ຄົນວຽດນາມເອົາພຣະຢູ່ວັດ ອົງຕື້ ໄປ

ອຸ່ນແກ້ວ ສຸກສະຫວັນ
2015-01-10
ອີແມວລ໌
ຄໍາເຫັນ
Share
ພິມ
ພະພຸດທະຮູບ ອົງນີ້ ເປັນ ໂລຫະທອງ ມີຂະໜາດໃຫຍ່ ມີຄວາມສູງ ປະມານ 1 ແມັດ ສັນນິຖານວ່າ ຖືກສ້າງຂຶ້ນ ໃນສະໄໝ ພະເຈົ້າ ໄຊເສດຖາ ຫຼືກ່ອນໜ້ານັ້ນ. ພະພຸດທະຮູບ ອົງນີ້ ຖືກປະດິດ ສະຖານຢູ່ ວັດອົງຕື້ ມະຫາວິຫານມາ ໄດ້ຫຼາຍເຊັ່ນຄົນ.
ພະພຸດທະຮູບ ອົງນີ້ ເປັນ ໂລຫະທອງ ມີຂະໜາດໃຫຍ່ ມີຄວາມສູງ ປະມານ 1 ແມັດ ສັນນິຖານວ່າ ຖືກສ້າງຂຶ້ນ ໃນສະໄໝ ພະເຈົ້າ ໄຊເສດຖາ ຫຼືກ່ອນໜ້ານັ້ນ. ພະພຸດທະຮູບ ອົງນີ້ ຖືກປະດິດ ສະຖານຢູ່ ວັດອົງຕື້ ມະຫາວິຫານມາ ໄດ້ຫຼາຍເຊັ່ນຄົນ.
RFA

ເກີດເຫດ ມີກຸ່ມຄົນ ວຽດນາມ ຈໍານວນ ນຶ່ງ ເຂົ້າມາ ຫາມ ເອົາ ພຣະພຸດທະຮູບ ແຕ່ປາງ ບູຮານ ຢູ່ ໃນວັດ ອົງຕື້ ມະຫາວິຫານ ໄປ ໂດຍທີ່ ເຈົ້າໜ້າທີ່ ບ້ານເມືອງ ບໍ່ໄດ້ ເຂົ້າມາ ຫ້າມ ປາມ ຫຼື ສະກັດກັ້ນ ແຕ່ຢ່າງໃດ ເລີຍ.

ຜູ້ທີ່ເຫັນ ເຫດການ ໄດ້ເລົ່າວ່າ, ເຫດເກີດຂຶ້ນ ໃນ ວັນທີ 9 ມົກກະຣາ ເວລາ ປະມານ 11 ໂມງ ຕອນເຊົ້າ, ໄດ້ມີກຸ່ມ ຄົນວຽດນາມ ຈໍານວນ ນຶ່ງ ເຂົ້າມາ ຂົນເອົາ ພຣະພຸດທະຮູບ ເກົ່າແກ່ ຢູ່ ວັດອົງຕື້ ຂະໜາດ ໜ້າຕັກ 50 ເຊັນ ອອກໄປ ຊຶ່ງ ກຸ່ມ ຄົນ ວຽດນາມ ດັ່ງກ່າວ ໄດ້ໃຊ້ ຣົດໂຕໂຍຕ້າ ແລນກຣູເຊີ ເປັນ ພາຫະນະ.

ຕໍ່ກັບ ເຫດການ ດັ່ງກ່າວ ເຈົ້າໜ້າທີ່ ຢູ່ ກະຊວງ ຖແລງຂ່າວ ວັທນະທັມ ແລະ ທ່ອງທ່ຽວ ກໍໄດ້ກ່າວ ຕໍ່ນັກຂ່າວ ເອເຊັຽເສຣີ ວ່າ ວຽດນາມ ກຸ່ມ ດັ່ງກ່າວ ຕັ້ງໃຈ ທີ່ ຈະເຂົ້າ ມາເອົາ ພຣະພຸດທະຮູບ ບູຮານ ອົງ ດັ່ງກ່າວ.

ເຈົ້າໜ້າທີ່ ກະຊວງ ຖແລງຂ່າວ ທ່ານ ນັ້ນ ຍັງກ່າວ ອີກວ່າ ສາເຫດ ກໍຍ້ອນວ່າ ໃນຊ້ວງ ປະມານ ກາງປີ ທີ່ ຜ່ານມາ ມີກຸມ ສະຖາບັນ ການເງິນ ຫລື ກຸ່ມ ນັກ ທຸຣະກິດ ວຽດນາມ ໄດ້ ມາ ບໍຣິຈາກ ເງິນເພື່ອ ປະຕິສັງຂອນ ວັດອົງຕື້ ມະຫາວິຫານ ແລ້ວ ຕ້ອງການ ຢາກໄດ້ ພຣະພຸດທະຮູບ ອົງ ດັ່ງກ່າວ, ແຕ່ ທາງການລາວ ບໍ່ໃຫ້ ເພາະ ເປັນພຣະ ເກົ່າແກ່.

ນອກຈາກ ນີ້ ຍັງມີຂ່າວ ອີກວ່າ ທາງການລາວ ຈະຫລໍ່ ພຣະພຸດທະຮູບ ອົງ ຈໍາລອງ ໃຫ້ ກັບຄົນ ວຽດນາມ ກຸ່ມ ດັ່ງກ່າວ, ແຕ່ວ່າ ຄົນ ວຽດນາມ ກຸ່ມ ດັ່ງກ່າວ ບໍ່ຍອມເອົາ ແລະ ຍັງ ຢືນຢັນ ຢາກໄດ້ ພຣະພຸດທະຮູບ ອົງ ດັ່ງກ່າວ.

ອີງຕາມ ການ ບອກເລົ່າ ຂອງ ເຈົ້າໜ້າທີ່ ກະຊວງ ຖແລງຂ່າວ ຍັງ ໄດ້ຮູ້ວ່າ ຫລັງຈາກ ທີ່ ກຸ່ມຄົນ ດັ່ງກ່າວ ໄດ້ຂົນເອົາ ພຣະ ພຸດທະຮູບ ອອກໄປແລ້ວ ຕໍ່ມາ ຈຶ່ງມີຄໍາສັ່ງ ຈາກ ຣັຖມົນຕຣີ ກະຊວງ ຖແລງຂ່າວ ວັທນະທັມ ແລະ ທ່ອງທ່ຽວ ໃຫ້ນໍາເອົາ ພຣະ ພຸດທະຮູບ ອົງ ດັ່ງກ່າວ ກັບ ຄືນມາ.

ແລະ ໃນເວລາ ປະມານ 16 ໂມງ ຂອງ ວັນດຽວກັນ (9 ມົກກະຣາ) ກໍມີຣາຍງານ ວ່າ ພຣະ ພຸດທະຮູບ ດັ່ງກ່າວ ຖືກນໍາ ກັບຄືນມາ ຢູ່ ວັດອົງຕື້ ມະຫາວິຫານ ຄືເກົ່າ. ນອກຈາກ ນີ້ ກໍຍັງມີ ຣາຍງານ ວ່າ ໃນເວລາ ເກີດເຫດ ເຈົ້າ ອະທິການ ວັດອົງຕື້ ບໍ່ໄດ້ ຢູ່ໃນ ວັດ.

ເຖີງຢ່າງໃດ ກໍຕາມ, ຄົນລາວ ສ່ວນຫລາຍ ກໍຍັງບໍ່ ປັກໃຈ ເຊື່ອວ່າ ພຣະ ພຸດທະຮູບ ອົງ ທີ່ເອົາກັບ ຄືນມານັ້ນ ຈະເປັນຂອງ ຈິງ ຫລື ວ່າ ຈະມີການ ສັບປ່ຽນ ເປັນທີ່ ຮຽບຮ້ອຍ ແລ້ວ.

ຂໍ້ສົງໄສ ຂອງ ຄົນລາວ:

ຂ່າວຍັງ ຣາຍງານວ່າ ໃນຕອນເຊົ້າ ຂອງ ວັນທີ 10 ມົກກະຣາ ມີ ປະຊາຊົນ ຫລາຍ ຮ້ອຍ ຄົນ ມາ ເຕົ້າໂຮມກັນ ຢູ່ ວັດອົງຕື້ ມະຫາວິຫານ ຫລັງຈາກ ໄດ້ ຮັບຂ່າວ ຈາກ ສື່ສັງຄົມ ອອນລາຍ ແລະ ພາກັນ ຕັ້ງຂໍ້ສົງໄສ ຂຶ້ນ ຫລາຍຢ່າງ. ດັ່ງທ່ານ ໄດ້ສະແດງ ຄວາມຄິດເຫັນ ຕໍ່ນັກຂ່າວ ເອເຊັຽເສຣີ ວ່າ:

“ຕາມເຫັນ ກໍເປັນ ໄປຕາມ ຄວາມ ຈິງຫັ້ນ ແມ່ນແທ້, ເພາະວ່າ ຫາກໍ່ຮູ້ ຫວ່າງຄໍ່າພຸ້ນ ແຫລະ ລະກະເລີຍ ມາສົມທົບ ຄູບາ ເພີ່ນກະວ່າ ມີແທ້ ແຕ່ກໍຍັງ ບໍ່ຮູ້ສາເຫດ ວ່າ ເອົາໄປ ເຫດການ ແນວໃດ? ແນວໃດ ຫັ້ນນ່່າ?, ແມ່ນ ແນວໃດ? ແມ່ນໃຜ ສັ່ງໃຜ, ຄູ ບາກະຍັງ ບໍ່ຮູ້”.

ແລະ ປະຊາຊົນ ອີກທ່ານນຶ່ງ ກໍໄດ້ ກ່າວວ່າ:

"ຍໍຂຶ້ນລົດໄປ ມັນກະບໍ່ ພິຖີພິຖັນ ແຫລະ, ຄັນສົມມຸດ ວ່າ ຊິເອົາໄປ ແທ້, ເຈົ້າກະຕ້ອງ ທໍາພິທີ ອັນເຊີນ ແລ້ວ ກ່າວໃຫ້ ປະຊາຊົນ ໃຫ້ຮູ້ວ່າ ດຽວນີ້ ມີ ການຈັ່ງຊັ້ນ ຈັ່ງຊີ້ ບອກ ວິທີການ ທີ່ຈະເອົາ ໄປຫັ້ນ, ເອົາໄປດ້ວຍ ວິທີໃດ, ແບບໃດ, ເຮັດຫຍັງ, ເປັນຫຍັງ ຈຶ່ງເອົາໄປ, ເຈົ້າມີຫຍັງ ມາແລກປ່ຽນ ກັນ, ມັນຕ້ອງ ແຈ້ງໃຫ້ ປະຊາຊົນ ຮູ້, ຄັນຊັ້ນກະ ເກີດຮືຮາ ກັນຈັ່ງຊີ້ ແຫລະຢ".

ແລະ ໃນເວລາ ດຽວກັນ ທ່ານ ສາຍທອງ ແກ້ວດວງດີ ຮອງເຈົ້າຄອງ ນະຄອນ ຫລວງ ຜູ້ຮັບຜິດຊອບ ວຽກງານ ຖແລວງຂ່າວ, ວັທນະທັມ ແລະ ທ່ອງທ່ຽວ ກໍໄດ້ມາ ພົບປະກັບ ປະຊາຊົນ ທີ່ ມາເຕົ້າໂຮມ ກັນຢູ່ ວັດອົງຕື້ ນັ້ນ ແລະ ຢືນຢັນວ່າ ພຣະພຸດທະຮູບ ທີ່ເຂົາເຈົ້າ ເອົາມາສົ່ງ ນັ້ນ ແມ່ນອົງແທ້, ແຕ່ ທ່ານ ກໍປະເສດ ທີ່ ຈະຕອບ ຄໍາຖາມ ຕໍ່ ປະຊາຊົນ ທີ່ ມາເຕົ້າໂຮມ ຢູ່ວັດ ນັ້ນວ່າ ໃຜເປັນຄົນ ອະນຸຍາດ ໃຫ້ກຸ່ມຄົນ ດັ່ງກ່າວ ເຂົ້າມາເອົາ ພຣະ ພຸດທະຮູບ ດັ່ງກ່າວ.

ປວັດຄວາມ ເປັນມາ ຂອງ ພຣະ ພຸດທະຮູບ ອົງ ດັ່ງກ່າວ:

ມີຣາຍງານ ວ່າ ຖືກສ້າງ ຂຶ້ນໃນ ສັດຕະວັດ ທີ 16 ສະໄໝ ສົມເດັດ ພະເຈົ້າ ໄຊຍະເຊດຖາ ທິຣາຊ ຫລໍ່ ດ້ວຍ ທອງສໍາຣິດ, ເປັນ ພຣະບາງ ມະລະວິໄຊ ຊຶ່ງ ນິຍົມກັນ ສ້າງ ຢ່າງ ແພ່ຫລາຍ ໃນ ສະໄໝ ນັ້ນ.

ຮູບລັກສນະ ທົ່ວໄປ ຄືກັນກັບ ພະເສີມ, ພະໄສ ເນື້ອທອງ ແບບ ດຽວກັນ, ມີ ລັກສນະ ໂດດເດັ່ນ ກໍຄື ລາຍ ຜ້າສັງຄາ ສະຫລັກລາຍ ເປັນ ຮອຍຝັງເງິນ, ຢູ່ ພຣະບາດ (ຕີນ) ມີຮູບ ທັມມະຈັກ ອ້ອມດ້ວຍ ລາຍລາວ ແລະ ມີສັດສ່ວນ ລໍາຄີງບາງ ກວ່າ ພຣະເສີມ ແລະ ພຣະໄສ.

ອີງຕາມ ການບອກເລົ່າ ຂອງ ຜູ້ເຖົ້າ ຢູ່ໃນ ວັດນັ້ນ ໄດ້ຮູ້ວ່າ ພຣະພຸດ ທະຮູບ ອົງ ດັ່ງກ່າວ ແມ່ນ ແບບ ຕົ້ນສະບັບ ທີ່ ໃຊ້ຫລໍ່ ພຣະອົງຕື້, ແຕ່ກໍຍັງ ບໍ່ໄດ້ມີການ ຢືນຢັນ ຈາກ ໜ່ວຍງານ ຂອງ ກົມ ວັດຖຸ ບູຮານ ເທື່ອ.

ຄໍາເຫັນ (14)
Share

ຄົນລາວ

ຈາກ ວຽງຈັນ

ເຖີງເວລາແລ້ວ ຕ້ອງຫາສາເຫດ ວ່າເປັນຫຍັງ ຈືງເກິດເລື່ອງ ແບບນີ້ໄດ້ ໃຜຢູ່ເບີ້ງໜ້າ ແລະເບີ້ງຫລັງ ຂອງການໃຫ້ມີ ການຍົກຍ້າຍ ພຣະພຸທະຮູບ ໄປຢູ່ວຽດນາມ ເພື່ອຈຸດປະສົງ ຫຍັງແທ້ ເຊັ່ນ 1. ເອົາໄວ້ກາລະບູຊາ ທີ່ເມືອງວິງ ປະເທດວຽດນາມ ແທ້ບໍ່? 2.ເອົາໄວ້ເປັນ ສິ່ງສະສົມ ຂອງມີຄ່າ ຂອງນັກທຸລະກິດ ວຽດນາມ ແມ່ນບໍ່? 3.ເປັນການລົງທືນ ເພື່ອຂາຍໄດ້ລາຄາ ໃນອະນາຄົດ ແມ່ນບໍ່? 4.ເກັບເອົາໄວ້ ເພື່ອສ້າງບາລະມີ ພຣະເດດພຣະຄຸນ ໃຫ້ ຄົນອື່ນນັບຖື ຍ້ຳເກຣງກົວ ແມ່ນບໍ່? 5.ສະແດງວ່າ ອຳນາດເງິນຕຣາ ສາມາດຊື້ຈ້າງ ເຈົ້າໜ້າທີ່ລາວ ໄດ້ງ່າຍດາຍ ໝາຍຄວາມວ່າ ເຈົ້າໜ້າທີ່ ລະດັບສູງ ພ້ອມຂາຍຊາດ ຂາຍແຜ່ນດິນ ຊັບໃນດິນ ສິນໃນນ້ຳ ໄດ້ທຸກຍາມ ແມ່ນບໍ່?
6. ສະແດງວ່າ ມີເຄືອຂ່າຍ ກຸ່ມຜົນປະໂຫຍດ ທຸລະກິດ ແລະກຸ່ມອິດທິພົນ ທາງດ້ານການເມືອງ ຢູ່ເບື້ອງຫລັງ ພ້ອມຈູງໃຈ ໃຫ້ເຮັດໄດ້ ຕາມອຳເພີໃຈ ແມ່ນບໍ່? 7.ອາດມີເຫດຜົນ ເລື່ອງອື່ນໆ ທີ່ປະຊາຊົນ ຍັງບໍ່ຮູ້ ກໍ່ເປັນໄດ້?



[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 18, 2015 04:52 PM

ພຣະສັນຕິ

ຈາກ ນະຄອນຫລວງວຽງຈັນ

ວິທີແກ້ ບໍ່ມີໃຜເອົາ ພຣະພຸທະຮູບ ຂອງ ປະເທດໃດອີກ ຈົນເຖີງໂລກາ ອັນຕ້ອງ ກາລະປາວະສານ ແລ້ວກໍ້ ໃຫ້ປະເທດລາວ, ວຽດນາມ, ພະມ້າ, ກັມພູຊາ, ແລະໄທ ເຊີນ ພະສັງຄະຣາຊ ແຕ່ລະ ປະເທດ ທຳພິທີ ສ້າງພຣະພຸທະຮູບ ປາງສັນຕິ 5 ອົງ ຢັ່ງຢ່າຍ ໃຫ້ແຕ່ລະ ປະເທດ ຄົນລະອົງ ເອົາໄວ້ເປັນ ພະຍານ ໂດຍພຣະພຸທະຮູບ ປະກອບດ້ວຍ ຄຳ ເປັນສ່ວນໃຫຍ່ ສູງປະມານ 1,99 ແມັດ ເພື່ອໄວ້ ສັກກາລະບູຊາ ແລະ ສິງສະຖິດ ຢູ່ແຕ່ລະ ປະເທດ ເພື່ອເຄົາຣົບໄຫວ້ ໃຫ້ຢູ່ເຍັນ ເປັນສຸກ ບໍ່ມີຂໍ້ ຂັດແຍ່ງ ຍາດແຍງ ດິນດອນ ຕອນຫຍ້າ ຊັບໃນດິນ-ສິນໃນນ້ຳ ແລະ ມໍລະດົກ ອັນລ້ຳຄ່າ ນັບຄ່າບໍ່ໄດ້ ຂອງປະເທດ ໃຜລາວ ຫ້າມສະສົມ ຫ້າມເຄື່ອນຍ້າຍ ຫ້າມລັກ ຫ້າມປຸ້ນຈີ້ ເປັນຕົ້ນ ຈະເລີນພອນ ທົ່ວຖ້ວນໜ້າ ຝູງປະຊາທັ້ງ 5 ປະເທດ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 14, 2015 12:19 PM

ເລີດ

ຈາກ ຫນອງບົກ

ຄະນະພັກ-ລັດ ສປປລາວ ເປັນພວກລູກແຫລ້ງ ຫມາຂີ້ເຮື້ອນ, ທຳລາຍຊາຕ, ມ້າງສາສນາ, ຂ້າ ປະຊາຊົນລາວ ເອົາໃຈຊາຕອື່ນ ນັບຕັ້ງແຕ່ ມີການປົດປ່ອຍ ຄໍ ສໍ 1975 ເປັນຕົ້ນມາ ກັມໄດ ພວກໄດກໍ່ ຂໍໃຫ້ກັມນັ້ນ ນຳສະຫນອງ ພວກສູ ທຸກເຊັ່ນ, ທຸກຊາຕ ຕໍ່ໄປທ້ອນ.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 14, 2015 12:16 PM

ທ້າວ ກືກ

ຈາກ ເມືອງມືດ

ມີອັບເດດ ຂໍ້ມູນໃໝ່ ພະອົງ ທີ່ມາສົ່ງຄືນ ແມ່ນຂອງປອມ ເພາະແກວ ພວກນີ້ ມີການວາງແຜນ ທີ່ຈະສັບປ່ຽນ ພະອົງ ດັ່ງກ່າວ ມາໄດ້ 3 ປີ ກ່ອນ ຈົນສຸດທ້າຍ ຈຶ່ງໃຫ້ ຊ່າງແກວ ກອ໋ບປີ ຈົນສຳເລັດ ແລ້ວຈຶ່ງມີການ ສັບປ່ຽນ ພະອົງ ດັ່ງກ່າວ ໃນມື້ ເກີດເຫດການ ຂໍໃຫ້ຜູ້ອ່ານຂ່າວ ສັງເກດ ເບີ່ງວ່າ:
1. ເວລາເອົາພະ ອອກໄປໃຜ ຮັບຮູ້ແດ່ ມີເຄື່ອງໝາຍຫຍັງ ບໍ່ກ່ອນ ນຳອອກໄປ ວ່າແມ່ນອົງແທ້
2.ເປັນຫຍັງ ຈຶ່ງສາມາດ ນຳອອກໄປໄດ້ ຢ່າງງ່າຍດາຍ
3.ເວລານຳເຂົ້າມາ ຈຶ່ງຢາກໃຫ້ຄົນ ຮູ້ວ່າຕົນເອງ ເອົາພະອົງ ດັ່ງກ່າວ ກັບມາໄວ້(ສ້າງກະແສ)
4. ພວກທ່ານ ສາມາດ ກວດສອບໄດ້ ໂດຍການພິສູດ ວ່າການລໍ່ ໃຊ້ສ່ວນປະສົມ ຫຍັງແດ່, ອາຍຸການ ໃນການລໍ່ ພະ ຈັກປີ
5.ເປັນຫຍັງ ທາງການລາວ ຈຶ່ງບໍ່ລົງໂທດ ຄົນທີ່ນຳພະໄປ ແລະ ນຳກັບຄືນມາ ເພາະນີ້ຄືການລັກ ສົມບັດ ຂອງຊາດ ໂທດສູງສຸດຄືການ ປະຫານ ຊືວິດ
ຂອບໃຈທຸກທ່ານ ທີ່ມີນ້ຳໃຈ ຮັກຊາດ ຮັກສາດສະໜາ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 14, 2015 12:07 PM

ທ້າວ ກືກ

ຈາກ ເມືອງມືດ

ປະເທດລາວ ໝົດແນວ ຂາຍກິນແລ້ວ ຈຶ່ງຫັນມາຂາຍ ພະ ຂາຍສາດສະໜາ ໃຫ້ວຽດໃຫ້ແກວ ດຽວຈັກໜ່ອຍ ຂະເຈົ້າກໍ່ຂາຍ ລູກ ຂາຍເມຍ ໃຫ້ແກວຕື່ມ ຂອບໃຈ ຜູ້ນຳ ປະຊາທິປະຕາຍ ລວມສູນ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 14, 2015 12:05 PM

ເບິ່ງຄວາມເຫັນທັງໝົດ.

ເຕັມຫນ້າ