ນັກທ່ອງທ່ຽວໄປວັງວຽງ ໜ້ອຍລົງ

ໄມຊຸລີ
2019-05-08
ອີແມວລ໌
ຄໍາເຫັນ
Share
ພິມ
ນໍ້າຊອງ ເມືອງວັງວຽງ ແຂວງວຽງຈັນ
ນໍ້າຊອງ ເມືອງວັງວຽງ ແຂວງວຽງຈັນ
RFA/AS

ບັນຫານັກທ່ອງທ່ຽວຕ່າງປະເທດ ໄປທ່ຽວເມືອງ ວັງວຽງ ຫຼຸດລົງເກືອບ 50% ນັບແຕ່ຕົ້ນປີມານີ້ ເຮັດໃຫ້ຍອດການຈອງເຮືອນພັກ (Guess Houses) ແລະ ໂຮງແຮມຫຼາຍຫ່ງ ບໍ່ມີນັກທ່ອງທ່ຽວ ເຂົ້າມາພັກ ໂດຍສະເພາະ ໃນຣະຍະປີໃໝ່ລາວ ທີ່ຜ່ານມາ, ອີງຕາມຄໍາເວົ້າ ຂອງ ຜູ້ປະກອບ ການເຮືອນພັກ ຢູ່ແຂວງວຽງຈັນ ຕໍ່ວິທຍຸ ເອເຊັຽເສຣີ ໃນວັນທີ 7 ພຶສພາ ນີ້:

”ກໍຄິດວ່າຫຼຸດລົງແນ່ນອນ ຫຼຸດໆ ສໍາລັບປີໃໝ່ປີນີ້ ປົກກະຕິ ສິມີຄົນໂທຣະສັບມາຈອງຫ້ອງພັກເນາະ ມີຄົນດຽວ ທີ່ໂທມາຈອງຫ້ອງແຕ່ລະປີ ມັນຕ້ອງເຕັມຕລອດໃດ ບໍ່ເຂົ້າໃຈວ່າ ນັກທ່ອງທ່ຽວ ນັກທີ່ມາທ່ຽວຫາຍໄປໃສ ກໍບໍ່ຮູ້ເລີຍ.”

ທ່ານເວົ້າວ່າ ໃນຣະຍະເວລາດຽວກັນ ຂອງປີຜ່ານມາ ເຮືອນພັກຂອງຕົນ ມີຍອດການຈອງຫ້ອງເຕັມທຸກຫ້ອງ ໂດຍສະເພາະ ເທສການປີ ໃໝ່ສາກົນ ແລະປີໃໝ່ລາວ ແຕ່ຮອດປີນີ້ ນັກທ່ອງທ່ຽວຕ່າງປະເທດຫຼຸດລົງ ບໍ່ມີນັກທ່ອງທ່ຽວເຂົ້າມາພັກເກືອບ 50% ໃນນັ້ນນັກທ່ອງທ່ຽວ ເກົາຫລີ 30% ຂນະທີ່ ເຮືອນ ພັກຂອງຕົນເອງ ຖືວ່າ ບໍ່ມີນັກທ່ອງທ່ຽວເຂົ້າມາພັກເລີຍ ຕັ້ງແຕ່ຊ່ວງປີໃໝ່ລາວ.

ທາງດ້ານເຈົ້າໜ້າທີ່ ກົມທ່ອງທ່ຽວ ກະຊວງຖແລງຂ່າວ ວັທນະທັມ ແລະ ທ່ອງທ່ຽວ ເວົ້າເຖິງສາເຫດ ຂອງນັກທ່ອງທ່ຽວ ຫຼຸດລົງນັ້ນວ່າ ເປັນຍ້ອນບັນຫາດ້ານຄ່າຄອງຊີບ ແລະ ການບໍຣິການ ເຊັ່ນວ່າ:

“ມັນກໍມີຫລາຍສາເຫດເນາະ ຫລາຍປັດຈັຍ ທີ່ນັກທ່ອງທ່ຽວຕ່າງປະເທດ ຫລຸດລົງຫັ້ນ ກ່ຽວກັບຄ່າຄອງຊີບ ສອງມາແລ້ວ ການເດີນທາງ ໄປສະຖານທີ່ທ່ອງທ່ຽວ ມັນຍັງມີຄ່າ ການເຂົ້າໄປຊົມໃຊ້ ມັນຢາກແພງໜ້ອຍນຶ່ງ ເວລາເຂົາປຽບທຽບ ຄ່າຫ້ອງນໍ້າ ຄ່າອະນາມັຍຫ້ອງນໍ້າ.”

ເຈົ້າໜ້າທີ່ ກົມທ່ອງທ່ຽວ ເວົ້າອີກວ່າ ຢາກໃຫ້ ຣັຖບານລາວ ໂຄສະນາ ປີການທ່ອງທ່ຽວ ໃນຫຼາຍປະເທດ ເພີ້ມຕື່ມ ໂດຍສະເພາະ ແຖບ ຢູໂຣບແລະສຫະຣັຖອະເມຣິກາ, ຫາກແຫຼຸ່ງທ່ອງທ່ຽວ ຂອງລາວ ຢູ່ໃນຣາຍການໂທຣະທັດ ຂອງຕ່າງປະເທດ ຫຼື ສື່ອອນລາຍ ຍ້ອນເຊື່ອວ່າ ຈະເຮັດໃຫ້ ນັກທ່ອງທ່ຽວຕ່າງປະເທດ ເຂົ້າມາທ່ຽວລາວເພີ້ມຂຶ້ນ.

ປັດຈຸບັນ ນັກທ່ອງທ່ຽວຕ່າງປະເທດ ທີ່ເຂົ້າມາທ່ຽວ ຢູ່ລາວ ສ່ວນຫຼາຍ ຈະເປັນຄົນໄທ ແລະຈີນ. ໃນປີ 2018 ຜ່ານມາ ຈໍານວນ ນັກທ່ອງທ່ຽວ ຕ່າງຊາດ ທີ່ເດີນທາງມາ ສປປລາວ ມີທັງໝົດ ປະມານ 4 ລ້ານ 2 ແສນຄົນ ຫລຸດເປົ້າໝາຍທີ່ ຕັ້ງໄວ້ 5 ລ້ານຄົນ.

ເຕັມຫນ້າ