អាជីវករ​វៀតណាម​ជាង​១០០​នាក់​ជួប​ប្រជុំ​គ្នា​នៅ​កម្ពុជា

នៅ​ចុង​ខែ​កក្កដា កន្លង​ទៅ​នេះ សារព័ត៌មាន​វៀតណាម បាន​ផ្សាយ​ព័ត៌មាន​ជា​បន្ត​បន្ទាប់​អំពី​ទំនាក់ទំនង​ល្អ​រវាង​កម្ពុជា និង​វៀតណាម តាម​រយៈ​ការ​ធ្វើ​ជំនួញ និង​ការ​បើក​ច្រក​ព្រំដែន​ចេញ​ចូល សម្រាប់​ការ​ដឹក​ជញ្ជូន​ទំនិញ​តាម​ផ្លូវ​គោក។
ដោយ ហាស់ សាន
2011.08.02
Share on WhatsApp
Share on WhatsApp

ទីភ្នាក់ងារ​ព័ត៌មាន​វៀតណាម​ផ្សាយ​ថា ក្រុមហ៊ុន​ប្រេង​ឥន្ធនៈ និង​ឧស្ម័ន បាន​ចុះ​កិច្ចសន្យា​លក់​ផលិតផល​គីមី ដូចជា ជី​អ៊ុយរ៉េ​ជាដើម តាម​រយៈ​ក្រុមហ៊ុន​ក្នុង​ស្រុក​ពីរ គឺ​ក្រុមហ៊ុន ហេង ពេជ្រចាយ នៅ​ក្នុង​ខេត្ត​តាកែវ និង​ក្រុមហ៊ុន ឈុន សុខអាន នៅ​ក្នុង​ខេត្ត​កណ្ដាល។

ចូល​រួម​ក្នុង​ពិធី​សម្ពោធ​ចុះ​កិច្ចព្រមព្រៀង​រវាង​ក្រុមហ៊ុន​វៀតណាម និង​ក្រុមហ៊ុន​ក្នុង​ស្រុក​ទាំង​ពីរ​នេះ មាន​ឧបនាយក​រដ្ឋមន្ត្រី ម៉ែន សំអន និង​ឯក​អគ្គ​រដ្ឋ​ទូត​វៀតណាម ង៉ោ អាញ់ ហ្ស៊ុង (Ngo Anh Dung)។ ក្រុមហ៊ុន​វៀតណាម បាន​ឲ្យ​ដឹង​ថា តាំង​ពី​បើក​ការិយាល័យ​នៅ​កម្ពុជា ក្នុង​ឆ្នាំ​២០១០ គេ​បាន​លក់​ជី​អ៊ុយរ៉េ ៦.០០០​តោន នៅ​ស្រុក​ខ្មែរ។

ទីភ្នាក់ងារ​ព័ត៌មាន​វៀតណាម​ឲ្យ​ដឹង​ទៀត​ថា កាល​ពី​សប្ដាហ៍​មុន អាជីវករ​វៀតណាម ដែល​មាន​មុខរបរ ឬ​ក្រុមហ៊ុន​រក​ស៊ី​នៅ​កម្ពុជា ហៅ​ថា វៀតគៀវ (Viet kieu=Overseas Vietnamese) ឬ​ប្រែ​ថា ជន​ជាតិ​វៀតណាម​ក្រៅ​ប្រទេស​ចំនួន​ជាង ១០០​នាក់ បាន​ជួប​ជុំ​គ្នា ក្រោម​ការ​រៀបចំ​នៃ​ស្ថានទូត​វៀតណាម​ប្រចាំ​កម្ពុជា និង​ក្រសួង​ឧស្សាហកម្ម និង​ពាណិជ្ជកម្ម​វៀតណាម ក្រោម​អធិបតីភាព​រដ្ឋមន្រ្តី ឡេ ដាញ់វិញ (Le Danh Vinh)។

ស្ថិតិ​ផ្សាយ​ដោយ​រដ្ឋាភិបាល​វៀតណាម បង្ហាញ​ថា ជំនួញ​រវាង​ប្រទេស​ទាំង​ពីរ បាន​កើន​ឡើង​ជា​លំដាប់ ហើយ​នៅ​ឆ្នាំ​២០១០ មាន​ទឹក​ប្រាក់​ជិត ២​ពាន់​លាន​ដុល្លារ។

កាល​ពី​ថ្ងៃ​អាទិត្យ ៣១ កក្កដា រដ្ឋ​អំណាច​កម្ពុជា និង​វៀតណាម បាន​ព្រមព្រៀង​គ្នា បើក​ច្រក​ចេញ​ចូល​នៅ​តាម​ខេត្ត​ជាប់​ព្រំប្រទល់​ដែន​មួយ​ចំនួន​ថែម​ទៀត។ សារពត៌មាន asiaone នៅ​សិង្ហបុរី ផ្សាយ​ថា ខេត្ត​ក្រចេះ បើក​នៅ​ច្រក​ត្រពាំង​ស្រែ ចេញ​ចូល​ច្រក ហួលូ ក្នុង​ខេត្ត ប៊ិញហ៊្វឹក (Binh Phuoc)។ ច្រក​នេះ ជា​ច្រក​ទី​៥ ក្នុង​ចំណោម​ច្រក​ចេញចូល ៧ គ្រោង​នឹង​បើក ដែល​ប្រទេស​ទាំង​ពីរ​ចុះ​កិច្ច​ព្រមព្រៀង​ជាមួយ​គ្នា តាំង​ពី​ឆ្នាំ១៩៩៨ រហូត​ដល់​ឆ្នាំ ២០០៥។

ច្រក​តាម​ខេត្ត​ផ្សេង​ទៀត មាន​ដូច​ជា ច្រក​បាវ៉ិត-ម៉ុកបៃ (ខេត្តស្វាយរៀង និង​តៃនិញ), ភ្នំដិន-ធិញប៊ៀន (ខេត្តតាកែវ និង អានយ៉ាង), សាស៊ៀ-ព្រែកចាក (ខេត្ត​គៀនយ៉ាង លក និង កំពត), សាម៉ាត-ត្រពាំង (ខេត្តកំពង់ចាម និង​តៃនិញ)។

នៅ​ប៉ែក​ឦសាន ច្រក ឡេថាញ់-អូរយ៉ាដាវ, ចាឡាយ និង​អណ្តូងពេជ្រ (ខេត្ត​រតនគិរី), ប៊ូប្រ៉ាង-អូររាំង (ខេត្ត​មណ្ឌលគិរី និង​ដាក់ណុង)។

អនុ​រដ្ឋមន្ត្រី​ក្រសួង​ដឹក​ជញ្ជូន​លោក ង្វៀង ង៉ុកហ្ស៊ុង (Nguyen Ngoc Dong) ថ្លែង​ថា​ការ បើក​ច្រក​ចេញ​ចូល មិន​ត្រឹម​តែ​សម្រួល​និង​ពង្រីក​ជំនួញ​ប៉ុណ្ណោះ​ទេ តែ​កែ​លំអ​សហប្រតិបត្តិការ​ទៀត​ផង៕

រឿង​ដែល​គេ​អាន​​ច្រើន​បំផុត
ព័ត៌មាន​ថ្មីៗ
អ្នកវិភាគ​ថា លោក ហ៊ុន ម៉ាណែត បកស្រាយ​បំភ្លៃ​ច្បាប់​បោះឆ្នោត​ជ្រើសតាំង​តំណាងរាស្ត្រ
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។