ຊາວໜຸ່ມຮຽນຈົບແລ້ວ ວ່າງງານ

ອະວາຣີ
2019-05-21
ອີແມວລ໌
ຄໍາເຫັນ
Share
ພິມ
ມະຫາວິທຍາໄລ ສຸພານຸວົງ ແຂວງ ຫລວງພຣະບາງ
ມະຫາວິທຍາໄລ ສຸພານຸວົງ ແຂວງ ຫລວງພຣະບາງ
ພາບອຸປຖັມໂດຍ: ນັກຂ່າວພົລເມືອງ

ນັກສຶກສາລາວຫລາຍຄົນ ທີ່ຮຽນຈົບແລ້ວ ວ່າງງານ ຊອກຫາວຽກງານບໍ່ໄດ້ ໄປສອບເສັງເຂົ້າເປັນຣັຖກອນ ກໍບໍ່ໄດ້ ຈ້າງເຂົ້າເຮັດວຽກ ກໍຖືກຕົ້ມ ແລະສຸດທ້າຍກໍກັບຄືນໄປ ເຮັດນາຄືເກົ່າ. ນັ້ນແມ່ນ ຄຳເວົ້າຂອງນັກສຶກສາ ທີ່ຮຽນຈົບປຣິນາຕຣີ ແລະ ຂອງພໍ່ແມ່ຫລາຍຄົນ ໃນລາວ ໃນປັດຈຸບັນ.

ປ້າຄົນນຶ່ງຢູ່ນະຄອນຫລວງວຽງຈັນ ທີ່ລູກຊາຍຮຽນຈົບປຣິນຍາຕຣີ ເມື່ອສອງປີກ່ອນ ເລົ່າສູ່ນັກຂ່າວວິທຍຸເອເຊັຽເສຣີ ຟັງເມື່ອຕົ້ນເດືອນນີ້ວ່າ:

“ມີຜູ້ຮູ້ຈັກ ເຮັດຢູ່ກະຊວງ ກະໄປລົມເຂົາ; ເຂົາກໍວ່າ ໄດ້ຢູ່ເຂົ້າເປັນຣັຖກອນນັ່ນ ແຕ່ກໍຕ້ອງແສນບາດ; ເອີ ຂ້ອຍກະບໍ່ມີເງິນ.”

ໃນເມື່ອບໍ່ມີເງິນຈ້າງ ຜູ້ເປັນລູກຊາຍວັຍລຸ້ນຄົນນີ້ ກໍບໍ່ໄດ້ວຽກ. ຊາວບ້ານໃກ້ຄຽງຄົນນຶ່ງເວົ້າກັບ ປ້າຄົນນັ້ນວ່າ;

“ເປັນຫຍັງບໍ່ຈ້າງເຂົ້າໃຫ້ລູກ ນຶ່ງແສນບາດນັ້ນ ຖືກແລ້ວ ຜູ້ອື່ນຈ້າງເຂົ້າເຖິງ ສາມສີ່ແສນບາດ ພຸ້ນໄດ໋.”

ນອກຈາກໄດ້ພຍາຍາມຊື້ຈ້າງແລ້ວ ໃນຣະຍະສອງປີຜ່ານມາ ຜູ້ເປັນລູກຊາຍ ກໍໄປເສັງເຂົ້າເປັນຣັຖກອນ ທຸກບ່ອນ ທີ່ມີການສອບເສັງ ນັບແຕ່ຂັ້ນເມືອງຂື້ນໄປຈົນເຖິງຂັ້ນສູນກາງ. ຜູ້ເປັນແມ່ ກໍເວົ້າຕໍ່ວ່າ ໄປເສັງກໍບໍ່ໄດ້ ຖ້າຢາກໄດ້ ກໍຕ້ອງເສັຽເງິນ.

ໃນເມື່ອເສັງແລະຈ້າງເຂົ້າບໍ່ໄດ້ ຊາຍຄົນນີ້ ກໍຈຳເປັນຕ້ອງໄປເຮັດວຽກ ກັບບໍຣິສັດເອກກະຊົນ ຊຶ່ງເປັນວຽກໜັກ ຕ້ອງຂົນ-ຫາມ ແລະຍົກຍໍ ແກ໊ສສິນຄ້າຕລອດເວລາ; ບາງມື້ ຮ້ອນກໍຮ້ອນ ໜັກກໍ່ໜັກ ເກືອບຈະເປັນລົມຫລາຍເທື່ອ. ຍ້ອນດັ່ງນັ້ນ ປັດຈຸບັນ ຊາຍສະກັນຄົນນີ້ ກໍອອກ ມາຢູ່ເຮືອນຊື່ໆ.

ນັກສຶກສາອີກຄົນນຶ່ງ ຢູ່ເມືອງປາກກະດິງ ແຂວງບໍຣິຄຳໄຊ ຮຽນຈົບປຣິນຍາຕຣີ ວິຊາການບັນຊີ ເມື່ອສາມປີກ່ອນ ກໍໄປເສັງເຂົ້າເປັນ ຣັຖກອນ ເຖິງສິບປາຍບ່ອນ ບໍ່ໄດ້ຈັກບ່ອນ; ບ່ອນສຸດທ້າຍ ແມ່ນເສັງເຂົ້າ ຜແນກຊ່ວຍສາອາກອນ ແຕ່ເຂົາເອົາແຕ່ສາມຄົນ ໃນຈຳນວນ ຄົນໄປສອບເສັງ ທັງໝົດຫລາຍຮ້ອຍຄົນ. ເຈົ້າໜ້າທີ່ອະທິບາຍວ່າ ຍ້ອນມີໂຄຕ່າ ຮັບເອົງພະນັກງານ ໃໝ່ໜ້ອຍ.

ຫລັງຈາກນັ້ນ ພໍ່ແມ່ຂອງອາດີດນັກສຶກສາຜູ້ນີ້ ກໍຕິດຕໍ່ກັບຜແນກອື່ນໆໃນແຂວງ ແລະຫົວໜ້າຜແນກນຶ່ງ ບອກວ່າ ໃຫ້ເອົາເງິນມານຶ່ງແສນ ບາດ ແລະໃຫ້ລໍຖ້າໂຄຕ່າອອກ. ຢູ່ຕໍ່ມານຶ່ງປີ ຫົວໜ້າ ບອກອີກວ່າ ໃຫ້ຜູ້ກ່ຽວກັບ ໄປຮຽນບຳຣຸງຕຶື່ມອີກນຶ່ງປີ ແຕ່ເມື່ອຮຽນຈົບມາ ກໍມິດຈ້ອຍ. ປະຊາຊົນເວົ້າ ເຕັມບ້ານເຕັມເມືອງວ່າ ຫົວໜ້າຮັບເອົາລູກຂອງເພິ່ນເອງ ເຂົ້າເຮັດວຽກ.

ນັກສຶກສາຮຽນຈົບຄົນນີ້ ຈົ່ມໃຫ້ນັກຂ່າວພວກເຮົາຟັງ ເມື່ອບໍ່ດົນຜ່ານມາວ່າ,

“ກະເອົາເງິນໄປແລ່ນ ເງິນແສນນຶ່ງ ເງິນບາດ ໄດ້ຄືນມາແຕ່ສີ່ໝື່ນນຶ່ງ ຖືກເຂົາຕົວະ ກະບໍ່ໄດ້ແລ້ວ.”

ໃນເມື່ອບໍ່ໄດ້ວຽກ ອາດີດນັກສຶກສາ ກໍໄປຖາມເອົາເງິນຄືນ; ຫ້າເທື່ອທຳອິດ ຫົວໜ້າຜແນກ ບອກວ່າ ບໍ່ມີເງິນ ເທື່ອທີ່ຫົກ ຫົວໜ້າສົ່ງເງິນຄືນ ແຕ່ສີ່ໝື່ນບາດ; ຫລັງຈາກນັ້ນ ພໍ່ແມ່ແລະຊາຍ ຄົນນັ້ນ ກໍໄປຖາມເອົາເງິນຄືນ ທຸກໆເດືອນ ເສັຽເວລາ ແລະເສັຽນ້ຳມັນຣົດ ແຕ່ຫົວໜ້າ ຜແນກ ບອກວ່າ ບໍ່ມີເງິນ ຈົນປັດຈຸບັນ ພໍ່ແມ່ແລະລູກຊາຍ ກໍຍອມ ບໍ່ໄປຖາມເອົາເງິນອີກ ໂສເສັຽເລີຍ ຍອມຮັບ ຖືກຕົ້ມໄປຫົກໝື່ນບາດ.

ເທື່ອລ້າສຸດ ຫົວໜ້າຜແນກ ບອກໃຫ້ວັຍລຸ້ນຄົນນີ້ ມາເຮັດວຽກເປັນອາສາສມັກ ເພື່ອລໍຖ້າໂຄຕ່າອອກ ແລະໂດຍທີ່ບໍ່ໄດ້ຮັບເງິນເດືອນ. ພໍ່ແມ່ແລະລູກ ກໍຄຶດວ່າ ການເປັນອາສາສມັກນັ້ນ ກໍຕ້ອງລໍຖ້າ ເປັນເວລາດົນນານ ຫລາຍຄົນຖ້າເປັນເວລາສີ່ຫ້າປີ ກໍບໍ່ໄດ້ເປັນຣັຖກອນ ຖາວອນຈັກເທື່ອ ອີກຢ່າງນຶ່ງໃນເວລາເປັນອາສານັ້ນ ກໍຕ້ອງໃຊ້ຈ່າຍຄ່າຢູ່ຄ່າກິນ ດ້ວຍເງິນຕົວເອງທັງໝົດ. ສະນັ້ນພໍ່ແມ່ ແລະລູກຊາຍ ຈຶ່ງຕັດສິນໃຈ ບໍ່ເປັນອາສາສມັກ ປັດຈຸບັນຢູ່ບ້ານນອກ ປູກມັນຕົ້ນຂາຍ ໃຫ້ຈີນແລະວຽດນາມ.

ແມ່ຂອງຊາຍຄົນນີ້ເວົ້າວ່າ:

“ເຈົ້າຮຽນຊ່ຳໃດ ກະບໍ່ໄດ້ສູ່ມື້ນີ້ນະ ເອົາເງິນໄປ ເຂົາກໍຕົ້ມ ເຮົາບໍ່ມີເສັ້ນ ພີ່ນ້ອງເຮົາບໍ່ໄດ້ເປັນນາຍ ມັນເປັນຈັ່ງຊັ້ນ; ແຕ່ກີ້ ຕົວະເຮົາວ່າ ໂຄຕ່າອອກ ໄທຂ້ອຍໄປຍື່ນແສນນຶ່ງ ເຂົາຢາກໄດ້ແສນຫ້າ ຢູ່ມາມີແຕ່ ລໍກັບລໍຫລາຍ ຢາກໄດ້ສອງແສນ.”

ແມ່ຄົນນີ້ເວົ້າຕອບວ່າ ບໍ່ມີສອງແສນ ຍອມ. ຫົວໜ້າເວົ້າຄືນວ່າ ຜູ້ອື່ນໃຫ້ສອງແສນແລ້ວ ແລະລາວສູງຄົນນຶ່ງໃຫ້ເຖິງສາມແສນ. ຄຳວ່າ ແສນສອງແສນໃນທີ່ນີ້ ໝາຍເຖິງແສນ ຫລື ສອງແສນບາດ.

ຜູ້ເປັນແມ່ຄົນນີ້ເລົ່າຕໍ່ວ່າ ຢູ່ແຂວງຄຳມ່ວນ ກໍໄປຕິດຕໍ່ກັບ ລູກສ່ຽວ ເອົາເງິນໄປມັດຈຳໄວ້ ນຶ່ງແສນບາດຄືກັນ ລໍຖ້າໂຄຕ່າ ໂຄຕ່າບໍ່ອອກ ມາຈັກເທື່ອ ລໍຖ້າເຖິງສອງປີ ກໍບໍ່ໄດ້ ເລີຍຖາມເອົາເງິນຄືນ ເທື່ອນີ້ໂຊກດີແດ່ ໄດ້ເງິນຄືນໝົດ.

ເຖິງຢ່າງໃດກໍຕາມ ພໍ່ແມ່ຂອງຍິງສາວຄົນນຶ່ງ ທີ່ຮຽນຈົບການບັນຊີຊັ້ນສູງມາໃໝ່ໆ ກໍຈ້າງເຂົ້າເຮັດວຽກ ຢູ່ທະນາຄານໄດ້ໃຊ້ເງິນນຶ່ງແສນ ບາດເຊັ່ນກັນ. ສ່ວນລູກຊາຍ ຂອງພໍ່ແມ່ຄູ່ນີ້ ຮຽນໄອທີ ເກັ່ງອີຫລີ ກໍບໍ່ໄດ້ຈຳເປັນໄດ້ຈ້າງເຂົ້າ ຮຽນໃກ້ຈະຈົບ ທະນາຄານແຫ່ງນຶ່ງ ກໍມາຈັບຈອງ ເອົາກ່ອນເລີຍ.

ນອກຈາກນັ້ນ ພໍ່ແມ່ອີກຄອບຄົວນຶ່ງ ທີ່ຫາກໍສົ່ງລູກໂຕເອງໄປຮຽນຕໍ່ຢູ່ ຈີນ ເວົ້າວ່າ ຜູ້ໃດຢາກໄປຮຽນຕໍ່ຢູ່ຈີນ ກໍຕ້ອງເສັຽເງິນຫຼາຍເຖິງຫົກ ພັນດອນລ່າ ສະຫະຣັດ ຈຶ່ງໄດ້ທຶນ. ສ່ວນພໍ່ແມ່ ອີກຄອບຄົວນຶ່ງ ທີ່ມີລູກສາວຈະຮຽນຈົບ ມໍປາຍໃນເດືອນໜ້າ ກໍກຳລັງວິຕົກກັງວົນວ່າ ຈະສົ່ງເສັຍໃຫ້ລູກຮຽນຕໍ່ ຫລືຈະໃຫ້ລູກອອກ ມາຊ່ວຍຄ້າຂາຍຈະດີກວ່າ. ພໍ່ແມ່ໄວລຸ້ນຄົນນຶ່ງ ຕັດສິນແລ້ວ ຈະບໍ່ໃຫ້ລູກຮຽນ ຕໍ່ຊັ້ນສູງ ເພາະຖ້າຮຽນຕໍ່ກໍຕ້ອງຈ້າງເຂົ້າໂຮງຮຽນ ແລ້ວເວລາອອກ ກໍຕ້ອງຈ້າງເຂົ້າເຮັດວຽກ ແລະໂອກາດຈະໄດ້ວຽກກໍໜ້ອຍລົງທຸກໆມື້ ສະນັ້ນ ຈຶ່ງໃຫ້ລູກສາວ ອອກມາຕຳ ໝາກຮຸ່ງຂາຍ ຫາເງິນຊ່ວຍພໍ່ແມ່. ອີກພໍ່ແມ່ຄູ່ນຶ່ງ ວາງແຜນໄວ້ແລ້ວວ່າ ຈະໃຫ້ລູກຊາຍໄປເຮັດວຽກຢູ່ໄທ ຫລັງຈາກຮຽນຈົບມໍປາຍ.

ເຕັມຫນ້າ