ກະຊວງການເງິນລາວວ່າ ເສຖກິດ ຈະຂຍາຍ

ຈໍາປາທອງ
2019-01-10
ອີແມວລ໌
ຄໍາເຫັນ
Share
ພິມ
ກະຊວງການເງິນ ສປປລ ທີ່ ນະຄອນຫຼວງວຽງຈັນ
ກະຊວງການເງິນ ສປປລ ທີ່ ນະຄອນຫຼວງວຽງຈັນ
RFA/NY

ເຈົ້າໜ້າທີ່ກະຊວງການເງິນ ສປປລາວ ຄາດວ່າ ເສຖກິດຂອງລາວ ຈະກັບຄືນມາເຕີບໂຕອີກໃນປີ 2019 ນີ້ ລວມຍອດມູນຄ່າຜລິຕພັນ ພາຍໃນຫຼື GDP ຈະຢູ່ທີ່ 6.7ສ່ວນຮ້ອຍ ເຖິງຈະຫຼຸດລົງຈາກປີກາຍທີ່ໄດ້ 7ສ່ວນຮ້ອຍ ຍ້ອນວ່າ ປີນີ້ຍັງມີໂຄງການ ລົງທຶນຂນາດໃຫຍ່ ຈາກຕ່າງປະເທສອີກຫລາຍໂຄງການ ທີ່ກໍາລັງຈະເກີດຂຶ້ນ, ດັ່ງທີ່ທ່ານກ່າວຕໍ່ ວິທຍຸເອເຊັຍເສຣີ ໃນວັນທີ 10 ມົກກະຣາ ນີ້ວ່າ:

"ຄິດວ່າປີນີ້ເສຖກິດລາວ ຈະກັບຄືນມາ ເຖິງແມ່ນເພິ່ນສິປັບຕົວເລກ GDP ຫລຸດລົງ ແຕ່ທາງກົງກັນຂ້າມ, ພາບ Investment (ການລົງທຶນ) ພາບຂອງເສຖກິດ ກະຕຸ້ນຂຶ້ນຫລາຍ ຍ້ອນວ່າຣາຍຮັບຂອງຣັຖບາລຄິດວ່າເພີ້ມຂຶ້ນ ແນ່ນອນນໍ ເພາະວ່າແຕ່ລະປີ ເພິ່ນເພີ້ມຍົກຕົວເລກຂຶ້ນໄດ້ ເພີ່ນບໍ່ໄດ້ຖອຍຫລັງ."

ທ່ານກ່າວຕື່ມອີກວ່າ ປັດຈຸບັນ ຣັຖບາລລາວກໍາລັງປ່ຽນຣະບົບການຈັດເກັບພາ ສີ-ອາກອນ ຈາກການເກັບເປັນເງິນສົດ ມາເປັນຣະບົບ IT Online ອັນເຮັດໃຫ້ທຸຣະກິດຂນາດນ້ອຍ ແລະ ຂນາດກາງຈໍານວນຫລາຍ ໄດ້ຮັບຜົລກະທົບ ເພາະຈະຕ້ອງໄດ້ປັບ ຕົວເຂົ້າມາຣະບົບ ການເສັຍພາສີ-ອາກອນ ຜ່ານຣະບົບ IT Online ນີ້.

ເມື່ອສະພາແຫ່ງຊາດ ກໍານົດຣາຍຮັບຂອງປະເທສ ເພີ້ມຂຶ້ນທຸກປີ ແຕ່ 5 ຫາ 10 ສ່ວນຮ້ອຍ ການເກັບພາສີ-ອາກອນ ຜ່ານຣະບົບ IT Online ຈຶ່ງເປັນສິ່ງສໍາຄັນ ເພື່ອໃຫ້ໄດ້ຕາມປົ້າໝາຍ ແລະປ້ອງກັນເງິນຮົ່ວໄຫລ. ດັ່ງນັ້ນ ຜູ້ເປັນພະນັກງານຣັຖ ຈຶ່ງມີໜ້າທີ່ຈັດເກັບ ພາສີ-ອາກອນ ທຸກຂັ້ນຮວມທັງຂັ້ນແຂວງ ແລະດ່ານສາກົນທຸກແຫ່ງທົ່ວປະເທສ ແລະຕ້ອງເອົາໃຈໃສ່ເຂັ້ມງວດກວດກາ ແລະສິ່ງສໍາຄັນ ຕ້ອງສະກັດກັ້ນ ພະນັກງານຣັຖບາງຄົນ ທີ່ສໍ້ຣາດບັງຫລວງ ດັ່ງທີ່ທ່ານກ່າວ ວ່າ:

"ຄືປັບພະນັກງານຣັຖເອງ ຄັນເພິ່ນເຄັ່ງຄັດເຂົ້ານີ້ ເຈົ້າເຮັດບໍ່ໄດ້ເຈົ້າກໍອອກໃຫ້ຜູ້ອື່ນເຮັດທໍ່ນັ້ນ ສະພາກໍເຂັ້ມຂົ້ນແນ່ ມັນກໍຊ່ວຍຣັຖບາລ ໄດ້ຫລາຍ."

ໃນກອງປະຊຸມສລຸບວຽກງານການເງິນ ຢູ່ຫໍປະຊຸມແຫ່ງຊາດ ທີ່ນະຄອນຫຼວງວຽງຈັນ ເມື່ອວັນທີ 7 ແລະວັນທີ 8 ມົກກະຣານີ້ ທ່ານ ສົມດີ ດວງດີ ຣັຖມົນຕຣີກະຊວງການເງິນ ຣາຍງານວ່າ ປີ 2018 ສປປລາວ ເກັຍຣາຍຮັບບໍ່ບັນລຸຕາມເປົ້າໝາຍ ທີ່ຄາດໄວ້ຈໍານວນ 25 ພັນ 452 ຕື້ກີບ, ເກັບໄດ້ພຽງແຕ່ 24 ພັນ 892 ຕື້ກີບ ຄືຫລຸດເປົ້າໝາຍ 2% ປາຍ. ສໍາລັບປີ 2019 ນີ້ ສປປລາວ ຕັ້ງເປົ້າໝາຍ ຈະເກັບ ຣາຍຮັບໃຫ້ໄດ້ 26 ພັນ 308 ຕື້ກີບ.

ຄໍາເຫັນ (1)
Share

(

Congratulations. Good job but I hope it's not fake news.


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jan 15, 2019 11:12 AM

ເຕັມຫນ້າ