ເຊັນສັນຍາ ຈັດສົ່ງຄົນງານລາວ 6 ເມືອງໃນນະຄອນຫຼວງວຽງຈັນ ໄປເກົາຫຼີໃຕ້

ໃນວັນທີ 13 ທັນວາ 2023 ທີ່ຜ່ານມາ ຍານາງ ອານຸສອນ ຄຳສິງສະຫວັດ ຫົວໜ້າກົມການຈັດຫາງານ ກະຊວງແຮງງານ ແລະ ສວັດດີການສັງຄົມ ແລະ ຄະນະໄດ້ເດີນທາງເຂົ້າຮ່ວມພີທີ ເຊັນບົດບັນທຶກຄວາມເຂົ້າໃຈ ວ່າດ້ວຍການຈັດສົ່ງຜູ້ອອກແຮງງານ ລາວໄປເຮັດວຽກຕາມຣະດູການ ຢູ່ເມືອງຄັງນຶງ ແຂວງຄັງວອນໂດ ປະເທດເກົາຫຼີໃຕ້.

ກ່ຽວກັບເຣື່ອງນີ້ ໃນໄລຍະທ້າຍເດືອນທັນວາທີ່ຜ່ານມາ ຜແນກແຮງງານ ແລະ ສວັດດີການສັງຄົມ ຢູ່ 6 ເມືອງ ພາຍໃນນະຄອນຫຼວງວຽງ ຈັນກໍໄດ້ທະຍອຍຕັ້ງຈຸດຈັດຫາງານ ໃນ ຫຼາຍເມືອງເພື່ອເປີດຮັບສະມັກຄົນງານລາວ ທີ່ສົນໃຈເດີນທາງໄປເຮັດວຽກ ກະສິກັມ ໄລຍະສັ້ນ ຢູ່ປະເທດເກົາຫຼີໃຕ້ ຕື່ມອີກ.

ດັ່ງເຈົ້າໜ້າທີ່ ທີ່ກ່ຽວຂ້ອງ ຜູ້ບໍ່ປະສົງອອກຊື່ ແລະຕຳແໜ່ງ ກ່າວຕໍ່ວິທຍຸເອເຊັຽເສຣີ ໃນວັນທີ 05 ມົກຣາ 2024 ນີ້ວ່າ:

“ເອີ ມີແຕ່ອັນນ່າ 6 ເມືອງໃນຂອງນະຄອນຫຼວງ ມີອັນນ່າເມືອງໄຊທານີ ເມືອງໄຊເສດຖາ ເມືອງສັງທອງ ເມືອງປາກງື່ມ ແລ້ວກໍເມືອງຫາດຊາຍຟອງແມ່ນແຫຼະ ແມ່ນໆ ເພິ່ນເປີດເລີຍດຽວນີ້ ເພິ່ນກຳລັງອ່າເປີດສັມພາດແລ້ວດຽວນີ້. ເອີ ບໍ່ຈຳກັດແຮງງານລາວເຮົາສົ່ງໄປ.”

ສໍາລັບຈໍານວນ ຄົນງານລາວ ເພື່ອເດີນທາງໄປເຮັດວຽກ ຢູ່ປະເທດເກົາຫຼີໃຕ້ດັ່ງກ່າວນີ້ ທາງຜູ້ປະກອບການ ແລະນາຍຈ້າງຊາວເກົາຫຼີໃຕ້ ຈະເປັນຜູ້ກຳນົດວ່າ ຕ້ອງການຄົນງານລາວຈຳນວນເທົ່າໃດ ສ່ວນທາງການລາວ ແລະພາກສ່ວນທີ່ກ່ຽວຂ້ອງ ຈະເປັນຜູ້ດຳເນີນການເປີດຮັບສມັກ ແລະຊ່ອຍດຳເນີນການຄັດເລືອກ ຄົນງານລາວທີ່ມີຄຸນສົມບັດເໝາະສົມ.

ດັ່ງຜູ້ທີ່ຮູ້ກ່ຽວກັບເຣື່ອງນີ້ນາງນຶ່ງ ກ່າວຕໍ່ວິທຍຸເອເຊັຽເສຣີ ໃນມື້ດຽວກັນນີ້ວ່າ:

“ເອີ, ໂຕນີ້ກໍບໍ່ຮູ້ຄືກັນຫັ້ນແຫຼະ ເພິ່ນຈະເອົາເທົ່າໃດກໍແລ້ວແຕ່ ທາງອໍເດີ້. ທາງນາຍຈ້າງ ມາຜ່ານທາງເມືອງມາແມ່ນໆ ມັນກໍຕ້ອງມີໂກຕ້າ. ເອີ, ເພິ່ນກໍຈະກຳລັງເຣີ່ມເຣີ່ມຈັດສົ່ງ.”

ທີ່ຜ່ານມາທາງການລາວ ແລະ ທາງການເກົາຫຼີໃຕ້ໄດ້ຮ່ວມເຊັນສັນຍາ ເພື່ອຈັດສົ່ງຄົນງານລາວໄປເຮັດວຽກໄລຍະສັ້ນ ຢູ່ເກົາຫຼີໃຕ້ ໄດ້ຢ່າງຕໍ່ເນື່ອງນັບແຕ່ປີ 2022 ເປັນຕົ້ນມາ ແລະມາຮອດປັດຈຸບັນ ຍັງຄົງມີຊາວລາວ ອີກຈຳນວນຫຼາຍ ໂດຍສະເພາະຊາວໜຸ່ມ ສົນໃຈເດີນທາງໄປເຮັດວຽກ ຢູ່ເກົາຫຼີໃຕ້.

ດັ່ງຊາວນະຄອນຫຼວງວຽງຈັນ ທີ່ຕ້ອງການເດີນທາງ ໄປເຮັດວຽກຢູ່ເກົາຫຼີໃຕ້ກ່າວວ່າ:

“ເອີ, ສົນໃຈຢູ່ມີຄົນຢາກໄປຫຼາຍຄົນ ສ່ວນຫຼາຍຈະເປັນນັກຮຽນນີ້ແຫຼະ ທີ່ຈົບມາໃໝ່ສ່ວນຫຼາຍກໍອາຍຸ 18 ປີຂຶ້ນໄປຫັ້ນແຫຼະ. ສ່ວນຫຼາຍເກົາຫຼີກໍເປັນວຽກກະສິກັມ. ເຄີຍແລ້ວໆ ພໍດີນ້ອງເຄີຍລົງຊື່ໄວ້ ແຕ່ວ່າທາງບໍຣິສັດເຂົາວ່າ ຖ້າເອີຖ້າມີວຽກຍາມໃດແລ້ວຊິຕິດຕໍ່ຫາ. ກຸ້ມຢູ່. ຖ້າໄດ້ໄປກໍກຸ້ມຢູ່ ລາຄາມັນປະມານ 30 ປາຍລ້ານຫັ້ນແຫຼະ.”

ທ່ານກ່າວຕື່ມວ່າ ເຖິງແມ່ນວ່າ ໃນຂໍ້ກໍານົດຂອງກະຊວງແຮງງານ ແລະ ສວັດດີການສັງຄົມ ຈະລະບຸວ່າຜູ້ທີ່ສາມາດ ສະມັກເພື່ອໄປເຮັດວຽກ ໄລຍະສັ້ນ ຢູ່ປະເທດເກົາຫຼີໃຕ້ ໄດ້ນັ້ນຈະຕ້ອງມີອາຍຸ 25-50 ປີ ແຕ່ຊາວໜຸ່ມລາວ ບາງສ່ວນທີ່ອາຍຸຕໍ່າກ່ວາເກນ ທີ່ກຳນົດກໍເລີ້ມສົນໃຈ ແລະຊອກຫາຂໍ້ມູນ ທີ່ກ່ຽວຂ້ອງເພື່ອເດີນທາງໄປເຮັດວຽກ ໃນລັກສະນະດັ່ງກ່າວນີ້ ເນື່ອງຈາກຄ່າຈ້າງແຮງງານຂັ້ນພື້ນຖານ ພາຍໃນປະເທດ ທີ່ທາງການລາວປັບຂຶ້ນ ຈາກ 1.3 ລ້ານກີບ ເປັນ 1.6 ລ້ານກີບ ໃນຄັ້ງຫຼ້າສຸດ ເດືອນຕຸລາ 2023 ຜ່ານມາເຊິ່ງຍັງເປັນອັດຕຣາ ຂ້ອນຂ້າງຕໍ່າ ແລະ ບໍ່ສອດຄ່ອງກັບຄ່າຄອງຊີບ ໃນປັດຈຸບັນ.

ສໍາລັບຄົນງານລາວ ທີ່ເດີນທາງເປັນເຮັດວຽກຢູ່ເກົາຫຼີໃຕ້ ແບບໄລຍະສັ້ນ ຜູ້ອອກແຮງງານຈະໄດ້ຮັບເງິນເດືອນ ສະເລັ່ຍປະມານ 27.6 ລ້ານກີບ/ເດືອນ ເປັນໄລຍະເວລາແຕ່ພຽງ 5 ເດືອນເທົ່ານັ້ນ ເຊິ່ງບໍ່ທັນກຸ້ມທຶນ ເນື່ອງຈາກ ຕ້ອງເສັຍຄ່າໃຊ້ຈ່າຍ ໃນການແລ່ນເອກະສານຕ່າງໆ ເປັນຈຳນວນຫຼາຍ.

ດັ່ງຊາວນະຄອນຫຼວງວຽງຈັນ ທີ່ສົນໃຈເດີນທາງໄປເຮັດວຽກ ຢູ່ເກົາຫຼີໃຕ້ແບບໄລຍະຍາວກ່າວວ່າ:

“ນ້ອງບໍ່ຄ່ອຍສົນໃຈ ວຽກໄລຍະສັ້ນດອກ ເພາະວ່າ ໄລຍະສັ້ນ. ໄປແລ້ວມັນຕ້ອງກັບມາຫັ້ນນ່າ ໄປກໍຢາກໄປແລ້ວປະມານ 3-4 ປີ ຄ່ອຍກັບມາຫັ້ນນ່າ ກໍໄປລອງສມັກ ແລ້ວແຕ່ວ່າອີກ 2 ເດືອນ ບໍ່ຈຶ່ງຈະໄດ້ໄປເພາະວ່າ ສອບເສັງຊ່າງເນາະ ໄປແບບເປັນຊ່າງເຊື່ອມເນາະ ປະມານ 5 ເດືອນ, 6. ແລ້ວຈຶ່ງຄ່ອຍໄດ້ໄປຫັ້ນນ່າການເຮັດວຽກຢູ່ແລ້ວມັນກໍມີຫຼາຍຢູ່ແຕ່ວ່າຄ່າຄອງຊີບ ມັນສູງເງິນຕົກຕໍ່າ ເພິ່ນກໍບໍ່ຢາກເຮັດຫັ້ນແຫຼະ.”

ອີງຕາມການຣາຍງານ ຂອງກະຊວງແຮງງານ ແລະສວັດດີການສັງຄົມ ລະບຸວ່າການເດີນທາງໄປເຮັດວຽກໄລຍະສັ້ນ ຢູ່ປະເທດເກົາຫຼີໃຕ້ ຕລອດໄລຍະການເຮັດວຽກ 5 ເດືອນຈະໄດ້ຮັບຄ່າຈ້າງ ແຮງງານລວມເປັນເງິນ 7,850 ໂດລ້າຣ໌ສະຫະຣັຖ ຫຼື 141 ລ້ານກີບເຊິ່ງ ສະເລັ່ຍເດືອນລະ 28,2 ລ້ານກີບ ໂດຍບໍ່ລວມຄ່າເຮັດວຽກ ລ່ວງເວລາ. ສຳລັບຄ່າໃຊ້ຈ່າຍອື່ນໆ ເປັນເງິນປະມານ 2,780 ໂດລ້າຣ໌ສະຫະຣັຖ ຫຼືປະມານ 50 ລ້ານກີບແມ່ນຜູ້ອອກ ແຮງງານຈະຕ້ອງເປັນຜູ້ຮັບຜິດຊອບ ທັງໝົດ ອີກທັງຜູ້ອອກແຮງງານ ຈຳເປັນຕ້ອງໄດ້ວາງເງິນມັດຈຳອິກ 3,000 ໂດລ້າຣ໌ ຫຼື ໃບຕາດິນ ເພື່ອປ້ອງກັນການລົບໜີ ຈາກນາຍຈ້າງ.

ຄົນງານລາວອີກຈໍານວນນຶ່ງ ຍັງຄົງສົນໃຈໄປເຮັດວຽກ ຢູ່ໄທຍຫຼາຍກ່ອນ ຍ້ອນເດີນທາງສະດວກ ເນື່ອງຈາກມີຊາຍແດນຕິດຈອດກັນ ແລະສາມາດເດີນທາງ ກັບຍັງປະເທດລາວໄດ້ ໃນໄລຍະບຸນປະເພນີຕ່າງໆ.

ດັ່ງຄົນງານລາວ ທີ່ສົນໃຈເດິນທາງໄປເຮັດວຽກ ຢູ່ຕ່າງປະເທດ ກ່າວວ່າ:

“ຢູ່ເກົາຫຼີບໍ່ຊ່ວງນີ້ຢູ່ກຸ້ມ ກໍບໍ່ຄ່ອຍເຫັນຜູ້ໃດອັນນັ້ນແລ້ວນ່າ. ມີແຕ່ສ່ວນຫຼາຍຂະເຈົ້າຢາກໄປໄທຍ ໃກ້ໆນີ້. ມີຊ່ວງນຶ່ງເຮົາກໍຍັງເຄີຍທັກໄປນໍາບໍຣິສັດ ທີ່ວ່າເພິ່ນໂພສລົງເຟສ ແຕ່ວ່າຊ່ວງນີ້ເຫັນມິດໆວ່າຊັ້ນເນາະ. ບໍ່ຄ່ອຍເຫັນໃຜຖາມ. ເອີ ກໍບໍ່ແນ່ໃຈຄືກັນເພາະວ່າ ບໍ່ໄດ້ຕິດຕາມ ທາງແຟນເພຈເພິ່ນດົນແລ້ວຫັ້ນນ່າ. ຕິດຕາມຢູ່ທາງໄທຍຢູ່ຫັ້ນແຫຼະ ແມ່ນມັນໃກ້ກັນແດ່ແບບເວລາ ເຮົາໄດ້ພັກວຽກຍາວ. ເອີ, ອາດຊິໄດ້ເຂົ້າມາຢ້ຽມບ້ານ ອິຫຍັງແບບໄປມາສະດວກ.”

ນັບແຕ່ປີ 2022 ມາຮອດປັດຈຸບັນ ກະຊວງແຮງງານ ແລະສວັດດີການສັງຄົມ ໄດ້ລົງນາມສັນຍາຮ່ວມມືດ້ານການຈັດສົ່ງ ຄົນງານລາວໄປເຮັດວຽກ ຕາມຣະດູການຮ່ວມກັບ 52 ເມືອງ ຂອງປະເທດເກົາຫຼີໃຕ້ແລະສາມາດຈັດສົ່ງຄົນງານລາວ ໄປເຮັດວຽກໃນລະບົບດັ່ງກ່າວ ແລ້ວ 3,000 ກ່ວາຄົນ ໂດຍສະເພາະຜູ້ທີ່ອາໄສ ຢູ່ໃນຂົງເຂດຊົນນະບົດ ເພື່ອໃຫ້ພວກເຂົາເຈົ້າມີໂອກາດ ໃນການເຂົ້າເຖິງການພັທນາສີມືແຮງງານ ແລະນໍາໃຊ້ເທັກໂນໂລຈີ ທີ່ທັນສໄມ ໃນກາຜລິດກະສິກັມ.