ຊາວລາວບໍ່ພໍໃຈ ກັບລາຄານໍ້າມັນ ທີ່ປັບຂື້ນຕື່ມອີກ

ເມື່ອວັນທີ 18 ພຶສຈິກາ ທີ່ຜ່ານມາ ກົມການຄ້າພາຍໃນ ກະຊວງອຸດສາຫະກັມ ແລະການຄ້າອອກຄຳສັ່ງເລຂທີ 1114/ອຄ ເພື່ອແຈ້ງການ ປັບຂື້ນລາຄາ ນໍ້າມັນແອັດຊັງທັມມະດາ ແລະນໍ້າມັນກະຊວນ ສ່ວນນໍ້າມັນແອັດຊັງພິເສດ ລາຄາຍັງຄົງເດີມ ໂດຍເຣີ່ມປະຕິບັດ ຕັ້ງແຕ່ວັນທີ 19 ພຶສຈິກາ 2021 ເວລາ 6 ໂມງເຊົ້າເປັນຕົ້ນໄປ. ຍ້ອນເຫດຜົນດັ່ງກ່າວນີ້ ຈຶ່ງເຮັດໃຫ້ປະຊາຊົນໃນເຂດຕ່າງ ໆ ພາຍໃນປະເທດຕ່າງກໍໄດ້ຮັບຜົນກະທົບ ຕໍ່ການດຳເນີນຊີວິດ ແລະການເປັນຢູ່ ດັ່ງຊາວນະຄອນຫຼວງວຽງຈັນ ທ່ານນຶ່ງກ່າວຕໍ່ ວິທຍຸເອເຊັຽເສຣີໃນວັນທີ 19 ພຶສຈິກາ 2021 ນີ້ວ່າ:

“ໂອ້ກະທົບຫຼາຍເພາະວ່າ ນໍ້າມັນມັນແພງຫັ້ນເນາະບາດນີ້ ເຣື່ອງການຊື້ ຢູ່ຊື້ກິນກໍກໍແພງຢູ່ ແລ້ວອາຫານການກິນເນາະມາບວກໃສ່ ນໍ້າມັນເພີ່ມລາຄາມັນກໍສູງຂື້ນ ອີກກະທົບກັບຄອບຄົວ ແລ້ວກໍການດຳຣົງຊີວິດຫາເງິນກໍຫາຍາກເດ້ ເຮັດວຽກກໍຍາກຊ່ວງໂຄວິດ-19 ໄປໃສມາໃສກໍລຳບາກ.”

ປະຊາຊົນລາວ ຕ້ອງການໃຫ້ໜ່ວຍງານທີ່ກ່ຽວຂ້ອງ ຊ່ອຍອຸ້ມລາຄານໍ້າມັນທີ່ເພີ່ມຂື້ນ ຢ່າງຕໍ່ເນື່ອງໃນປີ 2021 ໂດຍສະເລັ່ຽປະມານ 1-2 ຄັ້ງຕໍ່ເດືອນ ເພື່ອຫຼຸດຜ່ອນບັນຫາເຣື່ອງຄ່າຄອງຊີບ ໃຫ້ແກ່ພວກເຂົາເຈົ້າ. ແຕ່ຢ່າງໃດກໍຕາມບັນຫາດັ່ງກ່າວ ຍັງບໍ່ທັນມີໜ່ວຍງານໃດ ດຳເນີນການແກ້ໄຂເທື່ອ. ດັ່ງຊາວສວັນນະເຂດ ນາງນຶ່ງກ່າວໃນມື້ດຽວກັນວ່າ:

“ຕະກີ້ເຫັນ 11,900 ກີບດຽວນີ້ຂື້ນ 12,600 ກີບເຂົາກໍຕໍ່ວ່າກັນຢູ່ກໍປະຊາຊົນ ເຮົານີ້ແຫຼະກໍຕໍ່ວ່າຫັ້ນແຫຼະຣັຖບານວ່າແບບນໍ້າມັນຂື້ນຫຼາຍ ຫາເງິນຍາກຈັ່ງຊີ້ຈັ່ງ ຊັ້ນອີ່ຫຍັງເພິ່ນກໍເວົ້າຫຼາຍ ອັນກໍຍັງບໍ່ທັນໄດ້ແກ້ໄຂເທື່ອແມ່ນກໍຢາກໃຫ້ເພີ່ນແກ້ໄຂ ຢາກໃຫ້ນໍ້າມັນຫຼຸດລົງ ແນວມັນທຸກມື້ນີ້ ມັນຄອງຊີບມັນກໍຍັງຍາກຢູ່ແລ້ວ.”

ສຳລັບຜູ້ປະກອບການຂົນສົ່ງສີນຄ້າ ຈຳນວນຫຼາຍກໍຍັງເປີດໃຫ້ການບໍຣິການ ແລ່ນຣົຖຄືເກົ່າ ແລະຍັງຄົງລາຄາຄ່າໂດຍສານຕາມເດີມ ບໍ່ໄດ້ປັບຂື້ນຕາມລາຄານໍ້າມັນ. ໃນຂນະທີ່ລາຄານໍ້າມັນ ຍັງເພີ່ມຂື້ນເລື້ອຍໆ ຍ້ອນພວກເຂົາເຈົ້າ ຢ້ານວ່າບໍ່ມີລູກຄ້າມາໃຊ້ບໍຣິການ. ດັ່ງເຈົ້າ ຂອງຣົຖໃຫຍ່ຢູ່ ນະຄອນຫຼວງວຽງຈັນທ່ານນຶ່ງກ່າວວ່າ:

“ຂ້ອຍກໍແລ່ນຣົຖເນາະຢ່າງດຽວນີ້ ຄ່າຈ່າຍການຂົນສົ່ງນີ້ຂ້ອນຂ້າງສູງ ບາງງານກໍຍັງຖືກລົງຊໍ້ານ່າ ນ້ຳມັນແພງມີແຕ່ລາຄາຂອງນໍ້າມັນສູງຂື້ນເລື້ອຍໆ ແລ້ວບໍ່ເຮັດ ຫຍັງກໍບໍ່ມີກຳໄລບໍ່ມີເງິນ ບໍ່ມີເງິນໃນບັນຊີໃຊ້ຈ່າຍນໍ້າມັນເບິດຄູ່ມື້ນີ້ນ່າ ເຮັດຫຍັງບໍ່ໄດ້.”

ສ່ວນປະຊາຊົນຜູ້ໃຊ້ ຣົຖໃຊ້ຖນົນທົ່ວໄປ ກໍຕ້ອງປະສົບກັບບັນຫາຄວາມຫຍຸ້ງຍາກໃນການ ເດີນທາງຍ້ອນບໍ່ສາມາດຊອກບ່ອນເຕີມນໍ້າມັນ ແອັດຊັງທັມມະດາ ໄດ້ເນື່ອງຈາກປໍ້ານໍ້າມັນຕາມຈຸດຕ່າງໆ ພາກັນປິດໃຫ້ບໍຣິການຊົ່ວຄາວ ພາຍຫຼັງທາງການອອກແຈ້ງການວ່າຈະມີ ການປັບຂື້ນລາຄານໍ້າມັນໃນໄລຍະໝໍ່ໆ ນີ້. ດັ່ງພໍ່ຄ້ານຳເຂົ້າເຄຶື່ອງ ຈາກປະເທດໄທຍຢູ່ເມືອງຈັນທະບູລີ ນະຄອນຫຼວງວຽງຈັນ ທ່ານນຶ່ງກ່າວວ່າ:

“ມີແຕ່ວ່າແອັດຊັງໝົດ ແອັດຊັງບໍ່ມີຂາຍເຂົາເຈົ້າເວົ້າ ເຂົາເຈົ້າບໍ່ໄດ້ນຳ ສົ່ງຂະເຈົ້າບໍ່ໄດ້ສົ່ງນໍ້າມັນ ແລະບໍ່ໄດ້ມີນໍ້າມັນຂາຍດຽວນີ້ມີແລ້ວຕິ ເຫັນມື້ເຊົ້ານີ້ເຂົາເຈົ້າຂາຍ ລະໂອ້ຍສົ່ງຜົນກະທົບແທ້ຄ່າເຄື່ອງບໍ່ໄດ້ຂື້ນເລີຍມີແຕ່ນໍ້າມັນຂື້ນ ຄ່າຂົນສົ່ງກໍຍາກເບິດບໍ່ຢາກ ເຫຼືອລະກຳໄລຫັ້ນນ່າຄ່າຂົນສົ່ງ ຄືເກົ່າແຕ່ວ່າຄ່ານໍ້າມັນຂື້ນໃດຂື້ນຫຼາຍຮອບແລ້ວໃດ.”

ສາເຫດທີ່ເຮັດໃຫ້ນໍ້າມັນແອັດຊັງ ບາງຊະນິດບໍ່ມີຂາຍນັ້ນສ່ວນນຶ່ງເປັນຍ້ອນຄວາມຕ້ອງ ການຂອງປະຊາຊົນມີຫຼາຍ ນໍ້າມັນພັດມີໜ້ອຍ ແລະອີກສ່ວນນຶ່ງເປັນຍ້ອນເຈົ້າຂອງກິຈການ ປ້ຳນໍ້າມັນຈຳນວນນຶ່ງກັກຕຸນນໍ້າມັນເອົາໄວ້ ໂດຍສະເພາະປໍ້ານໍ້າມັນ ຂະນາດນ້ອຍ ດັ່ງເຈົ້າຂອງ ກິຈການປໍ້ານໍ້າມັນ ທ່ານນຶ່ງໄດ້ກ່າວວ່າ:

“ບາງປໍ້າມັນກໍຈະຂາດ ເຂົາເຈົ້າປິດປໍ້າເລີຍຫັ້ນນ່າ ຕ້ອງໄດ້ໄປລໍຕໍ່ແຖວໃສ່ ນໍ້າມັນຫັ້ນຕ້ອງໃຊ້ເວລາດົນສ່ວນຫຼາຍບາງປໍ້າເນາະ ຖ້າເປັນຂອງຫັ້ນນ່າ   ປຕທ ຊິ່ເພິ່ນກໍຈະມີ ໃຫ້ບໍຣິການຢູ່ແຕ່ຖ້າປໍ້າຫຍ່ອຍໆ ອອກໄປເຂົາເຈົ້າຈະຄອຍປິດ ອາດຈະອັ້ນມັນໄວ້ແນ່ໄວ້ຂາຍຕອນນໍ້າມັນຂື້ນ.”

ບັນຫາລາຄານໍ້າມັນ ທີ່ປັບຂື້ນຢ່າງຕໍ່ເນື່ອງ ຍ້ອນອີງຕາມລາຄານໍ້າມັນ ຕາມຕລາດສາກົນນັ້ນ ເປັນນຶ່ງໃນບັນຫາຄວາມຫຍຸ້ງຍາກ ແລະຄວາມບໍ່ສະດວກໃນການພັທນາ ເສຖກິຈ-ສັງຄົມພາຍໃນປະເທດແຕ່ໜ່ວຍງານ ທີ່ກ່ຽວຂ້ອງກໍຍັງບໍ່ທັນມີແນວທາງ ໃນການຫຼຸດຜ່ອນບັນຫາດັ່ງ ກ່າວຢ່າງຄັກແນ່ເທື່ອ ດັ່ງ ທ່ານ ພັນຄຳ ວິພາວັນ ນາຍົກຣັຖມົນຕຣີ ກ່າວໃນກອງປະຊຸມ ສມັຍສາມັນເທື່ອທີ່ 2 ສະພາແຫ່ງຊາດຊຸດທີ 9 ໃນວັນທີ 5 ພຶສຈິກາ 2021 ນີ້ວ່າ:

“ແຕ່ເຮົາຮູ້ກໍຕ້ອງຮັບຮຸູ້ ໂຕຢ່າງຄ່ານໍ້າມັນມັນຂື້ນ ເຮົາກໍຕ້ອງເບິ່ງວ່າສາກົນມັນຂື້ນ ບໍ່ນີ້ຊິເວົ້າວ່າຣັຖບານຄຸ້ມຄອງບໍ່ໄດ້ ມັນກໍບໍ່ແມ່ນມັນຂ້າງນອກມັນເປັນຈັ່ງຊັ້ນ ແຕ່ວ່າເວລາມັນກະທົບວ່າ ເຮົາຊິເຮັດແນວໃດປະຄັບປະຄອງເສຖກິຈເຮົາບໍ່ໃຫ້ມັນຖົດຖອຍຫຼາຍ ການປັບລາຄານໍ້າມັນຊິຕ້ອງເຮັດແນວໃດ ອັນນີ້ກໍຕ້ອງໄດ້ເບິ່ງສາກົນແລະເບິ່ງກົນໄກ ພາຍໃນເຮົາອັນນີ້ກໍຂໍໃຫ້ເຂົ້າໃຈ.”

ໃນຮອບປີ 2021 ນີ້ ກະຊວງອຸດສາຫະກັມ ແລະການຄ້າໄດ້ອອກແຈ້ງການ ກ່ຽວກັບການປັບລາຄານໍ້າມັນ ເຊື້ອໄຟໃນລາວ ຂື້ນເປັນຈຳນວນ 18 ຄັ້ງໂດຍເມື່ອ ເດືອນ ມົກຣາ 2021 ນໍ້າມັນແອັດຊັງມີລາຄາພຽງ 8,700 ກີບ ຕໍ່ລິດ, ແຕ່ມາຮອດ ວັນທີ 19 ພຶສຈິກາ 2021 ນີ້ ນໍ້າມັນແອັດຊັງທັມມະດາ ລາຄາ 13,600 ກີບ ຕໍ່ລິດ, ແອັດຊັງພິເສດລາຄາ 15,100 ກີບ ຕໍ່ລິດ ແລະ ກະຊວນລາຄາ 11,620 ກີບ ຕໍ່ລິດ. ຄົນລາວຈະຕ້ອງຈ່າຍຄ່ານໍ້າມັນເປັນເງິນ 272,000 ກີບ ຕໍ່ເດືອນ ຫຼືຄິດເປັນ 24.72% ຂອງຄ່າແຮງງານຂັ້ນຕໍ່າ ພາຍໃນປະເທດລາວ ຊຶ່ງຢູ່ປະມານ 1.1 ລ້ານກີບ ຕໍ່ເດືອນ.

ກ່ອນໜ້ານີ້ເມື່ອວັນທີ 4 ຕຸລາ ຜ່ານມາ ທ່ານວິໄລ ວົງຂະເສີມ ຮອງປະທານຄນະບໍຣິຫານງານສູນກາງສະຫະພັນກັມບານລາວຮ່ວມກັບໜ່ວຍງານທີ່ກ່ຽວຂ້ອງຈັດກອງປະຊຸມ ເພື່ອຫາລືກ່ຽວກັບການປັບປຸງຄ່າແຮງງານຂັ້ນຕໍ່າ ກໍຄືເງິນເດືອນ ຫຼືຄ່າແຮງງານຂັ້ນຕໍ່າສຸດ ທີ່ຜູ້ອອກແຮງງານທີ່ເຮັດວຽກບໍ່ເກີນ 26 ວັນຕໍ່ເດືອນ, 6 ວັນຕໍ່ສັປດາ ແລະ 8 ຊົ່ວໂມງຕໍ່ມື້ ໂດຍບໍ່ຮວມເອົາເງິນອື່ນໆ ເຊັ່ນເງິນເຮັດວຽກເພີ່ມໂມງ, ເງິນບໍາເນັດ, ເງິນຊຸກຍູ້ວຽກ, ເງິນຊຸກຍູ້ມາເຮັດວຽກ, ເງິນຄ່າອາຫານ, ຄ່າທີ່ພັກ, ຄ່າຮັບ-ສົ່ງມາວຽກ ແລະ ເງິນນະໂຍບາຍອື່ນໆ ທີ່ເປັນສວັສດິການ ຂອງຫົວໜ່ວຍແຮງງານນໍາເຂົ້າ.