ນາຍົກສັ່ງຫ້າມເຣື້ອງຂີ້ເຫຍື້ອ ໄຟຟ້າ

ສິດນີ
2016-06-23
ອີແມວລ໌
ຄໍາເຫັນ
Share
ພິມ
ຄນະກວດກາສະເພາະກິຈ ທີ່ອອກໄປກວດກາ ໂຮງງານລະລາຍ ຂີ້ເຫຍື້ອເອເລັກໂຕຣນິກ
ຄນະກວດກາສະເພາະກິຈ ທີ່ອອກໄປກວດກາ ໂຮງງານລະລາຍ ຂີ້ເຫຍື້ອເອເລັກໂຕຣນິກ
RFA

ທ່ານ ທອງລຸນ ສີສຸລິດ ນາຍົກຣັຖມົນຕຼີ ສປປລາວ ສັ່ງໂຈະໂຮງງານ ຂີ້ເຫຍື້ອ ເອເລັກໂທຣນິກ ທີ່ ເປັນເຈົ້າຂອງ ໂດຍ ບໍຣິສັດ Hokeng Metal Processing ຂອງຈີນ ຢູ່ນິຄົມ ອຸດສະຫະກັມ ເຂດ ເສຖກິດ ພິເສດ ໂນນທອງ ເມືອງ ໄຊທານີ ນະຄອນຫຼວງ ວຽງຈັນ ຍ້ອນສົ່ງ ຜົນກະທົບ ຕໍ່ ສິ່ງແວດລ້ອມ. ອີງຕາມ ຂໍ້ມູນ ຈາກຫ້ອງວ່າການ ສຳນັກງານ ນາຍົກ ຣັຖມົນຕຼີ.

ຫົວໜ້າຫ້ອງວ່າການ ສຳນັກງານ ນາຍົກຣັຖມົນຕຼີ, ທ່ານ ເພັດ ພົມພິພັກ ໄດ້ອອກແຈ້ງການ ໃນວັນທີ 14 ມິຖຸນາ ໄປຍັງບັນດາ ກະຊວງ ທີ່ກ່ຽວຂ້ອງ ເພື່ອໃຫ້ ຮັບຮູ້ ກ່ຽວກັບ ການສັ່ງໂຈະ ໂຮງງານ ດັ່ງກ່າວ ໃຫ້ຢຸດເຊົາ ການຜລິດ ເປັນການຊົ່ວຄາວ.

ຣັຖບານລາວ ໄດ້ມອບໝາຍ ກະຊວງ ອຸດສາຫະກັມ ແລະ ການຄ້າ, ກະຊວງ ຊັພຍາກອນ ທຳມະຊາດ ແລະ ສິ່ງແວດລ້ອມ ສົມທົບ ກັບ ພາກສ່ວນ ທີ່ກ່ຽວຂ້ອງ ແລະ ຄນະ ສະເພາະກິຈ ລົງໄປກວດກາ ມາຕຖານ ແລະ ສານພິດ ທີ່ ເປັນອັນຕະລາຍ ໃນ ໂຮງງານນັ້ນ, ແລະ ໃຫ້ໂຮງງານ ດຳເນີນການ ປັບປຸງ ໃຫ້ໄດ້ມາຕຖານ ແລະ ປະເມີນ ຜົນກະທົບ ຕໍ່ ສິງແວດລ້ອມ ແລະ ສັງຄົມ.

ແຈ້ງງການ ຍັງໄດ້ ກຳນົດ ອີກວ່າ: ຫ້າມບໍ່ໃຫ້ ນຳເຂົ້າ ໝໍ້ໄຟເກົ່າ ແລະ ຊິ້ນສ່ວນ ເສດເຫລືອ ຂອງເຄື່ອງ ເອເລັກໂທຼນິກ ເພາະວ່າ ມັນສົ່ງ ຜົນກະທົບ ຕໍ່ປະຊາຊົນ ແລະ ສິ່ງແວດລ້ອມ, ໃຫ້ເກັບມ້ຽນ ສິງເສດເຫລືອ ເອເລັກໂທຼນິກ ທີ່ ບັນຈຸຢູ່ໃນ 48 ຕູ້ ຄອນເທັນເນີ ໃນບ່ອນທີ່ ເໝາະສົມ ແລະ ບໍ່ໃຫ້ ນຳມາໃຊ້, ຜລິດ ຫລື ປຸງແຕ່ງ ອັນໃດອີກ.

ນອກຈາກນີ້ ຍັງມີ ການກວດສອບ ໂຮງງານ ທີ່ດໍາເນີນ ທຸຣະກິຈ ແບບນີ້ ໃນ ທົ່ວປະເທດ, ຢູ່ເຂດ ເສຖກິຈ ພິເສດ ແລະ ເຂດເສຖກິຈ ສະເພາະ ຢູ່ແຂວງ ອື່ນໆອີກ, ຣັຖບານ ຈະບໍ່ ອະນຸຍາດ ໃຫ້ສ້າງຕັ້ງ ໂຮງງານ ປະເພດ ດັ່ງກ່າວ ເພີ້ມອີກ ໃນລາວ.

ກ່ຽວກັບບັນຫາດັ່ງກ່າວ ເອເຊັຽເສຣີ ກໍໄດ້ຂໍ ສຳພາດ ທ່ານ ຄຳປະດິດ ຄຳມູນເຮືອງ ຫົວໜ້າ ກົມ ສິ່ງແວດລ້ອມ, ກະຊວງ ຊັພຍາກອນ ທັມມະຊາດ ແລະ ສິ່ງແວດລ້ອມ ໃນວັນທີ 22 ມິຖຸນາ ເພື່ອຂໍຂໍ້ມູນ ເພີ້ມເຕີມ, ແຕ່ທ່ານ ປະຕິເສດ ທີ່ຈະຕອບ ຄຳຖາມ.

ເຈົ້າໜ້າທີ່ທ່ານນຶ່ງ ຜູ້ທີ່ເຮັດວຽກ ປະສານງານ ກັບ ບໍຣິສັດ ໃຫ້ເຫດຜົນວ່າ ສາເຫດ ທີ່ ຣັຖບານ ສັ່ງໂຈະ ກໍຍ້ອນວ່າ ໂຮງງານ ບໍ່ມີ ລະບົບ ບຳບັດນ້ຳເສັຽ ທີ່ໄດ້ມາຕຖານ ຈື່ງ ສົ່ງຜົນກະທົບ ຕໍ່ ສິ່ງແວດລ້ອມ ແລະ ປະຊາຊົນ ທ້ອງຖີ່ນ. ກ່ອນໜ້ານີ້ ໃນວັນທີ 20 ພຶສພາ ທີ່ຜ່ານມາ ຄນະສະເພາະກິຈ ໂດຍ ມີຕົວແທນ ຈາກ ຂະແໜງການ ທີ່ກ່ຽວຂ້ອງ ໄດ້ລົງໄປ ກວດກາ ໂຮງງານ, ເຫດການ ດັ່ງກ່າວ ກໍມີ ການປະຊຸມ ປຶກສາຫາລືກັນ ຢູ່ຫ້ອງການ ສຳນັກງານ ນາຍົກ ຣັຖມົນຕຼີ.

ຄໍາເຫັນ (2)
Share

ຄ.ນະຄຳມ່ວນ

ຈາກ ທ່າແຂກ

ກໍ່ດີເປັນວິທີສະສາງບັນຫາສິ່ງແວດລ້ອມກວມລວມ, ເພາະເພິ່ນມອງເຫັນໂລກກ້ວາງໃຫຍ່ໄພສານເວລາຍ່າງຕິດດິນແມ່ນເຫັນ ຫົນທາງແຄບເຫລືອຫລາຍ, ແນວໄດກໍໍ່ຕາມກອງປະຊຸມອາຊຽນ ຈະມາເຖິງໃນບໍ່ຊ້ານີ້ກໍ່ຕ້ອງຕັ້ງຫນ້າປັດກວາດບ້ານເສັຍທີ ນີ້ລະ! ເພິ່ນຈຶ່ງມີຄຳຂວັນວ່າ: ພັກນຳພາແບບສລາດສ່ອງໃສ,ຣັຖ ບໍລິຫານແລະຄຸ່ມຄອງ, ປະຊາຊົນເປັນເຈົ້າ ມີປະຊາທິປະໄຕ ລວມສູນ ຢູ່ຈອມຍັງຍອດ, ນີ້ລະ ຄື ສາທາລະນະຣັຖປະຊາທິປະໄຕປະຊາຊົນລາວ ອັນຈິງແທ້ແນ່ນອນ!


[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jun 26, 2016 12:43 PM

ເຜົ່າລາວ

ຈາກ ແຜ່ນດີນລ້ານຊ້າງ

ດີແລ້ວ ແຜ່ນດິນລາວບໍ່ແມ່ນບ່ອນຖິ້ມຂີ້ເຫຍື້ອ ຂອງຕ່າງຊາດ. ໃຜຢາກມາເຮັດທຸຣະກິດ ມັນຜູ້ນັ້ນຈະຕ້ອງນັບຖືສິດທິ ຂອງປະຊາຊົນລາວຜູ້ເປັນເຈົ້າຂອງປະເທດ ແລະຢູ່ໃຕ້ອຳນາດກົດເກນ ຂອງຜູ້ອານຸຍາດໃຫ້ມັນສວຍໃຊ້ ບໍ່ແມ່ນມາຢູ່ເຫນືອ ກົດຫມາຍ ແລະສັນຍາທັງປວງແບບນີ້. ບັນຫາທີ່ທ່ານນາຍົກ ຈະຕ້ອງໄດ້ແກ້ໄຂ ກອງກັນເຕັມຢູ່ຕົງຫນ້າ ຖ້າຫາກທ່ານແກ້ໄຂໄດ້ ກໍນັບວ່າ ທ່ານເປັນຄົນແຣກທີ່ຮັກຊາດ ຮັກຜືນແຜ່ນດີນ ຜິດແປກໄປຈາກພວກຂາຍຊາດຄົນອຶ່ນໆ ຊື່ງຊາວລາວ ທັງປະເທດຈະຍົກຍ້ອງ ແລະ ຊື່ນຊົມທ່ານຕລອດໄປ.



[ຄໍາເຫັນນີ້ໄດ້ຖືກກວດແກ້ ໂດຍບັນນາທິການ ເອເຊັຽເສຣີ ອີງຕາມເງື່ອນໄຂການນໍາໃຊ້ ]

Jun 26, 2016 12:37 PM

ເຕັມຫນ້າ