ໂຮງງານປຸງແຕ່ງໄມ້ຖືກປິດ ຍ້ອນຜິດ ລະບຽບ

ໄຊຍາ
2018-11-20
ອີແມວລ໌
ຄໍາເຫັນ
Share
ພິມ
ໂຮງງານປຸງແຕ່ງໄມ້ ແຫ່ງນຶ່ງ ໃນ ແຂວງຄໍາມ່ວນ
ໂຮງງານປຸງແຕ່ງໄມ້ ແຫ່ງນຶ່ງ ໃນ ແຂວງຄໍາມ່ວນ
Photo courtesy of Lao Post

ຜແນກອຸດສາຫະກັມ ແລະການຄ້າ ແຂວງຄຳມ່ວນ ຍົກເລີກທະບຽນທຸຣະກິດ ໂຮງງານປຸງແຕ່ງໄມ້ 18 ແຫ່ງ ຈາກທັງໝົດ 89 ແຫ່ງ ໃນແຂວງຄຳມ່ວນ ຍ້ອນຂັດຄຳສັ່ງ ນາຍົກຣັຖມົນຕຣີ ເລກທີ 15/ນຍ ເປັນທຸຣະກິດໂຮງງານໄມ້ ບໍ່ໄດ້ມາຕຖານ ເປັນຕົ້ນ ຊຸກເຊື່ອງໄມ້ ແລະດຳເນີນກິຈການ ທີ່ຜິດກົດໝາຍ. ດັ່ງເຈົ້າໜ້າທີ່ ຜແນກອຸດສາຫະກັມ ແລະການຄ້າ ແຂວງຄຳມ່ວນ ກ່າວຕໍ່ວິທຍຸເອເຊັຽເສຣີ ເມື່ອ ວັນທີ 19 ພຶສຈິກາ ວ່າ:

"ມາຮອດປັດຈຸບັນຍົກເລີກທາງດ້ານທະບຽນທຸຣະກິດ 18 ແຫ່ງ ຍ້ອນຂັດຄຳສັ່ງນາຍົກ ເລກທີ 15 ກ່ຽວກັບການດຳເນີນ ທຸຣະກິດໄມ້ ໃນ ສປປລາວ ຂະເຈົ້າບໍ່ມີວັດຖຸດິບ ເຄື່ອນໄຫວໄມ້ແບບບໍ່ຖືກຕ້ອງ ມີການຊຸກເຊື່ອງໄມ້ ບໍ່ຖືກຕ້ອງ ເຂົາໃຫ້ຢຸດດຳເນີນ ທຸຣະກິດ."

ທ່ານກ່າວຕື່ມວ່າ ການຍົກເລີກທະບຽນທຸຣະກິດແມ່ຍົກເລີກພຽງແຕ່ທະບຽນ ການດຳເນີນທຸຣະກິດ ປຸ່ງແຕ່ງໄມ້ ເທົ່ານັ້ນ ແຕ່ເຂົາເຈົ້າສາມາດ ເຮັດທຸຣະກິດແນວໃໝ່ ໃນພື້ນທີ່ດັ່ງກ່າວໄດ້:

"ຢຸດທະບຽນບໍ່ໃຫ້ດຳເນີນການທາງໄມ້ ປຸງແຕ່ງໄມ້ ຢຸດດຳເນີນທຸຣະກິດ ແຕ່ໂຮງງານຍັງຢູ່ຄືເກົ່າ ສາມາດໝູນໃຊ້ໄປເຮັດແນວໃໝ່ໄດ້ ຍົກຕົວຢ່າງຂາຍກິຈການໄມ້ ໄປເຮັດຂາຍຣົດຂາຍລາ."

ສຳລັບໂຮງງານປຸງແຕ່ງໄມ້ ອີກຈຳນວນ 71 ແຫ່ງ ທີ່ເຫລືອຜແນກອຸດສາຫະກັມ ແລະການຄ້າແຂວງ ໄດ້ລົງໄປກວດກາ ໃນຂັ້ນຕອນຕໍ່ໄປ ຖ້າພົບວ່າໂຮງງານປຸງແຕ່ງໄມ້ໃດ ເຮັດຜິດກົດໝາຍ ກໍ່ຢຸດການດຳເນີນ ທຸຣະກິດທັນທີ:

"71 ແຫ່ງ ນີ້ເຮົາກໍ່ມີການເຄື່ອນໄຫວສືບຕໍ່ ກວດກາໂຮງງານ ວ່າຍັງສາມາດປຸງແຕ່ງໄມ້ ໄດ້ມາຕຖານ ເລກທີ 15 ກໍ່ຈະສົ່ງເສີມ ແຕ່ວ່າ ໂຮງງານໃດ ມີການລັກລອບບໍ່ຖືກຕ້ອງ ຕາມກົດໝາຍ ເລກທີ 15 ເຮົາກໍ່ຈະມີການຢຸດຕິ ການດຳເນີນທຸຣະກິດຂອງເຂົາ ເພາະໃນໄລຍະ ຜ່ານມາ ຫລາຍໂຮງານປຸງແຕ່ງ ແຕ່ວ່າຊຸກເຊື່ອງໄມ້."

ອີງຕາມຣາຍງານ ໃນຈຳນວນໂຮງງານປຸງແຕ່ງໄມ້ 71 ແຫ່ງ ໃນນັ້ນມີຢູ່ເມືອງທ່າແຂກ 7 ແຫ່ງ, ເມືອງຫີນບູນ 2 ແຫ່ງ, ເມືອງມະຫາໄຊ 4 ແຫ່ງ, ເມືອງບົວລະພາ 6 ແຫ່ງ ແລະ ເມືອງໄຊບົວທອງ 8 ແຫ່ງ.

ເຕັມຫນ້າ