អាជ្ញាធរខេត្តកណ្ដាលមិនអនុញ្ញាតឲ្យខ្មែរក្រោមដង្ហែកឋិនទៅកាន់វត្តក្បែរព្រំដែនវៀតណាម
2015.11.05
ប្រធានសមាគមខ្មែរកម្ពុជាក្រោម លោក ថាច់ សេដ្ឋា ថ្លែងក្នុងពិធីខួប ៦៤ឆ្នាំ ថ្ងៃអាណានិគមនិយមបារាំង កាត់ទឹកដីខ្មែរឲ្យវៀតណាម នាខណ្ឌសែនសុខ រាជធានីភ្នំពេញ នៅថ្ងៃទី៤ ខែមិថុនា ឆ្នាំ២០១៣។
RFA/Tin Zakariya
អាជ្ញាធរ និងការិយាល័យធម្មការ និងសាសនាស្រុកកោះធំ ខេត្តកណ្ដាល មិនអនុញ្ញាតឲ្យសហគមន៍ខ្មែរកម្ពុជាក្រោម សម្ព័ន្ធយុវជនខ្មែរដើម្បីលទ្ធិប្រជាធិបតេយ្យ និងពលរដ្ឋ ដង្ហែអង្គកឋិនទានទៅកាន់វត្តប៉ាក់ណាម ក្បែរព្រំដែនកម្ពុជា-វៀតណាម នោះទេ។
ការហាមប្រាមនេះ គឺបន្ទាប់ពីអាជ្ញាធរចោទប្រកាន់ថា អង្គកឋិនទាននេះមានគណបក្សប្រឆាំងនៅពីក្រោយ។ ប៉ុន្តែអ្នករៀបចំពិធីបុណ្យលើកឡើងថា អាជ្ញាធរមិនគួរយកបញ្ហានយោបាយមកលាបពណ៌ លូកលាន់ក្នុងរឿងធ្វើបុណ្យទានតាមប្រពៃណីពុទ្ធសាសនានោះទេ។
សហគមន៍ខ្មែរកម្ពុជាក្រោម សម្ព័ន្ធយុវជនខ្មែរដើម្បីលទ្ធិប្រជាធិបតេយ្យ និងពលរដ្ឋ សម្ដែងការហួសចិត្ត នៅពេលទទួលដំណឹងថា អាជ្ញាធរនៅភូមិប៉ាក់ណាម ឃុំព្រែកជ្រៃ ស្រុកកោះធំ ខេត្តកណ្ដាល មិនអនុញ្ញាតឲ្យពួកគេដង្ហែអង្គកឋិនទាន ដើម្បីនាំយកបច្ច័យចូលរួមកសាងវត្តប៉ាក់ណាម ដែលនៅក្បែរតំបន់ព្រំដែនជាមួយប្រទេសវៀតណាម។
សមាជិកសម្ព័ន្ធយុវជនខ្មែរដើម្បីលទ្ធិប្រជាធិបតេយ្យ និងជាប្រធានគណៈកម្មការរៀបចំពិធីបុណ្យ យុវជន សុង សារិទ្ធ ឬហៅក្រៅថា វែរី ឃូល (Very Cool)។ លោកឲ្យដឹងនៅថ្ងៃទី៤ ខែវិច្ឆិកា ថា ក្រុមយុវជន សហគមន៍ខ្មែរកម្ពុជាក្រោម និងពលរដ្ឋក្នុង និងក្រៅប្រទេស រួមទាំងពលរដ្ឋចំណុះជើងវត្តប៉ាក់ណាម ផងដែរ បានត្រៀមជាស្រេចដើម្បីធ្វើអង្គកឋិនទានមួយ ដង្ហែទៅកាន់វត្តប៉ាក់ណាម ដែលគ្រោងធ្វើឡើងនៅថ្ងៃទី៨ ខែវិច្ឆិកា ខាងមុខនេះ។
យុវជន សុង សារិទ្ធ ដែលអះអាងថា បានធ្វើដំណើរចុះឡើងទៅកាន់វត្តប៉ាក់ណាម ចំនួន ៤ដង គ្រាន់តែដើម្បីជជែកពីរឿងធ្វើបុណ្យនេះ ថ្លែងបន្តថា ព្រះសង្ឃ គណៈកម្មការវត្ត និងពុទ្ធបរិស័ទចំណុះជើងវត្តប៉ាក់ណាម បានយល់ព្រមរួចហើយ ថានឹងទទួលអង្គកឋិនទានពីក្រុមលោក។ លោកថា ក្រុមការងារលោកបានអំពាវនាវពុទ្ធបរិស័ទក្នុង និងក្រៅប្រទេស ហើយក៏បានកក់រថយន្ត កក់រោង ដើម្បីត្រៀមលក្ខណៈធ្វើពិធីបុណ្យនេះ។ តែលោកថា នៅពេលដែលពិធីនេះជិតចូលមកដល់ទៅហើយនោះ ស្រាប់តែពុទ្ធបរិស័ទចំណុះជើងវត្តប៉ាក់ណាម ប្រាប់ថា អាជ្ញាធរ និងការិយាល័យធម្មការ និងសាសនាស្រុកកោះធំ មិនអនុញ្ញាតឲ្យមានអង្គកឋិនទាន ដង្ហែទៅកាន់វត្តប៉ាក់ណាម ឡើយ ដោយលើកមូលហេតុថា ព្រះវិហារវត្តនេះបាក់បែក វាជាកឋិនរបស់បក្សប្រឆាំង និងថាព្រះសង្ឃចំនួន ២អង្គ ដែលគង់នៅវត្តនោះដាច់ព្រះវស្សា មិនអាចទទួលគ្រងកឋិនបាន។
យុវជនដដែលឲ្យដឹងបន្តថា ដោយសារតែខ្លាចមានអង្គកឋិនទានដង្ហែទៅទីនោះ ពេលនេះអាជ្ញាធរ និងការិយាល័យធម្មការ និងសាសនាស្រុកកោះធំ បាននាំព្រះកាយព្រះសង្ឃទាំង ២អង្គនៅក្នុងវត្ត គឺព្រះចៅអធិការជាខ្មែរក្រោមមួយអង្គ ទៅគង់នៅវត្តផ្សេងទៀត រួចទុកឲ្យវត្តនៅទំនេរគ្មានព្រះសង្ឃគង់នៅ។ ដូចនេះ រហូតមកទល់ពេលនេះ វត្តប៉ាក់ណាម មិនមានព្រះសង្ឃគង់នៅដើម្បីទទួលគ្រងកឋិនទានពីពុទ្ធបរិស័ទនោះទេ។
យ៉ាងណា យុវជនរូបនេះថ្លែងថា ក្រុមអ្នកផ្ដើមបុណ្យ នឹងនៅតែបន្តធ្វើពិធីសូត្រមន្តនៅថ្ងៃទី៧ វិច្ឆិកា នៅក្នុងវត្តចាស់ត្រើយខាងកើតទន្លេ ទល់មុខព្រះបរមរាជវាំង និងដង្ហែអង្គកឋិនទានដូចការគ្រោងទុក ទៅកាន់វត្តប៉ាក់ណាម នៅថ្ងៃទី៨ ខែវិច្ឆិកា៖ «គោលជំហរពួកខ្ញុំនៅតែទៅតាមការកំណត់ ទោះគេបិទទ្វារ ឬដាក់ប៉ូលិសបិទផ្លូវ ខ្ញុំត្រូវដង្ហែអង្គកឋិនទៅឲ្យដល់ ធ្វើឲ្យគេអ្នកផ្ដើមបុណ្យ និងពុទ្ធបរិស័ទដែលចូលរួមអស់ចិត្ត បើគ្មានលោកទទួលខ្ញុំយកមកវិញ ថ្ងៃណាមួយ ខ្ញុំនឹងធ្វើបុណ្យផ្កាសាមគ្គីខ្ញុំបវារណាជាបច្ច័យ៤ ប្រគេនលោកវិញក៏បានដែរ ទិសដៅថវិកាដែលយើងប្រមូលបាន គឺយកទៅកសាងវត្តនៅព្រំដែន»។
នៅកម្ពុជា ព្រះពុទ្ធសាសនា គឺជាសាសនារបស់រដ្ឋ។ យុវជន សុង សារិទ្ធ យល់ឃើញថា អាជ្ញាធរមិនគួរយករឿងនយោបាយមកលាបពណ៌ដាក់គ្នាក្នុងរឿងធ្វើបុណ្យទាននោះទេ ហើយថា ពលរដ្ឋគ្រប់រូប ទោះមកពីគណបក្សនយោបាយណាក៏ដោយ សុទ្ធតែមានសិទ្ធិស្មើគ្នាទាំងអស់ ក្នុងការប្រារព្ធពិធីបុណ្យប្រពៃណីរបស់ខ្លួន៖ «គេថាអត់ឲ្យធ្វើកឋិនទៅទេ គេចោទពួកខ្ញុំថាកឋិនហ្នឹងជាកឋិនរបស់ឯកឧត្តម រៀល ខេមរិន្ទ្រ របស់បក្សប្រឆាំង ហើយថាទៅវាយយួន គាត់បែរជាលាបពណ៌ពួកខ្ញុំដែលជាយុវជន មិនបានលើកទឹកចិត្តពួកខ្ញុំធ្វើបុណ្យខាងព្រះពុទ្ធសាសនា ហើយគាត់បែរជាមកលាបពណ៌ខ្មែរគ្នាឯងទៀត បើថាខ្ញុំធ្វើបុណ្យហើយមកចាប់ខ្ញុំដាក់គុកទៀត វាក៏ល្អមើលដែរ»។
កម្ពុជា មានវត្តព្រះពុទ្ធសាសនាទាំងអស់ជិត ៤.៧០០វត្ត និងមានព្រះសង្ឃប្រមាណ ៦ម៉ឺនអង្គ។ អង្គកឋិនទានបានដើរតួនាទីសំខាន់មួយក្នុងការរួមចំណែកអភិវឌ្ឍវត្តអារាមនៅកម្ពុជា តាមរយៈការប្រមូលបច្ច័យពីពុទ្ធបរិស័ទ ដើម្បីវេរប្រគេនព្រះសង្ឃ និងកសាងសមិទ្ធផលនានានៅក្នុងវត្ត។
ពលរដ្ឋរស់នៅក្បែរវត្តប៉ាក់ណាម ម្នាក់ដែលស្នើមិនបញ្ចេញឈ្មោះ និងសំឡេង មានប្រសាសន៍ថា អាជ្ញាធរ និងមន្ត្រីធម្មការ និងសាសនាស្រុកកោះធំ ពិតជាហាមមិនឲ្យខ្មែរក្រោម និងយុវជនធ្វើបុណ្យដង្ហែអង្គកឋិនទានទៅកាន់វត្តប៉ាក់ណាម ប្រាកដមែន។ លោកថា ក្នុងនាមលោកជាពលរដ្ឋម្នាក់ និងជាពុទ្ធបរិស័ទចំណុះជើងវត្តផងនោះ លោកពិតជាមិនសប្បាយចិត្តទាល់តែសោះ ចំពោះទង្វើរបស់អាជ្ញាធរ។ លោកបញ្ជាក់បន្ថែមថា រហូតមកទល់ពេលនេះ លោកមិនទាន់ដឹងថា តើព្រះសង្ឃទាំង ២អង្គដែលត្រូវបានគេនាំព្រះកាយចេញពីវត្តនោះ នឹងវិលត្រឡប់មកគង់ក្នុងវត្តនៅពេលណានោះទេ។
ចំណែកប្រធានសហគមន៍ខ្មែរកម្ពុជាក្រោម លោក ថាច់ សេដ្ឋា មានប្រសាសន៍ថា កន្លងមក គេធ្លាប់តែឮថាអាជ្ញាធរវៀតណាម ហាមឃាត់ និងរឹតបន្តឹងខ្មែរក្រោមមិនឲ្យប្រារព្ធពិធីបុណ្យប្រពៃណីរបស់ខ្មែរនៅដែនដីកម្ពុជាក្រោម។ តែលោកថា ការប្រើមធ្យោបាយជម្លៀសព្រះសង្ឃចេញពីវត្តកុំឲ្យទទួលគ្រងកឋិន គឺជារឿងដែលលោកកម្រឃើញកើតមាន៖ «សកម្មភាពនេះខ្ញុំមើលឃើញដូចអាក្រក់មើល ពីព្រោះនាំគ្នាមកជម្លៀសលោកយកចេញទៅគង់នៅវត្តផ្សេងៗ បញ្ចេះឲ្យគេថាលោកដាច់វស្សា មិនអាចធ្វើកឋិនបាន។ ហេតុផលខ្លះទៀត ខ្លាចយើងទៅរករឿងមានបញ្ហាជាមួយយួន វាជាហេតុផលមិនត្រឹមត្រូវនៅលើទឹកដីខ្មែរ ហើយដោយតំបន់នោះ យួន នៅច្រើន មិនហ៊ានឲ្យយើងទៅក៏ជារឿងមួយអស់សំណើច»។
កន្លងមក វត្តប៉ាក់ណាម ក៏ធ្លាប់ត្រូវបាន លោក ម៉ម សូណង់ដូ ប្រធានគណបក្សសំបុកឃ្មុំសង្គមប្រជាធិបតេយ្យ ដង្ហែអង្គកឋិនទានទៅកាន់ទីនោះផងដែរ។ លើសពីនេះ លោក ម៉ម សូណង់ដូ ក៏ធ្លាប់បួសជាសង្ឃគង់នៅវត្តប៉ាក់ណាម មួយរយៈ ដោយសារលោកមើលឃើញថា វត្តនេះពុំសូវមានព្រះសង្ឃគង់នៅ និងមានជនជាតិវៀតណាម ចូលរស់នៅក្បែរទីនោះច្រើន។
ចំពោះការហាមឃាត់ដង្ហែអង្គកឋិនទាននៅពេលនេះវិញ វិទ្យុអាស៊ីសេរី មិនអាចទាក់ទងអភិបាលស្រុកកោះធំ លោក ចាន់ សុខុម ដើម្បីស្នើសុំការឆ្លើយតបបានឡើយ ដោយអ្នកលើកទូរស័ព្ទថាលោកចេញទៅក្រៅ។
វិទ្យុអាស៊ីសេរី ក៏មិនអាចស្នើសុំការឆ្លើយតបពីអ្នកនាំពាក្យក្រសួងធម្មការ និងសាសនា លោក សេង សុមុនី បាននៅឡើយដែរ ដោយលោកមានប្រសាសន៍ថា លោកជាប់រវល់។
យ៉ាងណា លោក ថាច់ សេដ្ឋា មានប្រសាសន៍ថា អាជ្ញាធររដ្ឋាភិបាលគួរលើកទឹកចិត្តឲ្យពលរដ្ឋខ្មែរ ធ្វើដំណើរទៅកាន់តំបន់ព្រំដែនកាន់តែច្រើន ដើម្បីអាចឲ្យពួកគេបានស្វែងយល់ពីស្ថានភាពនៅតាមព្រំដែន។ មួយវិញទៀត លោកថា រដ្ឋាភិបាលក៏គួរខិតខំអភិវឌ្ឍនៅតាមតំបន់ព្រំដែន ក្នុងនោះមានដូចជាស្ពាន ថ្នល់ និងវត្តអារាម ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ