ເງິນຈໍານວນມະຫາສານຖືກ ຍັກຍອກ


2013-11-19
Share
F-Lao-kip ທະນາບັດ ເງິນກີບ ສປປ ລາວ
emergingfrontiersblog

 

ລາຍງານຈາກພາກສ່ວນສະກັດກັ້ນແລະຕໍ່ຕ້ານການສໍ້ຣາສບັງຫລວງ ແຈ້ງວ່າໃນປີ 2007 ເຈົ້າໜ້າທີ່ແຂວງສວັນນະເຂດໄດ້ກວດພົບການ ສົມຮູ້ ຮ່ວມຄິດ ຂອງພະນັກງານຣັຖ ກັບບໍຣິສັດເອກຊົນ ລັກຕັດໄມ້ ຂະຍູງ ຊຶ່ງເປັນໄມ້ຫວງຫ້າມຈໍານວນ 1,400 ແມັດກ້ອນ ກວດເຫັນ ຜູ້ສໍ້ໂກງຊັພສິນ ຂອງຣັຖ ຢູ່ຄັງເງິນແຫ່ງຊາຕ ປະຈໍາ ສາຂາແຂວງ ຕ່າງໆ ເປັນຈໍານວນເງິນ 5 ຕື້ ກວ່າກີບ. ກວດເຫັນມູນຄ່າ ຜິດດ່ຽງ ໂຄງການກໍ່ສ້າງທາງ ໃນເທສະບານແຂວງຄໍາມວ່ນ 12 ຕື້ກວ່າກີບ.

ສົກປີ 2010-2011 ໄດ້ກວດເຫັນເງິນຕົກເຮັ່ຽເສັຽຫາຍໄປ ຈໍານວນ 1 ລ້ານກັບ 5 ແສນໂດລາ ແລະຫລາຍຮ້ອຍລ້ານກີບ ໃນໂຄງການ ຮັບໃຊ້ງານມະຫາກັມ ກິລາຊີເກມ ຄັ້ງທີ່ 25 ທີ່ນະຄອນຫລວງວຽງ ຈັນ ແລະໄດ້ກວດເຫັນ ການຍັກຍອກ ເງິນງົບປະມານ ຣັຖຈໍານວນ 10 ຕື້ ກວ່າກີບ ຊຶ່ງພົວພັນເຖິງ ພະນັກງານຣັຖ 50 ກວ່າຄົນ. ສໍາ ລັບສົກປີ 2012-2013 ຜ່ານການກວດກາ 104 ເປົ້າໝາຍທັງຢູ່ສູນ ກາງ ແລະທ້ອງຖິ່ນ ໄດ້ກວດເຫັນເງິນສູນຫາຍໄປ 90 ຕື້ ກວ່າກີບ ມີຜູ້ກະທໍາຜິດ 472 ຄົນ ໃນນັ້ນມີຜູ້ສວຍໃຊ້ໜ້າທີ່ຕໍາແຫນ່ງ 88 ຄົນ ແລະ ຜູ້ໃຊ້ອໍານາດເກີນຂອບເຂດ 22 ຄົນ ແຕ່ລາຍງານບໍ່ໄດ້ແຈ້ງວ່າ ການລົງໂທດ ຜູ້ ກະທໍາຜິດນີ້ ມີຄືແນວໃດແດ່? ຍ້າຍໜ້າທີ່ບໍ່ ຫລືວ່າຖືກດໍາ ເນີນຄະດີ ກໍບໍ່ເປັນທີ່ ແຈ່ມແຈ້ງເລີຽ.

ລາຍງານສລຸບວ່າ ການສໍ້ຣາສ-ບັງຫລວງ ທີ່ມີຫລາຍຮູບແບບນີ້ ເກີດຂຶ້ນຢູ່ ໃນທຸກຣະດັບ ແຕ່ເທິງຮອດລຸ່ມ ຢູ່ຫລາຍຂົງເຂດ ວຽກງານ ເຊັ່ນ ການຄຸ້ມຄອງຣັຖ ການລົງທຶນກໍ່ສ້າງ ພື້ນຖານໂຄງລ່າງ ການໃຊ້ທຶນ ແລະ ຊັພສິນ ຂອງຣັຖ ການສວຍໃຊ້ໜ້າທີ່ຕໍາແຫນ່ງ ຂອງພະນັກງານ ການ ຮັບເອົາສິນບົນ ແລະຮູບແບບອື່ນໆ. ຫລາຍຄົນໃຫ້ຄໍາເຫັນວ່າ ຈໍານວນເງິນສູນເສັຽຈາກການສໍ້ຣາສບັງຫລວງ ມີຫລາຍກວ່າທີ່ລາຍງານ ໄດ້ແຈ້ງນີ້ຫລາຍເທົ້າ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ