ນັກລົງທຶນຈີນມັກຜິດ ສັນຍາ

ສຸພັດຕາ
2018-01-11
ອີແມວລ໌
ຄໍາເຫັນ
Share
ພິມ
ສວນປູກໝາກໂມ ບ້ານໂພນສູງ ເມືອງຫົງສາ ແຂວງໄຊຍະບູຣີ
ສວນປູກໝາກໂມ ບ້ານໂພນສູງ ເມືອງຫົງສາ ແຂວງໄຊຍະບູຣີ
Screen captured travel Laos video

ປະຊາຊົນຢູ່ໃນຫຼາຍເມືອງ ແຂວງໄຊຍະບູລີ ໄດ້ຮັບຄວາມເດືອດຮ້ອນ ຍ້ອນນັກລົງທຶນຈີນມັກໂຈະການຜລິດ ແລ້ວໜີກັບຄືນປະເທດ ກ່ອນ ທີ່ຈະໝົດກຳນົດ ການເຊົ່າທີ່ດິນ ຈາກປະຊາຊົນ ໃນຂນະທີ່ເຈົ້າໜ້າທີ່ ແຂວງໄຊຍະບູລີ ທ່ານນຶ່ງກ່າວກ່ຽວກັບ ເຣື້ອງນີ້ຕື່ມວ່າ:

“ກໍມີຈຳນວນນື່ງເນາະ ທີ່ວ່າຂະເຈົ້າມາເຊົ່າດິນ ຂອງປະຊາຊົນເນາະ ມາສັມປະທານດິນ ຂອງປະຊາຊົນ ແຕ່ວ່າກຳນົດ 3 ປີ ບາງເທື່ອມັນ ບໍ່ຮອດ 3 ປີ ຂະເຈົ້າກໍໂຈະເລີຍກໍມີ ກິຈກັມຫັ້ນນະ ກໍ່ເປັນຮູ້ເທົ່າບໍ່ເຖິງການນັ້ນເນາະ, ຈຳນວນນຶ່ງກໍຖືວ່າສາມາດ ຕາມໄດ້ ມີຈຳນວນນຶ່ງ ກໍຖືວ່າ ຕາມບໍ່ໄດ້ເນາະ ເພາະວ່າເບື້ອງພວກເຮົານີ້ ຂ້ອນຂ້າງບໍ່ຮູ້ນຳ ປະຊາຊົນປານໃດ ສ່ວນຫຼາຍມັນເປັນດິນ ຂອງປະຊາຊົນເດ້ ຂະເຈົ້າ ເຮັດສັນຍາເອງກັບນັກທຸຣະກິດ.”

ທ່ານອະທິບາຍວ່າ ບັນຫານັກລົງທຶນຈີນ ໜີກັບປະເທດ ທັງທີ່ຍັງບໍ່ໝົດກຳນົດເວລານັ້ນ ມີມາດົນແລ້ວ ແລະມີຫຼາຍກໍຣະນີ ໂດຍສະເພາະ ໃນເມືອງຄອບ ແລະເມືອງຊຽງຮ່ອນ ທີ່ປະຊາຊົນຮູ້ເທົ່າບໍ່ເຖິງການ ຍອມໃຫ້ນັກລົງທຶນ ສັມປະທານທີ່ດິນ ເພື່ອປູກພືດຣະດູແລ້ງ ເປັນຕົ້ນ ໝາກໂມ ໂດຍທີ່ຕົນເອງບໍ່ຮູ້ວ່າ ນັກລົງທຶນຜູ້ນັ້ນ ມີຄວາມໜ້າເຊື່ອຖື ຫຼາຍປານໃດ ຍ້ອນບໍ່ຜ່ານທາງການ ຈຶ່ງບໍ່ມີເຈົ້າໜ້າທີ່ ມາປະເມີນ ຄວາມສ່ຽງແລະກວດກາ ປວັດຂອງນັກລົງທຶນໄດ້.

ກ່ຽວກັບເຣື່ອງນີ້ ເຈົ້າໜ້າທີ່ບອກວ່າ ໃນປີ 2017 ທີ່ຜ່ານມາ ທົ່ວແຂວງ ທາງການສາມາດຕິດຕາມຕົວນັກລົງທຶນ ກັບມາຮັບຜິດຊອບໄດ້ ຈຳນວນນຶ່ງເທົ່ານັ້ນ ສະເລັ່ຽແລ້ວປະມານ 20 ກໍຣະນີ ຈາກເກືອບຮ້ອຍກໍຣະນີ ຫຼືອາດຫຼາຍກວ່ານີ້, ແຕ່ເຈົ້າໜ້າທີ່ ຍັງບໍ່ຮູ້ ເນື່ອງຈາກ ປະຊາຊົນ ບໍ່ໄດ້ມາຮ້ອງຮຽນ.

ນອກຈາກນີ້ ເຈົ້າໜ້າທີ່ເມືອງຄອບທ່ານນຶ່ງ ກໍບອກວ່າ ນັກລົງທຶນຈີນ ທີ່ມັກບ່ໍ່ປະຕິບັດຕາມເງື່ອນໄຂ ການສັມປະທານທີ່ດິນ ສ່ວນໃຫຍ່ ເປັນບໍຣິສັດຜີ ຫຼື (ບໍຣິສັດ ທີ່ບໍ່ມີຕົວຕົນ) ຫຼືເປັນພໍ່ຄ້າຈີນ ທີ່ທຶນໜ້ອຍ ຂະເຈົ້າຈະລົງທຶນບໍ່ຫຼາຍ ຊອກເຊົ່າເນື້ອທີ່ ຂນາດນ້ອຍໆບໍ່ຮອດ 5 ເຮັກຕາ ແລະຕັ້ງໃຈເຂົ້າມາຫາຊາວບ້ານເອງ ໂດຍບໍ່ຜ່ານທາງການ ເນື່ອງຈາກບໍ່ຢາກເສັຍເງິນ ຄ່າເຮັດເອກສານ ບໍ່ຢາກເສັຍພາສີໃຫ້ຣັຖ.

“ຂະເຈົ້າກໍຢ້ານທີ່ຈະຕ້ອງເສັຍພາສີໃຫ້ຣັຖ ຂະເຈົ້າກໍເລີຍວ່າເລືອກທີ່ຈະໄປໃນຮູບແບບ ໄປຫາປະຊາວບ້ານເລີຍຫຼາຍກວ່າ ເພາະວ່າບາງ ບໍຣິີສັດ ທີ່ມາ ຂະເຈົ້າກໍເປັນບໍຣິສັດ ທີ່ບໍ່ມີຕົວຕົນ ຢູ່ໃນຈີນ ຍົກຕົວຢ່າງຈັ່ງຊີ້ ເປັນບໍຣິສັດ ແບບບໍຣິສັດຜີ ມາຈັ່ງຊິ ຫັ້ນນາ ບໍຣິສັດທີ່ບໍ່ມີ ເງື່ອນໄຂ ຕາມກົດໝາຍ ທີ່ຈະສາມາດມາລົງທຶນ ໃນລາວໄດ້ ແຕ່ຂະເຈົ້າຢາກລົງມາ.”

ເຈົ້າໜ້າທີ່ກ່າວຕື່ມອີກວ່າ ສຳລັບເມືອງຄອບ ປັດຈຸບັນ ປັນຫານັກລົງທຶນ ກັບຄືນປະເທດ ແລະປ່ອຍປະເນື້ຶືືືຶອທີ່ ການຜລິດນັ້ນ ເຖິງວ່າຈະບໍ່ ໄດ້້ເກີດຂຶ້ນຫຼາຍເຮັກຕ້າ, ແຕ່ກໍເກີດຂຶ້ນຫຼາຍບ້ານ ບ້ານລະເລັກລະໜ້ອຍ.

ເຕັມຫນ້າ