ທາງການລາວ ພິຈາຣະນາ ຄ່າຊົດເຊີຍ ທີ່ ເໝາະສົມ

ສິດນີ
2018-01-16
ອີແມວລ໌
ຄໍາເຫັນ
Share
ພິມ
ເມືອງຮ້ຽມ ແຂວງຫົວພັນ
ເມືອງຮ້ຽມ ແຂວງຫົວພັນ
RFA/PN

ຣັຖບານລາວມີແຜນການຈະອອກກົດຫມາຍ ໃຫ້ຄ່າຊົດເຊີຍແກ່ຊາວບ້ານ ຜູ້ທີ່ໄດ້ຮັບຜົລກະທົບ ຈາກໂຄງການພັທນາ ຕ່າງໆຂອງຣັຖບານ ຢ່າງເປັນທັມ. ຫາກແຕ່ວ່າ ປະຊາຊົນລາວເຫັນວ່າ ຣະບຽບກົດໝາຍຕ່າງໆ ບໍ່ແມ່ນປັດຈັຍຫຼັກ ໃນການໃຫ້ຄ່າຊົດເຊີຍ ທີ່ເປັນທັມ ແກ່ຜູ້ທີ່ ໄດ້ຮັບຜົລກະທົບ ຈາກໂຄງການພັທນາ ຂອງຣັຖບານ ແຕ່ເປັນຄວາມຈິງໃຈ ຂອງຜູ້ມີອຳນາດ ຫຼືຜູ້ປະຕິບັດກົດໝາຍ ຕ່າງຫາກ ທີ່ເປັນຜູ້ ຕັດສິນ ໃນການໃຫ້ຄ່າຊົດເຊີຍແກ່ຊາວບ້ານ ເພາະໃນໄລຍະຜ່ານມາ ບໍ່ວ່າຈະເປັນຣະບຽບການ ຫຼືດຳຣັຖຕ່າງໆກໍໄດ້ຣະບຸໄວ້ ຢ່າງຈະແຈ້ງ ກ່ຽວກັບການໃຫ້ຄ່າຊົດເຊີຍ ຜູ້ໄດ້ຮັບຜົລກະທົບ,ແຕ່ກໍບໍ່ສາມາດ ປະຕິບັດໄດ້ ໃນຫຼາຍໂຄງການ ຂອງຣັຖບານ. ດັ່ງ ຊາວລາວທ່ານນຶ່ງໄດ້ ກ່າວຕໍ່ຜູ້ສື່ຂ່າວເອເຊັຽເສຣີ ເມື່ອວັນທີ 12 ມົກກະຣາ 2018 ນີ້ວ່າ:

“ໂຕນີ້ຄັນຊິເວົ້າແລ້ວເນາະ ເວົ້າທາງດ້ານກົດໝາຍ ມັນກະແມ່ນຢູ່, ແຕ່ວ່າຄວາມຈິງພວກປະຕິບັດ ມັນພັດແຕກຕ່າງຫັ້ນນ່າ. ເວົ້າເຣື້ອງ ກົດໝາຍ ມັນກະແມ່ນຢູ່, ແຕ່ພາກປະຕິບັດ ມັນບໍ່ຢາກອັນນັ້ນປານໃດ. ກົດໝາຍມັນກະຂຶ້ນກັບຜູ້ປະຕິບັດຫັ້ນແຫຼະ, ຜູ້ປະຕິບັດ, ມັນ, ຈັກ! ຄັນຊິເວົ້າໄປຫຼາຍ ມັນກະຢາກຍາວເນາະ."

ໃນຂນະດຽວກັນ ຄົນລາວອີກທ່ານນຶ່ງ ຈາກແຂວງພາກໃຕ້ ພັດເວົ້າ ການມີກົດໝາຍ ກໍຖືເປັນເຣື້ອງດີ ເພາະຈະໄດ້ເປັນບ່ອນອີງໃຫ້ແກ່ຜູ້ ປະຕິບັດກົດໝາຍ ທີ່ກ່ຽວພັນກັບ ການໃຫ້ຄ່າຊົດເຊີຍ ແກ່ຜູ້ທີ່ໄດ້ຮັບຜົລກະທົບ ຈາກໂຄງການພັທນາຂອງຣັຖບານ ດັ່ງທ່ານກ່າວວ່າ:

“ມັນກະຊິມີກົດໝາຍແດ່ຫັ້ນແຫຼະ ມັນຈັ່ງຊິກຳນົດໃຫ້ວ່າຊົດເຊີຍຈັ່ງໃດຈັ່ງໃດ ມູລຄ່າຕ່ຳສຸດແມ່ນອີ່ຫຍັງ, ຄັນບໍ່ມີກົດໝາຍບັງຄັບ ມັນກະ ແລ້ວແຕ່ ຜູ້ຊິໃຫ້. ກ່ອນອື່ນ ມັນກະມີກົດໝາຍ ເປັນບ່ອນອີງກ່ອນກະດີ ເພາະວ່າມັນຊິໄດ້ເວົ້າກັນ ໄປຕາມນັ້ນ. ສຳລັບມູລຄ່າ ອັນນັ້ນເດີ້ ທໍ່ນີ້ ດີຂຶ້ນກວ່າເກົ່າ ທໍ່ນັ້ນ ກຳນົດຈັກປີ? ເພື່ອເຂົາຊິໄດ້ ຕັ້ງຕົນຕັ້ງໂຕໄດ້ ຊິລ້ຽງເຂົາໄປຈັກປີ? ອີ່ຫຍັງໝູ່ນີ້. ທໍ່ໃດ? ຈັ່ງຊີ້."

ໜັງສືພິມວຽງຈັນທາມສ ສະບັບວັນທີ 3 ມົກຣາ ລາຍງານວ່າ ທາງການລາວ ກຳລັງກະກຽມຮ່າງ ກົດໝາຍວ່າດ້ວຍການ ຄ້ຳປະກັນຊີວິຕ ການເປັນຢູ່ ຂອງປະຊາຊົນ ຜູ້ທີ່ໄດ້ຮັບຜົລກະທົບ ເພື່ອສເນີຕໍ່ກອງປະຊຸມ ສະພາແຫ່ງຊາຕລາວ ສມັຍສາມັນ ໃນເດືອນ ເມສາ ປີ 2018 ໃຫ້ຮັບຜ່ານ ໃນຈຸດປະສົງ ເພື່ອເຮັດໃຫ້ພໍ່ແມ່ ປະຊາຊົນລາວ ບັນດາເຜົ່າ ຜູ້ທີ່ໄດ້ຮັບ ຜົລກະທົບ ຫຼື ຈະໄດ້ຮັບຜົລກະທົບ ຈາກໂຄງການ ພັທນາຂອງຣັຖບານ ໃຫ້ມີຊີວິຕການເປັນຢູ່ທີ່ດີ ແລະ ບໍ່ຖືກເອົາລັດ-ເອົາປຽບ ຈາກເຈົ້າຂອງໂຄງການພັທນາ. ແລະວ່າກົດໝາຍນີ້ຫຼັງຈາກ ຜ່ານສະພາ ຈະໃຊ້ແທນດຳຣັດ ຂອງນາຍົກຣັຖມົນຕຼີ ວ່າດ້ວຍການໃຫ້ຄ່າຊົດເຊີຍ ແລະການຄຸ້ມຄອງ ການໂຍກຍ້າຍຈັດສັນ ໃນໂຄງການ ພັທນາ ສະບັບເລກທີ 84 ລົງວັນທີ 5 ເມສາ ປີ 2016.

ຄໍາເຫັນ (1)
Share

(

Appropriate compensation. Lao people can always dream as dreaming is free.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 17, 2018 05:14 AM

ເຕັມຫນ້າ