ក្រុម​យុវជន​និង​អាជីវករ​នៅ​ក្រុង​ប៉ោយប៉ែត​ធ្វើ​បុណ្យ​ឧទ្ទិស​កុសល​ជូន​លោក​បណ្ឌិត កែម ឡី

ដោយ ហ៊ុំ ចំរើន
2016.07.17
Share on WhatsApp
Share on WhatsApp
បុណ្យ​ឧទ្ទិស​កុសល​ជូន​លោក កែម ឡី បន្ទាយមានជ័យ ២០១៦ ៨៥៥ ក្រុម​យុវជន​ប្រារព្ធ​ពិធី​បុណ្យ​ឧទ្ទិស​កុសល​ជូន​វិញ្ញាណក្ខន្ធ​លោក​បណ្ឌិត កែម ឡី នា​វត្ត​បាលេលិយ្យ ខេត្ត​បន្ទាយមានជ័យ នៅ​ថ្ងៃ​ទី​១៧ ខែ​កក្កដា ឆ្នាំ​២០១៦។ RFA/Hum Chamroeun
RFA/Hum Chamroeun

ក្រុម​យុវជន និង​អាជីវករ​នៅ​ក្រុង​ប៉ោយប៉ែត ខេត្ត​បន្ទាយមានជ័យ ជាង ១០០​នាក់ នៅ​ព្រឹក​ថ្ងៃ​ទី​អាទិត្យ ទី​១៧ កក្កដា រួម​គ្នា​និមន្ត​ព្រះសង្ឃ​ចំនួន ៩​អង្គ​ធ្វើ​ពិធី​បុណ្យ ៨​ថ្ងៃ ដើម្បី​ឧទ្ទិស​កុសល​ផល​បុណ្យ​ជូន​វិញ្ញាណក្ខន្ធ​លោក​បណ្ឌិត កែម ឡី ទៅ​កាន់​សុគតិភព ដែល​ប្រព្រឹត្ត​ទៅ​នៅ​វត្ត​បាលេលិយ្យ​ជាប់​ផ្លូវ​ជាតិ​លេខ​៥ ក្រុង​ប៉ោយប៉ែត។

ក្រុម​យុវជន និង​អាជីវករ​នៅ​ក្រុង​ប៉ោយប៉ែត សម្ដែង​ការ​ក្ដុកក្ដួល និង​សោកស្ដាយ​ជា​ខ្លាំង​ចំពោះ​ការ​បាត់បង់​លោក​បណ្ឌិត កែម ឡី។ ពួក​គាត់​ហៅ​ការ​បាត់បង់​ដោយ​គ្មាន​ថ្ងៃ​វិល​វិញ​នេះ ថា​ជា​សោកនាដកម្ម​មួយ​របស់​ពលរដ្ឋ​ខ្មែរ​នៅ​កម្ពុជា ដែល​មិន​អាច​កាត់​ថ្លៃ​បាន។

យុវជន​ម្នាក់​នៅ​ក្រុង​ប៉ោយប៉ែត គឺ​លោក ប៊ុន សុជី ប្រាប់​វិទ្យុ​អាស៊ីសេរី ពី​ទីកន្លែង​ធ្វើ​បុណ្យ​នៅ​សាលា​ធម្មសភា​វត្ត​បាលេលិយ្យ សង្កាត់​ប៉ោយប៉ែត ថា បើ​ទោះ​ជា​លោក​បណ្ឌិត​បាន​ស្លាប់​ទៅ​មួយ​សប្ដាហ៍​ហើយ​ក៏ដោយ ក៏ប៉ុន្តែ​អារម្មណ៍​របស់​រូប​គេ​នៅ​មិន​ទាន់​អស់​អាល័យ​នឹង​លោក​បណ្ឌិត កែម ឡី នៅ​ឡើយ។ លោក​បញ្ជាក់​ថា មូលហេតុ​ដែល​ក្ដុកក្ដួល​យូរ​អង្វែង ដោយសារ​សោកស្ដាយ​វីរជន​ជា​មនុស្ស​ល្អ​នៅ​ក្នុង​សង្គម​ជាតិ៖ «ខ្ញុំ​សោកស្ដាយ​ត្រង់​ថា​អ្នក​ស្នេហា​ជាតិ​ត្រូវ​គេ​សម្លាប់ ចំណែក​អ្នក​ដែល​បំផ្លាញ​ជាតិ​វិញ ភាគ​ច្រើន​រស់​នៅ​លើ​គំនរ​ទ្រព្យ​យ៉ាង​សុខ​សប្បាយ ដោយ​គ្មាន​ទោសពៃរ៍​អ្វី​ឡើយ»

ស្រដៀង​គ្នា​នេះ​ដែរ អាជីវករ​ខ្មែរ​លក់​ដូរ​នៅ​ផ្សារ​រ៉ុងក្លឿ ប្រទេស​ថៃ វិញ លោក យក់ វ៉ឺដែត ដែល​បាន​ចូលរួម​វិធី​បុណ្យ ៨​ថ្ងៃ​នៅ​វត្ត​បាលេលិយ្យ ថ្លែង​ថា លោក​បណ្ឌិត កែម ឡី ជា​អ្នក​វិភាគ​សង្គម​មាន​ចំណេះ​ដឹង​ខ្ពង់ខ្ពស់​ដែល​ហ៊ាន​និយាយ​ត្រង់ៗ​រិះគន់​រដ្ឋាភិបាល​ដោយ​មិន​សំចៃ​មាត់ ដើម្បី​ចង់​ឲ្យ​សង្គម​មាន​ភាព​ប្រសើរ​ឡើង។ ពួក​គាត់​ទាំង​នោះ​អះអាង​ថា ពួក​គាត់​បាន​ស្គាល់​លោក​បណ្ឌិត កែម ឡី តាម​រយៈ​ការ​ស្ដាប់​វិទ្យុ។ ចំពោះ​រូប​លោក​ចូល​ចិត្ត​ស្ដាប់​លោក​បណ្ឌិត​បកស្រាយ​តាម​វិទ្យុ និង​ទូរទស្សន៍​ជា​ប្រចាំ។ អាជីវករ​រូប​នេះ​ហៅ​ការ​បាត់បង់​លោក​បណ្ឌិត កែម ឡី ថា​ជា​ការ​បាត់បង់​ធនធាន​មនុស្ស​ដ៏​កម្រ​មួយ​នៅ​កម្ពុជា ដែល​មិន​អាច​កាត់​ថ្លៃ​បាន៖ «គាត់​មិន​មែន​ជា​សាច់ញាតិ​ខ្ញុំ​ទេ ប៉ុន្តែ​លោក​បណ្ឌិត​មាន​មនសិការ​ជាតិ​ខ្ពស់ វិភាគ​ធ្វើ​ឲ្យ​ខ្ញុំ​បាន​ដឹង​ពី​រឿង​ជាតិ​ជាច្រើន​តាម​រយៈ​គាត់។ សូម​សំណូមពរ​ឲ្យ​កូន​ខ្មែរ​ទាំងអស់​យក​តម្រាប់​តាម​លោក​បណ្ឌិត និង​សូម​ឲ្យ​វីរភាព​របស់​គាត់​ស្ថិត​ក្នុង​ដួង​ចិត្ត​របស់​ពលរដ្ឋ​ខ្មែរ​គ្រប់​រូប»

ភ្លាមៗ​ក្រោយ​ពី​ឃាតក​បាញ់​សម្លាប់​លោក​បណ្ឌិត កែម ឡី នៅ​កណ្ដាល​រាជធានី​ភ្នំពេញ កាល​ពី​ថ្ងៃ​ទី​១០ កក្កដា សមត្ថកិច្ច​ចាប់​បាន​ជន​សង្ស័យ​ម្នាក់​ឈ្មោះ អឿត អាង ហៅ ជួប សម្លាប់។ កាល​ពី​ថ្ងៃ​ទី​១៣ កក្កដា តុលាការ​បាន​ចោទ​ប្រកាន់​ជន​សង្ស័យ​រូប​នោះ​ចំនួន​ពីរ​បទ​ចោទ គឺ​បទ​ឃាតកម្ម​គិត​ទុក​ជា​មុន និង​កាន់​អាវុធ​ខុស​ច្បាប់ ដែល​នឹង​ត្រូវ​ជាប់​ទោស​អស់​មួយ​ជីវិត ប្រសិន​បើ​តុលាការ​រក​ឃើញ​ថា​ពិត​ជា​ឃាតក​ពិត​មែន។

ទោះ​បី​ជា​យ៉ាង​នេះ​ក្ដី ទាំង​អាជីវករ និង​យុវជន​នៅ​ក្រុង​ប៉ោយប៉ែត អះអាង​ថា ករណី​ឃាតកម្ម​នេះ​អាច​មាន​អ្នក​នៅ​ពី​ក្រោយ​ខ្នង និង​សំណូមពរ​ឲ្យ​រដ្ឋាភិបាល​កម្ពុជា វែក​មុខ​ចាប់​ជន​ប្រព្រឹត្តិ​ដទៃ​ទៀត​យក​មក​ផ្ដន្ទាទោស​តាម​ផ្លូវ​ច្បាប់​ឲ្យ​បាន​ឆាប់​រហ័ស៖ «ខ្ញុំ​សំណូមពរ​ឲ្យ​រដ្ឋាភិបាល​វែក​មុខ​រក​ឃាតក​ពិត​ឲ្យ​បាន​ច្បាស់លាស់ ដែល​អាច​ជឿ​ទុក​ចិត្ត​បាន​ទាំងអស់​គ្នា។ ខ្ញុំ​មិន​ជឿ​ឃាតក​ដែល​សមត្ថកិច្ច​ចាប់​បាន​មាន​តែ​ម្នាក់​ឯង​នោះ​ទេ ករណី​ប្រៀប​បាន​ទៅ​ដូចជា​សម្ដែង​ល្ខោន​ឲ្យ​សាធារណជន​មើល​ទេ គឺ​មិន​មែន​ជា​ការ​ពិត​ឡើយ។ បាទ! ពួក​ខ្ញុំ​បាទ​មិន​អស់​ចិត្ត​ទេ ចំពោះ​ជន​សង្ស័យ​ដែល​សមត្ថកិច្ច​ចាប់​បាន​នោះ»

លោក​នាយក​រដ្ឋមន្ត្រី ហ៊ុន សែន មាន​ប្រសាសន៍​កាល​ពី​ថ្ងៃ​ទី​១១ កក្កដា កន្លង​ទៅ​ថា លោក​សោកស្ដាយ​ចំពោះ​ការ​បាត់បង់​លោក​បណ្ឌិត កែម ឡី ដែល​ជា​អ្នក​វិភាគ​សង្គម​ល្បីល្បាញ និង​បាន​ថ្កោលទោស​អំពើ​ឃាតកម្ម​នេះ។ លោក ហ៊ុន សែន ចេញ​បទបញ្ជា​ឲ្យ​សមត្ថកិច្ច​ពាក់ព័ន្ធ ស្វែងរក​ជន​ដៃ​ដល់ និង​ជន​ឃុបឃិត​ទាំងឡាយ ដើម្បី​ផ្ដន្ទាទោស​តាម​ច្បាប់។ ជាង​នេះ​ទៅ​ទៀត លោក​នាយក​រដ្ឋមន្ត្រី ក៏​សំណូមពរ​ទៅ​ដល់​ប្រជាពលរដ្ឋ​ទាំងអស់​ឲ្យ​រក្សា​ភាព​ស្ងប់ស្ងាត់ ដើម្បី​ទុក​ឱកាស​ឲ្យ​សមត្ថកិច្ច​ធ្វើ​ការងារ​នេះ៖ «ខ្ញុំ​គិត​ថា តើ​អ្នក​នឹង​ទទួល​ផល​ចំណេញ​សោកនាដកម្ម​កើត​ឡើង​នេះ ហើយ​តើ​អ្នក​ណា​នឹង​ទទួល​ផល​ចំណេញ? អ្នក​ណា​ទទួល​ផល​ខាត? រាជ​រដ្ឋាភិបាល គឺ​ពិត​ទទួល​នូវ​ផល​ប៉ះពាល់​យ៉ាង​ធ្ងន់ធ្ងរ​ចំពោះ​មុខ​មាត់។ ម្ខាង​អំពី​កង្វះ​សមត្ថភាព​នៃ​ការពារ​សន្តិសុខ​ពលរដ្ឋ ម្ខាង​ទៀត​ត្រូវ​បាន​គេ​លាប​ពណ៌​ភ្លាមៗ​អំពី​បញ្ហា​នេះ ដែល​មាន​ចរិត​ជា​បញ្ហា​ខាង​នយោបាយ»

ទោះ​បី​ជា​យ៉ាង​នេះ​ក្ដី ការ​ស្លាប់​លោក​បណ្ឌិត កែម ឡី នេះ ពុំ​មែន​តែ​ប្រជាពលរដ្ឋ​ប៉ុណ្ណោះ​ទេ​ដែល​មាន​ការ​ព្រួយ​បារម្ភ​ខ្លាច​សមត្ថកិច្ច​មិន​អាច​ស្វែងរក​យុត្តិធម៌​ជូន​វីរជន​បាន​នោះ អង្គការ​សង្គម​ស៊ីវិល​ធ្វើ​ការងារ​ផ្នែក​សិទ្ធិ​មនុស្ស ក៏​សម្ដែង​ការ​សោកស្ដាយ និង​ព្រួយ​បារម្ភ​អំពី​បញ្ហា​នេះ​ដូច​គ្នា។

មន្ត្រី​សម្របសម្រួល​អង្គការ​លីកាដូ (LICADHO) ប្រចាំ​ខេត្ត​បន្ទាយមានជ័យ លោក ភុន ឈិន មាន​ប្រសាសន៍​ថា ដើម្បី​បង្ហាញ​ភាព​ស្អាតស្អំ​របស់​ខ្លួន រដ្ឋាភិបាល​គួរ​តែ​បើក​ទូលាយ​ឲ្យ​សហគមន៍​ជំនាញ​អន្តរជាតិ ចូលរួម​ស៊ើប​អង្កេត​លើ​ករណី​នេះ​ប្រកប​ដោយ​ភាព​ឯករាជ្យ និង​យុត្តិធម៌៖ «យើង​មើល​ឃើញ​រូបភាព​ដែល​អាជ្ញាធរ​បាន​បង្ហាញ​នោះ វា​ហាក់​ដូចជា​ការ​ប្រញាប់​ប្រញាល់ ដូចជា​ករណី​ការ​ស្លាប់​របស់​លោក ជា វិជ្ជា និង​សកម្មជន​ការពារ​ព្រៃ​ឈើ​លោក ឈុត វុទ្ធី និង​តារា​ល្បីៗ​មួយ​ចំនួន​ទៀត​ដែល​ត្រូវ​គេ​បាញ់​សម្លាប់​នោះ។ រហូត​មក​ដល់​ពេល​នេះ សមត្ថកិច្ច​ពុំ​ទាន់​ចាប់​បាន​ឃាតក​ពិត​ប្រាកដ​នៅ​ឡើយ ដើម្បី​ជា​ទំនុក​ចិត្ត​ដល់​សាធារណជន​នៅ​ឡើយ​ទេ»

នៅ​ក្នុង​កម្មវិធី​បុណ្យ​គម្រប់ ៨​ថ្ងៃ​សព​លោក​បណ្ឌិត កែម ឡី នៅ​ក្រុង​ប៉ោយប៉ែត រៀបចំ​ឡើង​រយៈពេល​ប្រមាណ ២​ម៉ោង គឺ​ចាប់​ពី​ម៉ោង ៨ រហូត​ដល់​ម៉ោង ១០​ព្រឹក​ថ្ងៃ​ទី​១៧ កក្កដា។ នៅ​ក្នុង​ពិធី​បុណ្យ​នោះ មាន​ដាក់​តាំង​រូបថត​លោក​បណ្ឌិត​អម​ដោយ​កម្រង​ផ្កា និង​អុជ​ធូប​ទៀន​នៅ​ក្នុង​សាលា​ធម្មសភា​វត្ត​បាលេលិយ្យ មាន​ការ​សូត្រ​មន្ត និង​រាប់បាត្រ​ព្រះសង្ឃ ៩​អង្គ ដើម្បី​ឧទ្ទិស​កុសល​ផល​បុណ្យ​ជូន​វិញ្ញាណក្ខន្ធ​លោក​បណ្ឌិត កែម ឡី បាន​ទៅ​កាន់​សុគតិភព៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។