ຊາວນາຊາວສວນຂໍໃຫ້ ຫຼຸດຄ່າໄຟ

2020-07-06
ອີແມວລ໌
ຄໍາເຫັນ
Share
ພິມ
ຊາວສວນທີ່ພົບບັນຫາ ຂາຍຜົລປູກສົ່ງອອກບໍ່ໄດ້ ຈົນປະສົບກັບຜົນກະທົບ ດ້ານການເງິນ ບໍ່ສາມາດຈ່າຍຄ່ານໍ້າ ຄ່າໄຟໄດ້
ຊາວສວນທີ່ພົບບັນຫາ ຂາຍຜົລປູກສົ່ງອອກບໍ່ໄດ້ ຈົນປະສົບກັບຜົນກະທົບ ດ້ານການເງິນ ບໍ່ສາມາດຈ່າຍຄ່ານໍ້າ ຄ່າໄຟໄດ້
ນັກຂ່າວພົລເມືອງ

ຊາວກະສິກອນຢູ່ເມືອງຄູນ ແຂວງຊຽງຂວາງ ຢາກໃຫ້ພາກສ່ວນກ່ຽວຂ້ອງ ຂອງທາງການລາວ ຫຼຸດຄ່າໄຟຟ້າຍ້ອນວ່າ ໄດ້ເສັຽຄ່າໄຟຟ້າ ແພງຂຶ້ນຈາກເດີມ ເດືອນລະ 70 ພັນປາຍກີບ ມາເປັນເດືອນລະ ແສນປາຍກີບ ໃນປັດຈຸບັນ ຂນະທີ່ຕົນເອງກໍໄດ້ເສັຽຄ່ານໍ້າມັນໃສ່ຈັກ ປັ້ມນໍ້າ ຫົດສວນຜັກເດືອນລະ 2-3 ແສນກີບ ຍ້ອນປີນີ້ຝົນບໍ່ຕົກ,ອີງຕາມຄໍາເວົ້າຂອງຊາວສວນ ປູກຜັກກະລໍ່າປີ ຢູ່ ເມືອງຄູນຕໍ່ RFA ໃນມື້ວັນທີ 6 ກໍຣະກະດາ ນີ້:

“ມັນເສັຽຄ່າໄຟຫຼາຍ ກໍບໍ່ຢາກຮອດນີ້ນ່າ ເສັຽຄ່ານໍ້າມັນແດ່ ເສັຽຄ່າໄຟແດ່ ຊື້ຈັກສູບນໍ້າ ເຮົາກໍໄດ້ຊື້ຈັກແຫຼະເນາະ ຄ່າຜັກຣາຄາຕົກຕໍ່າຣາຍ ຮັບກໍຫລຸດ ຢາກໃຫ້ເຂົາເຈົ້າສົ່ງເສີມຫັ້ນແຫຼະ ຢາກໃຫ້ເຂົາຫລຸດຄ່າໄຟລົງຫັ້ນແຫຼະ.”

ທ່ານເວົ້າວ່າ ທີ່ຜ່ານມາ ຣາຄາຜັກກະລໍ່າປີ ກໍຕົກຕໍ່າຢູ່ແລ້ວ ຄືກິໂລລະ 3 ພັນກີບຈາກເດີມ 5 ພັນກີບ, ເຮັດໃຫ້ຣາຍໄດ້ ຫຼຸດລົງແຕ່ກໍຈໍາ ເປັນຕ້ອງໄດ້ປູກ ເພື່ອລ້ຽງຊີບ ພໍມີຣາຍຮັບ ເຂົ້າຄົວເຮືອນ.

ທີ່ນະຄອນຫຼວງວຽງຈັນ ຊາວກະເສຕກອນ ກໍຢາກໃຫ້ພາກສ່ວນກ່ຽວຂ້ອງ ຫຼຸດຄ່າໄຟຟ້າລົງຄືກັນ ເພື່ອສົ່ງເສີມການປູກຝັງ ແລະລ້ຽງສັດ ຍ້ອນວ່າປັດຈຸບັນ ຄ່າໄຟຟ້າເດືອນທີ່ຜ່ານມາ ເພີ່ມຂຶ້ນເປັນ 2 ລ້ານປາຍກີບຈາກເດີມ 1 ລ້ານກີບ ແຕ່ເຖິງຢ່າງໃດກໍຈໍາຕ້ອງໄດ້ເປີດໄຟ ທັງເວັນທັງຄືນ ໃນໄລຍະອະນຸບານເປັດ ແລະໄລຍະຝົນຕົກ ເພື່ອໃຫ້ເປັດອຸ່ນ.

ປັດຈຸບັນຣາຄາເປັດ ອອກຈາກຟາມ ຢູ່ນະຄອນຫຼວງວຽງຈັນ ຕົກຕໍ່າເຫລືອກິໂລລະ 20 ພັນກີບ ຈາກເດີມກິໂລລະ 25 ຫາ 30 ພັນກີບ ຍ້ອນ ວ່ານັກທຸຣະກິດຈີນ ມາລ້ຽງເປັດແຂ່ງກັບ ຄົນລາວ ແລ້ວຂາຍອອກໃຫ້ ຕລາດ ກິໂລລະ 20 ພັນກີບ, ດັ່ງຜູ້ລ້ຽງເປັດທ່ານນຶ່ງຢູ່ ນະຄອນຫລວງ ກ່າວໃນມື້ດຽວກັນນີ້ວ່າ:

“ໄຟແພງນັ້ຮແຫຼະ ເຈົ້າ ເປັນໄປໄດ້ ບອກຣັຖບານຫັ້ນແຫຼະ ປ່ຽນວິສັຍສະ ເອົາປຽບກັນແບບຊີ້ນ່າ. ຄັນວ່າຜລິດໄຟຟ້າ ໃຊ້ເອງ ຣະດັບ ວ່າເຮົານີ໊ ເປັນໝໍ້ໄຟ ອາຊຽນ ລະສິມາເອົາແພງ ລະຜລິດເຮັດຫຍັງ ຕ້ອງສນັບສນູນ ໃຫ້ຄົນລາວລ້ຽງ ບໍ່ແມ່ນສິໃຫ້ຄົນຈີນ ຄົນຫຍັງມາລ້ຽງ ຄືເປັດນີ໋ ໂລນຶ່ງ 25 ພັນກີບ ອອກຈາກໜ້າຟາມ ພວກເຮົາກໍຢູ່ໄດ້ ປະຊາຊົນລ້ຽງ ຫລາຍນັ້ນ ມັນຂາຍໂລນຶ່ງ 20 ພັນກີບ ຕົ້ນທຶນກະສູງ ກໍາໄຣໜ້ອຍ ເຮັດການ ກະເສດນະ.”

ແລະຊາວສວນຢູ່ ເມືອງປາກຊ່ອງ ແຂວງຈໍາປາສັກ ທ່ານນຶ່ງກໍຢາກໃຫ້ພາກສ່ວນກ່ຽວຂ້ອງ ຫລຸດຄ່າໄຟຟ້າ ເພື່ອສົ່ງເສີມການປູກພືດຜັກຄື ກັນຍ້ອນວ່າຕົນເອງໂປ້ມນໍ້າຈາກສ້າງ ບາດານ ພຽງແຕ່ກາງເວັນ ກໍໄດ້ຈ່າຍຄ່າໄຟຟ້າ ເພີ່ມຂຶ້ນເປັນ 4 ແສນກີບ ຈາກທີ່ເຄີຍຈ່າຍກ່ອນນັ້ນ ເດືອນລະ 2 ແສນກີບ ຊຶ່ງໄດ້ໂປ້ມນໍ້າ ທັງກາງເວັນ ແລະກາງຄືນ. ແຕ່ເຖິງຢ່າງໃດ ກໍຈໍາຕ້ອງໃຊ້ ເພື່ອເອົານໍ້າຫົດສວນ ຍ້ອນບໍ່ມີ ຊົລປະທານ ເຂົ້າເຖິງ, ທ່ານກ່າວ:

“ຄ່າໄຟ ບ່ອນໃດມີບໍ່ນໍ້າ ພວກເຮົາກໍໃຊ້ຈັກ ບ່ອນໃດບໍ່ມີບໍ່ນໍ້າ ພວກເຮົາກໍໃຊ້ບາດານ ບາດານເຮົາກໍໃຊ້ໄຟຟ້າ ຣາຄາມັນກໍສູງ ຣາຄາດຽວນີ້ ໂອ໋ຍ ເຄີຍເສັຽເດືອນລະ 2 ແສນກີບກໍມາເສັຽ 4 ແສນ. ດຽວນີ້ຢາກໃຫ້ຊ່ວຍເພາະວ່າປະຊາຊົນ ຜົລກະທົບໜັກແຫຼະ ທຸກຍາກນັ້ນແຫຼະວ່າ ຈັ່ງຊັ້ນສະ ກະເສຕກອນປີນີ້.”  

ກ່ຽວກັບເຣຶ່ອງທີ່ວ່ານີ້ ເຈົ້າໜ້າທີ່ຣັຖວິສາຫະກິດ ໄຟຟ້າລາວແຂວງ ຈໍາປາສັກ ກໍແນະນໍາວ່າ ດີແທ້ ໃຫ້ຊາວກະເສຕກອນ ທີ່ຮຽກຮ້ອງໃຫ້ ພາກສ່ວນກ່ຽວຂ້ອງ ຫລຸດຄ່າໄຟຟ້າ ຍ້ອນວ່າ ຄ່າໄຟຟ້າແພງນັ້ນ ເຮັດໃບສເນີມາຍັງ ສາຂາຣັຖວິສາຫະກິດ ໄຟຟ້າລາວ, ຫາກທາງບໍຣິສັດ ເຫັນວ່າ ມີເຫດຜົລພຽງພໍ ເພິ່ນກໍຈະຫລຸດຄ່າໄຟຟ້າໃຫ້ ດັ່ງທີ່ທ່ານ ກ່າວວ່າ:

“ເຮັດໃບສເນີເຮັດໃບສເນີ ເຂົ້າທາງສາຂາ ເຈົ້າປະເພດໃດ ເຈົ້າຜລິດໄດ້ຈັກໂຕນ ເຈົ້າຮັບໃຊ້ສັງຄົມຫຼາຍປານໃດ ແລ້ວເພິ່ນສິຫລຸດໃຫ້ ມັນຈະມີຊົລປະທານ ແລະຟາມ ຜະລິດສະບຽງຮັບໃຊ້ສັງຄົມ ເພິ່ນສິຫລຸດໃຫ້.”

ໃນຂນະດຽວກັນ ເຈົ້າໜ້າທີ່ກະສິກັມ ແລະປ່າໄມ້ ແຂວງຊຽງຂວາງ ກໍກ່າວວ່າ ເຣື່ອງຊາວກະເສຕກອນ ເມືອງຄູນ ຮຽກຮ້ອງ ໃຫ້ຫລຸດ ຄ່າໄຟຟ້ານັ້ນເປັນເຣື່ອງໃໝ່ທີ່ ບໍ່ເຄີຍມີມາຈັກເທື່ອ, ແລະຂໍໃຫ້ກຸ່ມກະເສຕກອນ ດັ່ງກ່າວ ສເນີບັນຫານີ້ ມາຍັງຫ້ອງການກະສິກັມ ແລະ ປ່າໄມ້ເມືອງ ຫລັງຈາກນັ້ນ ທາງເມືອງກໍຈະຍື່ນຄໍາສເນີນັ້ນ ໄປຕາມຂັ້ນຕອນ:

“ເອີ໋ ທັມດາກໍຕ້ອງສເນີມາ ຕາມສາຍເນາະ ໄທເຮົາຈຶ່ງເອົາເອກສານນັ້ນໄປຍື່ນຕາມຂັ້ນນີ໋. ເຮົາບໍ່ຮູ້ ບໍ່ຮູ້ວ່າ ຈັກວ່າເຂົາໃຊ້ແພງບໍ່ ເຂົາເຈົ້າ ກໍບໍ່ໄດ້ເຮັດ ໃບສເນີຂຶ້ນມາ ສເນີມາກະສິກັມ ໄທເຮົາ ກະສິກັມ ກໍຈະສເນີໄປ ຕາມຂັ້ນ ຫັ້ນວ່າ ພວກເຂົາເຈົ້າ ໄດ້ຮັບ ຜົລກະທົບ.”

ກ່ຽວກັບຂໍ້ສເນີຫລຸດ ຄ່າໄຟຟ້າ ໃຫ້ຊາວກະເສຕກອນນີ້ ທ່ານ ສາຍທອງ ແກ້ວດວງດີ ສະມາຊິກສະພາແຫ່ງຊາດ ເຂດນຶ່ງ ນະຄອນຫລວງ ວຽງຈັນ ກໍກ່າວຕໍ່ກອງປະຊຸມ ສະພາແຫ່ງຊາດ ທີ່ຫາກໍປິດລົງ ເມື່ອວັນທີ 2 ກໍຣະກະດານີ້ ຕອນນຶ່ງວ່າ:

“ຂ້າພະເຈົ້າວ່າ ມື້ນຶ່ງທີ່ຊາວເຮັດສວນ ຢູ່ບ້ານຫ້ອມບໍ່ຫລຸດ 10 ກິໂລວັດ ບ້ານທ່າຊ້າງຄືກັນ ບ້ານໂນນແຕ້ ດຽວນີ້ມີສວນ ເຮື້ອແລ້ວ. ສະນັ້ນຈະຊຸກຍູ້ສົ່ງເສີມການ ເຮັດ SME ໃຫ້ຂຍາຍໂຕ ຖ້າຍັງວາງ 150 ຄືເກົ່າ ຂ້າພະເຈົ້າວ່າ ບໍ່ເໝາະສົມ ຄວນຕັ້ງຖານມັນຂຶ້ນໃໝ່ ບັນດານັກວິຊາການ ວາງຣາຄານີ໋ ຕ້ອງໄປເບິ່ງໂຕຈິງ ບໍ່ແມ່ນນັ່ງຢູ່ໂຕະຢູ່ຕັ່ງ.”

ເຖິງຢ່າງໃດກໍຕາມ ຣັຖວິສາຫະກິດໄຟຟ້າລາວ ກໍໄດ້ປະກາດໃນມື້ວັນທີ 29 ມິຖຸນາ ຜ່ານມາ ກ່ຽວກັບຄ່າໄຟຟ້າ ທີ່ຂຍາຍເວລາການເສັຽ ຈາກເດືອນກັນຍາ ໄປຈົນຮອດເດືອນ ທັນວາ 2020: ສໍາລັບກຸ່ມຜູ້ໃຊ້ໄຟຟ້າ ແຕ່ 0 ຫາ 150 ກິໂລວັດໂມງ ຕໍ່ເດືອນ ແມ່ນ 355 ກີບຕໍ່ ກິໂລວັດໂມງ.

ກຸ່ມທີ່ໃຊ້ແຕ່ 151 ຫາ 461 ກິໂລວັດໂມງ ຕໍ່ເດືອນນັ້ນ ແມ່ນໃຫ້ຈ່າຍ 355 ກີບ ຕໍ່ກິໂລວັດໂມງ ສໍາລັບ 150 ກິໂລວັດໂມງ ທໍາອິດ, ສ່ວນທີ່ເຫຼືອແມ່ນ 710 ກີບ ຕໍ່ກິໂລວັດໂມງ. ສ່ວນກຸ່ມທີ່ໃຊ້ແຕ່ 462 ກິໂລວັດໂມງ ຕໍ່ເດືອນຂຶ້ນໄປແມ່ນໃຫ້ຈ່າຍ 710 ກີບຕໍ່ກິໂລວັດໂມງ.

ເຕັມຫນ້າ