ໂຍທາທິການ-ຂົນສົ່ງ ຜູ້ສໍ້ໂກງ ມີນັບພັນ

ສຸພັດຕາ
2019-03-23
ອີແມວລ໌
ຄໍາເຫັນ
Share
ພິມ
ກົມກວດກາພາຍໃນ ເພື່ອ "ສະກັດກັ້ນ" ແລະ "ຕ້ານ" ການສໍ້ຣາສບັງຫລວງ
ກົມກວດກາພາຍໃນ ເພື່ອ "ສະກັດກັ້ນ" ແລະ "ຕ້ານ" ການສໍ້ຣາສບັງຫລວງ
RFA/LX

ກະຊວງໂຍທາທິການແລະຂົນສົ່ງ ຣາຍງານວ່າ ໃນປີ 2018 ທີ່ຜ່ານມາ ກົມກວດກາ ຂອງກະຊວງໂຍທາທິການ ແລະຂົນສົ່ງ ກວດພົບ ພະນັກງານ-ຣັຖກອນ ພາຍໃນກະຊວງ ມີການສໍ້ຣາດ ບັງຫຼວງ ຈໍານວນ 1,002 ຄົນ, ໃນນັ້ນ ໄດ້ຖືກລົງໂທດ ທາງວິນັຍ 849 ຄົນ ແລະຖືກສານຕັດສິນແລ້ວ 55 ຄົນ ສ່ວນເຫຼືອຍັງສືບສວນຢູ່.

ກະຊວງໂຍທາທິການແລະຂົນສົ່ງ ຍັງກວດພົບວ່າມີເງິນ ສູນເສັຍຈາກການສໍ້ຣາດບັງຫຼວງ ເປັນຈໍານວນ 846,44 ຕື້ກີບ, 309,97 ລ້ານບາດ, 6 ແສນໂດລ່າ ແລະ 32 ພັນຢວນ ຊຶ່ງເງິນດັ່ງກ່າວ ສາມາດເກັບກູ້ຄືນ ໄດ້ແລ້ວສ່ວນນຶ່ງ.

ບັນຫາການສໍ້ຣາດບັງຫຼວງ ຂອງພະນັກງານທີ່ຂຶ້ນກັບກະຊວງໂຍທາທິການ ແລະຂົນສົ່ງ ສ່ວນໃຫຍ່ ແມ່ນໂຄງການສ້າງ ເສັ້ນທາງຫຼາຍແຫ່ງ ໃນລາວ, ຍ້ອນຫຼາຍໂຄງການ ບໍ່ໄດ້ຮັບການຈັດສັນ ງົບປະມານ ທີ່ຖືກຕ້ອງ ເພາະຖືກພະນັກງານ ບາງກຸ່ມສໍ້ໂກງງົບປະມານ ເປັນຕົ້ນ ໂຄງການສ້າງທາງ 3 ແຫ່ງ ຢູ່ເມືອງຊໍາໃຕ້, ແຂວງຫົວພັນ ກໍເປັນສ່ວນນຶ່ງ ທີ່ໄດ້ຮັບຜົນກະທົບ ຈາກການສໍ້ຣາດ ບັງຫຼວງ, ດັ່ງເຈົ້າໜ້າທີ່ ຜແນກໂຍທາທິການ ແລະຂົນສົ່ງ ແຂວງຫົວພັນ ກ່າວຕໍ່ວິທຍຸເອເຊັຽເສຣີ ໃນວັນທີ 22 ມີນາ ນີ້ວ່າ:

“ຖືວ່າຊັກຊ້າແຫຼະ ບໍ່ໄດ້ເອົາຕາມສັນຍາ, ຕໍ່ສັນຍາສອງເທື່ອແລ້ວ, ປີນີ້ຈະບໍ່ມີເດ່, ເພິ່ນໃຫ້ແຕ່ປີ 2015 ໂຄງການທາງປູຢາງສອງຊັ້ນເນາະ, ໂຄງການນີ້ ຍັງບໍ່ສໍາເຣັດ ເພິ່ນສິເພີ່ມງົບປະມານ ແນວໃດ ສິເຂົ້າຕື່ມຫັ້ນນະ ເພາະວ່າ ທາງກະຊວງເປັນເຈົ້າຂອງໂຄງການເດ້.”

ທ່ານກ່າວຕື່ມວ່າ ໂຄງການສ້າງເສັ້ນທາງ 3 ແຫ່ງ ຢູ່ເມືອງຊໍາໃຕ້ ທີ່ຍັງຊ້າຍ້ອນຂາດງົບປະມານນັ້ນ, ໄດ້ແກ່ໂຄງການ ສ້າງທາງປູຢາງ ຈາກເມືອງວຽງໄຊ ຫາສາມແຍກເຂົ້າເມືອງຊໍາໃຕ້, ໂຄງການ ສ້າງທາງປູຢາງ ຈາກເມືອງຊໍາໃຕ້ ໄປຫາຊາຍແດນແທງຫວາ ຂອງວຽດນາມ ແລະໂຄງການສ້າງທາງປູຢາງ ຈາກເມືອງຊໍາໃຕ້ ໄປຫາຊາຍແດນເຫງະອານ ຂອງວຽດນາມ, ທັງ 3 ໂຄງການນີ້ ມີກໍານົດສ້າງໃຫ້ສໍາເຣັດ ໃນປີ 2018, ແຕ່ໃນປັດຈຸບັນ ໄດ້ໂຈະການກໍ່ສ້າງ.

ໃນຂນະດຽວກັນ ໂຄງການສ້າງເສັ້ນທາງ ຈາກເຂດຄູຂີ້ເຜິ້ງ, ເມືອງໂພນທອງ ແຂວງຫຼວງພຣະບາງ ໄປຫາຊາຍແດນວຽດນາມ ທີ່ມີຄວາມຍາວ 107 ກິໂລແມັດ ກໍເປັນອີກໂຄງການນຶ່ງ ທີ່ໄດ້ຮັບ ຜົນກະທົບ ຈາກການສໍ້ຣາດບັງຫຼວງ, ຊຶ່ງປັດຈຸບັນ ການກໍ່ສ້າງ ຍັງບໍ່ມີຄວາມຄືບໜ້າແນວໃດເທື່ອ, ຍ້ອນຍັງບໍ່ໄດ້ຮັບງົບປະມານ ຈາກກະຊວງໂຍທາທິການແລະຂົນສົ່ງ, ດັ່ງເຈົ້າໜ້າທີ່ ຫ້ອງການ ໂຍທາທິການ ແລະ ຂົນສົ່ງ ເມືອງໂພນທອງ ກ່າວວ່າ:

“ເຮົາກະບໍ່ວ່າ ຄາຢູ່ບ່ອນໃດເນາະ, ກະໄດ້ສເນີໄປຫາແຂວງ, ໄປຫາກະຊວງ, ໄປຫາສູນກາງ ເພິ່ນວ່າ ສິລົງແຕ່ປີ 2018 ມາ, ແຕ່ວ່າບໍ່ໄດ້ ລົງມືເທົ່າປານນີ້, ດຽວນີ້ເສັ້ນທາງກະຍັງມີ ສະພາບຫຍຸ້ງຍາກ ຫັ້ນແຫຼະເນາະ, ຫຍຸ້ງຍາກການໄປມາ ໂດຍສະເພາະຊ່ວງຝົນນີ້, ບັດຣົດນ້ອຍ ກະຖືວ່າໄປມາບໍ່ໄດ້.”

ການສໍ້າຣາດບັງຫຼວງໃນລາວ ແພ່ລາມຫຼາຍ ບໍ່ແມ່ນສະເພາະແຕ່ຢູ່ ກະຊວງໂຍທາທິການແລະຂົນສົ່ງ ເທົ່ານັ້ນ, ໜ່ວຍງານອື່ນໆຂອງຣັຖ ກໍມີການສໍ້ຣາດບັງຫຼວງ ເໝືອນກັນ.

ຄໍາເຫັນ (2)
Share

(

ການສໍ້ກົງຂອງລັດໃນສປປລາວນັ້ນ ມັນຮ້າຍແຮງຫຼາຍ ແລະຈະເພີ້ມຄວາມຮ້າຍແຮງນີ້ໄປຕະລອດ ຈົນກ່ວາການສີ້ນສຸດຂອງຜູ້ນໍາຜະເດັດການພຸ້ນລະ ເພາະພວກເພີ່ນບໍ່ມີຈິດສໍານຶກ ແລະພວກເພີ່ນກໍາລັງຍາດແຍ່ງກັນ ສໍ້ກົງກັນທັງໝົດທົ່ວພັກທົ່ວລັດ ທົ່ວຂແນງການຂອງຜູ້ນໍາສປປລາວ, ກໍຄືຜູ້ນໍາຜະເດັດການພັກດຽວນັ້ນເອັງ, ແລະເມື່ອບໍ່ດົນມານີ້ເພີ່ນກໍມີການປະຊູມຂອງພັກຂອງລັດ ຄັ້ງທີ່ 10 ຫາກໍ່ຈົບລົງ, ແລະກໍ່ປຶກສາຫາລືກັນຫຼາຍຢ່າງ ຟັງແລ້ວເປັນໜ້າພໍ່ໃຈຢູ່ ແລະຄືສິເປັນຕາມຄວາມຈິງຢູ່ ແລະນີ້ມັນກໍເທື່ອທີ່10ແລ້ວ ເພີ່ນພາກັນເວົ້າແຕ່ເລື້ອງເກົ່າ ທີ່ເພີ່ນເຄີຍເວົ້າມາ ແລະມີບາງຢ່າງທີ່ເປັນເລື້ອງໄໝ່ໆ ແລະຂ້ອຍປະຊາຊົນສາມັນ ທໍາມະດານີ້ຄິດວ່າຈະປະຊູມກັນ ຈົນເຖິງຄັ້ງທີ່ 100ມັນກະສິຍັງຄືເກົ່າ


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 28, 2019 06:04 AM

(

ອັນນີ້ມີພຽງແຕ່ໂຍທາ ແລະກົມຂົນສົ່ງເທົ່ານັ້ນໄດ໋, ທີ່ກົງເງິນຂອງລັດ, ເອົາທັງເງີນເດືອນບໍ່ພໍ ຍັງສໍ້ກົງນໍາອີກໂຫດຫ້ຽມຫຼາຍ ພໍ່ແມ່ພີ່ນອ້ງເຮົາເອີຍ, ເພີ່ນວ່າກວດພົບ 1000 ກ່ວາກໍລະນີ ໃນການບໍ່ສຸດຈະລິດໃນໜ້າທີ່ການງານວ່າຊັ້ນ ແລະຢູ່ສປປລາວ ນັ້ນມັນມີຈັກ ກະຊວງທະບວງກົມກັນແທ້ລວມທັງໝົດ, ຕາມທີ່ຂ້ອຍໄດ້ຍິນຂ່າວວ່າສປປລາວ ມີພະນັກງານລັດທະກອນຫຼາຍກ່ວາໝູ່ ໃນຂົງເຂດຄືເກືອບເຖິງ 3ແສນຄົນ ທົ່ວປະເທດ ແລະຂ້ອຍຄິດວ່າມັນຫຼາຍກ່ວານັ້ນອີກ ຄືສິບໍ່ມີດອກ 3ແສນຄົນ,ບໍ່ເຊື່ອຂີ່ລົດອອກໄປຕາມຖນົນເບິ່ງວ່າ ລົດແລ່ນຢູ່ທົ່ວເມືອງວຽງຈັນທັງໝົດນັ້ນ ແມ່ນລົດຂອງກະຊວງທະບວງກົມ ແລະຂອງລັດທະກອນທັງໝົດນັ້ນເອງ ຖ້າລົດເອກກະຊົນກໍມີພຽງນ້ອຍດຽວເທົ່ານັ້ນ,


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Mar 28, 2019 05:57 AM

ເຕັມຫນ້າ