បទពិសោធន៍របស់កសិករក្នុងការប្រើឡជីវឧស្ម័នផលិតពីលាមកសត្វ (ភាគ១)
2010.01.06
កសិករមួយចំនួនបានឲ្យដឹងថាឡជីវឧស្ម័ននេះ ងាយស្រួលក្នុងការប្រើប្រាស់និងជួយកាត់បន្ថយការចំណាយប្រាក់កាសប្រចាំថ្ងៃទៅលើឧស ធ្យូង ក្នុងការចម្អិនអាហារ ព្រមទាំងប្រេងកាតអាគុយសម្រាប់បំភ្លឺផ្ទះសម្បែង។
បុរសនិងស្រ្តីកសិកនៅតាមភូមិស្រុកនានាក្នុងតំបន់កម្មវិធីឡជីវឧស្ម័នថ្នាក់ជាតិ បានឲ្យដឹងដូចៗគ្នាអំពីការពេញចិត្តចំពោះឡជីវស្ម័ននេះ ដោយបញ្ជាក់ថា ឲ្យតែមានលាមកសត្វគោក្របីនិងជ្រូកដាក់បញ្ចូលឡទៅ ក៏អាចមានហ្គាសសម្រាប់ប្រើចង្ក្រានដាំស្ល និងចង្កៀងម៉័ងសុងបំភ្លឺលំនៅបានរាល់ថ្ងៃជាប់ជាប្រចាំ។
នាងខ្ញុំបានជម្រាបសួរកសិករមួយចំនួនអំពីបទពិសោធន៍ក្នុងការប្រើឡនេះ ជាពិសេសទាក់ទងនឹងការងារផ្គត់ផ្គង់លាមកសត្វដើម្បីទាញយកឧស្ម័នមកបម្រើសេចក្តីត្រូវការក្នុងគ្រួសារ។
បុរសកសិករម្នាក់ឈ្មោះ វូ លីម នៅភូមិត្រពាំងខ្នារ ឃុំយុទ្ធសាមគ្គី ស្រុកឧត្តុង ខេត្តកំពង់ស្ពឺ ដែលបានសង់ឡជីវឧស្ម័នប្រភេទ៦ម៉ែត្រត្រីគុណ ប្រើតាំងពីឆ្នាំ២០០៧មក បានរៀបរាប់ចាប់ពីដំណាក់កាលដំបូងបន្ទាប់ពីការសាងសង់រួចរាល់ហើយនោះ ៖ «លាមកគោដែលខ្ញុំប្រមូលដាក់ទៅឡហ្នឹងគឺមានក្បួនមានខ្នាតត្រឹមត្រូវ ថ្លឹងឲ្យគ្រប់២.៣០០គីឡូ ទឹកក៏២.៣០០លីត្រដែរ។ លាមកគោដែលមុនយើងប្រមូលមកដាក់ក្នុងឡហ្នឹង គឺដំបូងយើងចាប់ផ្តើមសាងសង់ យើងត្រូវប្រមូលវាច្រកកាតេចងមាត់ឲ្យជិត យើងកុំឲ្យវាស្ងួត រក្សាសំណើមវាឲ្យសើមជាប់។ ក្រោយមកបានយើងយកមកថ្លឹង បានយើងដាក់ក្នុងអាងលាយចំនួនលាមកនិងចំនួនទឹក គឺស្មើគ្នា។ លាយវាឲ្យល្បាយឲ្យសព្វស្មើទឹក។ ឧទាហរណ៍ថា អាងខ្ញុំហ្នឹងលាយម្តង៥០គីឡូ អ៊ីចឹងទៅទឹកក៏៥០លីត្រដែរ។ អ៊ីចឹងយើងលាយដាក់ទាល់តែគ្រប់២តោន ៣០០គីឡូ...»។
រីឯស្រ្តីកសិករម្នាក់ឈ្មោះ ឈួន ខ្លូត នៅភូមិអូរពពូល ឃុំកំពង់ត្រាចខាងកើត ស្រុកកំពង់ត្រាច ខេត្តកំពត ដែលបានប្រើឡជីវឧស្ម័ននេះបានជាងមួយឆ្នាំមកហើយ បានមានប្រសាសន៍ឲ្យដឹងអំពីវិធីម៉្យាងទៀតក្នុងការប្រមូលលាមកគោដើម្បីរក្សាឲ្យនៅសើមជាប់ មុននឹងយកទៅដាក់ក្នុងឡក្នុងជំហានដំបូងនេះ និងចំណុចសំខាន់មួយទៀតគឺការសម្អាតលាមកគោ។
កសិករឈ្មោះ ឈួន ខ្លូត បានឲ្យដឹងថា ៖ «ខ្ញុំធ្វើរោងមួយប្រក់ស្លឹកត្នោតដាក់ក្នុងម្លប់។ ខ្ញុំមានចាក់ខឿនខាងៗអ៊ីចឹងមក។ ខ្ញុំក្រាលតង់ហើយខ្ញុំលើកអាចម៍គោផ្សំទុករាល់ថ្ងៃ ពេលដាក់លាមកហ្នឹងខ្ញុំគ្របតង់ទៀត ហើយយើងឧស្សាហ៍ស្រោចទឹកវាតិចៗទៅ ដើម្បីឲ្យវានៅខាំជាប់គ្នាកុំឲ្យស្ងួត។ នៅពេលប្រមូលលាមកគោហ្នឹង ខ្ញុំសម្អាតកុំឲ្យមានក្រួស កុំឲ្យមានដីខ្សាច់ ត្រូវបោសកន្លែងក្រោលគោឲ្យស្អាត កុំឲ្យមានដីខ្សាច់ដីអីហ្នឹង ដល់ពេលយើងចាក់ចូលក្នុងឡទៅ វាមានកកនៅបាទឡ។ ខ្ញុំធ្វើតាមអ្វីដែលបានរៀនទាំងអស់...»។
បុរសនិងស្រ្តីកសិករទាំងពីររូបនេះ ក៏បានបញ្ជាក់ប្រាប់ដូចគ្នាផងដែរថា បន្ទាប់ពីដាក់បញ្ជូលលាមកគោដែលកូរលាយជាមួយនឹងទឹកទៅក្នុងឡគ្រប់ចំនួនទៅតាមការកំណត់នៃបច្ចេកទេសនៅក្នុងជំហានទីមួយនេះរួចហើយ គឺគេត្រូវទុកយ៉ាងតិចចំនួនមួយសប្តាហ៍ទើបគេអាចទទួលបានបរិមាណឧស្ម័នគ្រប់គ្រាន់សម្រាប់យកមកប្រើប្រាស់បាន។
បន្ទាប់ពីដំណាក់កាលដំបូងនោះមក លោក វូ លីម ដែលជាភ្នាក់ងារពេទ្យសត្វភូមិមួយរូបដែរនោះ បានអធិប្បាយអំពីបរិមាណលាមកគោដែលត្រូវដាក់បញ្ចូលទៅក្នុងឡប្រចាំថ្ងៃ ដើម្បីធានាឲ្យមានហ្គាសសម្រាប់ប្រើប្រាស់ជាប់រហូត ៖ «ក្រោយពីពេល(ចាក់)គ្រប់២តោន៣រយគីឡូហើយ ដល់រយៈពេលមួយសប្តាហ៍ឡហ្នឹងវាអាចមានហ្គាសហើយ អ៊ីចឹងយើងត្រូវថែមប្រចាំថ្ងៃ។ លាមកគោដែលប្រមូលមក យើងត្រូវរើសឲ្យស្អាត យើងកើបពីក្រោលមកសម្អាតឲ្យស្អាត។ ពេលដែលយើងដាក់កូរត្រូវយកសំរាមចេញឲ្យអស់។ ថែមប្រចាំថ្ងៃឡខ្នាត៦គូបហ្នឹង កម្រិតទាបគឺចាប់ពី៤០ទៅ៦០គីឡូក្នុងមួយថ្ងៃ ហើយទឹកក៏៦០លីត្រដែរ គឺស្មើគ្នាដែរ»។
ចំណែកអ្នកស្រី ឈួន ខ្លូត ដែលក៏ជាគ្រូបង្គោលក្នុងភូមិមួយរូបផងដែរ ខាងផ្នែកអប់រំផ្សព្វផ្សាយនិងបង្រៀនអំពីបច្ចេកទេសធ្វើស្រែតាមបែបប្រព័ន្ធប្រពលវប្បកម្ម ដែលជាការដាំឬស្ទូងស្រូវតែមួយដើម ប៉ុន្តែផ្តល់ទិន្នផលខ្ពស់និងការប្រើជីធម្មជាតិក្នុងការដាំដុះដំណាំកសិកម្ម បានឲ្យដឹងបន្ថែមអំពីប្រការនេះ ហើយនិងការពិនិត្យកម្រិតសម្ពាធឧស្ម័នដើម្បីឲ្យដឹងថា នៅពេលណាដែលល្មមអាចប្រើបាននិងពេលណាដែលត្រូវផ្អាកប្រើមួយរយៈសិន។
អ្នកស្រី ឈួន ខ្លូត មានប្រសាសន៍ដូច្នេះ ៖ «កូរមុនដំបូងច្របាច់ បើចាក់រាល់ថ្ងៃអត់ច្របាច់ទេ។ យើងចាក់លាមកគោហើយយើងចាក់ទឹកទៅ ត្រាំឲ្យវារលាយដូចថា ចាក់ពីព្រលឹមត្រាំចោលឲ្យលាមកវារលាយទៅ ស្រួលកូរណាស់ គ្រវីតែពីរបីឆាច់ទៅវារលាយហើយ ដល់ពេលមួយកំណាត់ថ្ងៃអីចាំយើងបញ្ចូលទៅ។ មើលកុងទ័រនាឡិកាដែលដាក់នៅលើចង្ក្រាន បើវាឡើងដល់១២គីឡូ គឺដឹងថា មានហ្គាសអាចប្រើបាន។ បើប្រើទៅថា ចុះដល់ត្រឹមលេខ៤អីហ្នឹង យើងឈប់ប្រើសិនទៅ ហើយលាយលាមកគោបញ្ចូលទុកឲ្យវាឡើងដល់១០ឬ១១គីឡូ សឹមចាប់ផ្តើមប្រើទៀត»។
បុរសកសិករនិងស្រ្តីមេផ្ទះជាច្រើននៅខេត្តផ្សេងៗទៀតដែលបានប្រើឡជីវឧស្ម័ននេះ ក៏បានបញ្ជាក់ប្រាប់ដូចៗគ្នាថា ជាទូទៅចំពោះឡប្រភេទ៦ម៉ែត្រត្រីគុណ បើគ្រួសារដែលមានសមាជិក៥នាក់ គឺគេអាចប្រើចង្ក្រាន២ចម្អិនអាហារទាំងបីពេល និងអាចប្រើចង្កៀងម៉័ងសុង២ ដុតបំភ្លឺបានរហូតដល់ជិតពាក់កណ្តាលអធ្រាត្រយ៉ាងបរិបូ ហើយក៏មិនដែលជួបបញ្ហាអ្វីឡើយក្នុងរយៈពេលប្រើប្រាស់ប៉ុន្មានឆ្នាំកន្លងទៅនេះ៕