៍ នៅមិនទាន់មានដំណោះស្រាយសាច់ការណាមួយទេ បើទោះបីជាមានកិច្ចអន្តរាគមន៍ពីសាលារាជធានីភ្នំពេញ និងក្រសួងការងារ ដោយហៅភាគីក្រុមហ៊ុនចូលតុចរចាស្វែងរកដំណោះស្រាយរួមគ្នាក៏ដោយ។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គា វើលដ៍ កញ្ញា ឈឹម ស៊ីថរ ប្រាប់វិទ្យុអាស៊ីសេរី នៅថ្ងៃទី២៣ ធ្នូថា ការដោះស្រាយវិវាទការងារនៅក្រសួងការងារ កាលពីថ្ងៃទី២២ ធ្នូ គឺគ្មានវត្តមានតំណាងក្រុមហ៊ុនចូលរួមទេ។
កញ្ញាឲ្យដឹងថា មន្ត្រីក្រសួងការងារមិនហ៊ានពិនិត្យផ្ទៀងផ្ទាត់ការទូទាត់សំណងរបស់ក្រុមហ៊ុនថា តើត្រឹមត្រូវតាមច្បាប់ស្ដីការងារឬទេ ចំពោះបុគ្គលិកម្នាក់ដែលព្រមទទួលយកសំណងបញ្ចប់ការងារពីក្រុមហ៊ុន។ កញ្ញាបន្តថា ក្រសួងការងារតម្រូវឲ្យសហជីពទៅចរចាជាមួយភាគីក្រុមហ៊ុន អំពីចំនួនបុគ្គលិកក្នុងចំណោមជាង៣រយនាក់ ដែលចង់ចូលធ្វើការវិញ ព្រោះក្រុមហ៊ុនជាអ្នកសម្រេចក្នុងរឿងនេះ។
កញ្ញា ឈឹម ស៊ីថរ ចាត់ទុករបៀបដោះស្រាយវិវាទរបស់ក្រសួងការងារនេះថា គ្មានចេតនាពិតប្រាកដ និងគ្មានជំហរច្បាស់លាស់ ដើម្បីបញ្ចប់វិវាទការងារនៅក្រុមហ៊ុនបនល្បែងណាហ្គា វើលដ៍មួយនេះឡើយ៖ «ក្រសួងអញ្ជើញ ៣៦០នាក់ជាង ហើយគាត់ដឹងហើយ ក្នុងចំណោម ៣៦០នាក់ជាងហ្នឹង មានចំនួនគាត់ទាមទារចូលធ្វើការ មួយចំនួនទាមទារប្រាក់សំណងត្រឹមត្រូវតាមច្បាប់។ សរុបជារួមទៅ កិច្ចប្រជុំម្សិលមិញនេះ គឺអត់បានផ្លែផ្កាអ្វីទាំងអស់។ ចុងក្រោយ យើងចង់ឲ្យក្រសួងបង្ហាញពីរូបមន្តត្រឹមត្រូវក្នុងការទូទាត់ប្រាក់សំណង ក៏ក្រសួងអត់យកការទូទាត់របស់ណាហ្គាផ្ទាល់ដែរ។ ទៅយកឧទាហរណ៍ផ្សេង ហើយមិនចេញជាផ្លូវការទៀត។ ថាតើអាហ្នឹង ជារូបមន្តគោលឬអត់ នៅក្នុងការទូទាត់ មិនថាសម្រាប់នៅក្រុមហ៊ុនណាហ្គា វើលដ៍ ឬនៅកន្លែងផ្សេងៗ»។
វិទ្យុអាស៊ីសេរី មិនអាចសុំការបកស្រាយរឿងនេះ ពីប្រធាននៃអគ្គលេខាធិការដ្ឋានដោះស្រាយកូដកម្ម បាតុកម្ម គ្រប់មុខសញ្ញា នៃក្រសួងការងារ លោក ទេស រុក្ខាផល បានទេ នៅថ្ងៃទី២៣ ធ្នូ ដោយហៅទូរស័ព្ទចូល តែពុំមានអ្នកទទួល។
ប៉ុន្តែក្រសួងការងារ លើកឡើងក្នុងសេចក្ដីប្រកាសព័ត៌មាន ចុះថ្ងៃទី២២ ធ្នូថា ក្រសួងរក្សាជំហរបន្តដោះស្រាយករណីទាមទាររបស់កម្មករនិយោជិតចំនួន ៣៦០នាក់ ដែលមិនទាន់ឯកភាពទទួលយកការទូទាត់ប្រាក់បំណាច់ផ្ដាច់កិច្ចសន្យាការងារតាមករណីនីមួយៗ។
ក្រសួងអះអាងថា ក្រសួងនឹងបន្តការងារនេះឲ្យបានជាផលប្រយោជន៍សម្រាប់កម្មករនិយោជិត រហូតដល់ករណីវិវាទនេះ ត្រូវបានដោះស្រាយបញ្ចប់ស្របតាមច្បាប់។
ទាក់ទងនឹងរឿងនេះ អ្នកគ្រប់គ្រងកម្មវិធីសិទ្ធិការងារ នៃអង្គការសង់ត្រាល់ (Central) លោក ឃុន ថារ៉ូ មានប្រសាសន៍ថា ការអូសបន្លាយពេលវេលាចរចារកដំណោះស្រាយ ដោយគ្មានវត្តមានក្រុមហ៊ុនចូលរួមបែបនេះ អាចជាវិធីសាស្ត្រមួយ ដើម្បីបន្សាបកម្លាំងក្រុមកម្មករនិយោជិតឲ្យនឿយណាយឈប់ធ្វើកូដកម្មដោយខ្លួនឯង។
លោកយល់ថា បើភាគីក្រុមហ៊ុននៅតែគ្មានភាពស្មោះត្រង់ចង់ដោះស្រាយរឿងនេះទេ ក្រសួងការងារ មានសិទ្ធិសម្រេចដោះស្រាយបញ្ចប់វិវាទការងារមួយនេះ តាមច្បាប់ស្ដីពីការងារ ដោយបង្ខំឲ្យភាគីនិយោជក អនុវត្តតាមស្មារតីនៃកិច្ចប្រជុំនៅសាលារាជធានីភ្នំពេញកន្លងមក៖ «បើសិនវាមិនមានដំណោះស្រាយ វាបង្កើតនូវបញ្ហាស្មុគស្មាញបន្តទៀត។ ពីព្រោះការធ្វើកូដកម្ម គឺដើម្បីជំរុញឲ្យនិយោជកចូលតុចរចាដោយភាពស្មោះត្រង់ ជាមួយកម្មករនិយោជិក ហើយធ្វើការសម្បទានគ្នា។ ហើយមកដល់ពេលនេះ ភាគីក៏មិនទាន់មានការសម្បទាន អីមួយ ឬក៏ការសម្រេចណាមួយ ដើម្បីបញ្ជាក់ពីជំហររបស់ខ្លួន ឲ្យខាងកម្មករនិយោជិកហ្នឹង គាត់អាចទទួលយកបានកម្រិតណាមួយ គឺអត់ទាន់មាន»។
វិទ្យុអាស៊ីសេរីមិនអាចសុំការបំភ្លឺអំពីដំណោះស្រាយវិវាទការងារនេះ ពីប្រធានប្រតិបត្តិបុគ្គលិករបស់ក្រុមហ៊ុនណាហ្គាវើលដ៍ លោក ម៉ៃក ង៉ៃ (Mike Ngai) បានទេ ដោយហៅទូរស័ព្ទ តែពុំមានអ្នកទទួល។
គិតមកដល់ពេលនេះ ក្រុមកម្មករនិយោជិកក្រុមហ៊ុនណាហ្គាវើលដ៍ បានធ្វើកូដកម្មដោយសន្តិវិធី អស់រយៈពេល ៦ថ្ងៃហើយ។ ពួកគាត់ទាមទារឲ្យថៅកែទទួលយកថ្នាក់ដឹកនាំសហជីព និងបុគ្គលិកសរុប ៣៦៥រយនាក់ ដែលក្រុមហ៊ុនបញ្ឈប់ពីការងារ ចូលធ្វើការវិញ។ ក្រុមកូដករនៅតែរក្សាជំហរធ្វើកូដកម្ម រហូតដល់ភាគីក្រុមហ៊ុនព្រមផ្ដល់ដំណោះស្រាយដែលអាចទទួលយកបាន។
ថ្នាក់ដឹកនាំសហជីព នឹងធ្វើសន្និសីទកាសែត នៅមុខអគារទី១ នៃក្រុមហ៊ុនណាហ្គា វើលដ៍ ថ្ងៃទី២៤ ធ្នូ ដើម្បីថ្លែងប្រាប់កម្មករនិយោជិត ជុំវិញដំណោះស្រាយពីអាជ្ញាធរនិងក្រសួងការងារ នាពេលកន្លងទៅនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។