ຊາວບ້ານຫ້ວຍຊອຍຕ້ອງ ໄດ້ຍ້າຍ

ຈໍາປາທອງ
2017.03.15
Share on WhatsApp
Share on WhatsApp
F-Sepian ຜູ້ຕາງໜ້າຊາວບ້ານ ທີ່ໄດ້ຮັບຜົນກະທົບ ຈາກ ເຂື່ອນ ເຊປ່ຽນ-ເຊນໍ້ານ້ອຍ ກ່າວຄໍາຮ້ອງທຸກ ຕໍ່ນັກຂ່າວ
Screen captured from Joseph Freeman video

ອຳນາດການປົກຄອງເມືອງ, ແຂວງ, ແລະຕົວແທນ ຈາກໂຄງການ ເຂື່ອນ ເຊປຽນ-ເຊນໍ້ານ້ອຍ ໄດ້ໄປບອກໃຫ້ ຊາວບ້ານ ແບບເຄາະ ປະຕູເຮືອນ ແຕ່ລະຫລັງ ເພື່ອໃຫ້ເຊັນຮັບ ເອົາຄ່າຊົດເຊີຍ ຄວາມເສັຽຫາຍ ທັງເຮືອນ ແລະ ທີ່ດິນ ທີ່ຊາວບ້ານ ໄດ້ຮັບຜົລກະທົບ ນັ້ນ ແລະທັງ ກຳນົດໃຫ້ ຊາວບ້ານ ຕ້ອງພາກັນ ໂຍກຍ້າຍ ອອກໜີຈາກ ບ້ານນັ້ນ ໃນເດືອນ ມີນາ 2017 ນີ້. ຕາມຄໍາເວົ້າ ຂອງຊາວບ້ານ ບ້ານຫ້ວຍຊອຍ ແລະ ບ້ານໃກ້ຄຽງ ໃນເມືອງປາກຊ່ອງ, ແຂວງຈຳປາສັກ ທີ່ຈະໄດ້ຮັບ ຜົລກະທົບ ຈາກໂຄງການ ເຂື່ອນ ດັ່ງກ່າວ ຕໍ່ ວິທຍຸ ເອເຊັຽເສຣີ ເມື່ອບໍ່ດົນ ມານີ້ວ່າ:

"ດຽວນີ້ກະບໍ່ຈັກຊິວ່າ ແຫຼະທ່ານ, ທາງເມືອງທາງແຂວງ ຫັ້ນກະ ປະສານແນວນັ້ນ ມີແຕ່ຢາກໃຫ້ ໝູ່ເຮົາເມືອ. ເມືອນີ້ກະວ່າ ບຸກເບີກ, ບຸກເບີກ ກະເຣື້ອງດິນດອນ ຕອນຫຍ້າ ຫັ້ນແຫຼະ ແລະ ກໍຟື້ນຟູຊີວິຕ ການເປັນຢູ່ ຂອງພໍ່ແມ່ ປະຊາຊົນ. ແຕ່ເຮົາເບິ່ງ ຕາມສະພາບ ຄວາມເປັນຈິງ ຕາມເຮົາເບິ່ງນີ້ ກະຄືຍັງ ບໍ່ທັນມີໄດ໋ທ່ານ ເນື້ອທີ່ດິນ ທຳການຜລິດ ກະຄັບແຄບແນ່ ລະກະເນື້ອທີ່ ການປູກຝັງ ກະບໍ່ມີ".

ທ່າວກ່າວຕື່ມວ່າ ມາຮອດຂັ້ນນີ້ ຊາວບ້ານ ຫຼາຍຄອບຄົວ ທີ່ຈະຕ້ອງສູນເສັຽ ທີ່ດິນປູກຝັງ ໃຫ້ກັບໂຄງການ ຫຼາຍເຮັກຕ້ານັ້ນ, ກໍຖືວ່າ ບໍ່ມີທາງເລືອກ ອື່ນແລ້ວ ນອກຈາກ ຈະຕ້ອງ ໄດ້ໂຍກຍ້າຍ ແລະເຊັນຮັບເອົາ ຄ່າຊົດເຊີຍ ຈາກທາງການ ເທົ່ານັ້ນ.

ຊາວບ້ານມີຄວາມກັງວົນຫຼາຍ ເພາະທີ່ດິນ ທຳການຜລິດ ທີ່ທາງການ ໄດ້ຈັດສັນໄວ້ໃຫ້ ໃນເຂດ ບ້ານຣາສສິນເກົ່າ ນັ້ນ ມີເນື້ອທີ່ ໜ້ອຍຫຼາຍ ແລະ ທັງບໍ່ເໝາະສົມ.

"ດິນດອນຕອນຫຍ້ານີ້ ທາງໂຄງການ ວ່າຊິທົດແທນໃຫ້, ແຕ່ວ່າເນື້ອທີ່ ທີ່ຖືກຜົລກະທົບ ຂອງເຮົານີ້ກະ ບາງຄອບຄົວ ກະຕ່ຳສຸດກະ ປະມານ 1 ເຮັກຕ້າ ຫຼື 2 ເຮັກຕ້າ. ບາງຄອບຄົວກະ 5,6,7 ເຮັກຕ້າກະມີ. ສ່ວນດິນ ດັ່ງກ່າວນັ້ນ ທີ່ໂຄງການ ຈັດສັນໃຫ້ເຮົາ ກະຢູ່ ຂອບເຂດ ຣາສສິນເກົ່າ, ເປັນດິນທີ່ ບໍ່ຢາກເໝາະສົມ ປານໃດນະ ທ່ານ".

ກ່ຽວກັບເຣຶ່ອງນີ້ ວິທຍຸເອເຊັຽເສຣີ ໄດ້ຕິດຕໍ່ ສອບຖາມໄປຍັງ ອຳນາດການປົກຄອງ ເມືອງປາກຊ່ອງ ໃນຕອນບ່າຍ ຂອງວັນທີ 14 ມີນາ ນີ້, ໄດ້ຮັບຄໍາຕອບ ຈາກ ເຈົ້າໜ້າທີ່ ທີ່ກ່ຽວຂ້ອງ ພຽງແຕ່ວ່າ ຈຳເປັນຕ້ອງໄດ້ ປະຕິບັດ ຕາມຂໍ້ຕົກລົງ ຂອງແຂວງ ແລະວ່າພາກສ່ວນ ເມືອງ ກັບໂຄງການ ສ້າງເຂື່ອນ ກໍໄດ້ເຮັດ ດີທີ່ສຸດແລ້ວ ເພື່ອເຮັດໃຫ້ ຊາວບ້ານ ມີຊີວິຕ ການເປັນຢູ່ ດີຂຶ້ນ ດ້ວຍການສ້າງ ສິ່ງອຳນວຍ ຄວາມສະດວກ ຕ່າງໆ ໄວ້ຮອງຮັບ ບໍ່ວ່າຈະເປັນ ການຈັດສັນເນື້ອທີ່ ທຳການຜລິດ ຈຳນວນ 261 ເຮັກຕ້າ ສ້າງຣະບົບນ້ຳລິນ ໂຮງຮຽນ ສຸຂສາຣາ ວິດຖ່າຍ ແລະ ດຶງໄຟຟ້າ ເຂົ້າໃຫ້ ໝົດທຸກ ຫຼັງຄາເຮືອນ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.