ໄຟໃໝ້ໄມ້ຫຼາຍພັນ ແມັດກ້ອນ

ຈໍາປາທອງ
2017-03-10
Share
f-logs ໄມ້ດີລາຄາແພງ ທີ່ກໍາລັງຖືກໄຟໃໝ້ ເສັຽຫາຍກວ່າ 8 ພັນແມັດກ້ອນ
Courtesy of Tholakhong

ເຈົ້າໜ້າທີ່ ກະຊວງ ອຸດສາຫະກັມ ແລະການຄ້າລາວ ບອກວ່າ ປັດຈຸບັນ ກຳລັງເລັ່ງ ສືບສວນ ຫາສາເຫດ ໄຟໃໝ້ໄມ້ ຈຳນວນ 8,700 ປາຍ ແມັດກ້ອນ ຢູ່ແຂວງ ອັດຕະປື ເມື່ອຕົ້ນປີ 2017 ນີ້. ດັ່ງທີ່ທ່ານ ໄດ້ເວົ້າກັບ RFA ໃນວັນທີ 9 ມິນາ ນີ້ວ່າ:

"ເພາະວ່າເພິ່ນກະແຕ່ງຕັ້ງ ຄນະກັມການ ຂອງກະຊວງ ອຸດສາຫະກັມ ການຄ້າ ລົງໄປ ແຕ່ກະຍັງ ບໍ່ໄດ້ຮັບ ຊາບວ່າ ມັນເປັນແນວໃດ ໄຟຈາກປ່າ ທັມຊາດ ບໍ່ ຫລືວ່າມີຄົນ ໄປລັກລອບ ຈູດບໍ່ ກະບັງບໍ່ຮູ້ ເພາະວ່າເພິ່ນ ຍັງສອບສວນ ລະອຽດກ່ອນ ເພິ່ນຈຶ່ງສິແຈ້ງ ອັນນີ້ມັນ ຫາກໃໝ້ ຕອນຕົ້ນປີ".

ທ່ານເວົ້າວ່າ ໄມ້ທີ່ຖືກໄຟໃໝ້ນັ້ນ ເປັນໄມ້ ທີ່ຖືກຕັດ ແບບບໍ່ໄດ້ຮັບ ອະນຸຍາດ ທີ່ທາງການ ຍຶດມາໄດ້ ຊຶ່ງ ເຈົ້າໜ້າທີ່ ສົງສັຍວ່າ ອາຈມີ ເງື່ອມງຳ ພາຍຫລັງທີ່ ນາຍົກ ຣັຖມົນຕຣີ ໄດ້ອອກຄຳສັ່ງ ຫ້າມບໍ່ໃຫ້ ເຄື່ອນຍ້າຍໄມ້ທ່ອນ.

ກ່ຽວກັບເຣຶ່ອງນີ້ RFA ໄດ້ຕິດຕໍ່ໄປຍັງ ຜແນກອຸດສາຫະກັມ ແລະ ການຄ້າ ແຂວງອັດຕະປື ເພື່ອຂໍຮູ້ ຂໍ້ມູນຕື່ມ ແຕ່ເຈົ້າໜ້າທີ່ ບໍ່ສາມາດ ບອກໃຫ້ຮູ້ໄດ້ ເພາະ ເຣຶ່ອງນີ້ເປັນ ຄວາມ ຮັບຜິດຊອບ ຂອງ ກະຊວງ ອຸດສາຫະກັມ ແລະ ການຄ້າໂດຍກົງ.

ເມື່ອອາທິດທີ່ຜ່ານມາ ເຈົ້າໜ້າທີ່ ແຂວງອັດຕະປື ເວົ້າວ່າ ເມື່ອປະມານ ສອງປີກ່ອນ ເກີດໄຟໃໝ້ໄມ້ ຢູ່ໃນສນາມໄມ້ ທີ່ບໍຣິເວນ ຊາຍແດນ ແຂວງ ອັດຕະປື ແລະວຽດນາມ.

ຫລັງຈາກເກີດເຫດໄຟໃໝ້ ຢູ່ແຂວງອັດຕະປື ທີ່ວ່ານັ້ນແລ້ວ ທາງຣັຖບາລ ກໍສັ່ງໃຫ້ ຜແນກ ອຸດສາຫະກັມ ແລະການຄ້າ ແຂວງອຸດົມໄຊ, ບໍຣິຄຳໄຊ, ໄຊສົມບູນ, ຄຳມ່ວນ, ສວັນນະເຂດ, ສາຣະວັນ ແລະ ແຂວງຈຳສັກ ຮື້ຖອນໂຮງງານ ປຸງແຕ່ງໄມ້ 28 ແຫ່ງ ທີ່ຕັ້ງຢູ່ໃກ້ກັບ ປ່າສງວນ, ປ່າປ້ອງກັນ ແລະ ປ່າຫວງຫ້າມ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ