ຊາວບ້ານຈາກເຂື່ອນນໍ້າເທີນ 2 ລໍາບາກ

ຈໍາປາທອງ
2019-04-04
ອີແມວລ໌
ຄໍາເຫັນ
Share
ພິມ
ພິທີເປີດ ການກໍ່ສ້າງ ເຂື່ອນນໍ້າເທີນ 2 ເມື່ອປີ 2005 ພາຍໃຕ້ ປ້າຍຄໍາຂວັນທີ່ວ່າ "ເພື່ອລົບລ້າງຄວາມທຸກຍາກ"
ພິທີເປີດ ການກໍ່ສ້າງ ເຂື່ອນນໍ້າເທີນ 2 ເມື່ອປີ 2005 ພາຍໃຕ້ ປ້າຍຄໍາຂວັນທີ່ວ່າ "ເພື່ອລົບລ້າງຄວາມທຸກຍາກ"
RFA/PS

ໃນຣະຫວ່າງທີ່ ທ່ານ ຄໍາມະນີ ອິນທິລາດ ຣັຖມົນຕຣີກະຊວງພລັງງານ ແລະບໍ່ແຮ່ ແລະຄນະນໍາຂັ້ນສູງ ຫລາຍກະຊວງ ໄປຢ້ຽມຢາມ ປະຊາຊົນຢູ່ບ້ານຈັດສັນ ເຂື່ອນໄຟຟ້ານໍ້າເທີນ 2 ຢູ່ເມືອງນາກາຍ ແຂວງຄໍາມ່ວນ ໃນວັນທີ 29 ມິນາຜ່ານມາພາຍຫຼັງ ທີ່ ສໍາເຣັດການ ໂຍກຍ້າຍຊາວບ້ານ ອອກຈາກໜ້າເຂື່ອນແລ້ວນັ້ນ ຄນະຈັດສັນເຂື່ອນໄດ້ຣາຍງານ ເຖິງສະພາບຊີວິດການເປັນຢູ່ ຂອງປະຊາຊົນວ່າດີຂຶ້ນ ໂດຍສະເພາະ ແມ່ນເຣຶ່ອງຣາຍໄດ້ຈາກອາຊີບ ທີ່ໄດ້ຈັດສັນໃຫ້ 5 ອາຊີບ ຮວມທັງການ ປູກຝັງ, ລ້ຽງສັດ ແລະການປະມົງ. ຕາມຄໍາເວົ້າ ຂອງ ເຈົ້າໜ້າທີ່ພລັງງານ ແລະບໍ່ແຮ່ແຂວງຄໍາມ່ວນ ທ່ານນຶ່ງ ຕໍ່ວິທຍຸເອເຊັຍເສຣີ ໃນວັນທີ 3 ເມສາ ນີ້:

"ທຸກວຽກພວກເຮົາໄດ້ຝຶກອົບຮົມ ໄດ້ນໍາພາເຮັດໃນ 5 ອາຊີບຫັ້ນ ທຽບໃສ່ 10 ປີຫລັງທີ່ເຮົາບໍ່ທັນໂຍກຍ້າຍມາ ຖືວ່າດີຂຶ້ນ ຖືວ່າທາງດ້ານ ສຸຂພາບ ທາງດ້ານການສຶກສາ ທາງດ້ານການລ້ຽງສັດປູກຝັງ ການປະມົງກໍມີຣາຍຮັບເພິ່ມຂຶ້ນປະຊາຊົນເຂດ ໂຍກຍ້າຍຈັດສັນຖືວ່າດີຂຶ້ນ."

ທ່ານກ່າວຕື່ມວ່າ ໂຄງການເຂື່ອນນໍ້າເທີນ 2 ໄດ້ໂຍກຍ້າຍປະຊາຊົນ ທີ່ໄດ້ຮັບຜົລກະທົບ ອອກຈາກ 16 ບ້ານ, ມີ 1,374 ຄອບຄົວຢູ່ ເມືອງນາກາຍ ແຂວງຄໍາມ່ວນ ແລະອີກ 2 ບ້ານຢູ່ເມືອງຄໍາເກີດ ແຂວງບໍລິຄໍາໄຊ ໄປຢູ່ບ້ານຈັດສັນ, ໄດ້ສ້າງໂຄງຮ່າງ ພື້ນຖານຮວມທັງ ຫົນທາງ, ໄຟຟ້າ, ໂຮງຮຽນ,ໂຮງໝໍໃຫ້.

ເຖິງແມ່ນວ່າ ຄນະຈັດສັນເຂື່ອນນໍ້າເທີນ 2 ຈະໄດ້ສລຸບຣາຍງານເຖິງຜົລສໍາເຣັດທຸກຢ່າງ ໃນການໂຍກຍ້າຍ ຄືທີ່ວ່ານັ້ນກໍຕາມ ແຕ່ປະຊາຊົນ 100 ປາຍຄອບຄົວ ທີ່ຍຶດອາຊີບປະມົງຢູ່ນັ້ນ ກໍຍັງມີຄວາມລໍາບາກຢູ່. ແຕ່ທາງຄນະຈັດສັນ ບໍ່ໄດ້ຣາຍງານໃຫ້ ຣັຖມົນຕຣີກະຊວງ ພລັງງານ ແລະບໍ່ແຮ່ ແລະຄນະນໍາຂັ້ນສູງຫຼາຍ ກະຊວງນັ້ນຊາບ ເຖິງຄວາມຫຍຸ້ງຍາກ ໃນຊີວິດການເປັນຢູ່ ແລະການທໍາມາຫາກິນ ດັ່ງປະຊາຊົນ ບ້ານຈັດສັນ ທ່ານນຶ່ງ ກ່າວໃນມື້ດຽວກັນນັ້ນວ່າ:

"ກໍບໍ່ແມ່ນຟ້ອງຮ້ອງດອກ ແຕ່ສະດວກສະບາຍນີ້ ສົ່ງເສີມໃຫ້ເຮືອນປູກປຸກສ້າງ ນໍ້າໄຫລໄຟສະຫວ່າງນີ້ ສົ່ງເສີມໃຫ້ເຮືອນປຸກສ້າງ ນໍ້າໄຫຼ ໄຟສະຫວ່າງ ໂຕນີີ້ໆໄດ້ແລ້ວ ແຕ່ວ່າເຣຶ່ອງກິນເຂົ້າກິນປານີ້ແຫຼະ ເງິນທອງນີ້ແຫຼະຍາກແຫຼະ ໄທຂ້ອຍນີ້ຄັນໄປ ຫາປາບ່ອນມັນໄດ້ເພິ່ນກໍ ບໍ່ໃຫ້ໄປ ອີກນັ້ນຫັ້ນເດ ທາງໂຄງການວ່າສິສັ່ງໂຄງການເກັບຊື້ ໂດຍສະເພາະ ເວົ້າແລ້ວເວົ້າອີກ ກໍຍັງບໍ່ເກີດອັນໃດເລີຍ ຄືມາເວົ້າລ້າໆນະ."

ເຂື່ອນໄຟຟ້ານໍ້າເທີນ 2 ເປັນເຂື່ອນຂອງ 3 ບໍຣິສັດ ທີ່ຖືຫຸ້ນຮ່ວມກັນຄື ບໍຣິສັດໄຟຟ້າ ຝຣັ່ງເສດຖືຫຸ້ນ 40%, ບໍຣິສັດໄຟຟ້າການຜລິດແຫ່ງ ປະເທດໄທ 35% ແລະຣັຖວິສາຫະກິດ ໄຟຟ້າລາວ 25%, ເລິ້ມຜລິດກະແສໄຟຟ້າຂາຍ ໃນປີ 2010, ປະຊາຊົນໄດ້ຖືກໃຫ້ໂຍກຍ້າຍໄປ ຢູ່ບ້ານຈັດສັນ ມາໄດ້ເກືອບ 10 ປີແລ້ວ ແຕ່ຫາກໍ່ສໍາເຣັດ ແລະຈັດງານໃຫ້ເມື່ອບໍ່ດົນມານີ້.

ເຕັມຫນ້າ