ភារកិច្ចរបស់ប៉ូលិសក្នុងការទទួលពាក្យបណ្ដឹងករណីគ្រោះថ្នាក់ចរាចរណ៍
2010.04.13
ដើម្បីងាយស្រួលក្នុងការស្ដាប់តាមដានសេចក្ដីអត្ថាធិប្បាយនេះ យើងសុំដាក់ឈ្មោះក្លែងដល់ម្ចាស់ចម្ងល់ថា លោក គ.ស។ លោក គ.ស បានលើកយកករណីគ្រោះថ្នាក់ចរាចរណ៍របស់លោកមួយដែលបានកើតឡើងកាលពីដើមខែមេសា ឆ្នាំ២០១០ នេះ។
លោក គ.ស បានរ៉ាយរ៉ាប់ថា កាលពីដើមខែមេសា លោក ប្រពន្ធលោក និងចៅ បានរងគ្រោះថ្នាក់ចរាចរណ៍ ដោយសារមានឡានមួយមកកៀរម៉ូតូលោកនៅក្នុងពេលធ្វើដំណើរតាមដងផ្លូវនៃខេត្តមួយ។ ឡានដែលកៀរលោកមិនបានឈប់ទេ គឺបើករត់តាមផ្លូវដដែលនោះ។ ក្រោយដួលម៉ូតូប្រមាណ ៥នាទី អ្នកភូមិម្នាក់ក្នុងចំណោមអ្នកភូមិជាច្រើនទៀតដែលមកជួយលោក បានហៅទូរស័ព្ទទៅនគរបាលមូលដ្ឋាន ដើម្បីឱ្យជួយចាប់ឡានបង្កគ្រោះថ្នាក់នោះ។ ក៏ប៉ុន្តែលោក គ.ស មិនបានដឹងថា អ្នកភូមិគាត់ទាក់ទងនគរបាលបាន ឬមិនបានទេ។ ប្រហែលមួយម៉ោងក្រោយមក កូនរបស់លោក គ.ស បានទៅសុំជំនួយពីនគរបាលប៉ុស្តិ៍ ដើម្បីសរសេរពាក្យប្ដឹងដាក់ទៅផ្នែកចរាចរណ៍ស្រុក។
នគរបាលប៉ុស្តិ៍មិនផ្ដល់ជំនួយទេ ដោយប្រាប់ឱ្យកូនរបស់លោក គ.ស រង់ចាំដល់ថ្ងៃស្អែក ពីព្រោះគាត់កំពុងលេងអុក។ បន្ទាប់មកកូនរបស់លោក គ.ស បានទៅដាក់ពាក្យប្ដឹងនឹងនគរបាលប៉ុស្តិ៍នៅផ្នែកចរាចរណ៍ស្រុក។ នៅទីនោះ នគរបាលប៉ុស្តិ៍នៅផ្នែកចរាចរណ៍ស្រុកបាននិយាយថា គាត់មិនអាចធ្វើអ្វីកើតទេ ហើយក៏មិនដឹងទៅរកឡានកៀរនោះឯណាដែរ លុះត្រាតែលោក គ.ស ចាប់ឡាននោះមកបាន។
លោក គ.ស បានបញ្ជាក់ថា ឡាននោះជាឡានក្រុមសិល្បៈដែលគេទើបនឹងជួលមកលេងនៅភូមិមិនឆ្ងាយប៉ុន្មានពីកន្លែងកើតហេតុ និងថែមទាំងបានផ្ដល់នាមប័ណ្ណនៅនឹងអ្នកភូមិនោះផង។
បន្ទាប់ពីបានរៀបរាប់ភិនភាគឡាន និងបង្ហាញនាមប័ណ្ណរបស់ក្រុមសិល្បៈនោះមក មាននគរបាលម្នាក់ប្រាប់ថា គាត់ស្គាល់ឡាន ព្រមទាំងម្ចាស់ឡាននោះហើយ ក៏ប៉ុន្តែម្ចាស់ឡាននោះជាមនុស្សមានលុយច្រើនមិនអាចប៉ះពាល់បានទេ។
ប្រហែលមួយម៉ោងបន្ទាប់មកទៀត លោកបានទទួលទូរស័ព្ទពីនគរបាលស្រុកម្នាក់ប្រាប់ឱ្យជួបគាត់នៅកន្លែងមួយក្រៅការិយាល័យធ្វើការ និងមានចម្ងាយប្រមាណជាងបួនគីឡូម៉ែត្រពីផ្ទះ។ កូនប្រពន្ធរបស់លោក គ.ស និងសាក្សីពីររូបផង បានទៅជួបនគរបាលរូបនោះ។ បន្ទាប់ពីសាក្សីរៀបរាប់ពីភិនភាគឡាននោះហើយ នគរបាលរូបនោះប្រាប់ថា ជងរងគ្រោះមិនមានភស្តុតាងទេ ដូចជាបំណែកកញ្ចក់ជាដើម។ ដូច្នេះគេមិនអាចធ្វើការចោទប្រកាន់នរណាបានទេ។ ទីបំផុត ករណីរបស់លោក គ.ស នគរបាលមិនបានអើពើធ្វើកំណត់ហេតុណាមួយទេ ហើយលោក គ.ស ក៏មិនបានដាក់ពាក្យប្ដឹងទៅទីណាទៀតដែរ។
ក៏ប៉ុន្តែក្នុងបញ្ហានេះ លោក គ.ស មានចម្ងល់មួយចំនួន ហើយលើកសំណួរមកនាទីអ្នកស្ដាប់វិទ្យុអាស៊ីសេរីថា តើនគរបាលចរាចរណ៍មានតួនាទី និងភារកិច្ចដូចម្ដេចខ្លះនៅក្នុងករណីគ្រោះថ្នាក់ចរាចរណ៍ដូចគ្រួសារលោកនេះ?
ទាក់ទងនឹងបញ្ហានេះ ខ្ញុំបាទបានជម្រាបសួរទៅមន្ត្រីជាន់ខ្ពស់មួយរូបនៃនាយកដ្ឋានកណ្ដាលសណ្ដាប់ធ្នាប់សាធារណៈ អគ្គស្នងការនគរបាលជាតិ លោកបានពន្យល់ដោយសុំមិនបាច់បញ្ចេញឈ្មោះថា ៖ «ធម្មតាក្រោយទទួលព័ត៌មានភ្លាម ប៉ូលិសត្រូវទៅកន្លែងកើតហេតុ មិននៅលេងអុកអ៊ីចឹងបានទៀតទេ។ ត្រូវទៅទទួលរបាយការណ៍ព័ត៌មាន ហើយទៅស៊ើបបញ្ជាក់នៅកន្លែងកើតហេតុ កើតអីត្រង់ណាៗ ឱ្យជនរងគ្រោះចង្អុលបង្ហាញឡើង ដើម្បីបញ្ជាក់ថា បណ្ដឹងហ្នឹងត្រឹមត្រូវ ឬមិនត្រឹមត្រូវ ក្រែងលោបណ្ដឹងហ្នឹងចង់ឆ្លើយដាក់ ឬចោទប្រកាន់នរណាមួយ។ រួចហើយត្រូវដំណើរការអង្កេត ហើយបើសិនមានព័ត៌មានពីជនរងគ្រោះបន្តទៀតថា ឥឡូវគេសង្ស័យថា ឈ្មោះនេះ ឈ្មោះនោះ ក៏ប៉ូលិសហ្នឹងត្រូវអង្កេតបន្តទៅទៀត។ មិនមែនទុករឿងហ្នឹងចោលអ៊ីចឹងទេ»។
លោក គ.ស បានសួរបន្តថា ក្នុងពេលដែលជនរងគ្រោះទៅសុំជំនួយខាងផ្លូវច្បាប់ពីនគរបាលដើម្បីដាក់ពាក្យបណ្ដឹង ហើយនគរបាលមិនយកចិត្តទុកដាក់ ឬអើពើ ព្រោះតែខ្លួនជាប់លេងអុក តើនគរបាលនោះមានបញ្ហាអ្វីខុសនឹងច្បាប់ ឬតួនាទី និងភារកិច្ចរបស់ខ្លួនឬទេ?
មន្ត្រីនាយកដ្ឋានកណ្ដាលសណ្ដាប់ធ្នាប់សាធារណៈ អគ្គស្នងការនគរបាលជាតិ មានប្រសាសន៍ថា ៖ «រឿងហ្នឹងគេហៅថា រំលោភមុខងារ។ រឿងហ្នឹងគេត្រូវតែដាក់វិន័យតាមរដ្ឋបាល តាមបទកំណត់នគរបាលជាតិ។ តួនាទី និងភារកិច្ចត្រូវកំណត់ឡើងវិញ ហើយត្រូវដោះដូរ ឬមួយយ៉ាងម៉េចទៀត»។
ទាក់ទងភស្តុតាងនគរបាលបានប្រាប់ជនរងគ្រោះខាងលោក គ.ស ឱ្យភស្តុតាងជារថយន្ត ឬបំណែកកញ្ចក់រថយន្តដែលកៀរនោះបានទើបនគរបាលធ្វើការកើត។
លោក គ.ស សួរថា តើការទាមទារបែបនេះ ជាតម្រូវការយ៉ាងណាដែរខាងផ្លូវច្បាប់?
មន្ត្រីដដែលមានប្រសាសន៍បញ្ជាក់ថា ៖ «គេរកហ្នឹង គេរកត្រឹមរបស់គេហើយ គឺគេរកភស្តុតាង ឬគេហៅថា អំណាង ដើម្បីដាក់បន្ទុកទៅលើជនណាម្នាក់ ហើយប៉ូលិសក៏ត្រូវទៅធ្វើកន្លែងកើតហេតុដែរ។ ចុះផ្ទាល់ គឺថា ដឹកដៃអ្នករងគ្រោះ បើអាចធ្វើទៅបាន គឺទៅដល់កន្លែងកើតហេតុភ្លាមតែម្ដង ឱ្យនិយាយឡើងវិញថា មើលតើការនិយាយ និងរឿងហេតុហ្នឹងវាស្របនឹងសភាពការណ៍ពិតឬអត់? គេមានវិធីសាស្ត្រដើម្បីវាយតម្លៃចេញពីណាទៅណា? ហើយមាននរណាដឹងឮខ្លះ? បន្សល់ទុកអីខ្លះ? ប៉ុន្តែទោះជាយ៉ាងណាក៏ដោយ ប៉ូលិសត្រូវតែធ្វើត្រូវតែចាត់ការភ្លាម។ គេប្ដឹងហ្នឹងខុស ឬមិនខុសក៏ដោយ អាហ្នឹងរឿងគេ យើងអាចចោទប្រកាន់គេពីព័ត៌មានមិនពិតអីវិញ។ ប៉ូលិសត្រូវតែទៅ»។
លោកបានពន្យល់បន្ថែមអំពីភស្តុតាងដូច្នេះ ៖ «ជួនបើរឿងកើតឡើងហើយ វាបាត់កន្លែងកើតអី ក្រែងលោគាត់រើសបាន។ បើប៉ូលិសទៅរក ជួនក៏រកមិនឃើញ។ អ៊ីចឹងបើយើងប្រមូលបានក៏គេយកហ្នឹងទីមួយ។ ទីពីរ ស្លាកស្នាមរងគ្រោះរបស់យើង បើខូចតែម៉ូតូ ម៉ូតូហ្នឹងវាខូចយ៉ាងម៉េច? បាក់កាំយ៉ាងម៉េចអីយ៉ាងម៉េច? ត្រូវទុកអាហ្នឹងឱ្យបាន ហើយបើយើងយកទៅធ្វើហើយ យើងទើបមកប្ដឹងតាមក្រោយ បាត់ភស្តុតាងហ្នឹងយ៉ាងម៉េចកើតទៀត? អ៊ីចឹងបានរឿងមួយចំនួនសុខចិត្តបាក់បែកយ៉ាងម៉េចទុកនៅប៉ូលិសរហូតពេលក្ដីក្ដាំគ្នាអត់ទាន់ដាច់។ ឡានបុកសើយពីមុខទៅក្រោយអីយ៉ាងម៉េចហ្នឹង អាហ្នឹងហើយជាភស្តុតាង ហើយបញ្ហាទី មានរបួសស្នាម មានសំបុត្រពេទ្យសំបុត្រអីបញ្ជាក់ថតយកមកឱ្យច្បាស់លាស់»។
ហើយវិធីស្រាវជ្រាវរកភស្តុតាងខ្លះមានដូចជា ៖ «ករណីថា រឿងហ្នឹងយូរបន្តិច មិនមែនជាករណីជាក់ស្ដែង អាហ្នឹងគេត្រូវរកភស្តុតាងហើយ។ បើសិនជាយូរពីរបីម៉ោងមិនមែនដេញប្រផាប់ចាប់ប្រភីងទេ រឿងហ្នឹងប៉ូលិសត្រូវអង្គុយអង្កេតអង្គុយគិតហើយ។ ត្រូវយកពាក្យបណ្ដឹងពាក្យអីហ្នឹងទៅពិចារណា។ មិនមែនចាប់បានភ្លាមតាមចម្លើយជនរងគ្រោះទេ គេត្រូវទៅអង្កេតជាសម្ងាត់សិន។ សម្ងាត់រួច បានជាចំហ របៀបកោះហៅមនុស្សហ្នឹងមក ឬក៏ចូលឆែកឆេរដកហូតវត្ថុតាងអីដែលពាក់ព័ន្ធសិន។ អាហ្នឹងវាប្រើពេល មិនមែនចាប់តាមចិត្តយើងអីបានទេ។ ករណីតាមការស្រាវជ្រាវនេះ ត្រូវទៅឆ្លងកាត់ព្រះរាជអាជ្ញា ព្រោះការឆែកឆេរទាំងឡាយ ព្រះរាជអាជ្ញាគេចេញដីកា។ បើសិនជាដេញប្រផាប់ចាប់ប្រភីងប្រហែលមួយម៉ោងមិនអីទេ ប៉ុន្តែបើលើសពីហ្នឹង បាត់ដានហើយបានយើងរកឃើញក្រោយ យើងត្រូវឆ្លងកាត់អាហ្នឹង ហើយចង់ចូលទៅឆែកឆេរករណីមិនជាក់ស្ដែងហ្នឹង ប៉ូលិសត្រូវតែសុំទៅព្រះរាជអាជ្ញា»។
លោក គ.ស មានចម្ងល់ទៀតថា តើហេតុអ្វីបានជានគរបាលហៅភាគីលោកទៅជួបសួរនាំនៅក្រៅកន្លែងធ្វើការ ហើយមិនមែនជាកន្លែងគ្រោះថ្នាក់ទៅវិញ?
ចំពោះចម្ងល់នេះ មន្ត្រីនៃនាយកដ្ឋានកណ្ដាលសណ្ដាប់ធ្នាប់សាធារណៈ អគ្គស្នងការនគរបាលជាតិ មានប្រសាសន៍បញ្ជាក់ថា «គេអាចសួរនៅត្រង់ណាក៏បានដែរ អត់ប្រកាន់ទេ។ គេអាចមកសួរជនរងគ្រោះនៅផ្ទះ។ ជួនអីបើករណីរក្សាការសម្ងាត់ គេយកជនរងគ្រោះសួរនៅកន្លែងកាហ្វេ កន្លែងអីស្ងាត់ក៏បាន ដើម្បីលាក់ការណ៍ខ្ពស់។ គេធ្វើកន្លែងណាក៏បាន លើកលែងតែករណីតទល់គ្នាអី គឺថា ត្រូវការមកស្នាក់ការ ឬករណីចង់ឃាត់ចង់ឃុំអី ត្រូវយកស្នាក់ការដាក់។ មិនឃាត់មនុស្សនៅក្នុងផ្ទះណាផ្សេងបានទេ»។
ប្រសិនបើលោកអ្នកមានចម្ងល់នានា ទាក់ទងនឹងបញ្ហាច្បាប់ ហើយចង់សួរមកនាទីយើង សូមលោកអ្នកទាក់ទងមកទូរស័ព្ទលេខ ០១២ ៧៧៦ ៥០៧៕
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ