ເຂດເສຖກິດສະເພາະຍ້າຍ ຈາກ ມ.ປາກແບງ ໄປ ມ.ໄຊ

ສຸພັດຕາ
2019-03-05
Share
F-TADTALAIE ນໍ້າຕົກ ຕາດຕະແລ ເປັນນໍ້າຕົກຕາດ 7 ຊັ້ນ ຢູ່ແຂວງອຸດົມໄຊ
ພາບຈາກ: ນັກຂ່າວພົລເມືອງ

ນັບຕັ້ງແຕ່ປີທີ່ຜ່ານມາ, ນັກລົງທຶນຍ້າຍການສໍາຣວດໂຄງການເຂດເສຖກິຈສະເພາະ ຢູ່ບ້ານປາກເງີຍ, ເມືອງປາກແບງ, ແຂວງອຸດົມໄຊ ໄປສຳຣວດຢູ່ເມືອງໄຊ ແຂວງອຸດົມໄຊ ຍ້ອນມີເນື້ອທີ່ກວ້າງຂວາງກວ່າ ແລະ ຈະບໍ່ກວມເອົາດິນສງວນ ຂອງຣັຖ, ດັ່ງເຈົ້າໜ້າທີ່ຜແນກ ຊັພຍາກອນທັມມະຊາດ ແລະສິ່ງແວດລ້ອມ ແຂວງອຸດົມໄຊ ທ່ານນຶ່ງ ກ່າວຕໍ່ວິທຍຸ ເອເຊັຽ ເສຣີ ໃນວັນທີ 5 ມີນາ ນີ້ວ່າ:

“ທີ່ມັນບໍ່ໄດ້ ເຂົາເຈົ້າກະຍ້າຍໄປບ່ອນອື່ນແລ້ວເດ່, ກະຢູ່ເຂດເມືອງໄຊ ມັນກະເໝາະສົມຢູ່, ແຕ່ວ່າເນື້ອທີ່ມັນໜ້ອຍ ແຕ່ຂະເຈົ້າຢາກໄດ້ ເນື້ອທີ່ຫຼາຍ.”

ທ່ານກ່າວຕື່ມວ່າ ໃນເບື້ອງຕົ້ນ, ເຈົ້າຂອງໂຄງການດັ່ງກ່າວຢາກໄດ້ເນື້ອທີ່ດິນສງວນຂອງຣັຖ ໃນເມືອງປາກແບງຈໍານວນ 30 ປາຍເຮັກຕ່າ, ເພື່ອພັທນາໃຫ້ເປັນເຂດການຄ້າ ແລະທ່ອງທ່ຽວຄົບວົງຈອນ, ແຕ່ທາງການເມືອງປາກແບງ ໃຫ້ໄດ້ແຕ່ 10 ປາຍ ເຮັກຕ່າ ເທົ່ານັ້ນ, ດັ່ງນັ້ນ ນັກລົງທຶນ ຈຶ່ງຂໍຖອນໂຕໄປສໍາຣວດຢູ່ເມືອງໄຊ ແທນ.

ໃນຂນະດຽວກັນປະຊາຊົນທ່ານນຶ່ງເວົ້າວ່າ, ປັດຈຸບັນໂຄງການດັ່ງກ່າວທີ່ຍ້າຍມາຈາກເມືອງປາກແບງ ກໍາລັງສໍາຣວດເນື້ອທີ່ຢູ່ບ້ານຫ້ວຍຂຸມ ໃນເນື້ອທີ່ປະມານ 250 ເຮັກຕ່າ, ຊຶ່ງອາດສົ່ງຜົນກະທົບ ໃຫ້ປະຊາຊົນຫຼາຍຄອບຄົວ ເສັຽດິນໃຫ້ແກ່ໂຄງການ ລົງທຶນແຫ່ງນີ້:

“ສໍາຣວດຢູ່ບ້ານເຮົານິ່ແຫຼະ, ຍັງບໍ່ທັນມີໂຕຕົນ, ສໍາຣວດ 250 ເຮັກຕ້າ ຂໍ້ມູນເບື້ອງຕົ້ນຫັ້ນແຫຼະ, ເພິ່ນສໍາຣວດວ່າເປັນໄປໄດ້ບໍ່ ຫຼື ບໍ່ໄດ້ ຫັ້ນນະ.”

ເຖິງຢ່າງໃດກໍຕາມ ໂຄງການເຂດເສຖກິຈສະເພາະດັ່ງກ່າວ, ເປັນໂຄງການນຶ່ງຂອງການສ້າງເຂດເສຖກິຈ, ຈໍານວນ 5 ແຫ່ງ ໃນແຂວງ ອຸດົມໄຊ ຄື: ໂຄງການເຂດຕາດນໍ້າກັດ, ເຂດຖໍ້າຈອມ-ອ່າງຫິນ, ເຂດເມືອງຫຼາ ຫາ ເມືອງຂວາ ແລະເຂດການຄ້າ ຊາຍແດນບ້ານຂວາງ ຫາ ບ້ານນາໝໍ້, ແຕ່ມາຮອດປັດຈຸບັນ ແຕ່ລະໂຄງການ ຍັງບໍ່ມີຄວາມຄືບໜ້າເທື່ອ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ