ຈີນເຊົ່າດິນປູກກ້ວຍຫອມ ຢູ່ບ້ານ ແສນດິນ

ໄຊຍາ
2019-05-08
ອີແມວລ໌
ຄໍາເຫັນ
Share
ພິມ
ສວນປູກກ້ວຍ ຂອງ ນັກລົງທຶນຈີນ ຢູ່ ນະຄອນຫຼວງວຽງຈັນ
ສວນປູກກ້ວຍ ຂອງ ນັກລົງທຶນຈີນ ຢູ່ ນະຄອນຫຼວງວຽງຈັນ
ຮູບພາບຈາກ : ນັກຂ່າວພົລເມືອງ

ນັກລົງທຶນຈີນ ເຊົ່າດິນປະຊາຊົນ ຢູ່ບ້ານແສນດິນ ເມືອງນາຊາຍທອງ ນະຄອນຫລວງວຽງຈັນ ເພື່ອປູກກ້ວຍສົ່ງອອກໄປຈີນ ເນື້ອທີ່ 80 ປາຍເຮັກຕ້າ ໂດຍມີສັນຍາ ເຊົ່າ 4 ປີ ນັບແຕ່ປີ 2015 – 2021. ດັ່ງ ປະຊາຊົນ ບ້ານແສນດິນ ເວົ້າຕໍ່ວິທຍຸເອເຊັຽເສຣີ ເມື່ອວັນທີ 07 ພືສພາ ວ່າ:

"ຄົນຈີນມາຢູ່ມາຜລິດ ຢູ່ບ້ານເຮົານິແຫຼະປູກກ້ວຍ ມາເຊົ່າທີ່ດິນຊາວນາເຮົາ 80 ປາຍເຮັກຕ້າ ປູກແລ້ວຖ້ວມຫົວແລ້ວ ພໍດີໄດ້ປີທີ 4 ແລ້ວ ຂະເຈົ້າເຊົ່າ 6 ປີ ເດ້ ສັນຍາປີ 2 ປີ ເຊົ່າກັນເທື່ອນຶ່ງກຳນົດ 6 ປີ, 6 ປີ ກໍເຊົາແລ້ວ."

ນັກລົງທຶນເຊົ່າດິນປະຊາຊົນປູກກ້ວຍຫອມນັ້ນ ກໍມີຫາງສຽງປະຊາຊົນຈຳນວນນຶ່ງ ບໍ່ເຫັນດີໃຫ້ປູກກ້ວຍຫອມ ຍ້ອນພວກເຂົາເຈົ້າໄດ້ຍິນ ຂ່າວຈາກພາກເໜືອ ວ່າສານເຄມີທີ່ໃຊ້ ໃນການປູກກ້ວຍ ມັນສົ່ງຜົລກະທົບຕໍ່ ສະພາບແວດລ້ອມ ເຊັ່ນແມ່ນໍ້າ ຮວມເຖິງມີຄົນເສັຽຊີວິດ ຈາກສານເຄມີ ດັ່ງກ່າວ.

ສຳລັບການປູກກ້ວຍຢູ່ບ້ານແສນດິນ ສ່ວນໃຫຍ່ຊາວສວນທີ່ມາປູກກ້ວຍ ແມ່ນຊົນເຜົ່າມົ້ງ ທີ່ຕິດຕາມເຈົ້າຂອງສວນກ້ວຍ ທີ່ເຄີຍເຊົ່າທີ່ດິນ ປູກກ້ວຍ ຢູ່ທາງພາກເໜືອມາກ່ອນ ໂດຍເປັນຮັບເໝົາບໍ່ວ່າຈະເປັນການປູກ, ການບົວຣະບັດ ແລະ ການບັນຈຸ.

"ສ່ວນຫຼາຍແມ່ນຊົນເຜົ່າມົ້ງ ຂະເຈົ້າເຮັດແບບເໝົາຄອບຄົວນຶ່ງ 5 ພັນຕົ້ນ ຫຼື 6 ພັນຕົ້ນ ຢູ່ບ້ານເຮົານີ້ມີ 30 ປາຍຄອບຄົວ ເປັນແຄ້ມ ເວົ້າເຣື່ອງສານເຄມີ ຂະເຈົ້າກໍ່ວ່າມີເດີ້ຢາໂຕນີ້ ແຕ່ກໍບໍ່ຜົລກະທົບຫຍັງ."

ຕໍ່ບັນຫານີ້ ທ່ານ ຄຳໄພ ພົມມະຈັນ ຫົວໜ້າຫ້ອງການກະສິກັມ ແລະ ປ່າໄມ້ ເມືອງນາຊາຍທອງ ເປີດເຜີຍຕໍ່ສື່ທ້ອງຖິ່ນ ເມື່ອວັນທີ 03 ພຶສພາ ວ່າ: ທາງການໄດ້ລົງກວດກາພື້ນທີ່ ບຸກເບີກໂຕຈິງ ຢູ່ບ້ານແສນດິນເຫັນວ່າ ການປູກກ້ວຍແມ່ນບໍ່ເໝາະສົມ ໃຫ້ຊາວສວນຫັນໄປ ປູກສາລີແທນ ເພື່ອເປັນການຮັກສາແຫຼ່ງນໍ້າ ທັມມະຊາດ.

ປັດຈຸບັນຢູ່ເມືອງນາຊາຍທອງ ມີໂຄງການປູກກ້ວຍທັງໝົດ 3 ໂຄງການ ຢູ່ບ້ານແສນດິນ 2 ໂຄງການມີເນື້ອທີ່ 200 ປາຍເຮັກຕ້າ ໃນນີ້ ປູກແຕ່ປີ 2015 ມີ 1 ໂຄງການເນື້ອທີ 88 ເຮັກຕ້າ ແລະ ອີກ 1 ໂຄງການ ຍັງຢູ່ໃນຂັ້ນຕອນອະນຸມັດຈາກຣັຖ ແລະ ໂຄງການຢູ່ບ້ານ ອີໄລ ເໜືອຣັຖຈະໃຫ້ປູກ 100 ເຮັກຕ້າ ເພື່ອເປັນການທົດລອງ ໃນໂຄງການຜລິດກະສິກັມສະອາດ (GAP) ເຊິ່ງໃນຂນະນີ້ຍັງຢູ່ໃນ ຂັ້ນຕອນ ການຜ່ານເອກກະສານ ດ້ານສິ່ງແວັດລ້ອມຢູ່.

ເຕັມຫນ້າ