ບໍຣິສັດ MMG ຈ່າຍເງິນ ບໍາເນັດ

ພູວົງສ໌
2019-01-25
Share
F-Sepon ການຂຸດຄົ້ນບໍ່ຄໍາ ທີ່ເມືອງເຊໂປນ ແຂວງສວັນນະເຂດ
Public Domain

ພາຍຫຼັງຂາຍກິຈການບໍ່ຄໍາເຊໂປນ 90% ໃຫ້ບໍຣິສັດ Chifeng Jilong Gold ຂອງຈີນ ເປັນມູນຄ່າ 270 ລ້ານໂດລາ ສະຫະຣັຖ ແລ້ວ, ບໍຣິສັດ MMG ຂອງອອສເຕຣເລັຽ ໄດ້ຈ່າຍເງິນບໍາເນັດ ໃຫ້ພະນັກງານບໍ່ຄໍາເຊໂປນ 1,800 ຄົນນັ້ນໝົດແລ້ວ ໃນທ້າຍປີກາຍ, ຕາມຄໍາ ຮຽກຮ້ອງ ໃນອັດຕຣາ 10% ແລະ 15% ຂອງເງິນເດືອນ ເດືອນສຸດທ້າຍ, ອີງຕາມຄວາມເວົ້າຂອງເຈົ້າໜ້າທີ່ບໍຣິສັດ MMG ຕໍ່ວິທຍຸເອເຊັຽ ເສຣີ ໃນມື້ວັນທີ 24 ມົກກະຣາ ນີ້ວ່າ:

“ປາກົດວ່າ ຂະເຈົ້າໄດ້ໝົດແລ້ວຕີ໋ ແກ້ໝົດແລ້ວໜ່າ ເຂົາເວົ້າເບິ່ງຕາມແຮງງານ ເຂົາກໍເວົ້າເບິ່ງອາຍຸເຂົ້າການ ແຕ່ຣະຍະກົດໝາຍເກົ່າ ປະຕິບັດຕາມກົດໝາຍ ບໍ່ໄດ້ມີການຮ້ອງຟ້ອງ ອີ່ຫຍັງແຫຼະ."

ທ່ານກ່າວຕື່ມວ່າ ການຈ່າຍເງິນບໍາເນັດ ໃຫ້ພະນັກງານນັ້ນ, ແມ່ນອີງຕາມກົດໝາຍແຮງງານ 2 ສະບັບ ຄືພະນັກງານຄົນໃດ ທີ່ເຂົ້າເຮັດ ວຽກກ່ອນປີ 2016 ຈະໄດ້ບໍາເນັດ ໃນອັດຕຣາ 10%, ສ່ວນຜູ້ເຂົ້າຫຼັງປີ 2016 ນັ້ນ, ຈະໄດ້ 15% ຂອງເງິນເດືອນ ເດືອນສຸດທ້າຍ. ກ່ອນໜ້ານັ້ນ, ພະນັກງານບໍຣິສັດ MMG ຂອງອອສເຕຣເລັຽ ຕົກລົງກັບບໍຣິສັດບໍ່ໄດ້ ໃນເຣື້ອງການຈ່າຍເງິນບໍາເນັດ ຍ້ອນທາງບໍຣິສັດ ຈະຈ່າຍເງິນບໍາເນັດນີ້ ໃນອັດຕຣາ 10% ຂອງເງິນເດືອນ ປະຈຸບັນ, ຕາມກົດໝາຍແຮງງານປີ 2013. ແຕ່ພະນັກງານບໍ່ຍອມ ຢາກໄດ້ 15% ຕາມກົດໝາຍແຮງງານ ສະບັບປັບປຸງ ປີ 2016.

ປະຈຸບັນ, ພະນັກງານທຸກຄົນ ກໍຍັງເຮັດວຽກຢູ່ບໍ່ຄໍາເຊໂປນ ຂອງບໍຣິສັດ Chifeng Jilong Gold ຂອງຈີນ ທີ່ຖືຫຸ້ນ 90% ທີ່ໄດ້ຊື້ຕໍ່ຈາກ ບໍຣິສັດ MMG ຂອງ ອອສເຕຣເລັຽ ແລະ ຣັຖບາລ ສປປລາວ ກໍຍັງຖືຫຸ້ນ 10% ຢູ່ຄືເກົ່າ.

ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.

ເຕັມຫນ້າ