ຄວາມວຸ້ນວາຍເຣື່ອງທີ່ດິນ ບ້ານນາໂນ

ໄຊຍາ
2019-03-24
ອີແມວລ໌
ຄໍາເຫັນ
Share
ພິມ
ພື້ນທີ່ດິນ ທີ່ກໍາລັງມີການຂັດແຍ່ງກັນ
ພື້ນທີ່ດິນ ທີ່ກໍາລັງມີການຂັດແຍ່ງກັນ
ຮູບພາບຈາກ: ນັກຂ່າວພົລເມືອງ

ປະຊາຊົນທີ່ໄດ້ຮັບຜົລກະທົບ ຈາກການຍົກຍ້າຍ ອອກຈາກເຂດຟາມໄກ່ດົງໂດກບໍ່ມີທາງເລືອກ ເພາະບໍ່ມີບ່ອນຢູ່ອາສັຍ, ລໍຖ້າທາງການ ມາແກ້ໄຂ ການຊົດເຊີຍຈັດສັນທີີີ່ດິນໃຫ້, ຢູ່ເຂດບ້ານນາໂນ ເມືອງໄຊເສດຖາ ນະຄອນຫລວງວຽງຈັນ ເກືອບສິບປີແລ້ວ.

ໃນທີ່ສຸດ ມາເຖິງວັນທີ 01 ມິນາ ກໍໄດ້ອອກເງິນກັນ ລົງມາບຸກເບີກດິນ ເພື່ອຈັດສັນເອງ, ແຕ່ໃນການບຸກເບີກກັບໄປລໍ້າແດນຕອນດິນ ມີເຈົ້າຂອງ, ທີ່ມີໃບຕາດິນ ຖືກຕ້ອງຕາມກົດໝາຍ ຈົນເກີດເຫດປະທະກັນ, ທ້າວ ສີພັນ ສໍພັນໄຊ ນຶ່ງໃນເຈົ້າຂອງດິນ ບໍ່ພໍໃຈຈົກປືນ ອອກມາຍິງນາບຂູ່ກັນ, ທາງຕຳຣວດເມືອງໄຊເສດຖາ ຕ້ອງເຂົ້າມາຣະງັບເຫດການ.

ຕໍ່ເຫດການດັ່ງກ່າວ ປະຊາຊົນທີ່ຢູ່ໃນເຫດການ ໄດ້ເວົ້າຕໍ່ນັກຂ່າວ ວິທຍຸເອເຊັຍເສຣີວ່າ, ເຫດການຂັດແຍ່ງທີ່ດິນນັ້ນ ພາກສ່ວນທີ່ກ່ຽວຂ້ອງ ບໍ່ໄດ້ໄກ່ເກັ່ຍ ບໍ່ວ່າແນວໃດ ຍັງຕົກລົງກັນບໍ່ໄດ້.

"ແມ່ນທາງເມືອງທາງຫຍັງ ກ່ຽວກັນທາງນະຄອນຫຼວງນີ້ ລົງໄປໄກ່ເກັ່ຍເພີ່ນຍັງບໍ່ໃຫ້ ອັນນັ້ນດອກເພາະວ່າເຂົາຍັງຕົກລົງກັນ ຍັງບໍ່ທັນ ຕົກແຕກບໍ່ໃຫ້ຂໍ້ມູນ ຫຍັງດອກ."

ສ່ວນຄຳເວົ້າຂອງຜູ້ເສັຍຫາຍອີກຄົນນຶ່ງ ກໍອ້າງໜັງສືທາງຣັຖການ, ທີ່ຢັ້ງຢືນໃຫ້ປະຊາຊົນ ມີສິດຕໍ່ຕອນດິນດັ່ງກ່າວ ທີ່ ລໍຄອຍມາຫລາຍປີ, ແຕ່ທາງການຍັງບໍ່ ຈັດສັນໃຫ້ກໍເລີຍໂຮມເງິນກັນມາບຸກເບີກເອງ, ບໍ່ໄດ້ລໍຖ້າທາງການແຈ້ງແຕ່ຢ່າງໃດ.

"ພວກຂ້າພະເຈົ້າກະມາໃນນາມປະຊາຊົນ, ທີ່ຖືກຜົລກະທົບຈາກຟາມໄກ່ດົງໂດກເນາະ, ເອກກະສານຂອງພວກເຮົານີ້, ເພີ່ນກາມີຄຳເຫັນ ອອກມາຕັ້ງແຕ່ 2012-2013, ຈົນມາຮອດປັດຈຸບັນນີ້ຫັ້ນນ່າ, ພໍ່ແມ່ປະຊາຊົນຍັງບໍ່ທັນໄດ້ຮັບໝາກຮັບຜົລຈາກທາງຣັຖຈັກເທື່ອ, ແຕ່ງຕັ້ງ ໃຫ້ຄນະກັມມະການ ລົງມານີ້, ປ່ຽນໃບແຕ່ງຕັ້ງຄນະກັມມະການ ສອງໃບ, ລະໃບທີສາມ ຊິປ່ຽນອີກລະກາຍັງບໍ່ໄດ້ລົງມາເຮັດໃຫ້ພວກເຮົາ."

ຍານາງເວົ້າຕື່ມວ່າ, ປະຊາຊົນຢາກໃຫ້ຝ່າຍເບື້ອງຣັຖລົງມາເຮັດແຕ່ຝ່າຍເບື້ອງຣັຖ, ກາບໍ່ລົງມາເຮັດຈັກເທື່ອ, ມີແຕ່ວ່າກຳລັງຊິຂື້ນແຜນ. ດັ່ງນັ້ນປະຊາຊົນ ລະພ້ອມໃຈກັນ ໝົດທຸກຄົນເວົ້າວ່າ, ເຮົາບໍ່ລົງເຮັດເອງ ຄືຊິບໍ່ມີໃຜເຮັດໃຫ້ເຮົາ. ດິນເປົ່າຫວ່າງຢູ່ບ່ອນໃດພວກເຮົາ ກໍ່ລົງໄປບຸກເບີກ.

ໃນຂນະທີ່ແຈ້ງການລົບລ້າງໃບຕາດິນ ເຮັດອອກມາແລ້ວ, ເອກກະສານເລກທີ 1607 ແຈ້ງໃຫ້ບ້ານ ແລະເມືອງ ທຸກພາກສ່ວນອົງການ ທີ່ກ່ຽວຂ້ອງກັບດິນຣັຖ ບໍ່ໃຫ້ຈັດສັນແບ່ງປັນດິນ ໃຫ້ບຸກຄົນ ແລະ ພະນັກງານ ທະຫານ ທີ່ບໍ່ທັນມີນະໂຍບາຍ ເຂົ້າມາຢູ່, ໃນເມື່ອເປັນ ແນວນັ້ນ, ແຈ້ງການໂຕນີ້ແຈ້ງອອກມາແຕ່ປີ  2014 ເປັນຫຍັງເພີ່ນຄື ບໍ່ເຮັດບໍ່ປະຕິບັດຕາມແຈ້ງການ, ຂອງຂັ້ນເທີງແດ່, ຫລືວ່າ ບ້ານ ກັບເມືອງ ເພີ່ນບໍ່ເອົາໃຈໃສ່ບໍ່ ຂອງ ຣັຖທີ່ອອກມາ ເປັນຫຍັງເພີ່ນຄືບໍ່ປະຕິບັດ ເພີ່ນຄືປ່ອຍໃຫ້ປະຊາຊົນ ໃຫ້ພະນັກງານທະຫານເຂົ້າມາ ຊື້ລະກາອອກໃບຕາດິນຂອບທອງໃຫ້ ກັນແບບນີ້.

ສ່ວນເຈົ້າຂອງດິນທີ່ມີໃບຂອບທອງ ທີ່ໄປເບີ່ງເຫດການການບຸກເບີກດິນໄດ້ເວົ້າຕໍ່ຊື່ທ້ອງຖິ່ນວ່າ ທີ່ດິນຕອນນີ້ແມ່ນຊື້ມາຖືກຕ້ອງມີໃບຕາດິນ ຄັກແນ່ ເສັຍພາສີ ມາຕັ້ງແຕ່ຊື້ ຈົນຮອດປັດຈຸບັນ.

"ມີໃບຂອບທອງຄັກແນ່ ລະເສັຍພາສີທີ່ດິນທຸກປີ ກາບໍ່ຮູ້ເລີຍເບື້ອງໜ້າເບື້ອງຫລັງເຮົາກາມາເສັຍລະ."

ຍານາງເວົ້າຕື່ມວ່າ: ຕາມທີ່ຮູ້ຂໍ້ມູນຈາກຫ້ອງການ ຊັບສິນເມືອງໄຊເສດຖາ ຟາມໄກ່ດົງໂດກນີ້, ຕາມທີ່ເຂົາເຈົ້າເວົ້າຫັ້ນເພິ່ນຖືກກະທົບແຕ່ວ່າ ພາກຣັຖ ໄດ້ທົດແທນໃຫ້ເພີ່ນແລ້ວ, ຟາມໄກ່ທຸກມື້ນີ້, ກໍ່ແມ່ນດິນຣັຖເອົາໃຫ້ເພິ່ນ ທາງຂັ້ນເທີງເພີ່ນເວົ້າກັນວ່າ, ດິນປ່າຊ້າຂອງບ້ານນີ້ມີ 6 ເຮັກຕ້າ ລະຊິແບ່ງໃຫ້ເພີ່ນ 3 ເຮັກຕ້າ ບໍ່ທັນແບ່ງໃຫ້ເພີ່ນ ບໍ່ທັນມີຂໍ້ຕົກລົງລະມາເຮັດກ່ອນ ເພີ່ນກາມີເຫດຜົລຂອງເພີ່ນ ເຮົາກາມີເຫດຜົລ ຂອງເຮົາໃນນາມເຈົ້າຂອງດິນ ຖ້າວ່າເພີ່ນຊິເອົາ ກາແຈ້ງໃຫ້ເຮົາຮູ້ກ່ອນ ແລະ ມີຂໍ້ຕົກລົງຄັກແນ່ ກໍ່ບໍ່ເປັນຫຍັງ.

ທາງນາຍບ້ານ ບ້ານນາໂນ ໄດ້ຣາຍງານທີ່ມາຂອງດິນຕອນດັ່ງກ່າວວ່າ: ເມື່ອປີ 2004 ເມືອງໄຊເສດຖາໄດ້ແບ່ງດິນເຂດນີ້ໃຫ້ ປກສ 5 ເຮັກຕ້າ ຄ້າຍຄຸມຂັງນາໄຫ 12 ເຮັກຕ້າ, ດິນທີ່ປະຊາຊົນດັ່ງເດີມ ຫລື ເອີ້ນວ່າດິນມູນມີໃບຕາດິນຂອບທອງ ຖືກຂາຍໄປ 5 ເຮັກຕ້າ ສ່ວນດິນຈັດສັນແມ່ນ 7 ເຮັກຕ້າ ທີ່ເມຶືອງໄດ້ອອກສິດໃຫ້ ໃນປີ 2004 ເພື່ອໃຫ້ປະຊາຊົນ ແລະ ພະນັກງານທີ່ຖືກຜົລກະທົບ ໃນເມື່ອກ່ອນ ທີ່ເຫັນວ່າເປັນໄປໄດ້ ໄດ້ທໍາການປຸກສ້າງແລະພັທນາສະເພາະ. ສຳລັບປະຊາຊົນ ແລະ  ພະນັກງານບໍ່ໄດ້ທັມການບຸກເບີກ ຫລື ພັທນາ ຕອນດິນດັ່ງກ່າວ ແມ່ນຣັຖບານໄດ້ເກັບກູ້ຄືນ ພໍມາຮອດປີ 2014 ທີ່ດິນດັ່ງກ່າວໄດ້ຖືກລົບລ້າງ.

ໃນສ່ວນຂອງການແກ້ໄຂ ຂໍ້ຂັດແຍ່ງ ອີງຕາມເອກກະສານ ສະບັບເລກທີ 256 ໂດຍສົ່ງໄປເຖິງ ຣັຖມົນຕຣີ ກະຊວງຊັພນາກອນທັມມະຊາດ ແລະສິ່ງແວດລ້ອມ ສເນີນະໂຍບາຍທີ່ດິນປຸກສ້າງ ຂອງບັນດາຄອບຄົວ ທີ່ຖືກຜົລກະທົບຟາມໄກ່ດົງໂດກ. ອີງຕາມຄຳຮ້ອງຂໍຄວາມເປັນທັມ ຂອງປະຊາຊົນ ຄັ້ັງວັນທີ 10 ມົກກະຣາ 2017.

ຜ່ານມາຣັຖບານໄດ້ມີການຕົກລົງ ແລ້ວກ່ຽວກັບການແກ້ໄຂບັນຫາ ຜົລກະທົບປະຊາຊົນ ຢູ່ເຂດຟາມໄກ່ດົງໂດກນັ້ນ, ສະນັ້ນຫ້ອງວ່າການ ສຳນັກງານນາຍຍົກ ຈຶ່ງໃຫ້ກະຊວງຊັພຍາກອນ ທັມມະຊາດ ແລະ ສິ່ງແວດລ້ອມ ສົມທົບກັບນະຄອນຫລວງວຽງຈັນ ແກ້ໄຂບັນຫາດັ່ງກ່າວ ບົນພື້ນຖານຄວາມເປັນຈິງ ໃຫ້ຂາດຕົວ ຖືກຕ້ອງຕາມຣະບຽບກົດໝາຍຢ່າງເຂັ້ມງວດ ແລ້ວຕ້ອງຣາຍງານຄືນ ໃຫ້ກັບສຳນັກງານນາຍົກ ຣັຖມົນຕຣີ.

ຕໍ່ການກແກ້ໄຂບັນຫາສະເພາະໜ້າເມື່ອວັນທີ 19 ມີນາ ຜ່ານມາ ທ່ານ ພຸດທະຄອນ ໂຄດປັນຍາ ຮອງເຈົ້າເມືອງ ເມືອງໄຊເສດຖາ ຖແລງຕໍ່ ຊື່ມວນຊົນທ້ອງຖິ່ນ ເຖິງວິທີການແກ້ໄຂວ່າ:

ຕອນນີ້ໄດ້ປະກາດໃຫ້ປະຊາຊົນ ທີ່ຖືກຜົລກະທົບຈາກໂຄງການຂອງຣັຖ ໄດ້ບຸດຕິກ່ອນ ທາງການຈະໄດ້ປະຊຸມ ຄນະສະເພາະກິດ ເພື່ອແກ້ໄຂບັນຫາດັ່ງກ່າວ ແຕ່ທາງການຂໍເວລາ 30 ວັນ ຈະເຮັດໃຫ້ບັນຫາລຸລ່ວງໄປໄດ້ດ້ວຍດີ.

ເປັນຫຍັງ ປະຊາຊົນ ຈື່ງໄດ້ຍົກຍ້າຍອອກຈາກເຂດຟາມໄກ່ດົງໂດກ, ແລ້ວມາຮຽກຮ້ອງເອົາທີ່ິດິນ ທີ່ບ້ານນາໂນ ເມືອງໄຊເສດຖາ ນະຄອນຫລວງວຽງຈັນ. ແຫລ່ງຂ່າວທີ່ຢູ່ໃນເຂດດັ່ງກ່າວເວົ້າວ່າ; ຟາມໄກ່ ທີວ່າ ເມື່ອກ່ອນເອີ້ນວ່າຟາມໄກ່ຮົງກາລີ ທີ່ຕັ້ງຢູ່ໃນເຂດ ມະຫາວິທະລັຍແຫ່ງຊາດ ແລະ ຢຸດເຊົາກິຈການໄປ ເມື່ອປີ 2000 ຈາກນັ້ນປະຊາຊົນຈຳນວນນຶ່ງ ໄດ້ມາຈັບຈອງອາສັຍ ຢູ່ເຂດດັ່ງກ່າວ ແຕ່ເມື່ອ ກະຊວງສຶກສາທິການ ແລະ ກິລາ ມີກັມມະສິດ ໃນຕອນດິນດັ່ງກ່າວ ຈື່ງທວງເອົາຄືນ ແລ້ວມາຂຍາຍ ພາກວິຊາຮຽນອີກສອງ ຄນະຄື: ຄນະວິທຍາສາດ-ສິ່ງແວດລ້ອມ ແລະ ຄນະການປະມົງ-ລ້ຽງສັດ ທີ່ຂຶ້ນກັບ ມະຫາວິທຍາລັຍ ແຫ່ງຊາດ ໃນປັດຈຸບັນ.

ດັ່ງນັ້ນຈື່ງໄດ້ຍົກຍ້າຍປະຊາຊົນທີ່ອາສັຍ ຢູ່ໃນເຂດນັ້ນອອກໄປໂດຍໄດ້ມີການຕົກລົງ ອອກເອກກະສານ ຮັບຮອງວ່າຈະຈັດສັນທີ່ດິນ ທີ່ຢູ່ອາສັຍໃຫ້ ແມ່ນຢູ່ບ້ານ ນາໂນ ແລະນາໄຫ ແຕ່ບໍ່ຮູ້ວ່າເຂດໃດ ນັບແຕ່ມື້ນັ້ນ ມາຮອດມື້ນີ້ ກໍ່ ເກືອບສິບປີແລ້ວ.

ເຖິງແມ່ນວ່າໄລຍະຜ່ານມາ ຫ້ອງວ່າການສຳນັກງານ ນາຍົກຣັຖມົນຕຣີ ໄດ້ອອກແຈ້ງການ ມາເຖີງນະຄອນຫລວງວຽງຈັນເຖີງ 4 ສະບັບ ແຕ່ການຈັດສັນທີ່ດິນ ຍັງບໍ່ໄປບໍ່ມາ ຈົນມາເກີດເຫດການຂັດແຍ່ງທີ່ດິນ ຂອງປະຊາຊົນຄືດັ່ງທີ່ເຫັນ.

ເຕັມຫນ້າ