ຜູ້ເຄາະຮ້າຍເຂື່ອນແຕກ ໄດ້ແຫ ແທນເບັ້ຽລ້ຽງ

ໄຊຍາ
2019-06-12
ອີແມວລ໌
ຄໍາເຫັນ
Share
ພິມ
ບ້ານເຮືອນ ທີ່ຢູ່ອາໃສຊົ່ວຄາວ ຂອງຜູ້ເຄາະຮ້າຍ ຈາກເຂື່ອນເຊປຽນ-ເຊນໍ້ານ້ອຍ ແຕກ ເມືອງສະໜາມໄຊ
ບ້ານເຮືອນ ທີ່ຢູ່ອາໃສຊົ່ວຄາວ ຂອງຜູ້ເຄາະຮ້າຍ ຈາກເຂື່ອນເຊປຽນ-ເຊນໍ້ານ້ອຍ ແຕກ ເມືອງສະໜາມໄຊ
Photo Courtesy of: Korea CSO group

ປະຊາຊົນຜູ້ປະສົບພັຍ ເຂື່ອນ ເຊປຽນ-ເຊນໍ້ານ້ອຍ ແຕກ ຢູ່ເມືອງສະໜາມໄຊ ແຂວງອັດຕະປື ຈົ່ມວ່າຍັງບໍ່ໄດ້ຮັບເງິນ ອັດຕຣາກິນ ເປັນ ເວລາສອງເດືອນແລ້ວ ເຊິ່ງເຮັດໃຫ້ແຕ່ຣະຄອບຄົວ ບໍ່ມີເງິນຊື້ເຄື່ອງປຸງແຕ່ງຄົວກິນ, ອີງຕາມປະຊາຊົນທີ່ອາສັຍ ໃນເຮືອນພັກຊົ່ວຄາວ ເວົ້າຕໍ່ຜູ້ສື່ຂ່າວ RFA ເມື່ອວັນທີ 11 ມິຖຸນາ ວ່າ:

"ຊ່ວງນີ້ໂອ້ຍ ອັດຕຣາກິນ ບໍ່ມີແຫຼະຊ່ວງນີ້ນະ ຢູ່ລ້າໄປນີ້ແຫຼະ ໂອ້ຍອຸກໃຈຢູ່ ມັນບໍ່ອອກ ເຂົ້າກິນກາໄດ້ຢູ່ ແຕ່ເງີນຕິມັນຊື້ກິນຊື້ຢາກ ບໍ່ໄດ້ ເພິ່ນບໍ່ຈ່າຍນີ້ຖ້າແມ່ນເພິ່ນຈ່າຍ ກາພໍໄດ້ກິນພໍກຸ້ມກິນຢູ່ ເຮົາກາອົດໄປກິນໄປ ນໍາແດ່ຫັ້ນນ່າ ອັນນີ້ບໍ່ຈ່າຍຮອດ ສອງເດືອນປາຍແລ້ວ ສິພໍສາມເດືອນຣະເດ ຄອງຢູ່ ແຕ່ຣະຄອບຄົວກະດາຍ."

ສ່ວນປະຊາຊົນບ້ານຕຳມໍຢອດ ທີ່ໄດ້ຮັບຜົລກະທົບກໍໄດ້ເວົ້າຕໍ່ ຜູ້ສື່ຂ່າວ RFA ວ່າ, ບໍ່ໄດ້ຮັບອັດຕຣາກິນ ຂອງເດືອນ 4 ແລະ ເດືອນ 5 ເຊັ່ນດຽວກັນ.

"ເດືອນ 4 ກັບເດືອນ 5 ນີ້ແຫຼະບໍ່ໄດ້ ເຂົາກໍ່ເອົາແຫ ທີ່ເຂົາບໍຣິຈາກມາໃຫ້ ເຮືອນຣະດາງສອງດາງ ເຂົາກໍ່ເອົາໂຕນັ້ນເປັນຫຼັກ ໄປກ້ານ ໄປຫາກິນກ້ານຂຽດກ້ານກົບ ແຕ່ວ່າມັນຂາດບ່ອນນັ້ນ ຕິ້ ສິ່ງທີ່ເຮົາເຮັດບໍ່ເປັນ ເຄື່ອງແຕ່ງຄົວມັນບໍ່ມີຢູ່ ອັດຕະປືມັນກໍຂາດ ບໍ່ມີເງິນມາໄວ ມັນກໍ່ຂາດກິນໄດ໋ທ້ອງ."

ໃນຂນະທີ່ ປະຊາຊົນເວົ້າຕື່ມວ່າທີ່ດິນ ທີ່ທາງການບຸກເບີກໃຫ້ ແລະແບ່ງໃຫ້ຜູ້ປະສົບພັຍ ແຕ່ລະຄອບຄົວໄດ້ເຮັດການຜລິດນັ້ນ ປີນີ້ແມ່ນ ໃຫ້ປູກມັນຕົ້ນກ່ອນ ແຕ່ມາເຖິງປັດຈຸບັນ ຍັງບໍ່ທັນມີຄອບຄົວໃດ ໄປປູກເທື່ອຍ້ອນດິນບໍ່ງາມ.

"ບໍ່ໜ່າຊິທັນມີໃຜໄປຈັກຄົນ ບໍ່ທັນມີໃຜອັນນັ້ນຕົກລົງດອກ ມັນບໍ່ເປັນຕາຊິເຮັດຕິ ລະມາໄລ່ເບິ່ງແລ້ວລະມັນບໍ່ກຸ້ມ ເພາະວ່າມັນເຮັດໃຫ້ ບໍຣິສັດເດ້ ບາດນີ້ບໍຣິສັດກາຕັດເອົາຄ່າທືນ ຄ່າຮອນ ຄ່າບຸກເບີກທີ່ິດິນບໍ່ມີຫຍັງ ເຮົາເຮັດຊິເຫຼືອຫຍັງປານໃດຄອບຄົວ ພໍ່ນີ້ກະໄດ້ຄືວ່າ 2 ເຮັກຕ້າ ດິນສວນມັນຫາກເປັນດິນ ບໍ່ງາມຄອບຄົວເຂົາໃຜ ຫຼາຍຄົນກາໄດ້ຫຼາຍກ່ວາ ຕໍ່າສຸດລະແມ່ນຊໍ່ານີ້ແຫຼະ."

ຕໍ່ກໍຣະນີດັ່ງກ່າວ ທ່ານເລັດ ໄຊຍະພອນ ເຈົ້າແຂວງອັດຕະປື ໄດ້ເວົ້າຕໍ່ຜູ້ສື່ຂ່າວ RFA ວ່າ ງົບປະມານຂອງຣັຖບານ ແລະເງິນບໍຣິຈາກ ທັງພາຍໃນແລະຕ່າງປະເທສເຣີ້ມຫລຸດລົງ ເຮັດໃຫ້ມີຜົລກະທົບ ຕໍ່ການຈ່າຍເງິນ ແຕ່ລະເດືອນ.

"ມີແຕ່ເວົ້າເຣື້່ອງທຶນຮອນ ເພື່ອຊ່ອຍປະຊາຊົນນີ້ແລ້ວ ພວກເຮົາກໍ່ຍັງບໍ່ທັນພ້ອມ ແຕ່ວ່າເບື້ອງແຂວງກໍ່ຄື ເບື້ອງຣັຖບານກໍ່ພະຍາຍາມ ຊອກຫາ ທຸກທິດທາງເພື່ອມາຊ່ອຍ ປະຊາຊົນດ້ວຍການໃຊ້ທຶນ ຂອງຣັຖບານ ແລ້ວກໍ່ໃຊ້ທຶນຈາກ ການຊ່ອຍເຫຼືອ ທຸກພາກສ່ວນດຽວນີ້ ກຳລັງສຸມໃສ່ຢູ່."

ທັງຍັງເວົ້າຕື່ມວ່າດຽວນີ້ ແຂວງຍັງແຈກເຂົ້າ ແລະ ຢາ ທີ່ຈຳເປັນໃຫ້ກັບຜູ້ປະສົບພັຍ ຈົນກ່ວາຈະໄດ້ຮັບການຊົດເຊີຍ ທີ່ເໝາະສົມຈາກ ຜູ້ເປັນເຈົ້າຂອງໂຄງການ ແລະ ກຳລັງເລັ່ງປັບປຸງ ສະພາບແວັດລ້ອມພາຍໃນເມືອງສ້າງ ໂຄງຮ່າງພື້ນຖານ ບຸກເບີກ ເນື້ອທີ່ໄວ້ປຸກເຮືອນ ຖາວອນ ແລະ ບຸກເບີກເນື້ອທີ່ ທໍາການຜລິດ ເພື່ອໃຫ້ທັນຣະດູການ ກ່ອນຣະດູຝົນ.

ເຕັມຫນ້າ