ຣັຖບາລລາວປະກາດ ປາບປາມ ຢາເສບຕິດ

ຈໍາປາທອງ
2021-05-13
Share
ຣັຖບາລລາວປະກາດ ປາບປາມ ຢາເສບຕິດ ຫ້ອງວ່າການສໍານັກງານ ນາຍົກຣັຖມົນຕຣີ ທີ່ ນະຄອນຫຼວງວຽງຈັນ
ວິກິພິເດັຽ

ຫ້ອງວ່າການສໍານັກງານ ນາຍົກຣັຖມົນຕຣີ ໄດ້ອອກແຈ້ງການດ່ວນ ໃນມື້ວັນທີ 12 ພຶສພາ 2021 ກ່ຽວກັບການຈັດຕັ້ງປະຕິບັດ ວາຣະ ແຫ່ງຊາດ ວ່າດ້ວຍການຄວບຄຸມ, ສະກັດກັ້ນ ແລະ ຕ້ານຢາເສບຕິດ. ໃນແຈ້ງການນັ້ນ ເນື້ອໃນຈໍານວນນຶ່ງ ເນັ້ນໜັກໃສ່ ການກໍານົດມາຕການ ແລະ ການລົງໂທດ ຜູ້ກະທໍາຜິດ, ຫາກແມ່ນເຈົ້າໜ້າທີ່ ເປັນຜູ້ກະທໍາຜິດ ໃຫ້ມີໂທດ ໜັກກວ່າປະຊາຊົນ.

ວຽກງານນີ້ ໃຫ້ກະຊວງປ້ອງກັນຄວາມສງົບ, ອົງການອັຍການປະຊາຊົນສູງສຸດ, ສານປະຊາຊົນສູງສຸດ ແລະ ກະຊວງຍຸຕິທັມ ປະສານງານ ແລະຜັດປ່ຽນກັນເປັນເຈົ້າພາບ ຈັດກອງປະຊຸມເປັນປະຈໍາ ເພື່ອຮ່ວມກັນແກ້ໄຂບັນຫາ ຢາເສບຕິດ ແລະ ຄະດີຕ່າງໆ ທີ່ຍັງບໍ່ທັນແກ້ໄຂໄດ້.

ກ່ຽວກັບເຣື່ອງນີ້ ເຈົ້າໜ້າທີ່ປ້ອງກັນຄວາມສງົບ ຢູ່ແຂວງພາກເໜືອທ່ານນຶ່ງ ກ່າວຕໍ່ວິທຍຸເອເຊັຍເສຣີ ໃນມື້ວັນທີ 13 ພຶສພານີ້ວ່າ, ພາຍຫລັງທີ່ຣັຖບານ ໄດ້ຍົກວຽກງານປາບປາມ ຢາເສບຕິດ ເປັນວາຣະແຫ່ງຊາດ ທາງເຈົ້າໜ້າທີ່ ທີ່ກ່ຽວຂ້ອງກັບການປາບປາມ ຢາເສບຕິດ ກໍຈະສືບຕໍ່ປະຕິບັດ ວຽກງານນີ້ຢ່າງເຂັ້ມງວດ ຕາມທິດຊີ້ນໍາ ຂອງສໍານັກງານ ນາຍົກຣັຖມົນຕຣີ ດັ່ງທີ່ທ່ານກ່າວວ່າ:

“ມີແຕ່ສິໄດ້ສືບຕໍ່ກວດກາ ຂຶ້ນບັນຊີເປົ້າໝາຍ ທີ່ເຄື່ອນໄຫວຫັ້ນແຫຼະ ກະສິແກ້ໄຂເປັນຕົ້ນ ກະແມ່ນການລົງກວດກາ ຕິດຕາມ ເປົ້າໝາຍ ແລ້ວກະລົງໂຄສະນາ ສຶກສາອົບຮົມ.”

ທ່ານກ່າວຕື່ມວ່າ ໃນໄລຍະ 3 ເດືອນ ທີ່ຜ່ານມາ ໃນຂອບເຂດຄວາມຮັບຜິດຊອບ ຂອງທ່ານເອງ ກໍສາມາດແກ້ໄຂບັນຫາ ຢາເສບຕິດ, ຈັບກຸ່ມຄ້າຢາເສບຕິດ ພ້ອມທັງຂອງກາງໄດ້ ຈໍານວນນຶ່ງ ເພື່ອນໍາໄປດໍາເນີນຄະດີ, ແຕ່ກໍຍັງເຫັນວ່າ ໃນປັດຈຸບັນ ຍັງມີກຸ່ມຜູ້ຄ້າຢາເສບຕິດ ອີກຫຼາຍ ທີ່ຍັງເຄື່ອນໄຫວຢູ່ໃນສັງຄົມ ຊຶ່ງທາງພາກສ່ວນທີ່ກ່ຽວຂ້ອງ ຈະໄດ້ສືບຕໍ່ ກໍາຈັດໃຫ້ໝົດໄປ.

ກ່ຽວກັບການປາບປາມຢາເສບຕິດ ໃນລາວໃຫ້ໝົດໄປນັ້ນ ປະຊາຊົນລາວຈໍານວນນຶ່ງເຫັນວ່າ ບໍ່ແມ່ນເຣື່ອງງ່າຍ ຊຶ່ງຫຼາຍປະເທດ ໃນໂລກ ກໍຍັງເຮັດບໍ່ໄດ້ເທື່ອ ແລະກໍເຊື່ອວ່າ ຍັງມີເຈົ້າໜ້າທີ່ລາວ ບາງຄົນ ມີສ່ວນພົວພັນກັບເຄືອຂ່າຍ ຄ້າຢາເສບຕິດຢູ່ ມັນຈຶ່ງ ເຮັດໃຫ້ການແກ້ໄຂບັນຫານີ້ ເປັນໄປໄດ້ຍາກ, ດັ່ງຊາວລາວທ່ານນຶ່ງ ກ່າວໃນມື້ດຽວກັນນັ້ນວ່າ:

“ເຣື່ອງແກ້ໄຂນີ້ ກະເວົ້າຄວາມຈິງ ກະບໍ່ທັນໄດ້ເທື່ອ ມັນກະເປັນນໍາທາງການແດ່ ກະມີບາງພາກສ່ວນກະຢາກສວຍໂອກາດອໍານວຍ ຄວາມສະດວກໃຫ້ພາກສ່ວນນຶ່ງ ຫັ້ນນ່າ ພວກທີ່ວ່າຄ້າຂາຍຢາເສບຕິດ.”

ທ່ານກ່າວຕື່ມວ່າ ຫາກພາກສ່ວນທີ່ກ່ຽວຂ້ອງ ແກ້ໄຂບັນຫາຢາເສບຕິດ ຢ່າງເຂັ້ມງວດ ຕາມທິດຊີ້ນໍາຂອງຣັຖບານ ຮວມທັງການ ລົງໂທດເຈົ້າໜ້າທີ່ ທີ່ພົວພັນກັບຢາເສບຕິດ ຕົນກໍເຊື່ອວ່າ ບັນຫາຢາເສບຕິດໃນລາວ ຈະຫລຸດລົງ ແລະຕົນ ໃນຖານະປະຊາຊົນ ລາວຜູ້ນຶ່ງ ກໍພ້ອມເປັນຫູເປັນຕາ ໃຫ້ເຈົ້າໜ້າທີ່ຕໍາຣວດ. ຫາກພົບເຫັນວ່າມີການ ຄ້າຂາຍ ຢາເສບຕິດ ໃນທ້ອງຖິ່ນຂອງຕົນ ກໍຈະ ຣາຍງານໃຫ້ເຈົ້າໜ້າທີ່ຊາບທັນທີ.

ໃນຂນະດຽວກັນ ຊາວລາວອີກທ່ານນຶ່ງ ກໍກ່າວໃນທໍານອງດຽວກັນນັ້ນວ່າ ການແກ້ໄຂບັນຫາ ຢາເສບຕິດໃນລາວເປັນເຣື່ອງທີ່ຍາກ, ໃນໄລຍະການແຜ່ຣະບາດຂອງ ໂຄວິດ-19 ນີ້ ຊາວໜຸ່ມລາວຈໍານວນນຶ່ງ ບໍ່ມີວຽກເຮັດງານທໍາ ແລ້ວຫັນຕົວເອງ ເຂົ້າສູ່ວົງການ ຢາເສບຕິດ ທັງເປັນຜູ້ເສບ ທັງອາຈເປັນຜູ້ຂາຍຢາເສບຕິດ ຣາຍຍ່ອຍນໍາດ້ວຍ ດັ່ງທີ່ທ່ານກ່າວວ່າ:

“ສ່ວນຫຼາຍທີ່ວ່າພາໃຫ້ຂະເຈົ້າ ຕິດຢາຫຼາຍໃນຊ່ວງນີ້ນ່າ ຄືເສຖກິດມັນບໍ່ຄ່ອຍດີ ແລ້ວບັນຫາມັນເຂົ້າມາເລື້ອຍໆ. ແລ້ວອີກແນວນຶ່ງ ຫັ້ນນ່າ ຊ່ອງທາງແກ້ໄຂບັນຫາ ສ່ວນຫຼາຍ ຈະເລືອກແກ້ໄຂບັນຫາ ທີ່ວ່າຜິດ ເມື່ອເຄີຍໄດ້ເສບແລ້ວ ສິເອົາໂຕນີ້ມາເປັນໂຕຊ່ວຍ ໃນການແກ້ໄຂບັນຫາ.”

ແຕ່ເຖິງຢ່າງໃດກໍຕາມ ຊາວລາວອີກທ່ານນຶ່ງ ກໍເຫັນວ່າ ໃນໄລຍະທີ່ຜ່ານມາ ທາງເຈົ້າໜ້າທີ່ຕໍາຣວດ ກໍສາມາດແກ້ໄຂບັນຫາ ຢາເສບຕິດໄດ້ດີສົມຄວນ, ພວກຄ້າຂາຍຢາເສບຕິດ ກໍບໍ່ຫຼາຍແລ້ວ, ເພິ່ນເອົາພວກຊາວໜຸ່ມ ທີ່ຕິດຢາເສບຕິດ ໄປເຂົ້າສູນປິ່ນປົວ ແລະ ບໍາບັດຜູ້ຕິດຢາເສບຕິດຫຼາຍແລ້ວ:

“ຜ່ານມາເພິ່ນກະລົງມາເທື່ອນຶ່ງ ຊາວໜຸ່ມເບາະ ພວກນັ້ນກະບໍ່ຫຼາຍແລ້ວດຽວນີ້ ພວກທີ່ຫົວຮຸນແຮງ ພວກທີ່ມັນດື້ດ້ານເພິ່ນເອົາໄປ ຮັກສາໝົດແລ້ວ ໂຕຜູ້ສໍາຄັນເອົາໄປໝົດແລ້ວ.”

ເມື່ອເດືອນສິງຫາ 2020 ພົນໂທ ວິໄລ ຫລ້າຄໍາຟອງ ຣັຖມົນຕຣີກະຊວງປ້ອງກັນຄວາມສງົບ ກ່າວໃນໂອກາດເຂົ້າຮ່ວມພິທີປະກາດ ມະຕິຕົກລົງກັບຮອງປະທານ, ຜູ້ປະຈໍາການ ແລະ ຄະນະກັມການ ປກຊ-ປກສ ແຂວງບໍ່ແກ້ວ ໂດຍໄດ້ເນັ້ນໃຫ້ກອງກໍາລັງ ປ້ອງກັນ ຄວາມສງົບ ແກ້ໄຂບັນຫາຢາເສບຕິດ ແລະວ່າ ຈະມີການລົງໂທດເຈົ້າໜ້າທີ່ ທີ່ມີສ່ວນພົວພັນ ກັບຢາເສບຕິດ ດັ່ງ ທີ່ທ່ານກ່າວ ຕອນນຶ່ງວ່າ:

“ຢູ່ນໍາຜູ້ໃດ ຖືກຜູ້ໃດໃຫ້ເອົາອອກໂລດ ຈາກກໍາລັງນີ້ ບໍ່ໃຫ້ຢູ່ອີກ ໃສ່ວິນັຍ ໃສ່ໂທດ ໃສ່ຣະບຽບໂລດ ມີຄ້າ ມີໄວ້ໃນການຄຸ້ມຄອງ ມີຂາຍ ມີກິນ ເອົາອອກໝົດ ກິນຊື່ໆກະເອົາອອກ ບໍ່ຂາຍກະຢ່າ ເອົາອອກຈາກກໍາລັງ ບໍ່ໄລ່ຫຍັງໃຫ້ອີກ ສິມີຜົລງານລົ້ນຟ້າ ກະຢ່າມັນ ກໍບໍ່ໃຫ້ຜົລງານນັ້ນ ໄລ່ອອກຊື່ໆໂລດ.”

ໃນແຈ້ງການດ່ວນ ຂອງຫ້ອງວ່າການສໍານັກງານ ນາຍົກຣັຖມົນຕຣີ ສະບັບດັ່ງກ່າວຣະບຸວ່າ ໃຫ້ກະຊວງປ້ອງກັນຄວາມສງົບ ຈັດຕັ້ງ ປະຕິບັດວາຣະແຫ່ງຊາດ ເພື່ອສ້າງຄວາມ ເຊື່ອໝັ້ນ ແລະເປັນທີ່ເພິ່ງຂອງປະຊາຊົນ, ສ້າງທຸກເງື່ອນໄຂ ໃຫ້ປະຊາຊົນມີສ່ວນຮ່ວມ ໃນການແກ້ໄຂບັນຫາຢາເສບຕິດ. ໃຫ້ເຮັດເປັນຂະບວນການແຂ່ງຂັນ ສ້າງບ້ານປອດ ຢາເສບຕິດ ໃຫ້ນັບມື້ນັບຫຼາຍຂຶ້ນ.

ສໍາລັບ ເຣື່ອງໂທດປະຫານຊີວິດ ກໍເຫັນດີໃຫ້ຮັກສາໄວ້ຄືເກົ່າ ແຕ່ຕ້ອງໄດ້ຄົ້ນຄວ້າໃຫ້ລະອຽດ ເລິກເຊິ່ງຕື່ມ ກ່ຽວກັບຮູບແບບ ແລະ ວິທີປະຕິບັດໂທດ, ບັນຫາຄວາມເດັດຂາດ ໃນການປະຫານຊີວິດ ຈາກຄວາມຜິດດ້ານ ຢາເສບຕິດ ແມ່ນເປັນທ່າແຮງອັນນຶ່ງ ທີ່ສ້າງ ຄວາມຢ້ານກົວ ໃຫ້ແກ່ຜູ້ທີ່ຄິດຈະກະທໍາຜິດ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ