ຈີນລົງທຶນປູກພືດອື່ນ ແທນ ປູກກ້ວຍ

ໄຊຍາ
2019-03-12
ອີແມວລ໌
ຄໍາເຫັນ
Share
ພິມ
ຕລາດກະສິກັມ ຢູ່ແຂວງຊຽງຂວາງ ທີ່ມີພືດຜົລປູກ ຈາກ ສວນພູຄໍາ ສົ່ງເຂົ້າມາຈໍາໜ່າຍ
ຕລາດກະສິກັມ ຢູ່ແຂວງຊຽງຂວາງ ທີ່ມີພືດຜົລປູກ ຈາກ ສວນພູຄໍາ ສົ່ງເຂົ້າມາຈໍາໜ່າຍ
ຮູບພາບຈາກ : ນັກຂ່າວພົລເມືອງ

ຢູ່ແຂວງຊຽງຂວາງ ນັກທຸຣະກິດຈີນ ເຂົ້າມາລົງທຶນປູກພືດ ເພື່ອການຄ້າ ແທນການປູກກ້ວຍເຖີງ 700 ເຮັກຕາ ເຊັ່ນວ່າປູກໝາກຖົ່ວ, ສາລີ, ຢາງພາຣາ ແລະ ຊາ. ອີງຕາມຄໍາເວົ້າຂອງເຈົ້າໜ້າທີ່ ຜແນກກະສິກັມ ແລະປ່າໄມ້ ແຂວງຊຽງຂວາງ ໃຫ້ສັມພາດຕໍ່ ວິທຍຸເອເຊັຍເສຣີ ໃນ ມື້ວັນທີ 11 ມິນາ ນີ້:

"ທາງດ້ານການປູກພືດຜັກອື່ນໆ ກໍມີແຕ່ພາກສ່ວນຈີນມາລົງທຶນ, ຈີນມາລົງທຶນເຂົາກໍຮັບໃຊ້ຢູ່ໃນຄົນຈີນ, ບັນດາໂຄງການກໍ່ສ້າງໄຟຟ້າເບາະ ກັມມະກອນຂອງຈີນທັງນັ້ນແຫລະ ເວົ້າຊັ້ນສະ ເອົາມາຈໍາໜ່າຍຕລາດແທ້ກໍໜ້ອຍ."

ທ່ານເວົ້າຕື່ມວ່າ ເມື່ອກ່ອນມີຄົນຈີນ ເຂົ້າມາປູກກ້ວຍຢູ່ເມືອງຄໍາ ແລະ ເມືອງແປກ ເກືອບເຖິງ 300 ເຮັກຕາ ແຕ່ຖືກສັ່ງໃຫ້ໂຈະ ເມື່ອປີ 2016 ຍ້ອນມີການໃຊ້ສານເຄມີຫລາຍ ເຮັດໃຫ້ເກີດຜົລກະທົບ ຕໍ່ສິ່ງແວດລ້ອມ. ຫລັງຈາກນັ້ນ ທາງການແຂວງກໍດຶງ ເອົານັກລົງທຶນຈີນ ເຂົ້າມາປູກພືດແນວອື່ນແທນ. ປັດຈຸບັນ ໃນທົ່ວແຂວງ ພວກເຂົາເຊົ່າທີ່ດິນປູກພືດ ໄປແລ້ວເກືອບເຖິງ 700 ເຮັກຕາ.

ແຕ່ສໍາລັບທຸຣະກິດປະເພດອື່ນ ແມ່ນຍັງມີຄວາມສົນໃຈ ທີ່ຈະເຂົ້າມາລົງທຶນ ຢູ່ແຂວງນີ້ໜ້ອຍຢູ່ ຍ້ອນພວກເຂົາເຈົ້າຄິດວ່າ ຍັງມີຄວາມສ່ຽງຕໍ່ ການລົງທຶນຫລາຍ ເປັນຕົ້ນເຣຶ່ອງ ຕລາດຮອງຮັບຜົລຜລິດ ທີ່ຍັງບໍ່ມີຫລາຍ ຂນະທີ່ຕົ້ນທຶນການຜລິດ ຍັງສູງ ແລະການຂົນສົ່ງຍັງບໍ່ສະດວກ ຍ້ອນຫົນທາງບໍ່ດີ:

"ກະສິກັມນີ້ ກໍແມ່ນຫລາຍຄົນມາລົງທຶນຢູ່, ແຕ່ຍັງມີຄວາມສ່ຽງ ຂະເຈົ້າກໍຢຸດໆຢ່ອນໆ ເອີ ແຕ່ກ່ອນມີວ່າ ເມື່ອກ່ອນສວນກ້ວຍ ຢູ່ທາງ ເມືອງຄໍາ ຄັບຄາໝາແໜ້ນ."

ຜົລຜລິດພາຍໃນແຂວງ ນອກຈາກຈະສົ່ງຂາຍໃຫ້ຄົນງານຈີນ ຢູ່ລາວແລ້ວ ບໍຣິສັດຈີນ ຍັງສົ່ງຜົລຜລິດກະສິກັມຂອງຕົນ ໄປຂາຍຢູ່ ປະເທສຈີນ ຜ່ານດ່ານສາກົນບໍ່ເຕັນ ແຂວງຫລວງນໍ້າທາ, ບໍ່ຂາຍຕາມຕລາດ ແລະ ບໍ່ສົ່ງໄປຂາຍຕ່າງແຂວງ ຂອງລາວ. ປັດຈຸບັນ ຢູ່ ແຂວງຊຽງຂວາງ ຈີນລົງທຶນດ້ານກະສິກັມ ຫລາຍກວ່າ 10 ໂຄງການ ໂດຍບໍ່ນັບໂຄງການລົງທຶນ ດ້ານອື່ນໆ ເປັນຕົ້ນເຂື່ອນໄຟຟ້າ ແລະການຂຸດຄົ້ນບໍ່ແຮ່ ເຂົ້ານໍາ.

ເຕັມຫນ້າ