ທາງການວ່າບໍ່ໃຫ້້ເພີ້ມ ເນື້ອທີ່ ປູກກ້ວຍ

ໄຊຍາ
2019-05-14
ອີແມວລ໌
ຄໍາເຫັນ
Share
ພິມ
ສວນປູກກ້ວຍຂອງຈີນ ຢູ່ແຂວງຫຼວງພຣະບາງ (ຮູບຖ່າຍ ວັນທີ 28/7/2016)
ສວນປູກກ້ວຍຂອງຈີນ ຢູ່ແຂວງຫຼວງພຣະບາງ (ຮູບຖ່າຍ ວັນທີ 28/7/2016)
RFA

ກະຊວງກະສິກັມ ແລະ ປ່າໄມ້ ສັ່ງຫ້າມເດັດຂາດ ໃນການຂຍາຍພື້ນທີ່ ປູກກ້ວຍເພີ້ມທົ່ວທຸກແຂວງ ໃນລາວ ຍ້ອນຈະກະທົບຕໍ່ສິ່ງ ແວດລ້ອມ ຖ້າຜູ້ໃດຝ່າຝືນ ຖືວ່າຜິດກົດໝາຍ ຈະຖືກລົງໂທດທັນທີ, ດັ່ງຄຳເວົ້າຂອງ ທ່ານ ບຸນຂວາງ ຄຳບຸນເຮືອງ ຮອງຣັຖມົນຕຣີ ກະຊວງກະສິກັມ ແລະ ປ່າໄມ້ ຕໍ່ວິທຍຸ ເອເຊັຽເສຣີ ໃນວັນທີ 14 ພຶສພາ ວ່າ:

“ໂຕໃໝ່ບໍ່ອະນຸຍາດ ນະຄອນຫຼວງວຽງຈັນສັ່ງໂຈະແລ້ວ ບຸກເບີກກະບຸກເບີກ ກໍຫັນໄປປູກແນວອື່ນ ບໍ່ໃຫ້ປຸກເດັດຂາດເລີຍ ນະກ້ວຍຫອມ ກະບໍ່ໄດ້ນອກຈາກອັນເກົ່າ ທີ່ຄ້າງກັນຫຼາຍປີນັ້ນ ໂຕນັ້ນແຫຼະ ແມ່ນໝົດສັນຍາແລ້ວ ກໍໃຫ້ເຊົານະແຂວງໃດ ເມືອໃດບໍ່ປະຕິບັດ ຜູ້ນັ້ນກໍຜິດ ແລ້ວສິໄດ້ກວດກາ ມັນລໍ່ແຫຼມເປິະເປື້ອນຕໍ່ສິ່ງແວລ້ອມແຫຼ່ງນໍ້າຕ່າງໆ.”

ທ່ານກ່າວຕື່ມວ່າ ຕາມຣະບຽບການ ການຫ້າມຂຍາຍພື້ນທີ່ ສວນກ້ວຍເພິ່ນ ມີມາແຕ່ປີ 2017 ແຕ່ຍັງມີສວນກ້ວຍທີ່ເຫຼືອ ເປັນສວນກ້ວຍ ສັມປະທານອັນເກົ່າ ແລະ ບໍ່ໃຫ້ສັມປະທານປູກກ້ວຍເພີ່ມເດັດຂາດ.

“ຕາມຄຳສັ່ງນາຍົກ ປີ 2017 ພຸ້ນລະ ເພິ່ນບໍ່ໄດຍົກເລີກເດ້ ຄຳສັ່ງນາຍົກເດ້ ສັນຍາໝົດລະກາເຊົາ ປູກແນວໃໝ່ ທີ່ບໍ່ແມ່ນກ້ວຍຫອມ ຕລາດຕ້ອງການຫຼາຍແນວຢູ່ເດ່ ແມ່ນແຕ່ກ້ວຍນີ້ນ່າ ສົມມຸດ ໝາກສາລີ ມັນຕົ້ນ ຕລາດຕ້ອງການ ກໍໃຫ້ເປັນ ກະສິກັມສະອາດໝົດ.”

ໃນຂນະທີ່ ທາງເຈົ້າໜ້າທີ່ ກະສິກັມແລະປ່າໄມ້ ນະຄອນຫຼວງວຽງຈັນເວົ້າວ່າ ສວນກ້ວຍຈີນ ທີ່ມີນັກລົງທຶນເຂົ້າມາບຸກເບີກ 680 ເຮັກຕາ ນັ້ນໄດ້ມີການໂຈະໄວ້ກ່ອນຊົ່ວຄາວ ໂດຍເຂົ້າມາບຸກເບີກ ບໍ່ຜ່ານທາງການ ເຊີ່ງຢູ່ໃນຣະຫວ່າງການກວດກາ:

"ສັ່ງໂຈະຊົ່ວຄາວ ກະເພື່ອປົກປ້ອງຜູ້ບໍຣິໂພຄ ຫຼືວ່າ ສະພາບແວດລ້ອມຫັ້ນນ່າ ຖ້າສີດຢາຂ້າແມງໄມ້ ຢາປາບສັດຕູພືດນີ້ນ່າ ປະຊາຊົນ ຍັງກິ່ນຂິວ ເຣື່ອງມາຕການກັບຜູ້ຣະເມີດນີ້ ເພິ່ນກາເອົາເຣື່ອງ ສຶກສາອົບຮົມນີ້ແຫຼະ ເປັນຫຼັກກກໍຣະນີ ມັນຫຼາຍແຮງກໍປັບໃໝ ຫຼືວ່າ ໃຫ້ຊົດເຊີຍ ຜົລເສັຽຫາຍເນາະ."

ນະຄອນຫຼວງວຽງຈັນ ມີສວນປູກກ້ວຍ ທີ່ໄດ້ຮັບໃບອະນຸຍາດ ທັງໝົດ 533 ເຮັກຕາ ຢູ່ເມືອງ ສັງທອງ, ເມືອງ ປາກງື່ມ ແລະ ເມືອງ ນາຊາຍທອງ ຈາກ 5 ບໍຣິສັດ ທັງພາຍໃນ ແລະ ຕ່າງປະເທສ ເຊີ່ງຢູ່ເມືອງນາຊາຍທອງ ນະຄອນຫຼວງວຽງຈັນ ມີໂຄງການໃໝ່ ທີ່ຖືກ ໂຈະໄວ້ຊົ່ວຄາວ 4 ຈຸດ ຄື ບ້ານແສນດິນ 802 ເຮັກຕ້າ, ບ້ານນາທອນ ໄກ້ອ່າງນໍ້າຫຸມ 400 ເຮັກຕາ, ບ້ານອີໄລ່ເໜືອ 100 ເຮັກຕາ ບ້ານນານາດ ແລະ ແສນດິນ 100 ເຮັກຕາ.

ເຕັມຫນ້າ