ມ.ສະໜາມໄຊປະມູນ ສ້າງຖນົນ ບໍ່ໂປ່ງໃສ

ພູວົງສ໌
2019-05-03
ອີແມວລ໌
ຄໍາເຫັນ
Share
ພິມ
ເສັ້ນທາງໄປຫາເມືອງສະໜາມໄຊ ແຂວງອັດຕະປື
ເສັ້ນທາງໄປຫາເມືອງສະໜາມໄຊ ແຂວງອັດຕະປື
RFA/LX

ການປະມູລໂຄງການກໍ່ສ້າງເສັ້ນທາງ, ຕັດຕາຜ້າຜັງບ້ານ ແລະຄອງຣະບາຍນໍ້າເສັຽ ໃຫ້ປະຊາຊົນ ຜູ້ປະສົພພັຍເຂື່ອນເຊປຽນເຊນໍ້ານ້ອຍ ແຕກ ຢູ່ເມືອງສະໜາມໄຊ ແຂວງອັດຕະປື ໄດ້ສໍາເຣັຈ ໃນຕົ້ນເດືອນເມສາ ແລ້ວ. ແຕ່ສະເພາະບັນດາ ບໍຣິສັດ ທີ່ຊນະການປະມູລນັ້ນ ສ່ວນຫຼາຍ ຈະເປັນບໍຣິສັດ ທີ່ເປັນເຄື່ອຍາຕ ຂອງເຈົ້າໜ້າທີ່ຂັ້ນສູງ ຂອງແຂວງອັດຕະປື. ຜູ້ສັງເກດການ ໃນການປະມູລ ທີ່ບໍ່ປະສົງອອກ ຊື່ແລະສຽງ ທ່ານນຶ່ງ ໄດ້ກ່າວຕໍ່ຜູ້ສື່ຂ່າວ ວິທຍຸເອເຊັຽເສຣີ ເມື່ອທ້າຍເດືອນ ເມສາ ທີ່ຜ່ານມານີ້ວ່າ:

“ມີແຕ່ຄົນຣັຖ ພາຍໃນແຂວງ ເອົາບໍຣິສັດໂຕເອງມາ ປະມູລ, ເຊິ່ງໃນນັ້ນ ບາງບໍຣິສັດກໍບໍ່ມີຮອດກົນຈັກໜັກ ໃນການດໍາເນີນການກໍ່ສ້າງ.”

ນັ້ນແມ່ນຄວາມເວົ້າຂອງຜູ້ສັງເກດການ. ຜູ້ສັງເກດການ ທ່ານນີ້ ກ່າວຕື່ມອີກວ່າ:

“ບໍຣິສັດເຫຼົ່ານັ້ນ ແມ່ນສາຂາຂອງພະນັກງານຣັຖໝົດ ຢູ່ພາຍໃນແຂວງ ແລະກ່ອນປະມູລ ຄົນໃນວົງການກໍ່ສ້າງຮູ້ກັນໝົດແລ້ວ ເຂົາຮູ້ວ່າ ບໍຣິສັດ ທີ່ຢູ່ໃນເຄືອຂ່າຍໃດ ຈະຊນະການປະມູລ ແລະ ຜົນອອກມາກໍເປັນແນວນັ້ນແທ້.”

ເຖິງຢ່າງໃດກໍຕາມ, ເຈົ້າໜ້າທີ່ກ່ຽວຂ້ອງແຂວງອັດຕະປື ກໍປະຕິເສດເຣື້ອງດັ່ງກ່າວ, ໂດຍໃຫ້ເຫຕຜົນວ່າ ການປະມູລຖືວ່າເປັນໄປຕາມ ຫລັກການ. ດັ່ງທ່ານລັດຕະນະພອນ, ຫົວໜ້າຜແນກໂຍທາທິການ ແລະຂົນສົ່ງແຂວງອັດຕະປື ໄດ້ກ່າວຕໍ່ຜູ້ສື່ຂ່າວເອເຊັຽເສຣີ ໃນວັນທີ 2 ພຶສພາ ນີ້ວ່າ:

“ບໍ່ຮູ້ບໍ່ຮູ້ໂຕນີ້ ເພາະວ່າ ຄນະກັມມະການປະມູລ ກະແມ່ນມາຈາກສູນກາງ ກະມີເນາະ ລະກະມາຢູ່ແຂວງ ບໍ່ບໍ່ ຮູ້ໄດ໋ ອັນນີ້ ກະປະມູນຕາມ ລະບຽບໄດ໋ ແຕ່ວ່າກະໄດ້ຍິນແຕ່ເຂົາເວົ້າ ໂຕຈິງມັນກະບໍ່ຮູ້ດອກ ເອີກວດສອບໄດ້ແທ້ ເພາະວ່າເອກກະສານຕ່າງໆ ອ່າ! ມັນກະສູນກາງ ຮ່ວມກັບແຂວງ ນີ້ແຫລະ.”

ສະເພາະໂຄງການທີ່ບໍຣິສັດພາຍໃນແຂວງອັດຕະປື ໄດ້ຮັບສໍາປະທານ ທີ່ມີມູນຄ່າຫລາຍກວ່າ 25 ຕື້ ກີບ ລວມມີ 7 ໂຄງການ. ນອກນີ້, ຍັງມີອີກ 10 ບໍຣິສັດ ຈາກນະຄອນຫຼວງວຽງຈັນ ທີ່ຊນະການປະມູລ ໂຄງການກໍ່ສ້າງເສັ້ນທາງອື່ນໆ ທີ່ມີມູລຄ່າອີກຫລາຍ 10 ຕື້ກີບ.

ໃນວັນທີ 8 ເມສາ ທີ່ຜ່ານມາ, ສໍານັກງານນາຍົກຣັຖມົນຕຣີ ໄດ້ອອກແຈ້ງການວ່າດ້ວຍ ການຮັບຮອງເອົາຜົລ ຂອງການປະມູນໂຄງການ ກໍ່ສ້າງ-ຟື້ນຟູ ໂຄງຮ່າງພື້ນຖານ, ວຽກງານຂົວທາງ ແລະ ເຄຫາສະຖານ ສໍາລັບວຽກແກ້ໄຂ ພັຍພິບັດ ຢ່າງເລັ່ງດ່ວນ ຢູ່ເມືອງສະໜາມໄຊ ແຂວງອັດຕະປື.

ສ່ວນເງິນທີ່ຈະໃຊ້ເຂົ້າໃນການກໍ່ສ້າງໂຄງການດັ່ງກ່າວ ແມ່ນນອນຢູ່ໃນຮ່ວງເງິນ 10 ລ້ານ ໂດລາ ທີ່ບໍຣິສັດ SK ຂອງເກົາຫຼີໃຕ້ ໄດ້ມອບ ໃຫ້ຣັຖບານ ລາວ ໃນປີ 2018.

ເຕັມຫນ້າ