ຂ.ອັດຕະປື ຈະເປີດປະມູນຂາຍໄມ້ ເດືອນນີ້

ໄຊຍາ
2019-05-06
ອີແມວລ໌
ຄໍາເຫັນ
Share
ພິມ
ໄມ້ທີ່ຖືກຢຶດໄດ້ ຢູ່ດ່ານພູເກືອ ຖືກນຳມາເກັບໄວ້ໃນສາງ ຂອງຜແນກ ອຸດສາຫະກຳ ແລະ ການຄ້າ ແຂວງອັດຕະປື
ໄມ້ທີ່ຖືກຢຶດໄດ້ ຢູ່ດ່ານພູເກືອ ຖືກນຳມາເກັບໄວ້ໃນສາງ ຂອງຜແນກ ອຸດສາຫະກຳ ແລະ ການຄ້າ ແຂວງອັດຕະປື
ຖ່າຍໂດຍ: ຜູ້ຟັງ ວິທຍຸເອເຊັຽເສຣີ 16/6/2017

ແຂວງອັດຕະປື ຈະເປີດປະມູນຂາຍໄມ້ທີ່ຍຶດໄດ້ພາຍໃນແຂວງ ຈຳນວນ 4,700 ທ່ອນ ບໍຣິມາດ 88 ແມັດກ້ອນ ໃນວັນທີ 16 ພຶສພານີ້ ທີ່ ຫ້ອງປະຊຸມ ຜແນກອຸດສາຫະກັມ ແລະ ການຄ້າແຂວງ, ດັ່ງເຈົ້າໜ້າທີ່ ຄນະຮັບຜິດຊອບ ປະມູນໄມ້ຍຶດໄດ້ ກ່າວຕໍ່ວິທຍຸ ເອເຊັຽເສຣີ ວັນທີ 6 ພຶສພາ ວ່າ:

“ໄມ້ຢູ່ສາງເຮົານີ້ແຫຼະ 80 ປາຍ ແມັດກ້ອນ ໄມ້ດູ່ແນ ມັນເປັນແປຮູບແດ່ຈຳນວນນຶ່ງ ຊຸມເປັນຕັບແດ່ ກໍມີ, 15 ນີ້ແຫຼະ ເຮົາປິດຊອງປະມູນ ຂາຍໄມ້ຢຶດ ຂອງແຂວງເລີຍ ເຮົາຢຶດໄວ້ ທ້ອນໂຮມໄວ້  ທ້ອນໂຮມໄວ້ ແລ້ວກໍມາເປີດປະມູນຂາຍ.”

ທ່ານເວົ້າຕື່ມວ່າ ຜູ້ທີ່ຈະເຂົ້າຮ່ວມປະມູນໄມ້ ຈະຕ້ອງຊື້ຊອງປະມູນ ຣາຄາ 1 ລ້ານກີບ ຕໍ່ຊອງ. ໄມ້ທີ່ຈະນໍາມາປະມູນເທື່ອນີ້ ເປັນໄມ້ດູ່ ຄຸນນະພາບດີ ທີ່ແຂວງ ສາມາດກວດຍຶດ ຈາກກຸ່ມລັກຕັດໄມ້ ຕາມແນວຊາຍແດນ ລາວ-ວຽດນາມ ແລະ ເຂດປ່າສງວນ ດົງອຳພັນ ເມືອງ ສະໜາມໄຊ ໃນໄລຍະປີຜ່ານມາ ສ່ວນເງິນທີ່ປະມູນໄມ້ທັງໝົດ ຈະເກັບເຂົ້າຄັງແຂວງ.

ການປະມູນໄມ້ເທື່ອນີ້ ຖືເປັນເທື່ອທຳອິດ ຂອງປີນີ້ ເຊີ່ງໃນປີ 2018 ຜ່ານມາ ມີການປະມູນ 3 ເທື່ອ ສ່ວນໃຫຍ່ກໍເປັນໄມ້ ທີ່ຖືກຍຶດໄດ້ ຕາມເຂດແນວຊາຍແດນ ລາວ-ວຽດນາມ ໃນນັ້ນ ເປັນການປະມູນໄມ້ ທີ່ຍຶດໄດ້ ຈາກຣົດບັນທຸກ 27 ຄັນ ທີ່ໜ້າດ່ານພູເກືອນັ້ນນຳ.

ຕໍ່ການປະມູນ ໃນມື້ດຽວກັນ ເຈົ້າໜ້າທີ່ຜແນກກະສິກັມ ແລະ ປ່າໄມ້ ເວົ້າວ່າ ນັບແຕ່ມີຄຳສັ່ງເລຂທີ 15/ນຍ ເຣື່ອງການເຂັ້ມງວດ ໃນການ ຄວບຄຸມ ແລະ ກວດກາ ການຂຸດຄົ້ນໄມ້ ເຄື່ອນຍ້າຍໄມ້ ແລະ ທຸຣະກິຈໄມ້ ທາງແຂວງອັດຕະປື ກໍໄດ້ເອົາໃຈໃສ່ຄຸ້ມຄອງ ແລະ ໂຄສະນາ ໃຫ້ປະຊາຊົນ ຫ້າມຕັດໄມ້ ແລະ ບຸກລຸກປ່າ ແລ້ວຫັນມາຟື້ນຟູປ່າໄມ້ ເຊິ່ງກໍຍັງບໍ່ປະສົບຜົລສຳເຣັດ ເທົ່າທີ່ຄວນ.

“ແມ່ນແຫຼະ ໃຫ້ຂະເຈົ້າປົກປັກຮັກສາເຂດທີ່ວ່າ ແຕ່ລະເມືອງທີ່ວ່າຕິດພັນກັບປ່າ 3 ປະເພດຫັ້ນນ້າ ອັນນີ້ແຫຼະ ພວກເຮົາລິເຣີ້ມປະຕິບັດ ເຣີ້ມນັບແຕ່ປູກແລ້ວກໍສິເວົ້າເຣື່ອງ ການຟື້ນຟູອີ່ຫຍັງໂຕນັ້ນ.”

ນອກຈາກ ມາຕການຄຸ້ມຄອງປ່າ ພາຍໃນແຂວງແລ້ວ ຜ່ານມາແຂວງອັດຕະປື ກໍມີມາຕການຮ່ວມມື ກັບວຽດນາມ ໂດຍໃຫ້ເຈົ້າໜ້າທີ່ ທະຫານ ທັງສອງປະເທສ ເຂັ້ມງວດກວດກາ ປ່າໄມ້ ໃນພຶື້ນທີ່ຊາຍແດນ ຢ່າງເຂັ້ມງວດ.

ປັດຈຸບັນ ພື້ນທີ່ປ່າບໍຣິເວນຊາຍແດນ ແຂວງອັດຕະປື-ແຂວງກອນຕຸນ ຂອງວຽດນາມ ຖືວ່າເປັນຈຸດສ່ຽງ ໃນການລັກເຂົ້າມາຕັດໄມ້ ຂອງກຸ່ມ ນາຍທຶນວຽດນາມ ຍ້ອນພື້ນທີ່ບ່ອນນັ້ນ ບໍ່ມີເຈົ້າໜ້າທີ່ປະຈຳການ ບໍ່ມີເສັ້ນທາງເຂົ້າເຖິງ.

ເມື່ອປີ 2017 ເຈົ້າໜ້າທີ່ກວດປ່າໄມ້ ແຂວງອັດຕະປື ກວດຍຶດໄມ້ດູ່ຄຸນນະພາບດີ 300 ປາຍທ່ອນ ພ້ອມເລື່ອຍຕັດໄມ້ ແລະ ຣົດບັນທຸກ ຂົນໄມ້ ຈາກກຸ່ມນາຍທຶນວຽດນາມ ທີ່ລັກເຂົ້າມາຕັດໄມ້.

ເຕັມຫນ້າ