ດິນເຂດບໍ່ເຕັນ ກໍາລັງ ເປັນທີ່ນິຍົມ

ພູວົງສ໌
2019-04-09
ອີແມວລ໌
ຄໍາເຫັນ
Share
ພິມ
ເຂດໃກ້ຄຽງ ຄາຊີໂນ ບໍ່ເຕັນ ແຂວງ ຫລວງນໍ້າທາ
ເຂດໃກ້ຄຽງ ຄາຊີໂນ ບໍ່ເຕັນ ແຂວງ ຫລວງນໍ້າທາ
RFA

ປະຈຸບັນ, ປະຊາຊົນຫຼາຍຄອບຄົວຢູ່ເຂດບໍ່ເຕັນ ເມືອງຫຼວງນ້ຳທາ ແຂວງຫຼວງນ້ຳທາ ພາກັນຕິດປ້າຍປະກາດຂາຍດິນຫຼາຍຂຶ້ນ ເພື່ອຂາຍໃຫ້ ແກ່ນັກລົງທຶນ ທີ່ສົນໃຈມາຊອກຊື້ດິນ, ໂດຍສະເພາະແມ່ນນັກລົງທຶນຈາກຈີນ ເພື່ອເຮັດທຸຣະກິຈ ໃນເຂດດັ່ງກ່າວ ພາຍຫຼັງຮູ້ວ່າໂຄງການ ກໍ່ສ້າງ ທາງຣົດໄຟລາວ-ຈີນ ມີຄວາມຄືບໜ້າຫຼາຍຂຶ້ນເລື້ອຍໆ ແລະ ໃກ້ຈະສຳເຣັດໃນອີກ 2 ປີຂ້າງໜ້າ, ເຊິ່ງທີ່ດິນເຂດນີ້ ເປັນທີ່ສົນໃຈ ໃນສາຍຕາ ຂອງນັກລົງທຶນຫຼາຍ, ດັ່ງເຈົ້າໜ້າທີ່ແຂວງຫຼວງນ້ຳທາ ທ່ານນຶ່ງ ໄດ້ກ່າວຕໍ່ ຜູ້ສື່ຂ່າວເອເຊັຽເສຣີ ໃນວັນທີ 09 ເມສາ ນີ້ວ່າ:

“ປະຊາຊົນເຂົາກະຂາຍ ບໍ່ແມ່ນແຕ່ຈີນດອກໄປຊື້ ເຂົາກະຂາຍ, ຜູ້ໃດຕ້ອງການດິນ ເຂົາກະຂາຍໂລດແຫຼະ. ທີ່ດິນຫຼາຍຕົ່ວພວກນັ້ນ ເພາະວ່າຂະເຈົ້າໄປຖາງພູ ເຮັດໄຮ່ເຮັດສວນ ຢາງພາຣາ ຫຼາຍອັນຫຼາຍແນວ, ບາດນີ້ເຂົາກະຂາຍອອກ.”

ເຈົ້າໜ້າທີ່ແຂວງຫຼວງນ້ຳທາ ທ່ານນີ້ກ່າວຕື່ມວ່າ ສຳລັບຣາຄາຂາຍທີ່ດິນນັ້ນ ຊາວບ້ານແຕ່ລະຄົນ ຕັ້ງຣາຄາແຕກຕ່າງກັນໄປ, ແຕ່ທີ່ດິນ ຕິດທາງໃຫຍ່ ຫຼືໃກ້ກັບເຂດເສຖກິຈສະເພາະບໍ່ເຕັນແດນງາມ ຍ່ອມມີຣາຄາສູງ. ສ່ວນທີ່ດິນໃນເຂດປ່າ ຫຼືພູດອຍ ກໍຈະມີຣາຄາຖືກກວ່າ, ເຊິ່ງການຕັ້ງຣາຄາຊື້ຂາຍທີ່ດິນ ຈະເກີດຂຶ້ນເອງຣະຫວ່າງນັກລົງທຶນກັບປະຊາຊົນ ບໍ່ໄດ້ຜ່ານທາງການແຕ່ຢ່າງໃດ.

ທ່ານກ່າວອີກວ່າ ປັດຈຸບັນ, ນັກລົງທຶນຈີນຈຳນວນນຶ່ງ ໄດ້ເຂົ້າມາຊອກຊື້ທີ່ດິນ ໃນເຂດດັ່ງກ່າວແລ້ວ ໂດຍໃຫ້ຄົນລາວເປັນໂຕແທນຖື ກັມມະສິດ. ອີກຫຼາຍຄົນ ກໍໄດ້ເຂົ້າມາເບິ່ງເນື້ອທີ່, ແຕ່ຍັງບໍ່ທັນສົນໃຈຊື້ຢ່າງເປັນທາງການເທື່ອ, ເຊິ່ງເບື້ອງເຈົ້າໜ້າທີ່ ກໍຍັງບໍ່ມີຂໍ້ມູນ ຣະອຽດວ່າ ຣະຫວ່າງປະຊາຊົນກັບນັກລົງທຶນ ໄດ້ມີການຊື້ຂາຍກັມມະສິດທີ່ດິນແລ້ວ ເປັນຈຳນວນຈັກຕອນ ແລະ ມີມູນຄ່າເທົ່າໃດ.

ນອກຈາກນີ້ແລ້ວ, ຢູ່ໃນເຂດເສຖກິຈສະເພາະບໍ່ເຕັນແດນງາມ ມີນັກທຸຣະກິຈຈີນເຂົ້າມາລົງທຶນແລ້ວ ຈຳນວນຫຼາຍ 10 ຫົວໜ່ວຍ, ແຕ່ຍັງບໍ່ທັນຮູ້ຈຳນວນຣະອຽດ, ເຊິ່ງໃນນັ້ນ ແມ່ນນັກທຸຣະກິຈຣາຍໃຫຍ່ 10 ຫົວໜ່ວຍ. ສ່ວນທີ່ເຫຼືອ ແມ່ນນັກທຸຣະກິຈຣາຍຍ່ອຍ ທີ່ມີທັງການລົງທຶນສ້າງໂຮງແຮມ, ສູນການຄ້າ, ສູນການຄ້າປອດພາສີ, ຮ້ານອາຫານ ແລະ ຮ້ານບັນເທິງ-ບໍຣິການດ້ານຕ່າງໆ.

ເຕັມຫນ້າ