ຜູ້ເສັຽຊີວິດເຂື່ອນແຕກ ໄດ້ຄ່າຫົວ

ໄຊຍາ
2019-01-28
ອີແມວລ໌
ຄໍາເຫັນ
Share
ພິມ
ທ່ານ ເລັດ ໄຊຍະພອນ(ຊ້າຍ) ເຈົ້າແຂວງ ແຂວງອັດຕະປື ມອບເງິນຄ່າ ປົວແປງຈິດໃຈ ໃຫ້ສະມາຊິກ ຄອບຄົວ ຂອງຜູ້ເສັຽຊີວິດ
ທ່ານ ເລັດ ໄຊຍະພອນ(ຊ້າຍ) ເຈົ້າແຂວງ ແຂວງອັດຕະປື ມອບເງິນຄ່າ ປົວແປງຈິດໃຈ ໃຫ້ສະມາຊິກ ຄອບຄົວ ຂອງຜູ້ເສັຽຊີວິດ
ຮູບພາບອຸປຖັມໂດຍ : ນັກຂ່າວພົລເມືອງ

ບໍຣິສັດ ເຊປຽນ-ເຊນ້ຳນ້ອຍ ແລະ ບໍຣິສັດ SK ຂອງເກົາຫລີໃຕ້ ພ້ອມດ້ວຍບໍຣິສັດປະກັນພັຍ, ໄດ້ຈ່າຍຄ່າຫົວໃຫ້ແກ່ຍາດພີ່ນ້ອງ ຂອງຜູ້ ເສັຽຊີວິດ ແລະ ຫາຍສາບສູນ ຈາກເຫດການເຂື່ອນເຊປຽນ-ເຊນ້ຳນ້ອຍ ແຕກ.

ບັນດາຍາດພີ່ນ້ອງຂອງຜູ້ເສັຽຊີວິດ ແລະຫາຍສາບສູນ 71 ຄົນໄດ້ຮັບເງິນຄ່າຫົວ, ຫຼືຄ່າປົວແປງຈິດໃຈ ໃນວັນທີ 26 ມົກກະຣາ ໃນມູນຄ່າ 10 ພັນໂດລາ ຕໍ່ຄົນ, ດັ່ງ ທ່ານ ເລັດ ໄຊຍະພອນ ເຈົ້າແຂວງອັດຕະປື ໄດ້ກ່າວຕໍ່ເອເຊັຍເສຣີ ວ່າ:

"ສຳລັບຄ່າປົວແປງຈິດໃຈນີ້ ມັນບໍ່ມີງວດສຸດທ້າຍ, ມັນບໍ່ມີງວດນີ້, ອັນນີ້ສະເພາະຄ່າຜູ້ເສັຽຊີວິດ ຕາມກົດໝາຍແລ້ວເຂົາເອີ້ນຄ່າປົວແປງ ຈິດໃຈ, ມັນບໍ່ມີຫຼາຍງວດ ໄທເຮົາໄດ້ຈ່າຍບາດດຽວໂລດ ແຕ່ວ່າຄ່າຊົດເຊີຍຕ່າງໄດ໋, ອັນນີ້ເອີ້ນຄ່າປົວແປງຈິດໃຈ ໃຫ້ຜູ້ເສັຽຊີວິດ ແລະ ໃຫ້ຄອບຄົວຜູ້ເສັຽຊີວິດ ແຕ່ວ່າ ໄລ່ເປັນຄົນ."

ທ່ານກ່າວຕື່ມອີກວ່າ ທີ່ຜ່ານມາ, ຣັຖບານໄດ້ຈ່າຍໃຫ້ເງິນກິນທານ ຈຳນວນ 1 ລ້ານ 5 ແສນກີບ ໃຫ້ແກ່ຍາດພີ່ນ້ອງ ຂອງຜູ້ເສັຽຊີວິດ ແລະ ຫາຍສາບສູນ. ອີງຕາມການຢືນຢັນຂອງ ທ່ານ ເຈົ້າແຂວງອັດຕະປື, ການຟື້ນຟູຊີວິດການເປັນຢູ່ ຂອງຜູ້ທີ່ໄດ້ຮັບ ຜົລກະທົບ ຈາກ ເຂື່ອນ ເຊປຽນ-ເຊນ້ຳນ້ອຍ ແຕກ, ຕ້ອງໃຊ້ເວລາປະມານ 3 ປີ - 4 ປີ, ເຊິ່ງບໍຣິສັດ ເຈົ້າຂອງໂຄງການເຂື່ອນເຊປ່ຽນ-ເຊນ້ຳນ້ອຍ ໄດ້ເຮັດປະກັນ ກັບບໍຣິສັດ ປະກັນພັຍເອົາໄວ້ ໃນມູນຄ່າ 50 ລ້ານໂດລາ ສະຫະຣັຖ, ຊຶ່ງບໍຣິສັດ ກໍ່ໄດ້ແຈ້ງ ໃຫ້ທາງການລາວ ໄດ້ຮັບຮູ້.

ເຫດການເຂື່ອນເຊປຽນ-ເຊນ້ຳນ້ອຍ ແຕກ ໃນເດືອນ ກໍຣະກະດາ ປີ 2018 ທີຜ່ານມາ, ເຮັດໃຫ້ມີຜູ້ເສັຽຊີວິດ ແລະ ຫາຍສາຍສູນ 71 ຄົນ ແລະໄດ້ຮັບຜົນກະທົບ ປະມານ 7 ພັນ ຄົນ, ໃນຂນະທີ່ຜົລຂອງການວິຈັຍ ສາເຫດຂອງເຂື່ອນແຕກ ໃນຄັ້ງນີ້, ຍັງບໍ່ທັນໄດ້ສລຸບອອກມາ ຢ່າງເປັນທາງການ.

ນອກຈາກນີ້ ໃນວັນທີ 23 ມົກກະຣາ ທີ່ຜ່ານມາ ສຳນັກງານນາຍົກຣັຖມົນຕຣີ, ໄດ້ອອກແຈ້ງການ ວ່າດ້ວຍການຮັບເອົາ ຄ່າຊົດເຊີຍແກ່ ຜູ້ເສັຽຊີວິດ ແລະຜູ້ຫາຍສາບສູນ ຈາກເຫດການ ເຂື່ອນເຊປຽນ-ເຊນ້ຳນ້ອຍແຕກ, ເນື້ອໃນຂອງແຈ້ງການ ລະບຸວ່າ:

1. ເຫັນດີຮັບຮອງເອົາຄ່າຊົດເຊີຍ ໃຫ້ແກ່ຜູເສັຽຊີວິດ ແລະຜູ້ຫາຍສາບສູນ ຈາກເຫດການ ສັນເຂື່ອນເຊປຽນ-ເຊນ້ຳນ້ອຍ ແຕກ ຢູ່ເມືອງ ສະໜາມໄຊ ແຂວງອັດຕະປື ໃນມູນຄ່າ 10 ພັນໂດລາ ສະຫະຣັຖ ຕໍ່ຫົວຄົນ ຕາມຈຳນວນ ຜູ້ເສັຍຊີວິດ ແລະຜູ້ ຫາຍສາບສູນ ທີ່ຣັຖບານ ໄດ້ຮັບຮອງເອົາ 71 ຄົນ. ໃນຕໍ່ໜ້າ, ຖ້າຫາກພົບເຫັນຜູ້ເສັຽຊີວິດ ເພີ້ມຕື່ມ ບໍຣິສັດຕ້ອງສືບຕໍ່ ຮັບຜິດຊອບ ຈ່າຍຄ່າຊົດເຊີຍຕື່ມອີກ.

2. ມອບໃຫ້ ແຂວງອັດຕະປື, ບໍຣິສັດ ເຊປຽນ-ເຊນ້ຳນ້ອຍ ແລະ ບໍຣິສັດ SK ພ້ອມດ້ວຍ ບໍຣິສັດ ປະກັນພັຍ ດຳເນີນການມອບຮັບເງິນ ຊົດເຊີຍດັ່ງກ່າວ ໃຫ້ແກ່ຄອບຄົວ, ຍາດພີ່ ນ້ອງຜູ້ທີ່ເສັຽຊີວິດ ແລະ ຫາຍສາບສູນ ຕາມກົດໝາຍ, ລະບຽບການ ແລະ ເງື່ອນໄຂການ ປະກັນພັຍ.

ເຕັມຫນ້າ