ຊັພສິນບໍຣິສັດພີເອັສ ຖືກເລັ່ງ ປະມູນຂາຍ

ໄຊຍາ
2018-02-22
ອີແມວລ໌
ຄໍາເຫັນ
Share
ພິມ
ປະຊາຊົນ ທີ່ເປັນລູກຄ້າປະມານ 500 ຄົນ ຂອງບໍຣິສັດພີເອັສ ສົ່ງເສີມກະສິກັມ ແລະ ອຸດສາຫະກັມ ຄົບວົງຈອນ ຂາເຂົ້າ-ຂາອອກ ພາກັນໂຮມຊຸມນຸມ ເພື່ອທວງເງິນຄືນ ຈາກບໍຣິສັດ.
ປະຊາຊົນ ທີ່ເປັນລູກຄ້າປະມານ 500 ຄົນ ຂອງບໍຣິສັດພີເອັສ ສົ່ງເສີມກະສິກັມ ແລະ ອຸດສາຫະກັມ ຄົບວົງຈອນ ຂາເຂົ້າ-ຂາອອກ ພາກັນໂຮມຊຸມນຸມ ເພື່ອທວງເງິນຄືນ ຈາກບໍຣິສັດ.
RFA

ຄນະຮັບຜິດຊອບສະເພາະກິດ ບໍຣິສັດພີເອັສ ເລັ່ງປະມູນຂາຍຊັບສິນ ທີ່ຍັງຄ້າງສາງ ພາຍໃນບໍຣິສັດພີເອັສ ໂດຍສະເພາະ ນໍ້າດື່ມ ແລະ ເຄື່ອງດື່ມຕ່າງໆ ທີ່ຍັງຄ້າງສາງເປັນຈຳນວນຫຼາຍ ເພື່ອເລັ່ງເກັບໂຮມເງິນ ແລ້ວນໍາມາສົ່ງຄືນໃຫ້ ສະມາຊິກທີ່ເປັນ ຜູ້ເສັຽຫາຍທົ່ວປະເທດ ລວມມູນຄ່າ 800 ຕື້ກີບ ທີ່ຈະຕ້ອງຈ່າຍຄືນໃຫ້ ປະຊາຊົນ. ດັ່ງເຈົ້າໜ້າທີ່ຄນະຮັບຜິດຊອບ ສະເພາະກິດ ບໍຣິສັດພີເອັສ ກ່າວຕໍ່ ວິທຍຸ ເອເຊັຽເສຣີ ໃນວັນທີ 20 ກຸມພາ ນີ້ວ່າ:

"ມີແຕ່ວ່າເພິ່ນຂາຍຊັບສິນ ອັນໃດທີ່ວ່າພໍເປັນເງິນຫັ້ນເນາະ ເພື່ອເກັບທ້ອນໂຮມ ຈະສົ່ງປະຊາຊົນຄືນວ່າຈັ່ງຊັ້ນ ຕອນນີ້ກໍ່ຄື ຂາຍເຂົ້າ ປະມູນຂາຍເຂົ້າແລ້ວແລ້ວ ຫັ້ນນ່າ ປັດຈຸບັນນີ້ຄືຊິປະມູນຂາຍ ນໍ້າດື່ມທີ່ວ່າ ເພິ່ນໄດ້ຜລິດປະໄວ້ ໃນສາງ."

ປັດຈຸບັນເຈົ້າໜ້າທີ່ສະເພາະກິດ ບໍຣິສັດພີເອັສ ໄດ້ແຈ້ງການເພີ່ມຕື່ມໄປແລ້ວວ່າ ຈະເປີດການປະມູນ ຂາຍນໍ້າດື່ມ ແລະເຄື່ອງດື່ມຕ່າງໆ ໂດຍຈະເລີ້ມເປີດ ຊອງປະມູນ ໃນວັນທີ 28 ກຸມພາ 2018 ເປັນຕົ້ນໄປ.

ກໍຣະນີທີ່ມີຣາຍງານວ່າ ເຈົ້າໜ້າທີ່ສະເພາະກິດ ບໍຣິສັດພີເອັສ ຈະນໍາຣົດຈຳນວນນຶ່ງ ຊຶ່ງເປັນຊັບສິນຂອງ ບໍຣິສັດ ພີເອັສ ອອກມາປະມູນ ຂາຍນັ້ນ ຂນະນີ້່ຍັງບໍ່ມີມະຕິຈາກ ຄນະຮັບຜິດຊອບສະເພາະກິດ ເນື່ອງຈາກຣົດທຸກຄັນ ຍັງຄ້າງສຳລະສົ່ງງວດ ທີ່ໄດ້ຖືກອາຍັດໄວ້ ກັບ ບໍຣິສັດ ຈັດ Finance ທີ່ນະຄອນຫຼວງວຽງຈັນ. ດັ່ງເຈົ້າໜ້າທີ່ ຄນະຮັບຜິດຊອບ ສະເພາະກິດ ບໍຣິສັດ ພີເອັສ ກ່າວຕື່ມວ່າ:

"ຣົດນີ້ກໍ່ຍັງບໍ່ຮູ້ວ່າເພິ່ນຊິເຮັດຈັ່ງໃດເນາະ ທາງຄນະຮັບຜິດຊອບ ເພິ່ນຊິເຮັດແນວໃດ ຍັງບໍ່ຮູ້ເພາະວ່າຣົດນີ້ ໄດ້ຍິນມາວ່າແມ່ນ ໄປຈັດ Finance ໄວ້ທຸກຄັນວ່າຊັ້ນ ເພິ່ນກໍ່ຍັງອາຍັດໄວ້ນໍາ ບໍຣິສັດຫັ້ນແຫລະ ຍັງບໍ່ທັນໄດ້ເຄື່ອນໄຫວ ຫຍັງເທື່ອ."

ລະຍະຜ່ານມາເຈົ້າໜ້າທີ່ສະເພາະກິດ ບໍຣິສັດພີເອັສ ກໍ່ຍຶດຊັບສິນສ່ວນຕົວ ປະເພດໃບຢັ້ງຢືນທີ່ດິນ ເພັດແລະຄຳ ໄດ້ຈຳນວນນຶ່ງ ຊຶ່ງເປັນ ຊັບສິນຂອງ ທ້າວ ປໍເຮີ້ ແລະ ນາງສຸກນາລີ ເທບສີເມືອງ ປະທານ ບໍຣິສັດ ພີເອັສ ແຕ່ຍັງບໍ່ໄດ້ປະເມີນລາຄາ.

ປັຈຈຸບັນຈະຕ້ອງເລັ່ງເອົາເຄື່ອງຂອງຕ່າງໆ ພາຍໃນບໍຣິສັດ ຂາຍໃຫ້ໝົດກ່ອນທີ່ຈະໝົດອາຍຸ ໂດຍຄາດວ່າ ອາດຈະຕ້ອງໃຊ້ເວລາ ເຖິງກາງປີ 2018 ຄນະຮັບຜິດຊອບສະເພາະກິດ ຈະຈັດສັນຄ່າເສັຽຫາຍທັງໝົດ ແລະຄືນເງິນໃຫ້ ສະມາຊິກ ພີເອັສ ໃຫ້ສຳເຣັດ.

ຄໍາເຫັນ (1)
Share

(

I pray God that the sell of PS property can cover your loss. Amen


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Feb 26, 2018 05:25 AM

ເຕັມຫນ້າ