ទន្ទឹមគ្នានេះ គេមានទស្សនៈថា ស្ត្រីដែលមានស្បែកសម្បុរស្រអែម ឬខ្មៅវិញ គឺដោយសារមានជីវភាពរស់នៅលំបាក ធ្វើការហាលថ្ងៃ ទើបស្បែកមុខ និងខ្លួនប្រាណ ប្រែក្លាយជាសម្បុរស្រអែម ឬខ្មៅ។
នៅក្នុងសង្គមកម្ពុជាបច្ចុប្បន្ន ស្ត្រីខ្មែរភាគច្រើនដែលមានវ័យក្មេងៗ និងខ្លះមានវ័យក្រោម៥០ឆ្នាំ ដែលសម្បូណ៌ទ្រព្យសម្បត្តិ បានចំណាយប្រាក់កាសយ៉ាងច្រើន ដើម្បីកែសម្ផស្សធ្វើឲ្យស្បែករបស់ខ្លួនមានពណ៌ស ទោះបីជាខ្លួនកើតមកមានស្បែកសម្បុរស្រអែម ឬខ្មៅពីកំណើតក៏ដោយ។
ប្រការនេះ បានញ៉ាំងឲ្យមានស្ត្រីខ្លះ រហូតដល់ប្រើប្រាស់សេវាបកស្បែកមុខ ខ្លួនប្រាណ ដើម្បីចង់បានសម្បុរស និងកែទម្រង់ភ្នែក ច្រមុះ បបូរមាត់ ជាដើម ដោយពុំបានគិតពីផលវិបាកដល់សុខភាពទៅថ្ងៃអនាគត។
មន្ត្រីសង្គមស៊ីវិលខ្លះ និងវេជ្ជបណ្ឌិតជំនាញផ្នែកសុខភាពនៅកម្ពុជា អះអាងថា ស្ត្រីដែលប្រើវិធីបកស្បែក ព្រោះមានទស្សនៈ និងការយល់ឃើញថា សម្បុរស្បែកស ជាសម្បុរស្រស់ស្អាត ទទួលជោគជ័យក្នុងជីវិត និងមានឋានៈខ្ពង់ខ្ពស់ក្នុងសង្គមនោះ គឺជាការយល់ច្រឡំ និងនាំឲ្យមានគ្រោះថ្នាក់ដល់សុខភាពទៅថ្ងៃអនាគត។
លោកវេជ្ជបណ្ឌិត លី ចេងហ៊ុយ អ្នកជំនាញផ្នែកសុខភាព និងជាប្រធានទស្សនាវដី្តសុខភាពយើង មានប្រសាសន៍ថា ការបកស្បែក គឺអាចនាំឲ្យមានគ្រោះថ្នាក់ដល់សុខភាព ដែលមានស្ត្រីខ្លះអាចប្រតិកម្មខ្លាំងទៅនឹងផលិតផលដែលប្រើប្រាស់សម្រាប់បកស្រទាប់ស្បែកនោះ៖ «ពួកគាត់សព្វថ្ងៃនេះ គឺប្រើប្រាស់ផលិតផលធ្វើឲ្យស្បែកស និយាយរួម ធ្វើឲ្យប៉ះពាល់ស្បែកទៅថ្ងៃក្រោយ ទៅតាមផលិតផលនោះឯង។ បើផលិតផលនោះ ពុំមានជាតិមេឡានីន (Melanin) ច្រើននោះ មិនអីទេ។ តែផ្ទុយទៅវិញ បើប្រើផលិតផលខ្លាំងៗ ដូចជាបកស្រទាប់ស្បែកទី១ ទី២ ចេញអ៊ីចឹង ហ្នឹងគ្រោះថ្នាក់ហើយទៅថ្ងៃក្រោយ»។
ក្នុងអត្ថបទចុះផ្សាយមួយក្នុងគេហទំព័ររបស់លោកវេជ្ជបណ្ឌិត ម៉េម៉េត អ៊ូហ្ស (Mehmet Oz) ឬហៅ Doctor Oz ដែលមានកម្មវិធីពិភាក្សាសុខភាព នៅស្ថានីយទូរទស្សន៍ក្នុងសហរដ្ឋអាមេរិកនេះ បានឲ្យដឹងថា ស្បែករបស់មនុស្សយើងម្នាក់ៗ គឺមានជាតិពណ៌ខ្មៅក្នុងស្បែក ដែលភាសាអង់គ្លេសហៅថា មេឡានីន។ អ្នកដែលមានសម្បុរស្បែកស្រអែម ឬខ្មៅ គឺមានជាតិមេឡានីនច្រើន ដែលអាចជួយការពារស្បែកមិនឲ្យឆាប់ជ្រីវជ្រួញ។ ប៉ុន្តែអ្នកដែលមានស្បែកសវិញ នៅពេលត្រូវកាំរស្មីព្រះអាទិត្យ (UV) កង្វះជាតិមេឡានីន អាចនាំឲ្យបំផ្លាញដល់កោសិកាស្បែក ជាហេតុបណ្ដាលឲ្យកើតជំងឺមហារីកស្បែក ដែលភាសាអង់គ្លេសហៅថា មេឡាណូម៉ា (Melanoma)។
ចំណែកនៅក្នុងប្រទេសកម្ពុជា ស្ត្រីវ័យក្មេងៗជាច្រើន បាននាំគ្នាជឿការផ្សព្វផ្សាយអំពីផលិតផល និងកន្លែងកែសម្ផស្ស ដែលផ្តល់សេវាបកស្រទាប់ស្បែកឲ្យមានសម្បុរស និងឡេប្រើលាបលើផ្ទៃមុខ និងខ្លួនប្រាណ។ បន្ថែមពីនេះ ស្ត្រីខ្លួនឯងផ្ទាល់គិតថា បើខ្លួនមានសម្បុរស ពួកគេនឹងមានភាពស្រស់ស្អាត អាចមានលទ្ធភាពច្រើនក្នុងការទាក់ទាញបុរសឲ្យស្រឡាញ់ខ្លួន ពីព្រោះបុរសខ្មែរភាគច្រើននិយមចូលចិត្ត និងស្រឡាញ់ស្ត្រីដែលមានសម្បុរស។
ម្ចាស់ហាងកែសម្ផស្ស ដ៏តូចមួយកន្លែង នៅផ្សារដើមថ្កូវ ក្រុងភ្នំពេញ កញ្ញា អ៊ុច សុភី បានប្រាប់វិទ្យុអាស៊ីសេរី តាមទូរស័ព្ទថា សព្វថ្ងៃនេះ ស្ត្រីវ័យក្មេងភាគច្រើន គឺប្រកួតប្រជែងគ្នាតាមរយៈសម្ភារៈនិយម និងយល់ឃើញថា សម្បុរស គឺជាសម្បុរដែលកំពុងពេញនិយមក្នុងសង្គម៖ «ភាគច្រើន បើខ្ញុំនិយាយសម្រាប់ក្មេងៗនៅស្រុកខ្មែរ គាត់និយមថា ឲ្យតែសគឺស្អាតហើយ។ តាមសម័យបច្ចុប្បន្ន គឺគេធ្វើតាមគ្នា ចង់បានសម្រស់ ម៉ូដអាវ ម៉ូដទូរស័ព្ទ។ បើនិយាយឲ្យខ្លីទៅ កត្តាសំខាន់ គឺស្ត្រីចង់បានសស្អាត និងមានមោទនភាពខ្លួនឯង»។
កញ្ញា អ៊ុច សុភី បន្តថា រូបនាងផ្ទាល់មិនដែលបកស្បែកមុខ ឬខ្លួនប្រាណទេ។ នាងមានសម្បុរស្រអែម ហើយភាពស្រស់ស្អាតរបស់នាង គឺពីធម្មជាតិ។ នាងបន្តថា ផលិតផលប្រើប្រាស់សម្រាប់បកស្រទាប់ស្បែកអតិថិជន គឺមានក្លិនខ្លាំងណាស់ នាំឲ្យពិបាកដកដង្ហើម ហើយនាងមិនហ៊ានប្រើទេ ដោយខ្លាចគ្រោះថ្នាក់៖ «ហាងខ្ញុំ អត់ដែលជួបប្រទះទេ ប៉ុន្តែគ្រាន់តែឮតាមហាងផ្សេងៗ ដែលវាមានបញ្ហា ពេលបកស្បែករហូតដល់ស្លាប់ បើនិយាយអាចប៉ះពាល់ដល់ហាងគេ។ កន្លែងក្មួយអត់ធ្វើទេ បើកុម្ម៉ង់ឡេបាន ចំហុយខ្លួន និងត្រាំទឹកដោះគោបាន។ ចង់នរណាថាអត់ចេះក៏ថាចុះ ថ្នាំបកស្បែកនោះខ្លាំងណាស់ ទ្រាំក្លិនអត់បានទេ»។
នៅក្នុងប្រទេសកម្ពុជា គេពុំដែលមានស្ថិតិច្បាស់លាស់ថា តើអត្រាស្ត្រីដែលប្រើសេវាបកស្បែក ឬមុខមាត់មានប៉ុន្មានភាគរយទេ ហើយវិធីនេះផ្តល់ផលវិបាកនាំឲ្យស្លាប់ ឬមានគ្រោះថ្នាក់ដល់សុខភាពយ៉ាងណានោះឡើយ។ ប៉ុន្តែសព្វថ្ងៃនេះ នៅទីក្រុងភ្នំពេញ និងនៅតាមបណ្ដាខេត្តមួយចំនួន ហាងកែសម្ផស្សបានបើករកស៊ីយ៉ាងច្រើន ដើម្បីផ្តល់សេវាដូចជាការបកស្បែកខ្លួនប្រាណ បកស្បែកមុខ ឬឡេសម្រាប់លាបមុខ ការខាត់ដុះស្បែកឲ្យស និងសេវាជាច្រើនទៀត ដោយពុំមានការត្រួតពិនិត្យត្រឹមត្រូវពីក្រសួងសុខាភិបាល និងអាជ្ញាធរពាក់ព័ន្ធនោះឡើយ។
អ្នកស្រី លឹម មុន្នី អនុប្រធានកម្មវិធីស្ត្រី និងកុមាររបស់សមាគមអាដហុក មានប្រសាសន៍ថា ក្រុមហ៊ុននាំចូលផលិតផលសម្រាប់បកស្បែកធ្វើឲ្យសម្បុរពណ៌ស ឬកន្លែងកែសម្ផស្ស គេបានចំណាយប្រាក់យ៉ាងច្រើន ដើម្បីផ្សព្វផ្សាយពីផលិតផល និងសេវារបស់គេ។
ប៉ុន្តែ ក្រសួងសុខាភិបាលវិញ មិនដែលបានអប់រំផ្សព្វផ្សាយឱ្យបានទូលំទូលាយដល់ពលរដ្ឋខ្មែរ អំពីវិធីថែរក្សាសម្រស់ ដោយធម្មជាតិនោះឡើយ៖ «ខាងអង្គការអត់មាននរណាមានកម្មវិធីអប់រំទេ។ គ្រាន់តែក្រសួងសុខាភិបាលធ្លាប់បានផ្សាយម្តងដែរ យូរហើយ គេថា ការបកស្បែក បើសិនជាខុសបច្ចេកទេស ឬប្រើថ្នាំខុស អាចធ្វើឲ្យកើតមហារីកស្បែក៥ឆ្នាំក្រោយមក។ ដូច្នេះ វាអត់ឈ្នះនឹងការផ្សព្វផ្សាយ ដែលប្រកបអាជីពហ្នឹង គេផ្សាយគ្រប់ប៉ុស្តិ៍វិទ្យុ ទូរទស្សន៍ ហើយគេជួលពិធីករ ពិធីការិនីស្អាតៗ ដើម្បីផ្សាយ ហើយផ្សាយហើយផ្សាយទៀត រៀងរាល់ថ្ងៃ»។
ទស្សនៈ និងការយល់ឃើញអំពីពណ៌សម្បុរស ថាជាសម្បុរស្រស់ស្អាត សាច់ល្អ និងមានឋានៈស្តុកស្តម្ភក្នុងសង្គមនេះ គឺច្រើនមានចំពោះពលរដ្ឋជាស្ត្រីនៅក្នុងទ្វីបអាស៊ី រួមមានប្រទេសកម្ពុជា ថៃ ឥណ្ឌា និងហ្វីលីពីន ជាដើម។ ផ្នត់គំនិតទាំងនេះ គឺមានភាពផ្ទុយស្រឡះពីសង្គមនៅបណ្ដាប្រទេសខាងលិច ដូចជានៅសហរដ្ឋអាមេរិក ជាដើម ដែលភាគច្រើន គេមានការផ្សព្វផ្សាយច្រើនតែអំពីផលិតផលធ្វើឲ្យស្បែកមានសម្បុរស្រអែម ឬសម្បុរពណ៌ត្នោត។
ក្នុងសង្គមនៃបណ្ដាប្រទេសលោកខាងលិច គេច្រើនមានទស្សនៈថា អ្នកដែលមានសម្បុរស្រអែម ឬសម្បុរពណ៌ត្នោត គឺជាអ្នកដែលសម្បូណ៌ប្រាក់កាស ដើរចាយវាយ ឈប់សម្រាកការងារ លំហែអារម្មណ៍សម្រាប់វិស្សមកាលនៅកន្លែងទេសចរណ៍ផ្សេងៗ និងទៅលំហែកាយនៅឆ្នេរសមុទ្រជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។