ການປາບປາມຂອງເຖື່ອນ ໃນລາວ

ອຸ່ນແກ້ວ ສຸກສະຫວັນ
2017-03-13
Share
F-Drug ນີ້ຄື: ອີກຕົວຢ່າງນຶ່ງ ທີ່ ພວກຄ້າຂາຍ ຢາເສບຕິດ ຖືກທາງ ເຈົ້າໜ້າທີ່ ປກສ ແຂວງຫຼວງນໍ້າທາ ກວາດລ້າງ ພ້ອມຍຶດ ຂອງກາງ ຢາບ້າ 20 000 ເມັດ
Courtesy of Lao PSTV

ຫລັງຈາກທີ່ມີການຈັບກຸມ ທ້າວ ໄຊຊະນະ ແກ້ວພິມພາ ຢູ່ປະເທດໄທ ໃນວັນທີ 19 ມົກກະຣາ 2017, ມີການຈັບກຸມ ທ້າວ ຄອນປະສົງ ສຸກກະເສີມ ແລະ ເຄືອຂ່າຍ ອີກຫຼາຍຄົນ ຢູ່ປະເທດລາວ ໃນຂໍ້ຫາຄ້າ ຢາເສບຕິດ ຊຶ່ງ ໃນຂນະດຽວກັນ ກໍຍັງມີຜູ້ ຫລົບໜີ ການຈັບກຸມ ຂອງ ເຈົ້າໜ້າທີ່ ທາງການລາວ ໃນນັ້ນ ຜູ້ຕ້ອງຫາ ໝາຍເລກນຶ່ງ ທີ່ກຳລັງ ຫລົບໜີກໍຄື ທ້າວ ສີສຸກ ດາວເຮືອງ ຊຶ່ງ ເຈົ້າໜ້າທີ່ ເຊື່ອວ່າ ເປັນຜູ້ຄ້າ ຢາເສບຕິດ ຣາຍໃຫຍ່.

ທ້າວ ສີສຸກ ດາວເຮືອງ ມີທຸຣະກິດຫຼາຍຢ່າງ ເປັນຕົ້ນແມ່ນ ຂາຍຣົດຫລູ ທີ່ຕັ້ງຢູ່ເຂດ ສີ່ແຍກໄຟແດງ ບ້ານທາດຂາວ ເມືອງ ສີສັດຕະນາກ ນະຄອນຫຼວງ ວຽງຈັນ ແລະ ທຸຣະກິດ ໃຫ້ບໍຣິການ ຂີີ່ມ້າ ຢູ່ເຂດເສັ້ນທາງ ຕັດໃໝ່ ບ້ານໂພນສີນວນ ເມືອງ ໄຊເສດຖາ ນະຄອນຫລວງ ວຽງຈັນ, ແຕ່ ທຸຣະກິດ ດັ່ງກ່າວ ກໍໄດ້ປິດລົງ ຫລັງຈາກ ທີ່ມີການຈັບກຸມ ທ້າວ ໄຊຊະນະ, ທ້າວ ຄອນປະສົງ ພ້ອມດ້ວຍ ເຄືອຂ່າຍ.

ໃນນັ້ນ ທຸຣະກິດ ອີກຢ່າງນຶ່ງ ທີ່ເຊື່ອກັນວ່າ ເປັນຂອງ ທ້າວ ສີສຸກ ດາວເຮືອງ ກໍຄືການເປັນ ຕົວແທນ ຈຳໜ່າຍ ຫວຍພັທນາລາວ. ເຈົ້າ- ໜ້າທີ່ ຫ້ອງວ່າການ ສຳນັກງານ ນາຍົກ ຣັຖມົນຕຼີ ທ່ານນຶ່ງ ຜູ້ທີ່ບໍ່ປະສົງ ອອກຊື່ ໄດ້ກ່າວຕໍ່ ເອເຊັຽເສຣີ ໃນວັນທີ 11 ມີນາ ວ່າ ທ້າວ ສີສຸກ ດາວເຮືອງ ຜູ້ຕ້ອງຫາ ຄ້າຢາເສບຕິດ ທີ່ຫລົບໜີ ການຈັບກຸມ ແມ່ນມີຮຸ້ນ ຢູ່ໃນ ບໍຣິສັດ ຕົວແທນຈຳໜ່າຍ ຫວຍພັທນາ ໂດຍທີ່ໃສ່ຊື່ ຄົນອື່ນແທນ.

ເຖິງຢ່າງໃດກໍຕາມ ກໍຍັງບໍ່ທັນມີ ເຈົ້າໜ້າທີ່ ທາງການລາວ ອອກມາຢືນຢັນ ແລະ ໃຫ້ຣາຍລະອຽດ ແຕ່ຢ່າງໃດ ນອກຈາກ ອອກມາຖແລງ ການຈັບກຸມເຄືອຂ່າຍ ຢາເສບຕິດ ໃນວັນທີ 15 ກຸມພາ ຜ່ານມາ ໂດຍມີ ເຈົ້າໜ້າທີ່ ຈາກກົມໃຫຍ່ ຕຳຣວດ ກະຊວງ ປ້ອງກັນ ຄວາມສງົບ ເປັນຜູ້ຖະແຫລງ ຂ່າວ.

ນອກຈາກນີ້ ທ່ານ ສີວາ ວຽງແກ້ວ ຮອງຣັຖມົນຕຼີ ກະຊວງການເງິນ ໄດ້ໃຫ້ສຳພາດ ຕໍ່ເອເຊັຽເສຣີ ວ່າ ບໍຣິສັດ ວິສາຫະກິດ ຫວຍພັທນາ ລາວ ເປັນຂອງຣັຖ 100 ເປີເຊັນ ບໍ່ອະນຸຍາດ ໃຫ້ເອກກະຊົນ ເຂົ້າມາຖືຮຸ້ນ ຂອງບໍຣິສັດ ຣັຖວິສາຫະກິດ ຫວຍພັທນາ ລາວ. ຟັງການໃຫ້ ສຳພາດວ່າ: ສຽງ...

ເຖິງວ່າ ທ່ານ ສີລາ ວຽງແກ້ວ ໄດ້ຢືນຢັນວ່າບໍຣິສັດ ຣັດວິສາຫະກິດ ຫວຍພັທນາເປັນຂອງຣັຖບານ 100 ເປີເຊັນ, ແຕ່ໃນທາງປະຕິບັດ ແລ້ວ ບໍຣິສັດ ຣັດວິສາຫະກິດ ຫວຍພັທນາ ພັດມອບໃຫ້ ບໍຣິສັດ ເອກກະຊົນ ເຂົ້າມາ ສຳປະທານ ເປັນຕົວແທນ ຈໍາໜ່າຍ ໂດຍທີ່ ຕົວ ແທນຈຳໜ່າຍ ຈະຈ່າຍຄ່າ ສຳປະທານ ໃຫ້ ຣັຖບານລາວ ສະເລັ່ຽ 50 ຕື້ ຕໍ່ປີ.

ໃນວັນທີ 17 ເດືອນ ກໍຣະກະດາ ປີ 2015, ທ່ານ ສຸບັນ ເພັຽສັກຂາ ຮອງ ຜູ້ອຳນວຍການ ຣັດວິສາຫະກິດ ຫວຍພັທນາ ໄດ້ກ່າວຕໍ່ ສື່ມວນຊົນວ່າ: ປັດຈຸບັນ ຕົວແທນ ຈຳໜ່າຍ ຫວຍພັທນາ ນັບທັງຢູ່ສູນກາງ ແລະທ້ອງຖິ່ນ ທົ່ວປະເທດ ມີທັງໝົດ 83 ສາຂາ ໃນນັ້ນ ຕົວແທນຈຳໜ່າຍ ທີ່ເປັນຂອງ ຣັດມີ 3 ສາຂາ, ສ່ວນທີ່ເຫລືອ ແມ່ນຂອງ ເອກກະຊົນ ແລະ ນິຕິບຸກຄົນ ເປັນຜູ້ຈັດຕັ້ງ ປະຕິບັດ.

ຖ້າຈະປຽບແທບສັດສ່ວນ ຕົວແທນຈຳໜ່າຍແລ້ວ ຈະເຫັນໄດ້ວ່າ ຕົວແທນຈຳໜ່າຍ ທີ່ເປັນຂອງຣັຖ ມີພຽງແຕ່ 3 ສາຂາ ແລະ ອີກ 80 ສາຂາ ເປັນຕົວແທນຈຳໜ່າຍ ແມ່ນເປັນຂອງ ເອກກະຊົນ, ຊຶ່ງຖ້າຄິດໄລ່ ເປັນອັດສາສ່ວນ ຕົວເລກເອກກະຊົນ ເປັນຕົວແທນ ຈຳໜ່າຍ ເກືອບ 100 ເປີເຊັນ.

ກ່ຽວກັບບັນຫາດັ່ງກ່າວ ຄົນສ່ວນຫລາຍ ກໍເຂົ້າໃຈວ່າ ຫວຍພັທນາ ແມ່ນຣັຖບານ ອະນຸຍາດ ໃຫ້ເອກກະຊົນ ເຂົ້າມາ ສຳປະທານ ເປັນທີ່ ຮຽບຮ້ອຍແລ້ວ ຊຶ່ງ ບໍຣິສັດ ຣັດວິສາຫະກິດ ຫວຍພັທນາ ພຽງແຕ່ ຊີ້ນຳເທົ່ານັ້ນ.

ນອກຈາກນີ້ ກໍມີຄົນຕັ້ງ ຂໍ້ສັງເກດວ່າ: ການຈ່າຍເງິນໃຫ້ແກ່ຜູ້ ທີ່ຖືກເລກ ກໍຈ່າຍເປັນ ເງິນສົດ ໂດຍບໍ່ໄດ້ ຜ່ານຣະບົບ ທະນາຄານ ແຕ່ຢ່າງໃດ. ຖ້າມີຄົນຖືກເລກ ກໍມາເອົາເງິນສົດ ຢູ່ບໍຣິສັດ ຕົວແທນ ຈຳໜ່າຍເລີຍ ແລະ ໃນຈຸດນີ້ເອງ ກໍສາມາດໃຊ້ເປັນ ຊ່ອງວ່າງ ໃນການຟອກເງິນ. ແລະ ຍັງມີການທວຍຜົນບານເຕາະ ນຳອີກ ເວົ້າແບບຊາວບ້ານ ເຂົ້າໃຈງ່າຍໆ ກໍຄື ການເປີດ ໃຫ້ມີການຫລິ້ນ ການພະນັນ ບານເຕະ ຢ່າງຖືກຕ້ອງ ຕາມກົດໝາຍ ນັ້ນເອງ.

ນອກຈາກນີ້ ທ້າວ ສີສຸກ ດາວເຮືອງຍັງໄດ້ພົວພັນ ກັບບຸກຄົນ ທີ່ເປັນຄອບຄົວ ຂອງອະດີດການນຳ ຂອງລາວ, ໂດຍສະເພາະ ທ່ານ ເດດສົງຄາມ ທຳມະວົງ ລູກຊາຍ ຂອງ ທ່ານແລະນາງ ໂສມມາລີ ທຳມະວົງ ຜູ້ເປັນລູກຊາຍ ແລະ ລູກໄພ້ ຂອງ ທ່ານ ທອງສິງ ທຳມະວົງ ອະດີດ ນາຍົກຣັຖມົນຕຼີ ລາວ.

ໃນເວລາດຽວກັນ ນາງ ໂສມມາລີ ທຳມະວົງ ກໍໄດ້ ປະຕິເສດວ່າ ບໍ່ມີສ່ວນກ່ຽວຂ້ອງ ກັບ ທຸຣະກິດໃດໆຂອງ ທ້າວ ໄຊຊະນະ ແກ້ວພິມພາ ແລະ ທ້າວ ສີສຸກ ດາວເຮືອງ, ສ່ວນວ່າ ທ່ານ ເດດສົງຄາມ ທຳມະວົງ ກໍປະຕິເສດ ທີ່ຈະໃຫ້ຄຳເຫັນ ໃນເລື້ອງນີ້.

ມາຮອດປັດຈຸບັນ ຣັຖບານ ຍັງບໍ່ທັນມີການ ຊີ້ແຈງວ່າ ທ້າວ ສີສຸກ ດາວເຮືອງ ມີສ່ວນພົວພັນ ຢູ່ໃນບໍຣິສັດ ຈຳໜ່າຍຫວຍ ພັທນາແນວໃດ, ຍັງບໍ່ທັນມີ ການຖະແຫລງ ຄວາມຄືບໜ້າ ໃນການຊອກຫາຕົວ ທ້າວ ສີສຸກ ດາວເຮືອງ ແຕ່ຢ່າງໃດ ວ່າ ຜູ້ກ່ຽວຍັງ ຢູ່ປະເທດລາວ ຫລື ວ່າ ໜີອອກຕ່າງປະເທດ ໄປແລ້ວ.

ປະຊາຊົນກຳລັງຕິດຕາມເບິ່ງວ່າ ຣັຖບານ ພາຍໃຕ້ການນຳພາ ຂອງ ທ່ານ ນາຍົກ ທອງລຸນ ຈະຈັດການແນວໃດ ກັບກຸ່ມຄ້າ ຢາເສບຕິດ ຊຶ່ງວ່າກັນວ່າ ມີເສັ້ນສາຍໃຫຍ່ ຢູ່ເບື້ອງຫລັງ. ເພາະທີ່ຜ່າມາ ຣັຖບານ ກໍມີການ ປາບປາມ ບັນຫາໄມ້ເຖື່ອນ, ຂາຍ ຣົດເຖື່ອນ ແລ້ວ ຄຳຖາມ ຂອງຄົນລາວ ກໍຄືວ່າ ຣັຖບານ ຈະສາມາດປາບປາມ ພໍ່ຄ້າ ຢາເສບຕິດ ໄດ້ຫລືບໍ່ນັ້ນ ກໍຕ້ອງຖ້າ ຕິດຕາມ ເບິ່ງ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ