ຊາວລາວຖືກຊາວຕ່າງດ້າວ ຍາດວຽກ

ໄຊຍາ
2019-05-16
ອີແມວລ໌
ຄໍາເຫັນ
Share
ພິມ
ບັນດາແມ່ຄ້າ ທີ່ ຂາຍເຄື່ອງແລະອາຫານຍ່ອຍ ຕາມຕລາດ
ບັນດາແມ່ຄ້າ ທີ່ ຂາຍເຄື່ອງແລະອາຫານຍ່ອຍ ຕາມຕລາດ
ຮູບພາບຈາກ : ນັກຂ່າວພົລເມືອງ

ຄົນລາວທີ່ຫາເຊົ້າກິນຄໍ່າ ຫຼື ຜູ້ມີຣາຍໄດ້ໜ້ອຍ ຖືກແຮງງານຕ່າງດ້າວເຂົ້າມາຍາດອາຊີບ ໂດຍສະເພາະແມ່ນຄົນຈີນ ແລະ ຄົນວຽດນາມ, ຕໍ່ເຫດການນີ້ ມັນຊໍ້າເຮື້ອມາຫຼາຍປີຣັຖບານ ຍັງແກ້ບໍ່ຕົກ ຊາວລາວຜູ້ປະກອບອາຊີບ ຫາເຊົ້າກິນຄໍ່າ ທີ່ໄດ້ຮັບຜົລກະທົບ ວອນທາງການ ແກ້ໄຂ.

ຄົນຈີນ ແລະ ຄົນວຽດນາມ ເປັນກຸ່ມຄົນສ່ວນໃຫຍ່ ທີ່ເຂົ້າມາລາວແລ້ວ ປະກອບອາຊີບໄດ້ຫຼາກຫຼາຍ ບໍ່ວ່າຈະເປັນໂຄງການຂນາດໃຫຍ່ ໄປຈົນເຖິງການຄ້າຂາຍ. ກຸ່ມຄົນທີ່ວ່ານີ້ ມີທັງແບບຖືກກົດໝາຍ ມານຳໂຄງການ ຫຼື ມີໃບອະນຸຍາດ ແຕ່ຍັງມີຄົນເຖື່ອນ ອີກຈຳນວນຫຼາຍ ທີ່ແອບແຝງ ເຂົ້າມາຫາກິນກັບຊຸມຊົນ ຢູ່ຕາມຕຣາດຫຼືເປີດຮ້ານຂາຍຍ່ອຍຕ່າງໆ ໄປຈົນເຖິງເຂົ້າມາເຮັດວຽກ ໃນໂຄງການໃຫຍ່.

ອີງຕາມການຣາຍງານ ຂອງທາງການລາວ ເມື່ອປີຜ່ານມາ ສະເພາະຜູ້ທີ່ໄດ້ຮັບການ ຂື້ນທະບຽນແມ່ນ 40 ພັນຄົນ ສ່ວນທີ່ມາກັບໂຄງການ ເຊັ່ນ ກໍ່ສ້າງທາງຣົດໄຟ ລາວ-ຈີນ, ກໍ່ສ້າງເຂື່ອນ, ກໍ່ສ້າງພື້ນຖານຕ່າງໆ ຄາດວ່າກັນວ່າບໍ່ຕໍ່າກວ່າແສນຄົນ.

ປະຊາຊົນລາວຜູ້ຫາເຊົ້າກິນຄໍ່າ ກຸ່ມຄົນເລົ່ານີ້ຈະມີຣາຍໄດ້ໜ້ອຍ, ມີທຶນໜ້ອຍ ບໍ່ສາມາດແຂ່ງຂັນ ກັບຄົນຕ່າງດ້າວໄດ້ ໂດຍສະເພາະ ຈີນ ກັບວຽດນາມ ປະກອບກັບມາຕການ ຂອງທາງການລາວ ບໍ່ເດັດຂາດເຮັດໃຫ້ປະຊາຊົນ ທຳມາຫາກິນ ໄດ້ຮັບຄວາມເດືອດຮ້ອນ ທົ່ວປະເທສ ບໍ່ວ່າຈະຢູ່ໜ້າວຽກໃດ ທັງເຮັດວຽກໂຄງການ ທັງຄ້າຂາຍ ປະກອບກິຈການໂຕເອງ ຕ່າງກໍ່ມີສຽງຈົ່ມວ່າ ຫາກິນລຳບາກຂື້ນນັບມື້.

ດັ່ງຊາຍຄົນນຶ່ງທີ່ໄດ້ເຮັດວຽກກັບໂຄງການເຂື່ອນແຫ່ງນຶ່ງຂອງຈີນໄດ້ໃຫ້ສຳພາດ ຕໍ່ນັກຂ່າວ RFA ເມື່ອທ້າຍເດືອນເມສາ ຜ່ານມາວ່າ:

"ມັນກາຫຼາຍສົມຄວນໃດ ປະມານ 800 ຄົນນີ້ລະ ເງິນເດືອນຂອງເຂົາຄົນວຽດນາມ ຜູ້ນຶ່ງແມ່ນ 6 ລ້ານ ມາຈ້າງຄົນລາວໄດ້ສອງຫຼືສາມຄົນ ຄົນລາວກາວ່າງງານ ຫຼາຍດຽວນີ້ນ່າ ສເນີພາກສ່ວນກ່ຽວຂ້ອງ ມາກວດສອບແດ່ເນາະ. ເທົ່າທີ່ນ້ອງຮູ້ມາຢູ່ໂຕເຂື່ອນຄົນລາວ ມີຢູ່ປະມານ 500 ນີ້ລະ ຮວມທັງກັມມະກອນ ທັງໂຊເຟີ້."

ຜູ້ຊາຍທີ່ເຮັດວຽກໂຄງການກ່າວຕື່ມວ່າ:

"ນ້ອງຈະເວົ້າຄືນ ອັນຄົນຈີນເຮັດວຽກໃນໂຄງການນີ້ນ່າ ມາຂັບຣົດຢູ່ລາວ ເງີນເດືອນກໍ່ສູງ 15 ລ້ານຕໍ່ຄົນ ຈ້າງຄົນລາວກາໄດ້ປະມານ 4 ຄົນ ພຸ້ນລະ ອັນທີ່ນ້ອງຢາກເວົ້າ ນີ້ອັນທີນຶ່ງ ຖືກຕ້ອງຕາມກົດໝາຍບໍ່ ອັນທີສອງມີໃບຂັບຂີ້ສາກົລບໍ່. ສ່ວນຣາຍລັບຂອງຄົນລາວກາ 2 ລ້ານປາຍ ຫາ 3 ລ້ານເນາະ ເຂົາຈ້າງຖືກ. ຄົນຈີນ ຄົນວຽດເອົາເຂົ້າມາ 800 ຄົນລາວ ກາວ່າງງານ 800 ຄົນ."

ຜູ້ຊາຍຄົນນີ້ກ່າວຕອນທ້າຍວ່າ:

"ເຣື່ອງຂັບຣົດຄົນລາວນີ້ຂັບໄດ້ຢູ່ ນອກຈາກວິຊາການຄົນລາວບໍ່ເກັ່ງ ກາຈຳເປັນຕ້ອງເອົາເຂົ້າມາເນາະ. ຄົນຈີນນີ້ໄລຍະເຊັນສັນຍາຢູ່ 3 ປີ ສ່ວນຄົນລາວ ບໍ່ມີເຊັນສັນຍາ ຢູ່ໄດ້ຊໍ່າໃດກາຢູ່ໄປ ຊັ້ນນ່າ ແລະບັນຫາຖ້າເອົາຄົນວຽດ ເຮັດວຽກຄົນຈີນກາ ໄດ້ເປີເຊັນນຳ ກັບຄົນລາວ ບໍ່ໄດ້ເປີເຊັນນຳ."

ນອກຈາກນີ້ຍັງມີແມ່ຄ້າ ທີ່ໄດ້ສະແດງຄວາມເຫັນກ່ຽວກັບຄົນຈີນ ມາຍາດອາຊີບຄ້າຂາຍຕາມຕຣາດ ເຮັດໃຫ້ຄົນລາວທືນໜ້ອຍ ກໍ່ໄດ້ແຕ່ ຈົ່ມແຕ່ເຮັດຫຍັງບໍ່ໄດ້.

"ມີແຕ່ວ່າຄົນຈີນນັ້ນ ເຣື່ອງຄົນແຍ່ງອາຊີບຫັ້ນແຫຼະ ເຂົາເຈົ້າມາທຳການຄ້າແບບວ່າ ຂາຍຍ່ອຍຂາຍຫຍັງຊື່ ໆ ແລ້ວຣັຖບານ ອະນຸຍາດ ໃຫ້ມາຂາຍຍ່ອຍໄປຕາມ ປະເທສລາວຫັ້ນນ່າ ລະກາເຮັດໃຫ້ຄົນລາວມັນທຸກ ບໍ່ສາມາດຂາຍຫາເງິນ ໄດ້ດ້ວຍຕົນເອງ."

ສ່ວນປະຊາຊົນອີກທ່ານນຶ່ງ ທີ່ໄດ້ກ່າວຜ່ານທາງສື່ສັງຄົມອອນລາຍ ເຖີງການປະປ່ອຍຄົນຈີນ ຄົນວຽດນາມ ມາເຮັດວຽກຢ່າງເສລີ ເຊີ່ງກໍ່ ເປັນສາເຫດເຮັດໃຫ້ຄົນລາວ ທຳມາຫາກິນຍາກ.

"ຄືບ້ານເຮົານີ້ ຄືປ່ອຍໃຫ້ວຽດຈີນ ເຮັດວຽກຢ່າງເສຣີໂລດເນາະ ຢາກຂາຍຫຍັງກາຂາຍ ບໍ່ມີການຈຳກັດ ບໍ່ມີການຫ້າມຄວນຊິຫ້າມເຂົາ ວ່າອາຊີບໃດ ໃຫ້ຄົນລາວເຮັດ ສະເພາະຄົນລາວເຮົາມີແຕ່ 7 ລ້ານຄົນກໍ່ຍັງລັ່ງໄຫຼ ອອກໄປເຮັດວຽກ ຢູ່ຕ່າງປະເທສ ຍ້ອນວ່າມັນບໍ່ມີ ການຈັດສັນ ວຽກໃຫ້ຄົນລາວ ແລະກໍ່ໃຫ້ຄົນຕ່າງປະເທສທີ່ຢູ່ໃນລາວ."

ນອກຈາກນີ້ ປະຊາຊົນຢູ່ແຂວງຜົ້ງສາລີ ທີ່ຢືດອາຊີບຂົນສົ່ງສີນຄ້າ ໄດ້ເວົ້າບາງຕອນວ່າ ເປັນຫຍັງ ປະເທສລາວ ຈຶ່ງອະນຸຍາດໃຫ້ຣົດ ຂົນສົ່ງຈີນ ເຂົ້າມາລາວຫຼາຍແທ້ ຊໍ້າບໍ່ໜໍາ ຍັງແກ່ໝົດທຸກຢ່າງເຮັດໃຫ້ ຜູ້ປະກອບການຂົນສົ່ງ ໃນແຂວງຢູ່ບໍ່ລອດ. ໃນຕອນທ້າຍ ທ່ານ ຍັງຮຽກຮ້ອງ ໃຫ້ຣັຖບານຊ່ອຍ ຜູ້ປະກອບການລາວແດ່.

ຕໍ່ກໍຣະນີທີ່ຄົນລາວ ຖືກຄົນຕ່າງດ້າວມາຍາດແຍ່ງອາຊີບຄົນລາວນັ້ນ ທ່ານ ສອນໄຊ ສີພັນດອນ ຮອງນາຍົກຣັຖມົນຕຣີ ສປປ ລາວ ໄດ້ກ່າວຕໍ່ສື່ມວນຊົນທ້ອງຖີ່ນ ໃນໄລຍະການດຳເນີນກອງປະຊຸມ ສືບຕໍ່ແຜນການແກ້ໄຂຄົນຕ່າງປະເທສ ທີ່ເຄື່ອນໄຫວ ບໍ່ຖືກຕ້ອງຕາມ ກົດໝາຍ ຂອງລາວ ເມື່ອຕົ້ນປີນີ້ວ່າ:

"ຄົນຕ່າງປະເທສ ຫຼືແຮງງານຕ່າງປະເທສ ທີ່ເຂົ້າມາເຄື່ອນໄຫວບໍ່ຖືກ ຕ້ອງຕາມກົດໝາຍ ສປປ ລາວ ຜ່ານມານີ້ກໍ່ເຮັດໃຫ້ປະເທສ ສູນເສັຍທາງເສຖກິດສັງຄົມ ແຮງງານລາວຈຳນວນນຶ່ງ ກາບໍ່ມີວຽກເຮັດງານທຳ. ພາໃຫ້ບໍ່ມີຄວາມສະຫງົບ ແລະ ບັນຫາທາງລົບອື່ນໆ ຕາມມາ. ຖ້າຫັນເອົາເຂົ້າເຈົ້າທັງໝົດ ເຂົ້າຊູ່ຣະບຽບກົດໝາຍ ພົລເມືອງລາວ ເຮົານີ້ກໍ່ຈະມີວຽກເຮັດຫຼາຍຂື້ນ ແຕ່ເຂົ້າມາຜິດກົດໝາຍ ພວກເຮົາກໍ່ພຍາຍາມພັກດັນອອກ."

ທ່ານ ຮອງນາຍົກກ່າວຕື່ມວ່າ ແຕ່ວ່າບັນຫາມັນກໍ່ມີຢູ່ວ່າກົດໝາຍ ແລະ ຣະບຽບການສຳລັບການຄຸ້ມຄອງ ຄົນຕ່າງປະເທສນີ້ ທີ່ພວກເຮົາ ມີຢູ່ປັດຈຸບັນນີ້ ບໍ່ທັນໄດ້ບັງຄັບໃຊ້ ໄດ້ດີເທົ່າທີ່ຄວນ ສາເຫດນຶ່ງກໍ່ແມ່ນມາຈາກເຈົ້າໜ້າທີ່ ແລະ ພາກສ່ວນກ່ຽວຂ້ອງ ຍັງບໍ່ທັນເຂົ້າໃຈ. ນອກຈາກ ບັນຫາຄົນຕ່າງດ້າວ ມາຍາດອາຊີບແລ້ວ ຄ່າແຮງງານຂັ້ນຕໍ່າ 1,100,000 ກີບ ທີ່ຣັຖບານໄດ້ປະກາດຂື້ນ ເມື່ອປີກາຍ ເມື່ອ ທຽບໃສ່ຄ່າຄອງຊີບ ແລ້ວແມ່ນບໍ່ພຽງພໍຈ່າຍແຕ່ລະເດືອນ.

ດັ່ງຣາຍງານຂອງສື່ທ້ອງຖີ່ນ ເມື່ອວັນທີ 03 ພືສພາ ຜ່ານມາ ທ່ານ ສີມູນ ອຸ່ນລາສີ ຮອງປະທານສູນກາງ ສະຫະພັນກັມມະບານລາວ ເວົ້າວ່າຜ່ານມາການປະຕິບັດເບື້ອງຕົ້ນ ຂອງຄ່າແຮງຂັ້ນຕໍ່າທີ່ຂື້ນເປັນ 1,100,000 ກີບ ຍັງຫຍຸ້ງຍາກ ແລະ ປະຕິບັດໄດ້ພຽງ 80% ຍັງມີບາງ ຫົວໜ່ວຍ ທຸຣະກິດ ຍັງປະຕິບັດບໍ່ໄດ້ ເຊີ່ງບັນຫາດັ່ງກ່າວ ທາງສະຫະພັນກຳມະບານ ຈະໄດ້ປືກສາຫາລືກັບ ສະພາອຸດສາ ຫະກັມ ແລະການຄ້າ ແລະ  ກະຊວງແຮງງານ ແລະ ສະຫວັດດີການສັງຄົມ.

ເຖິງແນວໃດກໍ່ຕາມ ບັນຫາຄົນຕ່າງດ້າວ ຍາດອາຊີບຄົນລາວ ເຈົ້າໜ້າທີ່ກະຊວງແຮງງານ ແລະ ສວັດດີການສັງຄົມ ກໍ່ຢັ້ງຢືນວ່າກຳລັງ ຮ່ວມກັບພາກສ່ວນທີ່ກ່ຽວຂ້ອງ ເພື່ອແກ້ໄຂບັນຫາດັ່ງກ່າວນີ້ ແຕ່ແນວໃດ ປະຊາຊົນກໍ່ຍັງຮຽກຮ້ອງ ໃຫ້ທາງການເລັ່ງດ່ວນແກ້ໄຂ ແລະ ຕ້ອງອອກ ມາຕການເດັດຂາດເພື່ອສະຫງວນອາຊີບ ໃຫ້ຄົນລາວໄດ້ທຳມາຫາກິນ.

ເຕັມຫນ້າ