ຄ່າໄຟຟ້ານະຄອນຫຼວງ ແພງຂຶ້ນ: ປະຊາຊົນ

ໄຊຍາ
2019-06-04
ອີແມວລ໌
ຄໍາເຫັນ
Share
ພິມ
ຕົວຢ່າງ ຂອງບິນຄ່າໄຟຟ້າ ໃນ ນະຄອນຫຼວງວຽງຈັນ
ຕົວຢ່າງ ຂອງບິນຄ່າໄຟຟ້າ ໃນ ນະຄອນຫຼວງວຽງຈັນ
ຮູບພາບຈາກ : ນັກຂ່າວພົລເມືອງ

ຊາວນະຄອນຫຼວງວຽງຈັນ ຈຳນວນບໍ່ໜ້ອຍຈົ່ມວ່າ ຣາຄາໄຟຟ້າແພງເກີນໄປ ໂດຍສະເພາະແມ່ນຄ່າໄຟຟ້າ ຂອງເດືອນພຶສພານັ້ນແພງຫຼາຍ. ປະຊາຊົນຫຼາຍຄົນ ບໍ່ພໍໃຈ ບາງຄົນກໍຈົ່ມວ່າ ຊິເອົາເງິນແຕ່ໃສມາຈ່າຍ ໂດຍສະເພາະຜູ້ຣາຍໄດ້ຕໍ່າ ຣະດັບ 2,500,000 ກີບ ຕໍ່ເດືອນ ເມື່ອທຽບຄ່າໄຟຟ້າ, ຄ່ານໍ້າປະປາ, ຄ່າໂທຣະສັບ, ກິນຢູ່ປະຈຳວັນ, ຄ່າເຊົ່າຫ້ອງພັກ ແລະ ອື່ນໆ ແມ່ນບໍ່ເຫຼືອຍັງເລີຍ.

ພ້ອມກັນນີ້ ປະຊາຊົນມີຄວາມກັງວົນວ່າ ການທີ່ໄຟຟ້າລາວ ກຳລັງຂຶ້ນຣາຄາໄຟຟ້າ ຈາກປະຊາຊົນທົ່ວໄປ ເພື່ອນຳໄປຊົດເຊີຍຣາຍໄດ້ທີ່ ຂາດຫາຍໄປ ເນື່ອງຈາກໜ່ວຍງານຂອງພາກຣັຖຫຼາຍແຫ່ງ ຍັງຄ້າງຊໍາລະ, ດັ່ງເຊັ່ນ ຄ່າໄຟເຍືອງທາງ ແລະ ສຳນັກງານອົງການຕ່າງໆ.

ນອກຈາກນີ້ ປະຊາຊົນເອງຍັງບໍ່ເຂົ້າໃຈວ່າ ທັງທີ່ລາວ ມີເຂື່ອນໄຟຟ້າຈຳນວນຫຼາຍ ຜລິດໄຟຟ້າໄປຂາຍ ແຕ່ກັບກາຍເປັນວ່າ ຄ່າໄຟຟ້າ ຂຶ້ນທຸກປີ, ດັ່ງປະຊາຊົນ ທີ່ໄດ້ຮັບຜົລກະທົບ ເວົ້າຕໍ່ນັກຂ່າວ RFA ເມື່ອວັນທີ 25 ພຶສພາ ວ່າ:

"ປະເທສລາວເຮົານີ້ ເປັນປະເທສຜລິດໝໍ້ໄຟ ໃນອາຊຽນ ເພິ່ນກາມີເຂື່ອນຫຼາກຫຼາຍໆ ແຕ່ວ່າ ການນຳໃຊ້ໄຟ ໃນບ້ານເຮົານີ້ນ່າ ຮູ້ສຶກວ່າ ແພງ ຖືວ່າມີຣາຄາສູງກວ່າປະເທສ ທີ່ເຂົາຊື້ໄຟ ນໍາເຮົາອີກຊໍ້າ ໃນບັນດາໃນປະເທສ ໃນອາຊຽນນີ້ ແພງຍັງບໍ່ແລ້ວ ເນາະ ການໃຊ້ໄຟຮອດ ສອງເດືອນຫັ້ນ ຕິດໜີ້ບໍ່ໄດ້ລະຖືກຕັດໄຟລະ ຖ້າເປັນພະນັກງານຣັຖ ເງິນເດືອນບໍ່ອອກກໍຖືກຕັດໄຟລະ ສ່ວນປະຊາຊົນ ກາແຮງແລ້ວແຫຼະ.”

ສ່ວນແມ່ຄ້າຂາຍເຄື່ອງ ໃນຕຣາດກໍເວົ້າວ່າ ຄ່າໄຟຟ້າຂຶ້ນຫຼາຍ ກະທົບຕໍ່ຊີວິດປະຈຳວັນ.

"ກາຂຶ້ນກະດໍ້ກະເດັ້ຽ ຄ່າຄອງຊີບມັນກາສູງ ຈັ່ງຊີ້ລະອັນໃດມັນກໍພຽງພໍ ຣາຍຈ່າຍກາບໍ່ພຽງພໍ ແພງໄຟຟ້ານະ ເດືອນນຶ່ງແສນປາຍສອງແສນ ພັດລົມກາເຫຼັກໆນ້ອຍໆ ກາບໍ່ຄ່ອຍໄດ້ເປີດ ເຮົາເປີດແອລະກາແລ້ວຫັ້ນນ່າ ສ່ວນໄຟທາງໂຮງສີ ກະມີຜົລກະທົບ.”

ໃນຂນະທີ່ ປະຊາຊົນເປັນຊາວສວນ ກໍໃຫ້ຄວາມເຫັນວ່າ ຄ່າໄຟຟ້າແພງກ່ວາເກົ່າ.

"ແພງຄືເກົ່າຫັ້ນລະ ແພງຂຶ້ນກວ່າເກົ່ານ້ອຍນຶ່ງ ແຕ່ກ່ອນເສັຽສາມແສນຫົກ ແຕ່ດຽວນີ້ ເສັຽສີ່ແສນເຈັດສີບເຈັດຂຶ້ນຫຼາຍເຕີບແລ້ວ.”

ຕໍ່ບັນຫາຄ່າໄຟຟ້າແພງ ທ່ານສົມຈັນ ພິລາລົມ ຮອງຫົວໜ້າ ຝ່າຍປະຕິບັດການໄຟຟ້າ ນະຄອນຫຼວງ ກໍໄດ້ຈັດຖແລງຂ່າວ ເມື່ອວັນທີ 29 ພຶສພາ ຜ່ານມາ ເພື່ອອະທິບາຍເຖິງສາເຫດວ່າ ເປັນຫຍັງຄ່າໄຟຟ້າຈຶ່ງແພງ.

“ແອເຢັນຄັນ ເປີດລະມັນມ່ວນເດເນາະ ເຢັນສະບາຍເນາະ ແຕ່ບໍ່ຄຶດສະ ຕອນກົງເຕີມັນແລ່ນ. ອັນທີ 2 ແມ່ນສາຍເກົ່າ ສາຍໄຟຂາດ ການບໍາລຸງຮັກສາບໍ່ໄດ້ປ່ຽນຖ່າຍ ເກີດມີໄຟຮົ່ວ ເຈົ້າບໍ່ໃຊ້ກາຢ່າແຕ່ກົງເຕີປີ່ນເດ, ອັນທີ 3 ນີ້ແມ່ນ ພວກທ່ານສັງເກດ ເບິ່ງວ່າ ການສຽບໄຟ ພວກທ່ານ ມອດຣີໂມດປັບ ບໍ່ຖອດປັກສຽບ ເຊິ່ງໄຟສີແດງນ້ອຍໆ ມັນກິນໄຟ ແອຄືກັນ ເວລາມອດຕ້ອງມອດເບຣກເກີ້ ພ້ອມ ເພາະມັນເຂົ້າ ໄປແຊ່ເຄື່ອງອີລັກໂທຣນິກ ແຕ່ວ່າໂຕເຮົາບໍ່ມອດເບຣກເກີ້ ມັນກິນໄຟເດ.”

ເປັນຫຍັງ ຄ່າໄຟຟ້າຈຶ່ງຂຶ້ນທຸກປີ ເຊິ່ງຄຳຖາມທີ່ປະຊາຊົນສົງໃສ ເຣື່ອງນີ້ ບໍ່ແມ່ນເຣື່ອງໃໝ່ ເຊິ່ງປະຊາຊົນ ຕ້ອງໄດ້ປະເຊີນກັບບັນຫານີ້ ທຸກປີ.. ຕໍ່ເຣື່ອງດັ່ງກ່າວ ເຈົ້າໜ້າທີ່ຣະດັບສູງ ຂອງຣັຖວິສາຫະກິຈໄຟຟ້າລາວ ໄດ້ໃຫ້ຣາຍຣະອຽດ ຕໍ່ນັກຂ່າວ RFA ວ່າ:

"ການປັບປຸງໂຄງສ້າງ ຣາຄາໄຟຟ້ານີ້ ປະຕິບັດມາ ແຕ່ປີ 2010 ແຈ້ງການອອກປີ 2012 ແລະ ຣາຄານັ້ນ ເພິ່ນຈະກຳນົດ ຮອດປີ 2017 ກຳນົດຂຶ້ນ 2% ຕໍ່ປີ ແຕ່ມາເບິ່ງສະພາບຄວາມເປັນຈິງ ອາຈບໍ່ສອດຄ່ອງກັບໄລຍະໃໝ່ ກໍໄດ້ມີກການປັບປຸງ ຣາຄາ ໄຟຟ້ານິີ້ ແລະກໍມີ ການຄົ້ນຄວ້າ ພາຍໃນຣັຖວິສາຫະກິຈໄຟຟ້າລາວ. ຕາມກົດໝາຍໄຟຟ້າ ແລ້ວແມ່ນຣັຖບານ ເປັນຜູ້ກຳນົດຄ່າໄຟຟ້າ ການຄົ້ນຄວ້າ ແມ່ນ ກະຊວງພລັງງານ ແລະບໍ່ແຮ່ໂດຍແມ່ນ ກົມນະໂຍບາຍແຜນພລັງງານ ເປັນຜູ້ຈັດຕັ້ງປະຕິບັດ ເຊິ່ງຣັຖວິສາຫະກິຈໄຟຟ້າລາວເອງ ກໍເປັນ ຜູ້ສເນີໃນນາມ ເປັນຜູ້ປະຕິບັດໂດຍກົງ ເຊິ່ງເຫັນວ່າ ຣາຄາໄຟຟ້າໃນເມື່ອກ່ອນ ມີສາມຂັ້ນ ສເນີ ໃໝ່ 5 ຂັ້ນຕອນ ເພື່ອໃຫ້ສອດຄ່ອງກັບ ສະພາບຄວາມເປັນຈິງ ຄື ຫົວໜ່ວຍ 0-25, 26-150 ແລະ ສູງກວ່າ 150 ແມ່ນຣາຄາ 999 ກີບ ເຊິ່ງວ່າມັນມີຜົລກະທົບ ໃຫ້ແກ່ຄົນໃຊ້ ໄຟຟ້າຫຼາຍ, ຣາຄາມັນຈະເພີ່ມຂຶ້ນຫຼາຍ ເພາະວ່າ ການຄູນໂຕເລຂໂຕນີ້ ມັນຈະຄູນຫຼາຍ ຖ້າທຽບໃສ່ຣາຄາຕໍ່ານີ້ ໝາຍຄວາມວ່າ 0-25, 26-150 ແມ່ນຮັກສາຣາຄາໄວ້ຄືເກົ່າ ສ່ວນ 150 ຂຶ້ນໄປ ກໍຈະໄດ້ປັບປຸງຈັ່ງໃດ ເພື່ອເຮັດໃຫ້ຣາຄາສະເລັ່ຽ ພໍເຮົາຢູ່ໄດ້ແລະກາຖືກກວ່າ ໂຕເກົ່າ."

ໃນຂນະດຽວກັນ ໄຟຟ້າລາວ ກໍຍັງມີໜີ້ສິນ ທີ່ໄດ້ຕ້ອງໄດ້ຊື້ ໄຟຈາກຜູ້ຜລິດຕ່າງໆ ເຂົ້າມາ ຢູ່ໃນຣະບົບການພັທນາ ແລະ ນອກຈາກນີ້ ຍັງມີຫຼາຍພາກສ່ວນ ບໍ່ໍ່ຊໍາລະຄ່າໄຟຟ້າ ສະນັ້ນ ມັນກໍເປັນບັນຫາຕ່ອງໂສ້ກັນ.

ປັດຈຸບັນ ຖ້າສົມທຽບຄ່າໄຟຟ້າ ໃນຄົວເຮືອນລາວ ແມ່ນຍັງມີຣາຄາ ຖືກຢູ່ໃນອາຊ້ຽນ ຖືກທີ່ສຸດແມ່ນ ບຣູໄນ ຣາຄາ 420 ກີບ ຕໍ່ 1 ກິໂລວັດໂມງ, ສ່ວນລາວ ຢູ່ອັນດັບສາມ ຣາຄາ 655 ກີບ ຕໍ່ 1 ກິໂລວັດໂມງ ແລະ ແພງທີ່ສຸດ ແມ່ນປະເທສ ສິງກະໂປ ຣາຄາ 1,665 ກີບຕໍ່ 1 ກິໂລວັດໂມງ.

ພາຍຫຼັງທີ່ມີຫາງສຽງຈາກສັງຄົມ ກອງປະຊຸມຣັຖບານ ປະຈຳເດືອນເມສາ ຜ່ານມາ ໄດ້ຕົກລົງເຫັນດີ ທີ່ຈະທົບທວນ ປັບຣາຄາຫົວໜ່ວຍ ໄຟຟ້າ ໃຫ້ຖືກລົງໃຫ້ໄດ້ໃຊ້ພາຍໃນປີ 2019 ນີ້ ເພື່ອບໍ່ໃຫ້ສົ່ງຜົລກະທົບ ຕໍ່ຜູ້ທີ່ມີຣາຍຮັບຕໍ່າ. ສິ່ງສຳຄັນແມ່ນ ບໍ່ເຮັດໃຫ້ສັງຄົມແຕກຕື່ນ ແລະ ກະຕຸ້ນການລົງທຶນການຜລິດ.

ທ່ານ ຄຳມະນີ ອິນທິລາດ ຣັຖມົນຕຣີ ກະຊວງພລັງງານ ແລະ ບໍ່ແຮ່ ຣາຍງານ ຕໍ່ກອງປະຊຸມ ສະພາແຫ່ງຊາດ ເມື່ອທ້າຍປີ 2018 ວ່າ ປັດຈຸບັນ ສປປລາວ ມີແຫຼ່ງຜລິດໄຟຟ້າແລ້ວ 54 ແຫ່ງ ຮວມມີ ກຳລັງການຕິດຕັ້ງ 7,162 ເມກາວັດ ສາມາດຜລິດພລັງງານໄຟຟ້າ ໄດ້ປະມານ 37,086 ລ້ານກິໂລວັດໂມງຕໍ່ປີ.

ເຖິງແນວໃດກໍຕາມ ຣາຍງານຍັງອ້າງຕື່ມວ່າ ຣັຖວິສາຫະກິຈໄຟຟ້າລາວ ກຳລັງປະເຊີນກັບບັນຫາ ໜີ້ສິນຫຼາຍຂຶ້ນ ແຕ່ບໍ່ໄດ້ເປີດໂຕເລຂ ໂດຍມີສາເຫດມາຈາກ ການກູ້ຢືມເງິນຕ່າງປະເທສ ແລະ ຈັດເກັບຄ່າຊົມໃຊ້ໄຟຟ້າ ຈາກຣັຖ ບໍ່ໄດ້ຕາມເປົ້າໝາຍ.

ເຕັມຫນ້າ