ໄຟໄໝ້ ສູນການຄ້າ ລາວ-ໄອເຕັກ

ພູວົງສ໌
2019-05-10
ອີແມວລ໌
ຄໍາເຫັນ
Share
ພິມ
ສະພາບໄຟໄໝ້ສູນການຄ້າ ລາວ-ໄອເຕັກ (ອາຄານຫຼັງເກົ່າ) ທີ່ບ້ານໂພນທັນເໜືອ, ເມືອງໄຊເສດຖາ ນະຄອນຫຼວງວຽງຈັນ ໃນຕອນເຊົ້າ ຂອງວັນທີ 10 ພຶສພາ
ສະພາບໄຟໄໝ້ສູນການຄ້າ ລາວ-ໄອເຕັກ (ອາຄານຫຼັງເກົ່າ) ທີ່ບ້ານໂພນທັນເໜືອ, ເມືອງໄຊເສດຖາ ນະຄອນຫຼວງວຽງຈັນ ໃນຕອນເຊົ້າ ຂອງວັນທີ 10 ພຶສພາ
ຮູບພາບຈາກ : ນັກຂ່າວພົລເມືອງ

ເກີດເຫດໄຟໄໝ້ສູນການຄ້າ ລາວ-ໄອເຕັກ (ອາຄານຫຼັງເກົ່າ) ທີ່ບ້ານໂພນທັນເໜືອ, ເມືອງໄຊເສດຖາ ນະຄອນຫຼວງວຽງຈັນ ໃນຕອນເຊົ້າ ຂອງວັນທີ 10 ພຶສພາ ນີ້, ເຮັດໃຫ້ເກີດຄວາມເສັຽຫາຍ ພໍສົມຄວນ, ໂດຍແມ່ນຮ້ານຂາຍເຄື່ອງຂອງລາວ-ໄອເຕັກ ໄດ້ຮັບຄວາມເສັຽຫາຍ 70-80 ເປີເຊັນ. ສ່ວນຮ້ານຂາຍເຄື່ອງ ຂອງປະຊາຊົນ ທີ່ມາຈັບຈອງສະຖານທີ່ຂາຍຂອງ ບໍ່ໄດ້ຖືກໄຟໄໝ້, ອີງຕາມຄວາມເວົ້າ ຂອງເຈົ້າ ໜ້າທີ່ກູ້ພັຍ ນະຄອນຫຼວງວຽງຈັນ ທີ່ໄດ້ກ່າວຕໍ່ຜູ້ສື່ຂ່າວ ເອເຊັຽເສຣີ ໃນວັນທີ 10 ພຶສພາ ນີ້ວ່າ:

“ສູນການຄ້າເຄື່ອງກິບຊ໋ອບ ແມ່ນໄໝ້ ຖືວ່າເສັຽຫາຍ 70-80 ເປີເຊັນເລີຍເນາະ ຮ້ານກິບຊ໋ອບຂອງສູນການຄ້າລາວ-ໄອເຕັກ ຫັ້ນ. ແນມເຂົ້າໄປລະແມ່ນຢູ່ເບື້ອງຊ້າຍມື້ເນາະ ຫັນອອກມາຢູ່ເບື້ອງ ຂວາ, ເຄື່ອງຂອງປະຊາຊົນທີ່ວ່າ ໄປຈັບຈອງສຖານທີ່ຂາຍ ບໍ່ໄດ້ໄໝ້.”

ເຈົ້າໜ້າທີ່ກູ້ພັຍທ່ານນີ້ ກ່າວຕື່ມວ່າ ເຖິງແມ່ນວ່າ ຮ້ານຂາຍເຄື່ອງ ຂອງປະຊາຊົນບໍ່ໄດ້ຖືກໄຟໄໝ້, ແຕ່ກໍມີເຄື່ອງນຸ່ງຈຳນວນນຶ່ງ ຂອງພວກ ເຂົາເຈົ້າ ທີ່ນຳມາຂາຍ ອາຈມີກິ່ນຄວັນຕິດ ແລ້ວອາຈຂາຍຕໍ່ບໍ່ໄດ້. ເບື້ອງຕົ້ນ, ຍັງບໍ່ທັນມີຣາຍງານ ເຖິງຜູ້ໄດ້ຮັບບາດເຈັບ ຫຼືເສັຽຊີວິດ, ແຕ່ກໍມີປະຊາຊົນ ທີ່ເຂົ້າໄປເກັບເອົາເຄື່ອງຂອງ ແລະ ເຈົ້າໜ້າທີ່ກູ້ພັຍ ຈຳນວນນຶ່ງ ສມັກຄວັນ ຈາກເຄື່ອງພລາສຕິກທີ່ໄໝ້.

ແນວໃດກໍດີ, ພາຍໃນເວລາ 3 ຊົ່ວໂມງ, ເຈົ້າໜ້າທີ່ກູ້ພັຍ ແລະ ເຈົ້າໜ້າທີ່ດັບເພີງ ກໍສາມາດດັບເພີງໄດ້ ພາຍຫຼັງທີ່ໄຟໄໝ້ຕັ້ງແຕ່ເວາລາ 09 ໂມງເຊົ້າຂອງມື້ດັ່ງກ່າວ. ຂນະທີ່ສາເຫດຂອງໄຟໄໝ້ໃນຄັ້ງນີ້, ເຈົ້າໜ້າທີ່ຕຳຣວຈກອງສືບສວນ-ສອບສວນ ນະຄອນຫຼວງວຽງຈັນ ຍັງບໍ່ສາມາດເວົ້າໄດ້ ຕ້ອງລໍຖ້າໃຫ້ພາກສ່ວນກອງພິສູຕຫຼັກຖານນິຕິວິທຍາສາຕ ຊອກຫາຮ່ອງຮອຍ ພ້ອມທັງເບິ່ງກ້ອງວົງຈອນປິດກ່ອນ ຈຶ່ງຄ່ອຍຈະຖແລງຂ່າວ, ໂດຍທ່ານປະທານສູນການຄ້າ ລາວ-ໄອເຕັກ ຈະເປັນຜູ້ຖແລງດ້ວຍຕົນເອງ:

“ຍັງເວົ້າບໍ່ໄດ້ເທື່ອ ເພາະເພິ່ນຍັງຊິເຂົ້າສັລສູຕບາດນຶ່ງຢູ່ ເພາະວ່າໄຟສງົບແລ້ວ ແລະ ຈະເຂົ້າສຖານທີ່ເກີດເຫຕ ຊອກຫາຮ່ອງຮອຍ ເພື່ອບໍ່ໃຫ້ເກີດໃໝ່. ບໍ່ທັນຮູ້ ບໍ່ທັນເວົ້າໄດ້ເທື່ອ ຈາກຫຍັງເດີ້. ພາກສ່ວນເພິ່ນກຸ່ມນິຕິເພິ່ນຈະເຂົ້າສັລສູຕ ຊອກຫາບ່ອນຈຸດເກີດເຫດ ສິຄ່ອຍຖແລງໄດ້. ແຈ້ງການຈະມາຮອດປະທານ ໄອເຕັກ ເພິ່ນຊິຈະຖແລງເດີ້ ໂຕນີ້ນະ. ເພິ່ນໃຫ້ທາງປະທານຖແລງເອງ.”

ຫຼ້າສຸດນີ້, ຕົກມາເວລາຕອນຄ້ອຍແລງ ຂອງມື້ດຽວກັນ, ທ່ານ ບຸນຮັກ ສີບຸນມີ ຕາງໜ້າຄນະບໍຣິຫານງານ ຂອງບໍຣິສັດລາວເວີລມຫາຊົນ ໄດ້ກ່າວໃນພິທີຖແລງຂ່າວ ທີ່ເຜີຍແຜ່ຜ່ານສື່ມວນຊົນທ້ອງຖິ່ນວ່າ:

“ມື້ອື່ນ ທາງປະກັນພັຍຂອງປະເທສໄທ ເຂົາຈະມາປະເມີນຜົລ ແລະ ພວກເຮົາຈະສຸກວຽກງານ ແລະ ທຶນຮອນຂອງພວກເຮົາ ເພື່ອຟື້ນຟູ ສິ່ງທີ່ເສັຽຫາຍທີ່ເກີດຂຶ້ນ ແລະ ຄາດວ່າ. ສ່ວນການທົດແທນຄ່າເສັຽຫາຍຕ່າງໆນັ້ນ, ພວກເຮົາ ຈະຮ່ວມກັນປຶກສາຫາລືກັນຕົວຈິງ.”

ປະຈຸບັນ, ສູນການຄ້າ ລາວ-ໄອເຕັກ ໄດ້ປິດປະຕູທາງເຂົ້າ-ອອກ ກ່ອນແລ້ວ ແລະ ລໍຖ້າຕິດຕາມການຖແລງຂ່າວ ຂອງ ລາວ-ໄອເຕັກ, ເຊິ່ງບໍ່ສາມາດຣະບຸວັນເວລາໄດ້. ຂນະທີ່ງານວາງສະແດງສິນຄ້າຜລິຕພັນລາວ ຫຼື Made In Laos ປະຈຳປີ 2019 ກໍພໍດີມີກຳນົດ ເປີດງານໃນວັນທີ 10-19 ພຶສພາ ນີ້ພໍດີ.

ສູນການຄ້າ ລາວ-ໄອເຕັກ ແຫ່ງນີ້ ສ້າງສຳເຣັດ ໃນປີ 2004 ເພື່ອເປັນສຖານທີ່ ຈັດກອງປະຊຸມສຸດຍອດ ASEAN ໃນປີ 2004 ທີ່ປະເທສລາວ ເປັນເຈົ້າພາບ. ບໍຣິສັດ ລາວເວີລມຫາຊົນ ທີ່ມີນັກທຸຣະກິຈລາວ ເຊື້ອສາຍຈີນ ເປັນຜູ້ຖືຫຸ້ນໃຫຍ່ນັ້ນ ເປັນເຈົ້າຂອງ ອາຄານດັ່ງກ່າວ.

ປັດຈຸບັນ, ນັກທຸຣະກິຈລາວເຊື້ອສາຍຈີນ ທີ່ເຄີຍເປັນຜູ້ຖືຫຸ້ນໃຫຍ່ນັ້ນ ຍັງຖືຫຸ້ນພຽງ 10 ເປີເຊັນ. ສ່ວນຫຸ້ນທີ່ເຫຼືອ 90 ເປີເຊັນຂອງ ລາວ-ໄອເຕັກ ຖືກໂອນໃຫ້ຄອບຄົວ ຂອງອະດີດສມາຊິກຄນະກັມມະການ ກົມການເມືອງສູນກາງພັກປະຊາຊົນປະຕິວັຕລາວທ່ານນຶ່ງ ເປັນເຈົ້າຂອງທຸຣກິຈສືບຕໍ່ໄປແທນ.

ເຕັມຫນ້າ