ທ່ານ Eric Schwartz ເຜີຍການຢ້ຽມຢາມຊາວມົ້ງ

ໃນວັນທີ 14 ເດຶອນມິຖຸນາ ປີ 2010 ຣັຖມົນຕຣີ ຊ່ວຍວ່າການ ຕ່າງປະເທດ ຝ່າຍອົພຍົບ ຈາກ ສະຫະຣັດ ອະເມຣິກາ ທ່ານ Eric P. Schwartz ເປີດເຜີຍການເດີນທາງ ໄປຢ້ຽມຢາມ ລາວເຜົ່າມົ້ງ ທີ່ບ້ານ ພັທນາໂພນຄໍາ ເມືອງບໍຣິຄັນ ແຂວງບໍຣິຄໍາໄຊ. ກ່ອນການອອກເດີນທາງ ທ່ານ Schwartz ໄດ້ຖືກຕ້ອນຮັບໂດຍ ທ່ານນາຍພົນຈັຕວາ ບົວສ້ຽງ ຈໍາປາພັນ ທີ່ສນາມວຽງຈັນ ເພື່ອອະທິບາຍ ລາຍການຂອງການ ໄປຢ້ຽມຢາມຊາວມົ້ງລາວ ໃນເທື່ອນີ້. ຫລັງຈາກທີ່ ທ່ານ Schwartz ໄດ້ໄປ ຢ້ຽມຢາມໂພນຄໍາ ອັນເປັນບ້ານພັທນາ ໃໝ່ໃນແຂວງ ບໍຣິຄໍາໄຊ ຫ່າງຈາກເມືອງ ບໍຣິຄັນ ປະມານ 57 ກິໂລແມັດແລ້ວ ຂ້າພະເຈົ້າ ກໍໄດ້ສັມພາດ ກ່ຽວກັບຄວາມ ຮູ້ສຶກທົ່ວໄປ ຂອງທ່ານ. ທ່ານ Schwartz ໄດ້ສະແດງ ຄວາມຫວັງວ່າ ຈະໄດ້ມີ ໂອກາດໂອ້ລົມ ກັບຊາວມົ້ງ ທີ່ໄດ້ຖືກ ສົ່ງກັບຄືນ ມາຈາກໄທ ເມື່ອທ້າຍປີ 2009 ນັ້ນ ໂດຍເວົ້າວ່າ: “ຂ້າພະເຈົ້າ ຍິນດີຮັບຟັງ ຫາກພວກທ່ານ ຢາກລົມກັບ ຂ້າພະເຈົ້າ. ທ່ານກ່າວວ່າ ເວລາການ ຢ້ຽມຢາມ ບ້ານໂພຄໍາ ສັ້ນເກີນໄປ ແລະກໍມີ ເຈົ້າໜ້າທີ່ລາວ ຕິດຕາມຢູ່ ຕລອດເວລາ ເພາະສະນັ້ນ ທ່ານຈຶ່ງບໍ່ ສາມາດເວົ້າເຖິງ ສະພາບການ ໃນບ້ານນັ້ນ ຢ່າງລະອຽດໄດ້. ເຖິງຢ່າງໃດກໍດີ ທ່ານກໍເຫັນວ່າ ການໄປຢ້ຽມຢາມ ເທື່ອນັ້ນເປັນ ປະໂຫຍດ ເພາະໄດ້ສະແດງ ໃຫ້ຊາວມົ້ງ ຢູ່ບ້ານໂພນຄໍາ ຮູ້ວ່າ ສະຫະຣັຖ ຍັງເປັນຫ່ວງນໍາ ພວກເຂົາເຈົ້າ ແລະຍັງຍິນດີ ຊ່ວຍເຫລືອ ພວກຂະເຈົ້າຢູ່. ທ່ານ Schwartz ຍັງສະແດງ ຄວາມດີໃຈ ທີ່ໄດ້ຍິນ ທ່ານນາຍພົນ ຈັຕວາ ບົວສ້ຽງ ຈໍາປາພັນ ເວົ້າວ່າຝ່າຍລາວ ບໍ່ມີຄວາມ ຂັດຂ້ອງ ຖ້າຫາກຊາວມົ້ງ ຢາກອົພຍົບ ໄປຢູ່ຕ່າງ ປະເທດ ຂໍພຽງແຕ່ ໃຫ້ເຮັດຖືກ ຕ້ອງຕາມຂັ້ນຕອນ ຄື 1-ຂື້ນສໍາມະໂນຄົວ 2-ເຮັດບັດ ປະຊາຊົນ ແລະ 3-ຂໍເອກກະສານ ເດີນທາງຫລື passport ແລ້ວກໍໄປ ຂໍວີຊາ ປະເທດທີ່ ຕົນຢາກໄປ. ທ່ານ Schwartz ກໍຫວັງວ່າ ທ່າທີດັ່ງກ່າວ ຂອງຣັຖບານລາວ ຈະມີການ ພັທນາໄປສູ່ ການປະຕິບັດ ຕົວຈິງ... ເຊີນທ່ານເປີດຟັງໄດ້ ໂດຍກົດ(Click) ຢູ່ບ່ອນທີ່ຂຽນວ່າ "ດາວໂລ້ດ"
ວຽງໄຊ
2010-06-28
ອີແມວລ໌
ຄໍາເຫັນ
Share
ພິມ
ຄໍາເຫັນ (0)
Share
ເຕັມຫນ້າ