សង្ខេបព័ត៌មានប្រចាំសប្តាហ៍ ២៨ ធ្នូ ២០០៩ ដល់ ៣ មករា ២០១០
2010.01.03
លោក វោហារ ជាតិ អ្នកយកព័ត៌មានវិទ្យុអាស៊ីសេរី ប្រចាំរាជធានីភ្នំពេញ បានរាយការណ៍សរុបព័ត៌មានសំខាន់ៗនៅកម្ពុជាពីថ្ងៃ ២៨ ធ្នូ ឆ្នាំ២០០៩ ដល់ថ្ងៃ ៣ មករា ឆ្នាំ២០១០។
ចំនួនគ្រោះថ្នាក់ចរាចរណ៍ឆ្នាំ២០០៩នេះថយចុះតែចំនួនមនុស្សស្លាប់កើនឡើង
របាយការណ៍ក្រសួងមហាផ្ទៃបង្ហាញថា ចំនួនអ្នកស្លាប់ភ្លាមនៅនឹងកន្លែងគ្រោះថ្នាក់ចរាចរណ៍នាឆ្នាំ២០០៩ មានជាង ១.៦០០នាក់ គឺកើន ១០០នាក់បើប្រៀបទៅឆ្នាំ២០០៨។
ប្រធាននាយកដ្ឋានដឹកជញ្ជូនផ្លូវគោក និងលេខាធិការដ្ឋាននៃគណៈកម្មាធិការជាតិសុវត្ថិភាពផ្លូវគោក លោក ព្រាប ច័ន្ទវិបុល មានប្រសាសន៍ថា គ្រោះថ្នាក់ចរាចរណ៍នៅទូទាំងប្រទេសឆ្នាំ២០០៩ មានចំនួន ៦.០២១លើក និងមានមនុស្សស្លាប់ដល់ទៅជាង ៦.៥០០នាក់ របួសធ្ងន់ជាង ៥.០០០នាក់ និងរបួសស្រាលជាង ៥.២០០នាក់។ បើធៀបទៅនឹងឆ្នាំ២០០៨ គ្រោះថ្នាក់ចរាចរណ៍បានថយចុះ ៣% ប៉ុន្តែចំនួនអ្នកស្លាប់បានកើនឡើង ៥ %វិញ។
លោកបន្តថា ចំនួនគ្រោះថ្នាក់នៅទូទាំងប្រទេសក្នុងឆ្នាំ២០០៨ មានចំនួន ៦.២១៤លើក មនុស្សស្លាប់១.៥០០នាក់ និងរបួសធ្ងន់ជាង ៥.០០០នាក់ និងរបួសស្រាលជាង ៦.០០០នាក់។
ចំនួនពាក្យបណ្តឹងប្រឆាំងអ្នកកាសែតកើនឡើងក្នុងឆ្នាំ២០០៩
ក្លឹបអ្នកកាសែតកម្ពុជាបានប្រកាសឲ្យដឹងថា នៅក្នុងឆ្នាំ២០០៩នេះ ចំនួនពាក្យបណ្តឹងដែលមជ្ឈដ្ឋាននានាបានប្តឹងអ្នកកាសែតទៅតុលាការមានការកើនឡើងចំនួន ៨ករណីបើគិតក្នុងរយៈពេលដូចគ្នាប្រៀបធៀបឆ្នាំ២០០៨ កន្លងទៅ។
ចំពោះការចាប់ខ្លួននិងឃាត់ខ្លួនអ្នកកាសែតខ្មែរវិញក៏មានការកើនឡើងដែរដោយក្នុងឆ្នាំ២០០៩នេះ មានអ្នកកាសែតចំនួន ៣១នាក់បានជាប់ឃុំក្នុងនោះមាន ២នាក់ជាប់គុកដោយរងការចោទប្រកាន់ពីបទបរិហារកេរ្តិ៍ និងបទផ្សាយព័ត៌មានមិនពិត។
សភាជាតិប្រជុំពិភាក្សាលើសេចក្ដីព្រាងច្បាប់"អស្សាមិករណ៍"
រដ្ឋសភាបានបើកកិច្ចប្រជុំពិភាក្សាលើសេចក្តីព្រាងច្បាប់ស្តីពីអស្សាមិករណ៍នៅព្រឹកថ្ងៃច័ន្ទ ទី២៨ ធ្នូ ដោយមានសមាជិកចំនួន ៩៩រូបចូលរួមជជែកដេញដោលគ្នា។
លោក ជាម យៀប ប្រធានគណៈកម្មការសេដ្ឋកិច្ច ហិរញ្ញវត្ថុ ធនាគារ និងសវនកម្មរបស់រដ្ឋសភា បានមានប្រសាសន៍ថា សេចក្តីព្រាងច្បាប់អស្សាមិករណ៍ អនុញ្ញាតឲ្យអាជ្ញាធររដ្ឋាភិបាលអាចដកហូតដី ផ្ទះឯកជន និងទ្រព្យសម្បត្តិរដ្ឋសម្រាប់គម្រោងសាងសង់ផ្លូវស្ពាន និងដើម្បីបម្រើផលប្រយោជន៍សាធារណៈ។
លោកបន្តថា ថ្វីត្បិតតែមានការជំទាស់ខ្លាំងពីមន្ត្រីគណបក្សប្រឆាំង ប៉ុន្តែរដ្ឋសភាអនុម័តបានជំពូកទី១ នៅសល់៧ជំពូកទៀត។
លោក យឹម សុវណ្ណ សមាជិកសភា និងជាអ្នកនាំពាក្យគណបក្សសមរង្ស៊ីបានថ្លែងថា រដ្ឋាភិបាលគួរយកសេចក្តីព្រាងច្បាប់អស្សាមិករណ៍ទៅពិនិត្យកែប្រែចំណុចខ្វះខាត ដូចជាមាននិយមន័យមិនច្បាស់លាស់ និងចំណុចខ្វះខាតជាច្រើនទៀត។
សេចក្តីព្រាងច្បាប់អស្សាមិករណ៍មាន ៨ជំពូក និងចែកចេញជា ៣៩មាត្រាក៏បានកំណត់ថា នឹងផ្តល់សំណងត្រឹមត្រូវ និងយុត្តិធម៌សម្រាប់អ្នកដែលត្រូវបាត់បង់ដីធ្លី និងផ្ទះដោយសារតែការពង្រីកផ្លូវសម្រាប់ការសាងសង់ និងការអភិវឌ្ឍណាមួយ ដែលជាប្រយោជន៍សាធារណៈ។
សមាគមអាដហុកនឹងបញ្ជូនប៉ែនប៊ុណ្ណារ៍ឲ្យទៅបំពេញការងារនៅរតនគិរីវិញ
សមាគមអាដហុកបានសម្រេចរួចហើយថា នឹងបញ្ជូនសកម្មជនដ៏សកម្មរបស់ខ្លួនគឺ លោក ប៉ែន ប៉ុណ្ណារ៍ ឲ្យត្រឡប់ទៅបំពេញការងារនៅខេត្តរតនគិរីវិញ។
ការសម្រេចខាងលើនេះគឺបន្ទាប់ពីមានរឿងក្តីក្តាំតាមផ្លូវតុលាការកោះហៅលោកឲ្យចូលខ្លួនបំភ្លឺក្នុងរឿងចោទប្រកាន់ថា ញុះញង់អ្នកភូមិជនជាតិដើមភាគតិចនៅឃុំប៉ាតាង ឲ្យប្រព្រឹត្តអំពើហិង្សាក្នុងជម្លោះដីធ្លី ៣០០ហិកតាជាមួយក្រុមហ៊ុនមួយឈ្មោះ ឌីអឹម ហ្គ្រូប។
មន្ត្រីការពារសិទ្ធិមនុស្សនៃសមាគមអាដហុក លោក ប៉ែន ប៊ុណ្ណារ៍ នឹងត្រូវវិលទៅបំពេញភារកិច្ចជាអ្នកឃ្លាំមើលសិទ្ធិមនុស្សប្រចាំខេត្តរតនគិរីបន្តទៀតនៅដំណាច់ខែធ្នូ ឆ្នាំ២០០៩នេះ បន្ទាប់ពីលោកបានផ្លាស់ឲ្យមកបំពេញភារកិច្ចនៅស្នាក់ការកណ្តាលសមាគម អាដហុក នៅទីក្រុងភ្នំពេញកាលពីខែកក្កដាកន្លងទៅនេះ។
ប្រធានសមាគមអាដហុក លោក ធន សារាយ មានប្រសាសន៍ប្រាប់វិទ្យុអាស៊ីសេរីនៅថ្ងៃអង្គារ ទី២៩ ខែធ្នូ ឆ្នាំ២០០៩ ថា មានអ្នកភូមិជនជាតិដើមបានធ្វើជាសាក្សីបញ្ជាក់ថា លោក ប៉ែន ប៊ុណ្ណារ៍ មិនមានកំហុសពីរឿងចោទប្រកាន់ថា ជាអ្នកញុះញង់អ្នកភូមិឲ្យប្រព្រឹត្តអំពើហិង្សានោះទេ។
នាយករដ្ឋមន្ត្រីទូន្មានឲ្យគ្រួសារត្រកូលហ៊ុនកុំប្រព្រឹត្តអំពើអាក្រក់
លោកនាយករដ្ឋមន្រ្តី ហ៊ុន សែន បានប្រកាសទូន្មានឲ្យសាច់ញាតិនានានៃត្រកូលហ៊ុន កុំប្រព្រឹត្តអំពើអាក្រក់នៅក្នុងសង្គមកម្ពុជា ដោយលោកបានព្រមានថា ប្រជាពលរដ្ឋខែ្មរនានាអាចនឹងធ្វើការសងសឹកដោយគំនុំនៅថៃ្ងណាមួយ ដែលលោកអស់ពីអំណាចជានាយករដ្ឋមន្រ្តី។
លោកនាយករដ្ឋមន្រ្តី ហ៊ុន សែន បានមានប្រសាសន៍នៅក្នុងពិធីជួបជុំគ្រួសារដ៏ធំមួយដូច្នេះថា "ចូរចាំថា ក្មួយជាគោលដៅនៃការវាយប្រហារ!"។
លោក យឹម សុវណ្ណ តំណាងរាស្រ្តនៃគណបក្សសមរង្ស៊ីបានមានប្រសាសន៍សាទរចំពោះការទូន្មាននោះ "ជាការទូន្មានមួយដ៏ល្អសម្រាប់កូនចៅ ហើយសូមឲ្យទូន្មានមនុស្សនៅទៅទូទាំងប្រទេសកុំឲ្យមានអំពើអាក្រក់កើតនៅក្នុងសង្គមខ្មែរពីព្រោះអំពើអាក្រក់នាំមកនូវអយុត្តិធម៌"។
ជប៉ុនសន្យាផ្ដល់ជំនួយសង់អគារតម្កល់ឯកសារសាលាក្ដីខ្មែរក្រហម
ប្រទេសជប៉ុនសន្យាផ្តល់ជំនួយជាទឹកប្រាក់ចំនួនជាង ២លានដុល្លារដើម្បីសង់អគារតម្កល់ឯកសារសាលាក្តីខ្មែរក្រហម និងអគាររដ្ឋបាលរបស់គណៈមេធាវីកម្ពុជា។
មន្រ្តីផ្នែកកិច្ចការសាធារណៈនៃអង្គជំនុំជម្រះវិសាមញ្ញក្នុងតុលាការកម្ពុជា ឬតុលាការខ្មែរក្រហម លោក រាជ សម្បត្តិ បានមានប្រសាសន៍ប្រាប់វិទ្យុអាស៊ីសេរីថា ថវិកាជំនួយនេះនឹងបានជាប្រយោជន៍យ៉ាងច្រើនសម្រាប់ការសិក្សាស្វែងយល់របស់ប្រជាពលរដ្ឋខ្មែរ និងបរទេស។
ទាក់ទងនឹងថវិកាជំនួយនេះដែរ ទឹកប្រាក់មួយផ្នែកនឹងប្រើប្រាស់ដើម្បីសង់អគាររដ្ឋបាលដែលជាទីស្នាក់ការកណ្តាលរបស់គណៈមេធាវីកម្ពុជា។
លោកមេធាវី ជីវ សុងហាក់ ប្រធានគណៈមេធាវីកម្ពុជា បានមានប្រសាសន៍បញ្ជាក់ថា នេះគឺជាការជួយដល់ដំណើរការកែទម្រង់ប្រព័ន្ធតុលាការនៅកម្ពុជា។
ប្រធានសភាចុះហត្ថលេខាលើលិខិតស្នើសុំឲ្យដោះលែងអ្នកកាសែត២រូប
លោក ហេង សំរិន ប្រធានរដ្ឋសភាប្រទេសកម្ពុជាបានចុះហត្ថលេខាកាលពីថ្ងៃទី២៨ ខែធ្នូ លើលិខិតស្នើសុំអន្តរាគមន៍អ្នកតំណាងរាស្ត្រគណបក្សសមរង្ស៊ីចំនួន ១៦រូបផ្ញើជូនលោក អង្គវង្ស វឌ្ឍានា រដ្ឋមន្ត្រីក្រសួងយុត្តិធម៌សុំឲ្យចាត់វិធានការតាមនីតិវិធីឲ្យតុលាការដោះលែងអ្នកកាសែតចំនួនពីររូប គឺលោក ហង្ស ចក្រា និងលោក រស់ សុឃិត ចេញពីពន្ធនាគារ ប៉ុន្តែរហូតមកដល់ពេលនេះអ្នកកាសែតទាំងពីររូបនេះនៅមិនទាន់មានពន្លឺនៃការដោះលែងឲ្យមានសេរីភាពនៅឡើយ។
ជាស៊ីមអំពាវនាវឲ្យបុព្វជិតនិងគ្រហស្ថពង្រឹងការប្រតិបត្តិធម៌វិន័យ
លោក ជា ស៊ីម ប្រធានព្រឹទ្ធសភាកម្ពុជាបានអំពាវនាវដល់មន្ត្រីសង្ឃ និងពុទ្ធសាសនិកឲ្យខិតខំពង្រឹងការប្រតិបត្តិខ្លួនឯង និងជួយអប់រំពុទ្ធបរិស័ទតាមលំអានខ្លឹមសារក្នុងព្រះត្រៃបិដកដែលជាធម៌របស់ព្រះសម្មាសម្ពុទ្ធឲ្យបានត្រឹមត្រូវ។
មានប្រសាសន៍ក្នុងពិធីអបអរសាទរអនុសំវច្ចរមហាសន្និបាតមន្ត្រីសង្ឃទូទាំងប្រទេសឆ្នាំ២០០៩ លើកទី១៨ នៅថ្ងៃទី២៩ ខែធ្នូ នាទីក្រុងភ្នំពេញដែលមានមន្ត្រីសង្ឃនិងគ្រហស្ថប្រមាណជិត ១ពាន់នាក់ចូលរួម លោក ជា ស៊ីម បញ្ជាក់ថា តួនាទីព្រះពុទ្ធសាសនាផ្សាភ្ជាប់នឹងសង្គម ពង្រឹងគុណភាពលើអភិបាលកិច្ចគ្រប់លំដាប់ថ្នាក់ក្នុងជួរមន្ត្រីសង្ឃ ត្រូវផ្សាភ្ជាប់នូវបច្ចេកវិទ្យាទំនើបដើម្បីឲ្យកិច្ចការព្រះពុទ្ធ សាសនាមានសណ្ដាប់ធ្នាប់ និងធានាបាននូវសាមគ្គីភាពក្នុងជួរពុទ្ធសាសនិកជនដែលជាប្រការសំខាន់បំផុត។
សីលធម៌ក្នុងសង្គមកម្ពុជាបច្ចុប្បន្នបានធ្លាក់ចុះខ្លាំងហួសពីការស្មាន កុំថាឡើយតែគ្រហស្ថ សូម្បីតែព្រះសង្ឃ យាយជី តាអាចារ្យ ក៏ឈ្លោះវាយតប់ កាប់ចាក់គ្នាដែរ រហូតធ្វើឲ្យបណ្តាញព័ត៌មានខ្លះចំអកឡកឡឺយថា ជាសង្ឃទំនើង ឬអាចារ្យទំនើងទៀតផង។ លោក ជា ស៊ីម បានអំពាវនាវឲ្យបុព្វជិតនិងគ្រហស្ថពង្រឹងការប្រតិបត្តិធម៌វិន័យឲ្យបានខ្ជាប់ខ្ជួន។
ប្រទេសកម្ពុជាបច្ចុប្បន្នមានវត្តចំនួន ៤ពាន់វត្ត និងព្រះសង្ឃជាង ៥ម៉ឺនអង្គ ក្នុងនោះគណៈមហានិកាយមានជាង ៤ពាន់វត្ត ព្រះសង្ឃមានចំនួនជាង ៥ម៉ឺនអង្គ និងគណៈធម្មយុត្តិកនិកាយ មាន ១៥១វត្ត និងព្រះសង្ឃមានចំនួនជាង ១.៣០០អង្គ។
ខ្មែរអាចឆ្លងដែនមិនបង់ថ្លៃទិដ្ឋាការទៅប្រទេស៥ក្នុងសហគមន៍អាស៊ាននៅ ឆ្នាំថ្មី ឆ្នាំ ២០១០នេះ
ប្រទេស ៥ ជាសមាជិកសហគមន៍អាស៊ាន អនុញ្ញាតឲ្យមានការឆ្លងដែនដោយមិនចាំបាច់បង់ថ្លៃទិដ្ឋាការ។ អនុរដ្ឋលេខាធិការក្រសួងការបរទេសកម្ពុជា និងជាអ្នកនាំពាក្យ លោក កុយ គួង មានប្រសាសន៍ថា ប្រទេសទាំង៥នោះមានប្រទេសវៀតណាម លាវ, សិង្ហបុរី, ហ្វីលីពីន និងម៉ាឡេស៊ី។ លោកបន្តថា នៅចុងឆ្នាំ២០១០ កម្ពុជារំពឹងថា នឹងមានប្រទេសថៃមួយទៀតដែលពលរដ្ឋទាំងពីរឆ្លងដែនដោយមិនចាំបាច់បង់ថ្លៃទិដ្ឋាការ។
ជប៉ុនផ្អាកជំនួយក្នុងគម្រោងសាងសង់ស្ពានអ្នកលឿង
តំណាងរាស្រ្តគណបក្សសមរង្ស៊ីបានថ្លែងឲ្យដឹងនៅថ្ងៃទី៣០ ធ្នូនេះ ថា ប្រទេសជប៉ុនបានផ្អាកជំនួយឥតសំណងចំនួន ៧៤លានដុលា្លរអាមេរិកដល់រដ្ឋាភិបាលកម្ពុជាក្នុងគម្រោងសាងសង់ស្ពាន អ្នកលឿង។
ការប្រកាសផ្អាកនោះគឺបានធ្វើឡើងបន្ទាប់ពីមានការចោទប្រកាន់រដ្ឋាភិបាលកម្ពុជាថា មិនបានផ្តល់សំណងសមរម្យដល់ប្រជាពលរដ្ឋជាថ្នូរនឹងការរុះរើផ្ទះចេញដើម្បីយកកន្លែងសាងសង់ស្ពាននោះ។
លោកស្រី លី ស្រីវីណា តំណាងរាស្រ្តគណបក្សសមរង្ស៊ីបានមានប្រសាសន៍ថា នៅពេលដែលលោកស្រីទៅធ្វើទស្សនកិច្ចនៅប្រទេសជប៉ុនកាលពីខែមេសាកន្លងទៅនេះ ភាគីជប៉ុនបានប្រាប់លោកស្រីថា លុះត្រាណារដ្ឋាភិបាលកម្ពុជាបានផ្តល់សំណងសមរម្យដល់ប្រជាពលដ្ឋដែល បណ្តេញចេញទើបជប៉ុននឹងផ្តល់ថវិកានោះ។
លោក ឈាង វុន តំណាងរាស្រ្តគណបក្សប្រជាជនកម្ពុជា និងជាប្រធានគណៈកម្មាធិការទទួល បន្ទុកការបរទេសបានច្រាលចោលការចោទប្រកាន់នេះដោយអះអាងថា ប្រទេសជប៉ុននៅតែផ្តល់ជំនួយឥតសំណងដល់ប្រទេសកម្ពុជាចំនួន ៧៤លានដុលា្លរដើម្បីសាងសង់ស្ពានអ្នកលឿងដដែល៕