ຮ້ານຄ້າຂາຍຍ່ອຍກັງວົນ ຄູ່ແຂ່ງ 7-Eleven

ໄມຊູລີ
2019-03-06
ອີແມວລ໌
ຄໍາເຫັນ
Share
ພິມ
ຮ້ານຄ້າຂາຍຍ່ອຍ ຢູ່ ບ້ານຊຽງແມນ ເມືອງຈອມເພັດ ແຂວງຫຼວງພຣະບາງ
ຮ້ານຄ້າຂາຍຍ່ອຍ ຢູ່ ບ້ານຊຽງແມນ ເມືອງຈອມເພັດ ແຂວງຫຼວງພຣະບາງ
RFA/LX

ຜູ້ປະກອບການ ຮ້ານຂາຍເຄື່ອງຍ່ອຍ ຕາມບ້ານເຮືອນ ແລະ ຮ້ານມິນິມາທ (Mini Mart) ຈຳນວນຫຼາຍ ຮູ້ສຶກກັງວົນໃຈ ຖ້າຫາກກຸ່ມ ບໍຣິສັດ CP-All ຈາກປະເທສໄທ ຈະເຂົ້າມາເປີດສາຂາຮ້ານສະດວກຊື້ ຫຼື ເຊ່ເວັ້ນ-ອີ່ເລ່ເວັ້ນ (7-Eleven) ໃນປະເທສລາວ, ເນື່ອງຈາກວ່າ ຜູ້ປະກອບການ ເຫັນວ່າ ຮ້ານສະດວກຊື້ ໃນລາວ ກໍນັບມື້ນັບ ມີຫຼາຍຂຶ້ນແລ້ວ ຢ້ານວ່າຈະມາຍາດ ລູກຄ້າທ້ອງຖິ່ນ ຂອງຕົນ ແລະ ຈະ ສູ້ກຸ່ມທຶນຈາກໄທບໍ່ໄຫວໃນທີ່ສຸດ. ດັ່ງເຈົ້າຂອງຮ້ານສະດວກຊື້ ໃນນະຄອນຫຼວງວຽງຈັນ ນາງນຶ່ງ ກ່າວຕໍ່ວິທຍຸ ເອເຊັຽເສຣີ ໃນມື້ວັນທີ 05 ມີນາ ນີ້ວ່າ:

“ເມື່ອມີຮ້ານເພີ້ມຂຶ້ນ ມັນກະຕ້ອງມີແດ່, ວ່າຊີ້ສາ. ມັນຫຼາຍຮ້ານຂຶ້ນ, ແຕ່ປົກກະຕິຢູ່ໜີ້ມັນກະຫຼາຍຢູ່ແລ້ວເນາະບ້ານເຮົາ. ເຣື້ອງຍອດ ຕົກຂາຍ ມັນກະຕ້ອງຕົກແດ່ ລະກະຕ້ອງເອີ່ມັນກະຕ້ອງມີຜົລກະທົບ. ເພິ່ນມີຫຼາຍທາງເລືອກຂຶ້ນນ່າ ພວກລູກຄ້າ ເລືອກຊື້, ວ່າຊີ້ສາ. ເຮົາກະເບິ່ງຕາມສະພາບໂຕຈິງ.”

ໃນຂນະດຽວກັນ, ຜູ້ປະກອບການ ຮ້ານມິນິມາທ ໃນແຂວງສວັນນະເຂດ ນາງນຶ່ງ ກໍໄດ້ກ່າວຕໍ່ ເອເຊັຽເສຣີ ໃນມື້ດຽວກັນນັ້ນວ່າ: ນາງບໍ່ ຮູ້ສຶກກັງວົນໃຈເລີຍ ເພາະເຊື່ອວ່ານິໄສຄົນລາວມັກຊື້ເຄື່ອງ ໃຊ້ສອຍທີ່ຢູ່ ໃກ້ເຮືອນຊານ ຂອງຕົນ ຫຼາຍກວ່າຈະ ໄປຊື້ຢູ່ຮ້ານໃດຮ້ານນຶ່ງ ແບບເຈາະຈົງ ແລະ ຮ້ານສະດວກຊື້ແບບ ເຊ່ເວັ້ນ-ອີ່ເລ່ເວັ້ນ ກໍ ມີຫຼາຍແລ້ວ.

“ເພາະວ່າຮ້ານຄ້າແບບທີ່ເຣີ້ມເປັນລັກສະນະມິນິມາທ ຄ້າຍໆເຊເວັ້ນນີ້ກະຫຼາຍຢູ່ແລ້ວ ມີຫຼາຍຢູ່ແລ້ວ, ຫັ້ນນ່າ. ເພາະວ່າສ່ວນຫຼາຍຄົນລາວ ກະຢູ່ໃສໃກ້ບ້ານ ເຂົາກະຊື້ຢູ່ໃນຫັ້ນໂລດ ເຂົາບໍ່ໄດ້ແບ່ງແຍກວ່າ ຕ້ອງຮ້ານໃດ ຕ້ອງນຳໄປຊື້ຢູ່ຫັ້ນ, ຫັ້ນນ່າ. ເພາະວ່າມັນມີຫຼາຍຢູ່ແລ້ວ.”

ກ່ຽວກັບເຣື້ອງນີ້, ນັກວິຊາການ ດ້ານເສຖກິຈໃນລາວ ໄດ້ໃຫ້ທັສນະ ຕໍ່ຜູ້ສື່ຂ່າວເອເຊັຽເສຣີວ່າ ແຜນການ ຈະເຂົ້າມາເປີດສາຂາ ເຊ່ເວັ້ນ-ອີ່ເລ່ເວັ້ນ ຂອງກຸ່ມ ນັກລົງທຶນຈາກໄທນັ້ນ ຈະເຮັດໃຫ້ລາວ ຕົກເປັນພຽງຕລາດຈຳໜ່າຍສິນຄ້າ ຂອງກຸ່ມບໍຣິສັດໄທ ເທົ່ານັ້ນ  ເພາະລາວບໍ່ມີພື້ນຖານ ການຜລິຕ ທີ່ດີ ພໍຈະປ້ອນເຂົ້າຣະບົບ ຮ້ານສະດວກຊື້ ກຸ່ມນີ້ ແລະ ຈະເຮັດໃຫ້ກຳໃຣ ຕົກໄປ ໃສ່ກຸ່ມທຶນໃຫຍ່ ຫຼາຍກວ່າ ຈະຕົກໃສ່ ຜູ້ປະກອບການ ທ້ອງຖິ່ນທີ່ມີຢູ່.

“ມັນສະດວກ ມັນສະດວກຢູ່ວິທີເຮົາຂາຍ, ແຕ່ວ່າ ທຸຣະກິຈການຄ້າຂາຍມັນຊິໄປຕົກຢູ່ໃນມືເຂົາຜູ້ດຽວຫັ້ນ. ການຄ້າການຂາຍເງິນ ເຂົາຕ້ອງເອົາອອກໄປ ເຂົາເອົາເຂົ້າມາ, ເຈົ້າກະເປັນຕລາດໃນໂຕໃຫ້ເຂົາ ເຈົ້າບໍ່ໄດ້ມີຖານການຜລິຕ. ມີແຕ່ຊື້ຶ້ກິນ ຊື້ກິນ ຊື້ຂອງເຂົາກິນ, ເຈົ້າຊິໄດ້ຫຍັງບາດນີ້ນ່າ.”

ປະຈຸບັນ, ກຸ່ມທຶນຮ້ານ ສະດວກຊື້ ຫຼືມິນິມາທ ພວມເຂົ້າມາເປີດ ແລະ ຂຍາຍສາຂາ ໃນລາວຢ່າງຫຼວງຫຼາຍ ເປັນຕົ້ນ: ຮ້ານສະດວກຊື້ Jiffy ທີ່ ມີຢູ່ຕາມ ປ້ຳນ້ຳມັນ ປຕທ ທຸກແຫ່ງໃນທົ່ວປະເທສລາວ. ເມື່ອທ້າຍປີ 2018 ທີ່ຜ່ານມາ, ກຸ່ມທຶນຂອງ ບໍຣິສັດ ເບີ່ລີ້-ຢຸກເກີ້ ຫຼື BJC ທີ່ເປັນເຈົ້າຂອງຮ້ານຄ້າຂນາດໃຫຍ່ ໃນໄທ ຫຼື Big-C ໄດ້ຮ່ວມທຶນ ກັບບໍຣິສັດຮ້ານ ສະດວກຊື້ ໃນລາວ M-Point Mart ແລ້ວ ກໍພວມປ່ຽນຮ້ານ ໃຫ້ກາຍມາເປັນ Mini Big-C ໃນລາວ. ຈົນມາເຖິງກໍຣະນີຫຼ້າສຸດ, ເມື່ອຄນະ ບໍຣິຫານງານ ຂອງກຸ່ມບໍຣິສັດ CP-All ຈາກປະເທສໄທ ມີມະຕິຕົກລົງ ໃຫ້ມີການເຈຣະຈາ ເພື່ອ ຈະເຂົ້າມາເປີດ ສາຂາຮ້ານສະດວກຊື້ ຫຼື ເຊ່ເວັ້ນ-ອີ່ເລ່ເວັ້ນ ໃນປະເທສລາວ ແລະ ກຳພູຊາ.

ເຕັມຫນ້າ