កម្ពុជាព្រួយបារម្ភអំពីការចល័តពលកម្មអាស៊ាន
2012.11.06
ការព្រួយបារម្ភទាំងនោះ គឺការខ្វះកម្លាំងពលកម្មក្នុងស្រុកនៅប្រទេសកម្ពុជា ទន្ទឹមនឹងតម្រូវការពលកម្មកើនឡើង ឬការវិនិយោគក្នុងស្រុកកើនឡើងនៅក្នុងតំបន់អាស៊ាន។ និន្នាការនេះអាចនឹងកើតឡើងនៅពេលដែលប្រទេសសមាជិកអាស៊ាន ជាពិសេសប្រទេសកម្ពុជា គ្មានវិធានការគ្រប់គ្រងពលកម្ម និងការវិនិយោគ។
ការស្រាវជ្រាវជាច្រើនបានលើកឡើងថា នៅក្នុងបរិបទអាស៊ាន ក្រៅពីលំហូរពាណិជ្ជកម្មដោយសេរី នៅពេលធ្វើសមាហរណកម្មអាស៊ានឆ្នាំ២០១៥ ប៉ុន្តែក្នុងនោះក៏មានលំហូរពលកម្មនឹងត្រូវបើកចំហផងដែរ ដែលបានសរសេរក្នុងឯកសារគោលរបស់អាស៊ាន។ នៅពេលនោះ ទាំងពលកម្មជំនាញ ឬគ្មានជំនាញរបស់ប្រទេសអាស៊ាន មានលំហូរដោយសេរី និងមានការប្រកួតប្រជែងពីប្រទេសខាងក្រៅ។
ប្រទេសសមាជិកអាស៊ាននីមួយៗនឹងទទួលផលប្រយោជន៍កាន់តែច្រើន ក្នុងករណីប្រទេសនោះ ទទួលយកពលកម្មជំនាញកាន់តែច្រើន។ ផ្ទុយទៅវិញ ប្រទេសសមាជិកអាស៊ានមួយចំនួននឹងខ្វះខាតកម្លាំងពលកម្ម នៅពេលដែលធនធានមនុស្សភាគច្រើន នឹងសម្លឹងទៅរកទីផ្សារការងារដែលមានអត្ថប្រយោជន៍ខ្ពស់។
វិទ្យាស្ថាននៃកិច្ចការបរទេសរបស់ប្រទេសសិង្ហបុរី បានរកឃើញថា ការចល័តពលកម្មជំនាញគឺមានសារសំខាន់សម្រាប់ការអនុវត្តសេរីភាវូបនីយកម្មសេវាកម្ម និងការវិនិយោគ ដែលជាគោលបំណងរបស់អាស៊ាន ដើម្បីធ្វើសមាហរណកម្មសេដ្ឋកិច្ចនៅក្នុងសហគមន៍សេដ្ឋកិច្ចអាស៊ាន។ ការស្រាវជ្រាវបានរកឃើញថា នៅពេលនោះ ប្រទេសដែលជាអ្នកស្រូបពលកម្មជំនាញ គឺប្រទេសសិង្ហបុរី ចំពេលដែលប្រទេសហ្វីលីពីន និងប្រទេសម៉ាឡេស៊ី ជាអ្នកផ្គត់ផ្គង់កម្លាំងពលកម្ម។
សកម្មភាពមួយចំនួនដែលមាននៅក្នុងឯកសារគោលរបស់អាស៊ានស្ដីអំពីលំហូរដោយសេរីនៃពលកម្មជំនាញ មានដូចជា ការសម្របសម្រួលក្នុងការចេញទិដ្ឋាការធ្វើការងារ កិច្ចព្រមព្រៀងទទួលគ្នាទៅវិញទៅមកជាកត្តាសំខាន់បំផុតសម្រាប់បង្កើនសហប្រតិបត្តិការរវាងអាស៊ាន។
កិច្ចព្រមព្រៀងទទួលស្គាល់គ្នាទៅវិញទៅមក គឺជាមធ្យោបាយតែមួយគត់សម្រាប់ការចល័តពលកម្មជំនាញរវាងអាស៊ាន ប៉ុន្តែការទទួលស្គាល់សមត្ថភាពនឹងបទពិសោធន៍មិនទាន់បានធានា ឬព្រមព្រៀងគ្នាសម្រាប់ការចាប់យកការងារនៅក្នុងតំបន់អាស៊ាននៅឡើយ។ ក្របខ័ណ្ឌច្បាប់ និងគោលនយោបាយ ជាឧបសគ្គចម្បងសម្រាប់ការចល័តពលកម្ម ដែលកត្តារារាំងទាំងនោះរួមមាន លិខិតអនុញ្ញាតធ្វើការងារ ការផ្ដល់ ឬការអនុញ្ញាតដោយរដ្ឋធម្មនុញ្ញឲ្យទទួលការងារនៅប្រទេសសមាជិកអាស៊ានណាមួយ រួមទាំងភាសាជាដើម។
ទោះជាយ៉ាងណាក៏ដោយ នៅពេលដែលប្រទេសអាស៊ានទាំងអស់ មានការរីកចម្រើនបច្ចេកវិទ្យា តម្រូវការជំនាញនឹងកើនឡើង ហើយតម្រូវការអ្នកមានជំនាញខ្ពស់ពីខាងក្រៅនឹងហូរទៅប្រកួតប្រជែងជាមួយអ្នកមានជំនាញខ្ពស់នៅប្រទេសនីមួយៗ។ ប៉ុន្តែប្រទេសសមាជិកអាស៊ានដែលមានការអភិវឌ្ឍទាប ប្រឈមនឹងការបាត់បង់ការងារ ជាពិសេសការងារគ្មានជំនាញ ដោយសារតែពលកម្មបរទេសនឹងមកជំនួស។
អគ្គនាយកដ្ឋានរដ្ឋបាលនៃក្រសួងការងារ និងបណ្ដុះបណ្ដាលវិជ្ជាជីវៈ លោក ហៀង សួ មានប្រសាសន៍ថា ប្រទេសកម្ពុជា មិនត្រូវមានការព្រួយបារម្ភថា ប្រទេសសមាជិកអាស៊ានចូលមកដណ្ដើមការងារនោះឡើយ ដោយសារតែកត្តាមួយចំនួន គឺប្រាក់ខែអប្បបរមា និងការចំណាយប្រើប្រាស់នៅកម្ពុជា មានតម្លៃខ្ពស់ជាងប្រទេសជិតខាង។ ផ្ទុយទៅវិញ លោក ហៀង សួ បញ្ជាក់ថា កម្លាំងពលកម្មគ្មានជំនាញរបស់កម្ពុជា នឹងហូរចេញទៅប្រទេសសមាជិកអាស៊ានផ្សេង ដោយសារទីផ្សារការងារធំជាងមុន ហើយកត្តានេះជះឥទ្ធិពលអាក្រក់ដល់ការវិនិយោគនៅកម្ពុជា។
លោកបញ្ជាក់ថា ឥទ្ធិពលអាក្រក់ផ្សេងទៀត គឺបញ្ហាប្រឈមក្នុងការរកការងាររបស់អ្នករៀននៅមហាវិទ្យាល័យ៖ «ពេលដែលអ្នករៀននៅមហាវិទ្យាល័យនៅថៃ នៅវៀតណាម នៅឥណ្ឌូនេស៊ី ក៏ប្រឈមនឹងការរើសអើងពីនិយោជក។ មានន័យថា គាត់ពិបាករកការងារ ជួនកាលគាត់អាចពិចារណាដើម្បីឆ្លងដែនមកធ្វើការងារ។ អ៊ីចឹងមានន័យថា សម្ពាធឧត្ដមសិក្សា គឺអាចមានខ្ពស់ជាងអ្នកមានជំនាញតិច»។
យ៉ាងណាក៏ដោយ រដ្ឋមន្រ្តីក្រសួងព័ត៌មាន លោក ខៀវ កាញារីទ្ធ បានមានប្រសាសន៍ថា នៅឆ្នាំ២០១៥ ទីផ្សារការងារជាទីផ្សារគ្មានព្រំដែនពិតប្រាកដមែន ប៉ុន្តែអ្នកពាក់ព័ន្ធមិនត្រូវបារម្ភអំពីភាពខ្វះខាងការងារឡើយ ដោយសារតែបច្ចុប្បន្ននេះ ការវិនិយោគមានច្រើនដែលនឹងបង្កើតការងារច្រើននៅពេល ៣ឆ្នាំខាងមុខទៀត។
លោក ខៀវ កាញារីទ្ធ៖ «សព្វថ្ងៃ រដ្ឋាភិបាលកំពុងបារម្ភ ដំបូងដោយខ្ងុំលើកឧទាហរណ៍មួយចុះ។ គេវិនិយោគចម្ការកៅស៊ូ ១៥ម៉ឺនហិកតារ ពីរបីឆ្នាំទៀត យើងត្រូវការមនុស្សធ្វើការ ១៥ម៉ឺននាក់ ហើយឥឡូវយើងរកមិនបាន ៥ពាន់នាក់ផង»។
លោកមានប្រសាសន៍បន្ថែមថា ដើម្បីសម្រេចបានគោលដៅនេះ រដ្ឋាភិបាលបានបង្កើតឲ្យមានការផ្សព្វផ្សាយ ការងារក្នុងស្រុក ដើម្បីធ្វើឲ្យមានភាពស៊ីគ្នារវាងតម្រូវការការងារ និងការផ្គត់ផ្គង់នៅប្រទេសកម្ពុជា នៅពេលដែលអាស៊ានធ្វើសមាហរណកម្មតំបន់នៅពេលខាងមុខ។ លោកបញ្ជាក់ថា នៅពេលធ្វើសមាហរណកម្មតំបន់នៅពេលខាងមុខ ការបង្កើតការងារខ្ពស់គឺនៅក្នុងវិស័យកសិកម្ម។
នាយកប្រតិបត្តិកម្មវិធីអភិវឌ្ឍធនធានយុវជន លោក ជាង សុខា មានប្រសាសន៍ថា ក្នុងចំណោមប្រទេសអាស៊ាន ប្រទេសកម្ពុជា មានចំនួនយុវជនខ្ពស់ជាងគេ ដែលបច្ចុប្បន្នមានចំនួនជាង ៤លាននាក់ ប៉ុន្តែភាគច្រើនពួកគេមិនបានដឹងអំពីទីផ្សារការងារអ្វីសមស្របសម្រាប់ពួកគេឡើងនៅក្នុងបរិបទអាស៊ាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ជនជាតិឥណ្ឌា ៦៧នាក់ទៀត ត្រូវបានសង្គ្រោះចេញពីកន្លែងឆបោកតាមអនឡាញនៅកម្ពុជា
- តុលាការចោទប្រកាន់ពលករខ្មែរដែលបញ្ជូនពីម៉ាឡេស៊ី ពីបទញុះញង់ និងឃុំខ្លួននៅពន្ធនាគារ
- អង្គការអន្តរជាតិថា រដ្ឋាភិបាលបានបរាជ័យ ចំពោះការធានារបស់ខ្លួនលើកកម្ពស់សិទ្ធិមនុស្ស
- លោក ស៊ុន ចាន់ថុល អះអាងថា ក្រុមហ៊ុនអាមេរិកាំងច្រើនចាប់អារម្មណ៍ចង់មកវិនិយោគនៅកម្ពុជា
- កាស៊ីណូលោក លី យ៉ុងផាត់ រងការចោទប្រកាន់ថា បង្ខាំងមនុស្សឱ្យធ្វើការឆបោកតាមអនឡាញ