ບໍຣິສັດບໍ່ທອງສືບຕໍ່ ສ້າງ ເຂື່ອນນໍ້າເອົ້າ

ໄມຊູລີ
2018-05-08
ອີແມວລ໌
ຄໍາເຫັນ
Share
ພິມ
ເຂື່ອນນໍ້າເອົ້າທີ່ແຕກ ເມື່ອເດືອນກັນຍາ ວັນທີ 11 2017
ເຂື່ອນນໍ້າເອົ້າທີ່ແຕກ ເມື່ອເດືອນກັນຍາ ວັນທີ 11 2017
Screen captured

ນັບແຕ່ເດືອນກຸມພາ 2018 ຈົນຮອດປັຈຈຸບັນ ບໍຣິສັດບໍ່ທອງ Inter Group ໄດ້ສືບຕໍ່ການກໍ່ສ້າງເຂື່ອນນໍ້າເອົ້າ ຄືນໃໝ່ ອີກເທື່ອນື່ງ ຢູ່ ເມືອງຜາໄຊ ແຂວງຊຽງຂວາງ ໂດຍຜ່ານການ ອອກແບບກໍ່ສ້າງໃໝ່ ສ່ວນຕົວເຂື່ອນ ບ່ອນທີ່ເປ່ເພແຕກຜຸພັງ ເມື່ອປີກາຍ ຈະບໍ່ມີການ ສ້ອມແປງຄືໃໝ່. ດັ່ງເຈົ້າໜ້າທີ່ ຜແນກພລັງງານແລະບໍ່ແຮ່ ແຂວງຊຽງຂວາງ ກ່າວຕໍ່ວິທຍຸເອເຊັຍເສຣີ ໃນວັນທີ່ 8 ພຶສພາ ນີ້ວ່າ:

“ກໍາລັງກໍ່ສ້າງເນາະ ກໍາລັງເຮັດອອກແບ ຄອງເໝືອງໃໝ່ ສ້ອມແປງອ່າງເກັບນໍ້າໃໝ່ ເນາະແລ້ວກໍ ເຮັດຄອງເໝືອງລົງໄປຫາ ປະຕູ ລະບາຍນໍ້າ ຕຽມປ່ອຍລົງ ກົນຈັກຫັ້ນ ຫາກໍເຣີ້ມ ເຮັດເດືອນສອງມານີ້ແຫລະ ອອກແບບໃໝ່ເລີຍ ໂຕເກົ່າມັນຫັກ ແລ້ວກໍປະເລີຍ.”

ເຈົ້າໜ້າທີ່ກ່າວຕຶ່ມວ່າ ການກໍ່ສ້າງ ເຂື່ອນນໍ້າເອົ້າ ທຸກມື້ນີ້ ບໍ່ຄ່ອຍຕໍ່ເນື່ອງເທົ່າໃດ ເພາະວ່າເຣີ້ມເຂົ້າຣະດູ ຝົນແລ້ວ ມື້ໃດຝົນຕົກ ກໍບໍ່ສາມາດ ກໍ່ສ້າງແລະບວກໃສ່ ຈໍານວນຄົນງານກໍ່ສ້າງ ກໍມີນ້ອຍບໍ່ກາຍ 100 ຄົນ. ຢ່າງໃດກໍຕາມໂຄງການສ້າງເຂື່ອນນໍ້າເອົ້າ ຖືກເລື່ອນໄປໃຫ້ສໍາເຣັດ ພາຍໃນ ປີ 2019, ຈາກແຕ່ເດີມມີແຜນ ຈະສ້າງສໍາເຣັດ ແລະເປິດການຜລິດ ພາຍໃນປີ 2018 ນີ້.

ສໍາລັບເຂື່ອນນໍ້າງຽບ 2 ຢູ່ເມືອງຜາໄຊ ຊຶ່ງໄດ້ຢຸດປັ່ນໄຟ ມາແຕ່ເດືອນກັນຍາ ຍ້ອນເຂື່ອນປັ່ນໄຟ ໄດ້ຮັບຜົນກະທົບຈາກເຂື່ອນນໍ້າເອົ້າ ແຕກນັ້ນ ຫລ້າສຸດນີ້ ກໍໄດ້ກັບມາປັ່ນໄຟ ຜລິດໄຟຟ້າ ຕາມປົກກະຕິແລ້ວ.

ສໍາລັບການຟື້ນຟູເນື້ອທີ່ ທີ່ທໍາການຜລິດ ຢູ່ເມືອງທ່າໂທມ ແຂວງໄຊສົມບຸນ ທີ່ໄດ້ຮັບຄວາມເສັຍຫາຍ ຈາກເຂື່ອນນໍ້າເອົ້າ ແຕກນັ້ນ ປັຈຈຸບັນ ໄດ້ສໍາເຣັດໄປແລ້ວ ກອງຂິ້ຕົມ ທີ່ຖົມດິນນາ ຊາວບ້ານ ກໍຖຶກຈົກ ອອກໄປໝົດແລ້ວ ແຕ່ເດືອນຜ່ານມາ ແຕ່ການຊົດເຊີຍ ຄ່າເສັຍຫາຍ ຂອງບໍຣິສັດ Inter Groups ໃຫ້ປະຊາຊົນ ປະມານ 60 ຄອບຄົວ ນັ້ນຍັງບໍ່ມີຫຍັງຄຶບໜ້າເທື່ອ ປະຊາຊົນ ກໍຍັງລໍຖ້າຢູ່.

ເຕັມຫນ້າ