ຂ.ຄໍາມ່ວນບໍ່ມີດິນໃຫ້ ຂຸດຄົ້ນ ບໍ່ແຮ່

ສຸພັດຕາ
2019-05-03
ອີແມວລ໌
ຄໍາເຫັນ
Share
ພິມ
ທົ່ງນາໃນແຂວງຄໍາມ່ວນ
ທົ່ງນາໃນແຂວງຄໍາມ່ວນ
ຮູບພາບຈາກ : ນັກຂ່າວພົລເມືອງ

ແຂວງຄໍາມ່ວນ ບໍ່ມີດິນໃຫ້ນັກລົງທຶນ ທັງພາຍໃນ ແລະຕ່າງປະເທດ ເຂົ້າມາສໍາຣວດ ແລະຂຸດຄົ້ນບໍ່ແຮ່ໄດ້ອີກ. ປັດຈຸບັນ ແຂວງຄໍາມ່ວນ ມີໂຄງການຂຸດຄົ້ນບໍ່ແຮ່ແລ້ວ ເກືອບ 40 ໂຄງການ, ຊຶ່ງກວມເອົາເນື້ອທີ່ປະມານ 5 ພັນເຮັກຕາ, ອີງຕາມຄໍາເວົ້າຂອງ ເຈົ້າໜ້າທີ່ຜແນກ ແຜນການ ແລະ ການລົງທຶນ ແຂວງຄໍາມ່ວນ ຕໍ່ວິທຍຸເອເຊັຽ ເສຣີ ເມື່ອວັນທີ 26 ເມສາ ຜ່ານມານີ້:

“ເໝິດແລ້ວ ພື້ນທີ່ມັນກໍຢາກຈະຈໍາກັດແລ້ວ ຢູ່ແຂວງຄໍາມ່ວນ ມັນບໍ່ຄ່ອຍມີແລ້ວ ຕັ້ງແຕ່ປີ 2013 ພຸ້ນໄດ້ມີໂຄງການທີ່ເພິ່ນອະນຸຍາດຕົ໋ວ ແລ້ວຫັ່ນທີ່ສືບຕໍ່ໂຄງການສເນີໃໝ່ ລະບໍ່ມີ ມັນກໍມີທັງຈີນ ແລະວຽດນາມຫັ້ນແຫຼ້ວ ມັນກໍມີຫຼາຍປະເທດເຂົ້າມາລົງທຶນ ກ່ອນໜ້ານັ້ນນາ ສ່ວນຫຼາຍຈະ ເປັນຈີນ ກັບ ວຽດນາມ.”

ທ່ານກ່າວວ່າ ແຂວງຄໍາມ່ວນ ມີທີ່ດິນໃຫ້ສັມປະທານ ທັງໝົດ 15 ພັນເຮັກຕາ ໃນນັ້ນ ແຍກເປັນດິນສັມປະທານ ສ້າງເຂື່ອນໄຟຟ້າ, ເຂດ ເສຖກິຈພິເສດ ແລະ ເຂດກະສິກັມ, ຊຶ່ງກໍໃຫ້ສັມປະທານ ເກືອບໝົດແລ້ວ. ສະນັ້ນ, ແຂວງຈະບໍ່ຂຍາຍທີ່ດິນ ເພື່ອໃນນັກລົງທຶນສັມປະທານ ຕື່ມອີກ ເພາະຢາກສງວນໄວ້ ໃຫ້ປະຊາຊົນ ພາຍໃນແຂວງ ໄດ້ເຮັດກະສິກັມ ແລະ ປຸກສ້າງທີ່ຢູ່ອາສັຍ.

ປັດຈຸບັນ ບໍຣິສັດຂຸດຄົ້ນບໍ່ແຮ່ ຢູ່ແຂວງຄໍາມ່ວນ ສ່ວນໃຫຍ່ ຈະເປັນການລົງທຶນຂນາດໃຫຍ່ ທີ່ໄດ້ຮັບອະນຸຍາດ ຈາກຣັຖບານໂດຍກົງ ແລະ ຍັງໄດ້ຮັບ ສັມປະທານທີ່ດິນ ເຂົ້າໃນໂຄງການ ຢ່າງໜ້ອຍ 100 ເຮັກຕາ ຕໍ່ໂຄງການ ໂດຍມີບໍຣິສັດ ຂຸດຄົ້ນບໍ່ແຮ່ ປະມານ 40 ບໍຣິສັດ ເປັນຕົ້ນ ບໍຣິສັດຂຸດຄົ້ນ ບໍ່ກົ່ວ, ເກືອ, ຫິນປູນ, ຫິນຊາຍໂປຣຕັສ ຢູ່ເມືອງໜອງບົກ, ບໍ່ເຫຼັກ ຢູ່ເມືອງບົວລະພາ, ເມືອງຫິນບູນ ແລະ ເມືອງ ມະຫາໄຊ ແມ່ນຂຸດຄົ້ນຖ່ານຫິນ. ຢູ່ເມືອງບົວລະພາ ສ່ວນໃຫຍ່ ບໍຣິສັດ ທີ່ຂຸດຄົ້ນບໍ່ແຮ່ນັ້ນ ແມ່ນເປັນຂອງຈີນ ແລະ ວຽດນາມ.

ຕົວຢ່າງ ບໍຣິສັດອຸດສາຫະກັມ ຊີເມັນລາວ ກາສິງ ຂອງຈີນ ທີ່ຜລິດປູນເມັນ ຖືເປັນບໍຣິສັດໃຫຍ່ທີ່ສຸດ ທີ່ສາມາດຜລິດປູນຊີເມັນໄດ້ 8 ແສນຕັ້ນ ຕໍ່ປີ, ຮອງລົງມາ ແມ່ນບໍຣິສັດຂຸດຄົ້ນ ແລະ ຜລິດເກືອຈືດ ຂອງວຽດນາມ ໂດຍສາມາດຜລິດເກືອຈືດໄດ້ 60 ພັນຕັ້ນຕໍ່ປີ.

ປັດຈຸບັນ ການລົງທຶນ ຂຸດຄົ້ນບໍ່ແຮ່ ໃນທົ່ວປະເທດລາວ ຂຍາຍໂຕຢ່າງວ່ອງໄວ ໂດຍມີບໍຣິສັດຈາກພາຍໃນ ແລະຕ່າງປະເທດ ລົງທຶນແລ້ວ 700 ບໍຣິສັດ. ໃນນັ້ນເປັນໂຄງການ ທີ່ຣັຖບານຫຼືສູນກາງອະນຸມັດ 270 ປາຍບໍຣິສັດ ແລະຣະດັບແຂວງອະນຸມັດ 400 ປາຍບໍຣິສັດ.

ເຕັມຫນ້າ