ຊີ້ນສົດໄກ່ແລະໄຂ່ ຫາຊື້ຍາກ

ມະນີຈັນ
2020-04-17
ອີແມວລ໌
ຄໍາເຫັນ
Share
ພິມ
ແມ່ຄ້າຂາຍຜັກ ຈາກສວນຄົວ ທີ່ພໍເກັບອອກມາວາງຂາຍໄດ້ ຕາມແຄມຖນົນ ແຕ່ຈໍາພວກ ຊີ້ນງົວ ຊີ້ນໝູ ແມ່ນຫາຊື້ຍາກແລ້ວ
ແມ່ຄ້າຂາຍຜັກ ຈາກສວນຄົວ ທີ່ພໍເກັບອອກມາວາງຂາຍໄດ້ ຕາມແຄມຖນົນ ແຕ່ຈໍາພວກ ຊີ້ນງົວ ຊີ້ນໝູ ແມ່ນຫາຊື້ຍາກແລ້ວ
ພາບຈາກ : ນັກຂ່າວພົລເມືອງ

ປະຊາຊົນລາວ ພາກັນຈົ່ມ ຫາຊື້ອາຫານການກິນ ຍາກ ຍ້ອນພໍ່ຄ້າຊາວຂາຍ ໃນຕລາດປິດຮ້ານ. ຕລາດບາງແຫ່ງ ຢູ່ເມືອງປາກກະດິງ ແຂວງບໍລິຄໍາໄຊ ບໍ່ມີຮອດຊີ້ນງົວ ຊີ້ນໝູຂາຍ, ແມ່ນແຕ່ໄຂ່ເປັດ ໄຂ່ໄກ່ ກໍຍັງບໍ່ມີຂາຍ ຍ້ອນຄໍາສັ່ງຂອງຣັຖບານ ທີ່ຫ້າມບໍ່ໃຫ້ປະຊາຊົນ ອອກຈາກເຮືອນ ຫາກບໍ່ມີຄວາມຈໍາເປັນແທ້ ເພື່ອຄວບຄຸມແລະປ້ອງກັນການແຜ່ຣະບາດ ຂອງເຊື້ອພຍາດ ໂຄວິດ-19, ດັ່ງຊາວເມືອງ ປາກກະດິງ ກ່າວຕໍ່ RFA ໃນມື້ວັນທີ 16 ເມສານີ້ວ່າ:

“ກະທັມດາຢູ່ບ້ານນອກ ຫາກຕລາດເຂົາບໍ່ຂາຍເດ໋ ຂາຍກໍບໍ່ມີອັນແນວເລາະ ຂາຍກະດາຍ ມີແຕ່ປາດຸກ ບໍ່ຢາກ ເອີ໊... ຄັນເພິ່ນໃຫ້ກະດີກໍ໋ ຄັນບໍ່ ໃຫ້ຢ້ານເພິ່ນບໍ່ໃຫ້່.” 

ຊາວເມືອງປາກກະດິງ ຜູ້ນີ້ ເວົ້າຕື່ມອີກວ່າ ດຽວນີ້ ໄດ້ກິນແຕ່ຜັກ ແຕ່ປາ ເປັນອາຫານຫລັກ ແລະຮູ້ສຶກເລີ່ມເບື່ອແລ້ວ ຊຶ່ງບໍ່ຄືແຕ່ກ່ອນ ທີ່ສາມາດໄປຕລາດສົດ ເລືອກຊື້ອາຫານໄດ້ຫລາຍຢ່າງຕາມໃຈ ແລະວ່າ ມາຕການຊ່ອຍເຫລືອ ປະຊາຊົນ ຈາກຣັຖບານ ທີ່ວ່າຈະໃຫ້ນັ້ນ ກໍຍັງບໍ່ທັນໄດ້ຮັບຫຍັງເທື່ອ.

ແລະຊາວເມືອງໂພນໂຮງ ແຂວງວຽງຈັນ ກໍເວົ້າຕໍ່ RFA ໃນມື້ດຽວກັນນີ້ວ່າ ໄດ້ຮູ້ພຽງແຕ່ຂ່າວຈາກສື່ສັງຄົມອອນລາຍ ວ່າທາງການລາວ ຈະຫລຸດຜ່ອນຣາຄານໍ້າມັນ ຄ່າໄຟຟ້າ ແລະ ຫລຸດພາສີ-ອາກອນ ໃຫ້ ປະຊາຊົນໃນໄລຍະ 3 ເດືອນ ແຕ່ກໍຍັງເອົາແນ່ເອົານອນບໍ່ໄດ້ເທື່ອ ສໍາລັບມາຕການ ຊ່ອຍເຫລືອດ້ານອື່ນໆ ທີ່ຍັງມິດງຽບ ແລະໄປໃສມາໃສ ກໍຍາກດຽວນີ້, ອອກໄປຕລາດໃນເຂດບ້ານ ເພື່ອຫາຊື້ເຄື່ອງໃຊ້ ຈໍາເປັນ ແລະອາຫານສົດ ກໍບໍ່ມີພໍ່ຄ້າແມ່ຄ້າ ເອົາເຄື່ອງມາຂາຍ ແລະຜູ້ໃດ ຈະເດີນທາງອອກຈາກບ້ານ ກໍຕ້ອງໄດ້ຂໍໜັງສືຢັ້ງຢືນຈາກທາງ ບ້ານກ່ອນ ດັ່ງທີ່ທ່ານກ່າວວ່າ:

“ກະມີແຕ່ໂຕລົງຂ່າວນັ້ນ ວ່າງ 3 ເດືອນຫັ້ນແຫລະ ເຫັນຣັຖບານລົງເຟສຢູ່ ລົງປະກາດແຕ່ວ່າງ 3 ເດືອນ ລອງເບິ່ງດຸ ຊິແມ່ນແຫ້ບໍ່ ເຂົາກໍຊ່າກັນໝົດບ້ານໝົດເມືອງ ນະດຽວນີ້ຫັ້ນມີຢູ່ ມັນຫາກບໍ່ມີຜູ້ຢາກຂາຍ ນາຍບ້ານບໍ່ໃຫ້ຂ້າມບ້ານຂ້າມເມືອງນະດຽວນີ້ຫັ້ນ. ໄປວຽງ ກໍໄດ້ຂໍໜັງສື.”

ສໍາລັບຢູ່ແຂວງຫຼວງພຣະບາງ ເຈົ້າຂອງຮ້ານອາຫານແຫ່ງນຶ່ງ ໃນນະຄອນຫຼວງພຣະບາງ ກ່າວຕໍ່ RFA ໃນມື້ດຽວກັນນັ້ນວ່າທາງການ ແຂວງຫຼວງພຣະບາງ ກໍານົດໃຫ້ຜູ້ໃດຜູ້ນຶ່ງ ໃນຄອບຄົວສາມາດອອກໄປ ຊື້ເຄື່ອງຂອງ ແລະອາຫານສົດໄດ້ ສ່ວນຜູ້ອື່ນໆຫ້າມອອກຈາກ ເຮືອນແລະງົດກິຈກັມທຸກປະເພດ ໃນໄລຍະທີ່ຣັຖບານພຍາຍາມຄວບຄຸມ ແລະປ້ອງກັນການແຜ່ຣະບາດ ຂອງເຊື້ອໂຄວິດ-19 ຢູ່ນີ້.

“ບາງຈໍານວນກະໄປມາຢູ່ ໄປຕລາດໄປຊື້ຂອງຢູ່ແນວກິນ ກະໃຫ້ບຸກຄົນສໍາຄັນໄປເດັກເລັກເດັກນ້ອຍເຂົາບໍ່ໃຫ້ໄປແລ້ວ ຮູ້ປ້ອງກັນແນວໃດ ຜູ້ນັ້ນແລ້ວໄປກິຈກັມອື່ນ ບໍ່ໄດ້ເຮັດແລ້ວ.”

ເວົ້າເຖິງການຄວບຄຸມຣາຄາສິນຄ້າ ໃນທ້ອງຕລາດ ເຈົ້າໜ້າທີ່ກະຊວງອຸດສາຫະກັມ ແລະການຄ້າ ທ່ານນຶ່ງ ກ່າວຕໍ່ RFA ວ່າ ໃນໄລຍະ ທີ່ຣັຖບານ ອອກມາຕການຄວບຄຸມ ແລະປ້ອງກັນການແຜ່ຣະບາດ ຂອງເຊື້ອໂຄວິດ-19 ໄປຕື່ມອີກ 14 ມື້ ຄືເຖິງວັນທີ 3 ພຶສພາ, ທາງກະຊວງ ໄດ້ສັ່ງໃຫ້ຜແນກອຸດສາຫະກັມ ແລະການຄ້າ ແຂວງແລະເມືອງຕ່າງໆ ກວດກາພໍ່ຄ້າ-ແມ່ຄ້າ ທຸກແຫ່ງ ຫ້າມສວຍໂອກາດ ຂຶ້ນຣາຄາ ສິນຄ້າ ດັ່ງທີ່ທ່ານກ່າວວ່າ.

“ສຸມໃສ່ການແກ້ໄຂບັນຫາ ເຣື່ອງຣາຄາສິນຄ້າ ມີຈໍານວນນຶ່ງ ສວຍໂອກາດຂຶ້ນໆລົງໆຫັ້ນລະ ໂດຍສະເພາະພວກປະເພດອາຫານການກິນ ການສນອງມັນບໍ່ພຽງພໍ. ແລ້ວກະຄວາມຕ້ອງການຫລາຍ ເພາະວ່າ ສ່ວນໃຫຍ່ ສິນຄ້າໄທເຮົາກໍມີແຕ່ນໍາເຂົ້າເດ໋ ສິນຄ້າພາຍໃນໄທເຮົາ ມັນກະບໍ່ພຽງພໍກັບຄວາມຕ້ອງການຫັ້ນ.”

ທ່ານເວົ້າວ່າ ດຽວນີ້ຫລາຍເຂດ ໃນນະຄອນຫລວງວຽງຈັນ ເລີ່ມໜ້າເປັນຫ່ວງ ຍ້ອນອາຫານສົດ ເປັນຊີ້ນງົວ ຊີ້ນໝູ ຊີ້ນໄກ່ ໄຂ່ໄກ່ ແລະ ຜັກສົດ ເລີ່ມຂາດຕລາດ ຮວມເຖິງເຄື່ອງໃຊ້ຈໍາເປັນ ທີ່ຕ້ອງໄດ້ນໍາເຂົ້າ ມາຈາກຕ່າງປະເທດ ກໍເລີ່ມຫາຊື້ຍາກແລ້ວ.

ໃນບັນຫານີ້ ທ່ານ ທອງລຸນ ສີສຸລິດ ນາຍຍົກຣັຖມົນຕຣີ ໄດ້ກ່າວກ່ຽວກັບສະພາບການຣະບາດຂອງເຊື້ອໂຄວິດ-19 ໃນລາວຕໍ່ສື່ມວນຊົນ ລາວ ໃນມື້ວັນທີ 15 ເມສາ ນີ້ວ່າ ປະເທດລາວດຽວນີ້ ຕົກຢູ່ໃນ ສະພາບທີ່ບໍ່ປົກກະຕິ ສະນັ້ນຈຶ່ງຂໍຮຽກຮ້ອງໃຫ້ປະຊາຊົນລາວ ທຸກຄົນ ພ້ອມໃຈກັນເສັຽສຣະໂຕເອງ ເພື່ອສັງຄົມ ປະຕິບັດຕາມມາຕການປ້ອງກັນ ທີ່ຣັຖບານວາງອອກ ຢ່າງເຂັ້ມງວດ:

“ນີ້ແຫລະຄືພວກເຮົາ ພວມຢູ່ໃນສະຖານະ ທີ່ບໍ່ເປັນປົກກະຕິ ສະຖານະການສຸກເສີນ ຂອງສະພາບການເກີດຂຶ້ນ ແຕ່ມັນພັດຮຽກຮ້ອງໃຫ້ ທຸກຄົນ ຕ້ອງໄດ້ເສັຽສຣະເພື່ອໂຕເອງ ເສັຽສຣະເພື່ອຄວາມສງົບສຸກ ຂອງສັງຄົມ ແລະເສັຽສຣະເພື່ອສະເຖັຽຣະພາບ ແລະຄວາມໝັ້ນຄົງ ຂອງປະເທດຊາດເຮົາ.”

ທ່ານ ທອງລຸນ ກ່າວຕື່ມວ່າ ການຣະບາດຂອງ ໂຄວິດ-19 ກໍມີຄວາມຮຸນແຮງ ແລະກະທົບຕໍ່ການ ດໍາເນີນຊີວິດຂອງປະຊາຊົນຢ່າງໜັກ ເຮັດໃຫ້ຣັຖບານລາວ ມີຄວາມຈໍາເປັນ ທີ່ຈະຕ້ອງອອກມາຕການ ຄວບຄຸມແລະປ້ອງກັນດ້ວຍການປິດເມືອງ ແລະຢຸດວຽກງານທຸກຢ່າງ ເພື່ອກັກໂຕຢູ່ເຮືອນຕໍ່ໄປອີກ 14 ມື້ ຈົນເຖິງວັນທີ 3 ພຶສພາ ເພື່ອຕອບໂຕ້ການຣະບາດ ຂອງເຊື້ອພະຍາດນັ້ນ ໃຫ້ມີປະສິດທິພາບສູງສຸດ.

ເຕັມຫນ້າ